Isaiah 5

Ilonggo (Ang Biblia (1982))

← Chapter 4 Jump to: Chapter 6 →

1Paambaha ako sa akon hinigugma gid sing ambahanon sang akon hinigugma nahanungud sang iya ulubasan: Ang akon hinigugma gid may ulubasan sa mapatubason gid nga bakolod.

2Ginkutkutan niya ini kag ginkuhaan ini sang mga bato, kag gintamnan ini sang pinili gid nga uvas; ginpatindugan niya sing torre sa tunga sini, kag ginkutkutan ini sing linasan sang uvas; kag nagpaabut sia nga magpatubas ini sing uvas, apang nagpatubas ini sing mga uvas nga talonon.

3Kag karon, O mga pumuluyo sang Jerusalem kag mga tawo sang Juda, maghukom, ginaampo ko sa inyo, sa tunga nakon kag sang akon ulubasan.

4Ano pa bala ayhan ang mahimo sa akon ulubasan, nga wala ko mahimo sa iya? Sang nagpaabut ako nga magpatubas ini sing mga uvas, ngaa bala nagpatubas ini sing mga uvas nga talonon?

5Kag karon isugid ko sa inyo ang himoon ko sa akon ulubasan. Kuhaan ko sia sing habong, kag ini halbon; lumpagon ko ang iya kuta, kag ini tasakon.

6Papason ko ini; indi ini pagpanapsan ukon pagsadulon, kondi tuboan sing mga sapinit kag mga talongon; sogoon ko man ang mga gal-um nga indi sila mag-ulan sa sini.

7Kay ang ulubasan sang Ginoo sang mga kasoldadosan amo ang balay sang Israel, kag ang mga tawo sang Juda iya tanum nga matahum; kag nagpaabut sia sang katarungan, apang yari karon, pagpigus; sang pagkamatarung, apang yari karon, paghibi!

8Kailo sa mga nagasugpon sing balay sa balay, nga nagatambi sing uma sa uma, tubtub nga wala na sing duug, kag magpuyo kamo nga isa lamang sa tunga sang duta.

9Sa akon mga idulungug nagasiling ang Ginoo sang mga kasoldadosan: “Sa pagkamatuud madamu nga mga balay ang magamingaw, ang dalagku kag matahum, nga wala sing pumuluyo.

10Kay ang napulo ka acre nga ulubasan magapatubas sing isa ka bat, kag ang isa ka homer nga binhi magapatubas sing isa ka efa.”

11Kailo sa mga nagabangon sing aga pa, agud nga makasonod sila sa masingkal nga ilimnon, nga nagapabilin sing gab-i na tubtub nga mapainit sila sang alak!

12Ang arpa kag ang biola, ang pandereta kag ang lantoy kag ang alak yara sa ila mga piesta; apang wala sila magsapak sang buluhaton sang Ginoo, kag wala sila magpatugsiling sang pagpanghikot sang iya mga kamut.

13Busa ang akon katawohan ginabihag tungud sa pagkakulang sing ihibalo; ang ila dungganon nga mga tawo ginabungtas, kag ang ila kadam-an nagakigas sa kauhaw.

14Busa ang Sheol nagpasangkad sang iya handum kag nagnganga sang iya baba sa wala sing takus, kag ang ila himaya kag ang ila kadam-an, ang ila kadayawan kag ang nagakalipay sa tunga nila nagapanaug sa sini.

15Ang kubus nga tawo ginapakubus, kag ang daku nga tawo ginapaubus, kag ang mga mata sang matinaastaason ginapaubus.

16Apang ang Ginoo sang mga kasoldadosan ginapakataas sa katarungan, kag ang Dios nga Balaan ginapakabalaan sa pagkamatarung.

17Niyan ang mga cordero magahalab subong nga sa ila mga halalban, ang mga manlalagaw magakaon sang nalaglag nga mga duug sang mga matambok.

18Kailo sa mga nagaguyud sang kalautan sa mga kalat sang pagkadimatuud, sang sala subong sang sa may gikos sang karo,

19nga nagasiling: “Padasiga sia, padalidalia sia sa iya buluhaton agud nga makita naton ini; papalapita ang laygay sang Balaan sang Israel, kag paabuta ini, agud nga makilala naton ini!”

20Kailo sa mga nagatawag sang malaut maayo kag sang maayo malaut, nga nagabutang sang kadudulman nga kapawa kag sang kapawa nga kadudulman, nga nagabutang sang mapait nga matam-is kag sang matam-is nga mapait!

21Kailo sa mga maalam sa ila kaugalingon nga mga mata, kag mahinalongon sa ila kaugalingon nga itololok!

22Kailo sa mga gamhanan sa pag-inum sing alak, kag sa mga tawo nga makusug sa pagsimbog sing masingkal nga ilimnon,

23nga nagapakamatarung sang malauton tungud sa hamham, kag nagakuha sang pagkamatarung sang matarung gikan sa iya!

24Busa, subong sang dila sang kalayo nga nagalamon sang ginalaban, kag subong sang hilamon nga laya nga nagausmud sa dabdab, sa amo ang ila gamut subong sang pagkadunut, kag ang ila bulak magapaibabaw subong sang yab-ok; bangud nga ginsikway nila ang kasogoan sang Ginoo sang mga kasoldadosan, kag gintamay ang polong sang Balaan sang Israel.

25Busa ang kaakig sang Ginoo nagadabdab batok sa iya katawohan, kag nauntay niya ang iya kamut batok sa ila kag ginsakit sila, kag ang kabukiran nagakurug; kag ang ila mga bangkay subong sang sagbut sa tunga sang mga dalan. Tungud sini tanan wala makuha ang iya kaakig kondi ang iya kamut nauntay pa gihapon.

26Magabayaw sia sing hayahay sa mga pungsud gikan sa malayo, kag magapanitsit sa ila kutub sa ukbung sang duta; kag yari karon, magakari sila nga may kadasig sing madali!

27Wala gid sing lapyoon, ukon makasandad sa ila, wala gid sing tuyhon ukon matolog, kag indi mahubad ang ila wagkus sa ila mga hawak, ukon mabugto ang higot sang ila mga sapin;

28ang ila mga baslay mataliwis, ang tanan nila nga pana nabingat, ang mga koko sang ila mga kabayo manginsubong sang santikan, kag ang ila mga aliling subong sang buhawi.

29Ang ila pangurub manginkaangay sang leon nga babayi, magangurub sila kaangay sang bataon nga mga leon; magangurub sila kag magadakup sang tulukbon, sila magadala sini sing malig-on, kag wala gid sing magaluwas.

30Magangurub sila batok sa ila sa sadto nga adlaw, kaangay sang huganas sang dagat. Kag kon ang isa magtolok sa duta, yari karon, kadudulman kag kalisdanan; kag ang kapawa nadulman sa iya mga gal-um.

← Chapter 4 Jump to: Chapter 6 →