Isaiah 19

Ilonggo (Ang Biblia (1982))

← Chapter 18 Jump to: Chapter 20 →

1Ang lulan sang Egipto. Yari karon, ang Ginoo nagasakay sa madasig nga panganud kag nagaabut sa Egipto; kag ang mga diosdios sang Egipto magakurug sa iya atubangan, kag ang tagiposoon sang mga Egiptohanon matunaw sa tunga sini.

2Kag painiton ko ang mga Egiptohanon batok sa mga Egiptohanon, kag magainaway sila, ang tagsatagsa batok sa iya utud kag ang tagsatagsa batok sa iya isigkatawo, ang banwa batok sa banwa, ang ginharian batok sa ginharian;

3kag ang espiritu sang Egipto mapaslawan sa tunga sini, kag laglagon ko ang laygay nila; kag magadangup sila sa mga diosdios kag sa mga manugtiwtiw, kag sa mga manugpagowa sang mga espiritu kag sa mga salamangkero;

4kag itugyan ko ang mga Egiptohanon sa kamut sang ginoong mapintas; kag ang hari nga mabangis magahari sa ila, nagasiling ang Ginoo, ang Ginoo sang mga kasoldadosan.

5Kag ang mga tubig mahubas sa Nilo, kag ang suba magahubas kag magamala;

6kag ang mga suba magalang-og, ang mga ililigan sang Egipto magabuhin kag magamala, ang mga tabon-ak kag ang mga bagaas malaya.

7Ang mga latagon sa ubay sang Nilo, sa pangpang sang Nilo, kag ang tanan nga nasab-ugan nga mga uma sang Nilo magakigas, magakapanas, kag mawala.

8Ang mga mangingisda magapanalabiton, ang tanan nga nagapamunit sa Nilo magalalaw; kag ang mga nagaladlad sing mga sapyaw sa tubig magakag-as sila.

9Labut pa sila nga nagapangabudlay sa lino nga nahusay malibogan, kag ang mga nagahabol sing maputi nga panapton.

10Ang mga haligi sang Egipto dugmokon, ang tanan nga nagapangabudlay tungud sa sohol magakalisud sa kalag.

11Ang mga principe sang Soan buangbuang sing bug-os; ang laygay sang mga manuglaygay ni Faraon nanginsinapat. Paano bala nga nagasiling kamo kay Faraon, “Anak ako sang maalam, ang anak sang mga hari nga dumaan”?

12Diin bala niyan ang imo maalam nga mga tawo? Pasugira sila sa imo kag pakilalaha sila sang gintuyo sang Ginoo sang mga kasoldadosan nahanungud sa Egipto.

13Ang mga principe sang Soan nanginbuangbuang, ang mga principe sang Memphis nalimbongan; ginpatalang nila ang Egipto nga mga bato nga pamag-ang sang iya mga kabikahan.

14Ang Ginoo nagsimbog sa tunga niya sing espiritu sang pagkabalingag; kag ginpatalang nila ang Egipto sa tagsa ka buluhaton niya subong sang hobog nga tawo nga nagadulingduling sa iya suka.

15Kag wala sing bisan ano nga buluhaton sa Egipto nga mahimo sang olo ukon ikog, paklang sang palma ukon banban.

16Sa sadto nga adlaw ang mga Egiptohanon manginkaangay sa mga babayi; kag magakurug sila kag magakahadluk bangud sang pagbalabad sang kamut sang Ginoo sang mga kasoldadosan nga ginabalabad niya sa ibabaw nila.

17Kag ang duta sang Juda manginkakugmat sa Egipto; ang tagsatagsa nga masambitan sini magakahadluk bangud sang katuyoan sang Ginoo sang mga kasoldadosan nga ginatuyo niya batok sa iya.

18Sa sadto nga adlaw may lima ka banwa sa duta sang Egipto nga nagapamolong sang hambal sang Canaan kag nagasumpa sa Ginoo sang mga kasoldadosan. Ang isa tawgon nga Banwa sang Kalaglagan.

19Sa sadto nga adlaw may halaran sa Ginoo sa tunga sang duta sang Egipto, kag haligi sa Ginoo sa dulunan sini.

20Ini mangintanda kag maginsaksi sa Ginoo sang mga kasoldadosan sa duta sang Egipto; kon magatuaw sila sa Ginoo bangud sang mga manugpigus magapadala sia sa ila sing manluluwas, kag magaapin kag magaluwas sa ila.

21Kag ang Ginoo makilala sa Egipto; kag ang mga Egiptohanon magakilala sa Ginoo sa sadto nga adlaw kag magasimba sila nga may halad kag dolot, kag magasaad sing saad sa Ginoo kag magatuman sini.

22Kag ang Ginoo magapilas sang Egipto, nga nagapilas kag nagaayo, kag magabalik sila sa Ginoo, kag mapakilooyan sia nila kag ayohon sila.

23Sa sadto nga adlaw may dalan nga daku gikan sa Egipto pa Asiria, kag ang Asiriahanon magakadto sa Egipto, kag ang Egiptohanon sa Asiria, kag ang mga Egiptohanon magasimba upud sang mga Asiriahanon.

24Sa sadto nga adlaw ang Israel mangin-ikatlo upud sa Egipto kag sa Asiria, isa ka pakamaayo sa tunga sang duta,

25kay ang Ginoo sang mga kasoldadosan nagpakamaayo sa ila, nga nagasiling, “Bulahan ang Egipto nga akon katawohan, kag ang Asiria nga binuhatan sang akon mga kamut, kag ang Israel nga akon panublion.”

← Chapter 18 Jump to: Chapter 20 →