Isaiah 61

Ilonggo (Ang Biblia (1982))

← Chapter 60 Jump to: Chapter 62 →

1Ang Espiritu sang Ginoong Dios yari sa akon, bangud nga ang Ginoo naghaplas sa akon sa pagwali sang maayo nga mga balita sa mga mapainubuson; ginpadala niya ako sa pagbugkus sang boong sing tagiposoon, sa pagbantala sing kahilwayan sa mga bihag, kag sa pagbukas sang bilanggoan sa mga binilanggo;

2sa pagbantala sang tuig sang kahamuut sang Ginoo, kag sang adlaw sang pagtimalus sang Dios naton; sa paglipay sang tanan nga nagakasakit;

3sa pagtangdo sa mga nagakasakit sa Sion— sa paghatag sa ila sing purungpurung sa baylo sang mga abo, sang lana sang kalipay sa baylo sang kasakit, sang panapton sang pagdayaw sa baylo sang espiritu sang kasubu; agud nga tawgon sila nga mga kahoy sang pagkamatarung, ang tinanum sang Ginoo, agud nga himayaon sia.

4Patindugon nila ang dumaan nga mga nagub-an, tukuron nila ang nauna nga mga mamingaw; kaayohon nila ang kabanwaanan nga naguba, ang mga mamingaw sang madamu nga mga kaliwatan.

5Ang mga tagaluwas magatindug kag magapahalab sang inyo mga panong, ang mga dumuloong mangin-inyo mga manug-arado kag inyo mga manugtatap sang uvas;

6apang kamo hingalanan nga mga sacerdote sang Ginoo, ang mga tawo magatawag sa inyo nga mga alagad sang aton Dios; magakaon kamo sang manggad sang mga pungsud, kag sa ila himaya magapabugal kamo.

7Sa baylo sang inyo kahuluy-an may inyo kamo nga pilo nga bahin, sa baylo sang pagkawala sing dungug magakalipay sila sa ila bahin; busa sa ila duta magatag-iya sila sing pilo nga bahin; ang dayon nga kalipay manginsa ila.

8Kay ako nga Ginoo nagahigugma sang katarungan, nagadumut ako sang pangawat nga may kalautan; hatagan ko sila sang ila tumbas sa kamatooran, kag magahimo ako sa ila sing katipan nga dayon.

9Ang kaliwat nila kilalahon sa mga pungsud, kag ang ila anak sa katawohan; ang tanan nga makakita sa ila magakilala sa ila, nga sila amo ang kaliwat nga ginpakamaayo sang Ginoo.

10Magakalipay ako sing daku sa Ginoo, ang akon kalag magamalipayon sa akon Dios; kay ginpanaptan niya ako sang mga panapton sang kaluwasan, ginputus niya ako sang kunup sang pagkamatarung, subong sang nobyo nga nagapamuni sang iya kaugalingon sing purungpurung, kag subong sang nobya nga nagapamuni sang iya kaugalingon sang iya mga huluyason.

11Kay subong nga ang duta nagapatubo sang iya salingsing, kag subong nga ang katamnan nagapatubo sang mga butang nga ginatanum sa iya, sa amo ang Ginoong Dios magapatubo sang pagkamatarung kag pagdayaw sa atubangan sang tanan nga pungsud.

← Chapter 60 Jump to: Chapter 62 →