Isaiah 11

Ilonggo (Ang Biblia (1982))

← Chapter 10 Jump to: Chapter 12 →

1May magagowa nga salingsing gikan sa tuud ni Jesse, kag isa ka sanga gikan sa iya mga gamut magapamunga.

2Kag magadolog sa iya ang Espiritu sang Ginoo, ang espiritu sang kaalam kag paghangup, ang espiritu sang laygay kag kusug, ang espiritu sang ihibalo kag sang kahadluk sa Ginoo.

3Kag magakalipay sia sa kahadluk sa Ginoo. Indi sia maghukom sono sa panolok sang iya mga mata, ukon maghusay sono sa pagpamati sang iya mga idulungug;

4kondi magahukom sia nga may pagkamatarung sang mga imol, kag magahusay nga may pag-alangay sa mga mahagup sang duta; kag sakiton niya ang duta sang bilogon sang iya baba, kag patyon niya ang malauton sang gininhawa sang iya mga bibig.

5Ang pagkamatarung manginwagkus sang iya hawak, kag ang katutum manginwagkus sang iya mga balikawang.

6Ang lobo magapuyo kaupud sang cordero, kag ang leopardo magaluko kaupud sang kanding nga tinday, kag ang tinday nga baka kag ang leon nga totoy kag ang pinatambok magatingub, kag ang bata magatuytuy sa ila.

7Ang baka kag ang oso magahalab; ang ila mga tinday magaluko sing tingub; kag ang leon magakaon sing dagami kaangay sang baka.

8Ang bata nga nagasoso magahampang sa ibabaw sang boho sang dalitan nga man-ug, kag ang nalutas nga bata magakoot sang iya kamut sa palanagoan sang man-ug nga dalitan.

9Indi sila maghalit ukon maglaglag sa bug-os ko nga bukid nga balaan; kay ang duta matugub sang pagkilala sa Ginoo subong nga ang mga tubig nagatabon sang dagat.

10Sa sadto nga adlaw ang gamut ni Jesse magatindug subong nga hayahay sang mga katawohan; sa iya magapangita ang mga pungsud, kag ang iya palahuwayan manginmahimayaon.

11Sa sadto nga adlaw ang Ginoo magabutang liwat sang iya kamut sa ikaduha sa pagbawi sang salin sang iya katawohan nga mabilin, gikan sa Asiria, sa Egipto, sa Patros, sa Cus, sa Elam, sa Sinar, sa Hamat, kag sa kapuloan sang dagat.

12Magapatindug sia sing hayahay tungud sa mga pungsud, kag magatipon sang mga sinikway gikan sa Israel, kag magatipon sing tingub sang mga nag-aplaag sang Juda gikan sa apat ka pamusud sang duta.

13Ang kahisa man sang Efraim nadula, kag ang mga nagapainit sang Juda, papason; ang Efraim indi magkahisa sa Juda, kag ang Juda indi maggamo sang Efraim.

14Apang magahugpa sila sa abaga sang mga Filistinhon sa katundan, atihon nila sing tingub ang mga anak sang sidlangan. Untayon nila ang ila kamut sa Edom kag Moab, kag ang mga anak ni Amon magatuman sa ila.

15Kag ang Ginoo magalaglag sing bug-os sang dila sang dagat sang Egipto; kag upud sang iya makapalaso nga hangin nagabalabad sia sang iya kamut sa ibabaw sang Suba, kag magabahinbahin sini sa pito ka iligan kag magapatabok sang mga tawo nga may mga sapin nga mamala.

16Kag gikan sa Asiria may daku nga dalan nga sa mga salin sang iya katawohan nga mabilin, kaangay nga may dira sa Israel sang adlaw nga nagtaklad sia gikan sa duta sang Egipto.

← Chapter 10 Jump to: Chapter 12 →