Acts 1

Ilokano (Ti Biblia (1973))

Jump to: Chapter 2 →

1Ti umuna a suratco, O Teofilo, sinaritac dagiti isu-amin a banag a rinugian nga inaramid ken insursuro ni Jesus.

2Agingga idi aldaw a pannacaipangatona idinto a nabilinnan babaen ti Espiritu Santo dagidi apostol a pinilina:

3Cadacuada nagparang met a sibibiag idi calpasan ti panagsagabana, gapu cadagiti adu a pamanecnec, ket nagparparang cadacuada bayat ti uppat a pulo nga aldaw ket kinasasaona ida cadagiti banag a maipapan iti pagarian ti Dios:

4Ket idi a nakisango cadacuada, binilinna ida a dida pumanaw sadi Jerusalem, no di ket urayenda pay ti cari ti Ama, a cunana, nangngegyo caniac,

5A ni Juan pudno a nangbautizar iti danum, ngem dacayo mabautizarancayto iti Espiritu Santo iti saan nga adu nga aldaw manipud ita.

6Idi ngarud nga addada a naurnong, inintuudda kencuana a cuncunada: Apo, itan ti panangbangonmo manen ti pagarian iti Israel?

7Ket kinunana cadacuada: Saan a maibatang cadacayo ti panangammo cadagiti aldaw wenno cadagiti tiempo nga intalimeng ti Ama iti pannacabalinna a bucbucod.

8Ngem umawatcayto ti pannacabalin, inton umay cadacayo ti Espiritu Santo; ket dacayto ti sacsic sadi Jerusalem, ken iti isu-amin a Judea, ken Samaria, ken agingga iti ungto ti daga.

9Ket idi a nasaona dagitoy a banag, naipangato a kitkitaenda, ket isu inawat ti maysa nga ulep ket dida makitan.

10Ket idi a kitkitaenda ti langit bayat ti ingangatona adtoy dagiti dua a lallaki a nagtacder iti dinnada a nagcawes ti puraw;

11Isuda a nagcuna met: Lallaki a taga Galilea, apayapay agtatacdercayo a cumitkita iti langit? daytoy Jesus a naipangato sadi langit nanipud cadacayo, casta met umayto a cas ti pannacakitayo nga ipapanna sadi langit.

12Idin nagsublida sadi Jerusalem manipud iti bantay a managan ti Caolivaan, nga asideg iti Jerusalem, a cas ti caadayo ti pagnaen iti maysa nga aldaw a panaginana.

13Ket idi nacasrecda, immulida iti salas, isu a nagianan da Pedro ken Juan, ken Santiago, ken Andres, ni Felipe ken Tomas, ni Bartolome ken Mateo, ni Santiago nga anac ni Alfeo, ken ni Simon a Naregta ken ni Judas a cabsat ni Jacobo.

14Amin dagitoy nagmaymaysada a nagtuloy iti panagcarcararag agraman cadagiti babbai, ken ni Maria, nga ina ni Jesus, ken cadagiti cacabsatna a lallaki.

15Ket cadagidi nga aldaw, timmacder ni Pedro iti nagtengngaan dagiti cacabsat (agsangagasut ket duapulo dagidi tao a naurnong) ket kinunana:

16Lallaki a cacabsat, maipaay a matungpal ti Surat nga impadto ti Espiritu Santo iti ngiwat ni David, a maipapan ken Judas, isu a nangidalan cadagiti nangtiliw ken Jesus.

17Ta isu naibilang cadatayo ket adda pannacabagina idi itoy a kinaministro.

18(Ta daytoy a tao nacaala iti maysa a talon iti bayad ti kinadakesna, ket idi a natnag nga immuna ti olona, bimtac a naguddua ket naiwara dagiti amin a bagisna.

19Ket naammoan daytoy dagiti amin nga agnaed idiay Jerusalem; iti casta a daydiay a talon napanaganan iti pagsasaoda ti Aceldama, a cayatna a saoen ti daga ti dara.)

20Ta adda a naisurat iti libro dagiti Salmos: Maaramid coma a taltalipungawen ti pagiananna ket awan ti agnaed kencuana; ken: Alaen coma ti sabali ti saadna.

21Maiparbeng ngarud a cadagiti tattao a nakicadcadua cadatayo iti amin nga aldaw a ni Apo Jesus nagudong ken immaway a nakicuyog cadatayo,

22A manipud idi pammautizar ni Juan agingga iti aldaw a pannacaipangatona nanipud cadatayo, maysa cadagitoy agbalin a sacsi a mainayon cadatayo, ti panagungarna.

23Ket pinatacderda ti dua: ni Jose a managan Barsabas, a napanaganan ti Nalinteg, ken ni Matias.

24Ket nagcararagda, ket kinunada: Apo, Sica nga ammom dagiti puspuso dagiti amin a tao iparangmo no asino ti pinilim cadagitoy dua,

25Nga umawat ti akem daytoy a kinaministro, ken kinaapostol, isu a nacasalungasingan ni Judas, tapno mapan iti pacaicarianna.

26Ket pinaggiginnasatda ida, ket napagasatan ni Matias; ket naibilang cadagiti sangapulo ket maysa nga apostol.

Jump to: Chapter 2 →