Acts 16

Ilokano (Ti Biblia (1973))

← Chapter 15 Jump to: Chapter 17 →

1Ket immay idiay Derbe ken Listra: ket adtoy, adda idiay ti maysa nga adalan a managan Timoteo, anac ti maysa a babai a Judia a namati, ngem taga Grecia ti amana.

2Isu naimbag ti damagna cadagiti cacabsat idiay Listra ken Iconio;

3Daytoy kinayat ni Pablo a sumurot kencuana; ket idi nga innalana, kinugitna gapu cadagidi Judio nga adda idi cadagidiay a disso; ta ammoda amin a ni amana taga Grecia.

4Ket idi aglabasda cadagiti Il-ili imbagada dagiti alagaden nga dagidi apostol ken dagidi lallacay nga adda idiay Jerusalem, tapno salimetmetanda.

5Iti casta, dagiti Iglesia napabilegda iti pammati, ket ti bilangda immadu nga inaldaw.

6Ket limmabasda iti daga ti Frigia ken Galacia, ket ti Espiritu Santo pinaritanna ida nga icascasabada ti sao idiay Asia.

7Ket idi a dimtengda iti sangoanan ti Misia; ginayagayda ti napan idiay Bitinia; ket ti Espiritu ni Jesus saanna ida a pinalubusan;

8Ket idi a linabasanda ti Misia, bimmabada a napan idiay Troas.

9Ket iti rabii nagparang ken Pablo ti maysa a parparmata: Maysa a lalaki a taga Macedonia, nagtacder a nagdawat kencuana ket kinunana: Umayca idiay Macedonia, ket tulungannacami.

10Ket idi a nakitana daydi parparmata, dagus nga inagawaanmi ti napan idiay Macedonia, nga mapneccami a ti Dios inayabannacami, a mangicasaba ti evangelio cadacuada.

11Idi ngarud aglayagcami manipud idiay Troas, nagtartaruscami sadi Samotracta, ket iti sumuno nga aldaw idiay Neapolis;

12Ket nanipud idiay napancam idiay Filipos, isu nga umuna nga Ili iti daydiay a beddeng ti Macedonia, maysa a daga nga iturayan ti Roma. Ket naggiancam iti daytoy nga Ili iti sumagmamano nga aldaw.

13Ket iti aldaw a panaginana rimmuarcam iti ruar ti ruangan iti igid ti maysa a carayan, isu nga impapanmi nga adda disso a pagcararagan, ket timmugawcami, ket kinasaomi dagidi babbai nga immay.

14Ket dinengngegnacami ti maysa a babai a managan Lidia, managlaco ti pagananay a lienzo taga Ili ti Tiatra, maysa a babai a managbuteng iti Dios; a ti pusona linuctan ti Apo, tapno imatanganna dagiti sasaw-en ni Pablo.

15Ket idi a nabautizaran agraman dagiti cabbalayna, nagdawat cadacami a cuncunana: No impatoyo a mammatiac iti Apo, sumrecay iti balayco ket agdaguscayo: ket impapilitna cadacami.

16Ket naaramid nga idi mapmapancami iti disso a pagcararagan sinabatnacami ti maysa a balasang nga adda espirituna a mammadles, nga adu ti it-itedna cadagiti appona a masapulanna iti panagpadpadlesna.

17Daytoy, idi a simmurot iti licudan ni Pablo ken cadacami, nagpuccaw a cuncunana. Dagitoy a tao adipen ida ti Dios a cangatoan, isuda a mangipacaammo cadacayo ti dalan ti pannacaisalacan.

18Ket daytoy inaramidna iti adu nga aldaw, ngem naglucsaw ni Pablo ket idi a sinangona, kinunana idi espiritu: Ibilinco kenca iti nagan ni Jesu-Cristo, rumuarca kencuana. Ket rimmuar idi met la nga horas.

19Ket idi nakita dagiti appona a rimmuaren daydi inanama ti pagsapulonda, tiniliwda da Pablo ken Silas, ket ginuyodguyodda ida iti plaza nga impan cadagiti agturay.

20Ket idinto a naiparangda ida cadagiti mangocom, kinunada: Dagitoy a tattao idinto a Judioda riribukenda ti Ilitayo.

21Ket isursuroda dagiti ugugali a di maipaay cadacami nga awaten ken aramiden, ta taga Romacami.

22Ket dagiti adu a tao nagmaymaysada a simmupring cadacuada: ket dagidi mangocom pinigisda dagiti pagananayda, ket pinasaplitda ida.

23Ket idi nasaplitdan ida iti adu, impupocda ida iti pagbaludan, ket binilinda ti agbanbantay iti pagbaludan nga aywananna unay ida:

24Isu nga idi a naawatna daytoy a bilin, inserrecna ida iti pagbaludan a caunegan; ket incabilna dagiti sacsacada iti tul-ong.

25Ngem iti tengnga ti rabii, idi agcarcararag da Pablo ken Silas, nagcancantada ti himhimno a maipaay iti Dios: ket dagidi adda a balud, nangngegda ida;

26Ket pagamoanen immay ti maysa a dackel a gingined, a dagiti cimiento ti pagbaludan nagpigergerda; ket naigiddato a naglucat dagiti isu-amin a ruangan, ket nawarwar dagidi galgalutda amin.

27Ket idi a nacariing ti agbanbantay iti pagbaludan, ken idi makitana a silulucat dagiti ruangan ti pagbaludan, inasotna ti campilanna ket nganngani papatayenna ti bagina, ta ipappapanna a nagtalaw dagidi balud.

28Ngem ni Pablo nagickis iti napigsa a timec a cuncunana: Dica ranggasan ta bagim; ta addacam amin ditoy.

29Ket isu idi a dimmawat ti silsilaw, timmaray iti uneg, ket agpigpigerger a nagrucbab cadagiti sacsaca da Pablo ken Silas,

30Ket innalana ida iti ruar, ket kinunana cadacuada: Appo, ania ti rebbengco nga aramiden tapno maisalacanac?

31Ket kinunada: Mamatica ken Apo Jesu-Cristo, ket maisalacancanto, sika ken ti balaymo.

32Ket impalawagda kencuana ti sao ti Apo, ken cadagidi amin nga adda iti balayna.

33Ket idi nga innalana ida iti daydi met la nga horas ti rabii, binuggoanna dagidi saplitda; ket dagus a nabautizaran, isu ken amin dagidi cabbalayna.

34Ket impanna ida iti balayna, ket insangoanna ida ti canen; ket nagayayat a namati iti Dios agraman ti amin a balayna.

35Ket idi bimmigaten, dagidi manangocom imbaonda dagiti alguacil a nagcuna; Palubusanyo dagidi tattao.

36Ket daydi agaywan ti pagbaludan impacaammona dagitoy a sao ken Pablo a kinunana: Dagiti agturay nagbaonda tapno maluc-atancayo: ita ngarud, rumuarcayo ket incayo a sitatalna.

37Ngem kinuna cadacuada ni Pablo. Sinaplitdacami iti saclang ti amin a tao, nga awan pannacasalaysaymi, idinto nga umilicami ti Roma, ket impupocdacami iti pagbaludan: ket ita paruarendacami iti nalimed? Pudno a saan la ketdi, no di ket isuda ti umay ken mangiruar cadacami.

38Ket dagidi policia imbagada cadagidi agturay dagitoy a sao: ket nagbuteng da, idi nangngegda nga umilida ti Roma;

39Ket immayda ket nagpacpacaasida cadacuada: ket idi nga inruarda ida, dinawatda cadacuada nga umadayuda iti Ili.

40Pimmanawda ngarud iti pagbaludan ket simrecda iti balay ni Lidia, ket idi a nakitada dagiti cacabsat liniwliwada ida, ket pimmanawdan.

← Chapter 15 Jump to: Chapter 17 →