Acts 11

Ilokano (Ti Biblia (1973))

← Chapter 10 Jump to: Chapter 12 →

1Ket nangngeg dagidi apostol, ken dagidi cacabsat nga adda idiay Judea, a dagiti Gentil inawatda met ti sao ti Dios.

2Ket idi simmang-at ni Pedro sadi Jerusalem nakisubangda kencuana dagidi nacugit.

3A cuncunada: Simrecca cadagiti tao a saan a nacugit, ket nakipanganca cadacuada,

4Ngem nangrugi ni Pedro, ket impalawagna cadacuada iti naornos, a cuncunana:

5Addaac idi nga agcarcararag idiay Ili a Joppe, ket nakitac iti pannacaimayeng ti isip ti maysa a parparmata: maysa a bungon a bumabbaba, a cas la maysa a dackel a lupot, a naibaba cadagiti uppat a pingir nanipud langit ket immay agingga caniac:

6Isu nga idi minatmatac, nailasinco ket nacakitaac cadagiti nagsaca ti uppat iti daga, ken an-animal nga atap, ken agcarcarayam, ken tumatayab ti tangatang.

7Ket nangngegco met ti maysa a timec a nagcuna caniac: Tumacderca, Pedro, pumartica ket agsidaca.

8Ngem kinunac: Apo, saan; ta uray caano awan pay ti simrec itoy ngiwatco a saan a napili wenno di nadalus.

9Ngem maysa a timec simmungbat caniac nanipud langit iti maicadua: Ti dinalusan ti Dios, dica naganen ti saan a napili.

10Ket daytoy namitlo a naaramid ket naunosda amin manen sadi langit.

11Ket adtoy, naigiddato nga iti sangoanan ti balay nga yanmi idi immay nagtacder dagiti tal-lo a tao a naibaon caniac nanipud Cesarea.

12Ket ti Espiritu kinunana caniac a makicuyogac cadacuada a diac agduadua. Ket immayda met a nanguyog caniac dagitoy innem a cacabsat, ket simreccami iti balay di lalaki:

13Ket isu sinaritana cadacami no casano ti pannacakitana iti angel a nagtacder idiay balayna, ket kinunana kencuana; Mangibaonca idiay Joppe ket paayabam ni Simon a napanaganan ti Pedro;

14Isu saoennanto kenca dagiti sao, isuda a pacaisalacanamto, sica ken ti amin a balaymo.

15Ket idi a rinugiac ti nagsao bimmaba ti Espiritu Santo cadacuada a cas met cadatayo idi damo.

16Ket nalagipco daydi sao ti Apo, cas kinunana: Kinapudnona a ni Juan nangbautizar iti danum; ngem dacayo mabautizarancayto iti Espiritu Santo.

17No ngarud ti Dios intedna cadacuada ti isu met laeng a parabur a cas met cadatayo a mamati ken Apo Jesu-Cristo, asinoac idi a macabalin coma a mangpawil iti Dios?

18Ket idi nangngegda dagitoy a banag, nagulimecda ket dinaydayawda ti Dios, a cuncunada: No casta, inted met ti Dios cadagiti Gentil ti panagbabawi a pacabiagan.

19Dagiti ngarud naiwaraswaras gapu ti pannacaidadanes a napataud gapu ken Esteban, namagpagnada agingga idiay Fenicia, Chipre, ken Antioquia, ket saanda nga insasao ti Sao iti uray siasino no di laeng cadagiti Judio.

20Ket adda dadduma cadacuada a lallaki a taga Chipre ken Cirene, nga idi nacasrecda idiay Antioquia, insaoda met cadagiti Griego nga incascasabada ni Apo Jesus.

21Ket ti tulong ti Apo adda cadacuada: ket dackel a bilang namatida ken nagsublida iti Apo.

22Ket dagitoy a damdamag naammoan ti Iglesia idiay Jerusalem: ket imbaonda ni Bernabe idiay Antioquia:

23Isu, nga idi nacagteng ken nakitana ti parabur ti Dios, nagrag-o, ket binagbagaanna ida amin, nga agtalinaedda coma a sitatalged ti pusoda iti Apo,

24Ta isu maysa a lalaki a naimbag ken napno iti Espiritu Santo ken ti pammati; ket adu a tao ti nainayon iti Apo.

25Ket napan ni Bernabe idiay Tarso a nagsapul ken Saulo:

26Ket idi a nasaracanna, impanna idiay Antioquia. Ket naaramid a nakitiponda iti Iglesia iti bayat ti maysa a tawen ket sinursuroanda ti adu a tao; ket idiay Antioquia ti nangrugian ti pannacanagan dagiti adalan, Cristiano.

27Ket cadagidi nga aldaw dagiti mammadto simmalogda nanipud Jerusalem ingana idiay Antioquia.

28Ket timmacder ti maysa cadacuada, a managan Agabo ket impacaammona gapu iti Espiritu, nga addanto maysa a dackel a bisin iti amin a lubong: isu a naaramid cadagidi aldaw ni Claudio.

29Ket dagidi adalan nagnunumoanda ti mangipaw-it ti tulong cadagidi cacabsat nga agnaed idi sadi Judea; cas ti cabaelan ti tunggal maysa.

30Isu met ti inaramidda, nagipawpaw-itda cadagidi panglacayen iti ima da Bernabe ken Saulo.

← Chapter 10 Jump to: Chapter 12 →