Acts 6

Ilokano (Ti Biblia (1973))

← Chapter 5 Jump to: Chapter 7 →

1Ket cadagidi nga aldaw, idi nga umadu dagidi agsursuro, dagidi Judio a Griego nagtanabutobda a maicaniwas cadagidi Hebreo, ta dagidi baloda a babbai saanda a maicancano iti panagbibingay nga inaldaw.

2Ket dagidi sangapulo ket dua inurnongda ti gimong dagidi pasursuroan, ket kinunada: Saan a maiparbeng a baybayanmi ta panangisuro iti sao ti Dios, ket agservicami cadagiti lamisaan.

3Sumapulcayo ngarud cacabsat cadacayo ti pito a lallaki a naimbag ti damagda, napnoda ti Espiritu ken sirib, nga isuda ti isaadtayo itoy nga aramid.

4Ngem sangoenminto a cancanayon ti panagcararag ken ti panangicascasaba iti sao.

5Ket daytoy a balacad inannugutanda amin; ket tinudinganda ni Esteban, lalaki a napno ti pammati ken ti Espiritu Santo, da Felipe, Procoro, Nicanor, Timon, Parmenas, ken ni Nicolas, napasurot a taga Antioquia;

6Isuda nga imparangda iti sangoanan dagiti apostol, ket idi a nacapagcararagda, impatayda cadacuada dagiti imimada.

7Ket rimmangrang-ay ti sao ti Dios ket ti bilang dagiti agsursuro umadu unay sadi Jerusalem; ket adu unay dagiti papadi simmurotda iti pammati.

8Ket ni Esteban, a napno iti parabur ken pannacabalin, nagaramid cadagiti nacascasdaaw ken dadackel a datdatlag cadagidi umili.

9Ket timmacder dagiti dadduma cadagiti camcameng iti managan sinagoga dagiti Libertino, ken dagiti taga Cirine ken Alejandria, ken dagiti taga Cilicia ken Asia a nakisuppiatda ken Esteban.

10Ngem dida nabaelan idi ti sirib ken ti Espiritu a pakisaona.

11Idin nangsucsucda cadagiti tattao a nagcuna: (Isu nangngegmi a nagsao cadagiti tabbaaw a maicaniwas ken Moises ken iti Dios.)

12Ket riniribocda dagiti umili ken dagiti lallacay ken dagiti escriba; ket tiniliwda, ginuyodguyodda ket impanda iti pangocoman,

13Ket nangiparangda cadagiti sacsi a natiri a nagcuna: (Daytoy a tao saan nga umingga nga agsasao cadagiti sao a maisalungasing itoy nasantoan a disso ken iti linteg:

14Ta isu nangngegmi a kinunana, a daytoy Jesus a taga Nazaret rebbaennanto daytoy a disso ket baliwannanto dagiti bilbilin nga impatawid cadatayo ni Moises.

15Ket isu-amin dagidi adda nga agtutugaw iti pangocoman, idi nga isu minatmatanda, nakitada daydi rupana a cas la rupa ti maysa nga angel.

← Chapter 5 Jump to: Chapter 7 →