Acts 15

Ilokano (Ti Biblia (1973))

← Chapter 14 Jump to: Chapter 16 →

1Ket adda tattao a naggapu idiay Judea ket insuroda dagiti cacabsat a kinunada; No dicay pacugit a cas iti pagalagadan ni Moises, saanyo a mabalin ti maisalacan.

2Iti casta, idi a napataud ti suppiat ken ringgor a napinget cada Pablo ken Bernabe a sumupring cadacuada, nagnonomoanda a sumang-at sadi Jerusalem, da Pablo ken Bernabe ken dagiti dadduma cadacuada, tapno iyumanda daytoy a supiat cadagiti apostol ken cadagiti lallacay.

3Isuda ngarud, idi nga napalubosan ida ti Iglesia, limmabasda idiay Fenicia ken Samaria, a sinarsaritada ti panagbalbaliw dagiti Gentil, ken pinarnuayda ti dackel a ragsac cadagiti amin a cacabsat.

4Ket idi dimtengda idiay Jerusalem, inawat ida ti Iglesia, ken dagiti apostol ken dagiti lallacay: ket sinaritada dagiti amin a banag nga inaramid ti Dios babaen ti pannacaaramatda.

5Ngem dagiti dadduma a sumurot cadagiti Fariseo a namati, timmacderda a nagcuna: Masapul a cugiten ida ket ibilin cadacuada a tungpalenda ti linteg ni Moises.

6Ket naguurnong dagiti apostol ken dagiti lallacay; tapno panunutenda daytoy a banag.

7Ket idi a nabangon ti dackel a suppiat, timmacder ni Pedro ket kinunana cadacuada: Lallaki a cacabsat, ammoyo a cadagiti napalabas nga aldaw, ti Dios pinilina cadacayo a dagiti Gentil denggenda iti ngiwatco ti sao ti evangelio ken tapno mamatida.

8Ket ti Dios, nga ammona dagiti puspuso, pinanecnecanna ida, nga intedna met cadacuada ti Espiritu Santo a cas cadatayo;

9Ket awan ti pacaidumdumaan nga inaramidna cadatayo ken cadacuada, ket ginuguranna dagiti puspusoda iti pammati.

10Ita ngarud, apayapay suutenyo ti Dios nga icabilyo iti teltel dagiti adalan ti sangol nga uray dagiti ammatayo, uray datayo saantayo a nabalin nga inawit?

11Ngem patientayo nga gapu iti parabur ni Apo Jesus, maisalacantayo, a cas met cadacuada.

12Idin amin dagidi adu a tao nagulimecda ket dinengngegda ni Bernabe ken Pablo, a manarsarita idi cadagidi amin a datdatlag ken pagilasinan nga inaramid ti Dios cadagiti Gentil babaen ti pannacaaramatda.

13Ket iti calpasan ti panagulimecda, ni Santiago simmungbat, a kinunana: Lallaki a cacabsat denggendac:

14Ni Simon sinaritana no casano ti panangrugi ti Dios a nangsarungcar cadagiti Gentil, tapno mangala cadacuada ti tattao a maipaay iti naganna.

15Ket mayannugot itoy dagiti sao dagiti mammadto, a cas iti naisurat,

16Iti calpasan dagitoy agsubliacto, Ket baliwacto a bangonen ti balay ni David nga adda a natuangen, ket baliwacto a bangonen dagiti paderna a nadadael, ken patacderecto:

17Tapno dagiti sabsabalipay a tattao sapulenda ti Apo, ken amin dagiti Gentil, mapanagananda iti naganco.

18Cuna ti Apo, a mangaramid cadagitoy a banag a naammoan nanipud idi ugma.

19Gapuna, iti panangipatoc ditay coma riribuken dagiti Gentil nga agsubli iti Dios.

20No di ket isurattay cadacuada nga umadayuda cadagiti daton a naanitoan cadagiti saan a pudno a diosen, ken iti pannakicamalala, ken iti animal a nalmes, ken iti dara.

21Ta dagiti sursuro ni Moises nanipud cadagidi caputotan nga immun-una adda a maicascasaba iti tunggal ili ket maibasada cadagiti sinagoga, iti amin nga aldaw a panaginana.

22Idin napanunot dagidi apostol ken dagidi lallacay agraman ti amin nga Iglesia, a naimbag no mangpilida cadagiti lallaki a caduada, ket ibaonda ida sadi Antioquia a cumuyog cada Pablo ken Bernabe: nga isuda da Judas a napanaganan ti Barsabas, ken ni Silas, lallaki a nangnangrona cadagidi agcacabsat:

23Ket insuratda daytoy; babaen ti pannacaaramatda, Dacam nga apostol ken panglacayen a cacabsat cabla-awanmi dagiti cacabsat a nagtaud cadagiti Gentil sadi Antioquia, Siria ken Cilicia:

24Agsipud ta nangngegmi a dagiti sumagmamano a tattao a naggapu cadacami pinaglagawdacayo cadagiti sao a riniribucda dagiti cararuayo; isuda a dicam imbaon;

25Napanunotmi amin a nagmaymaysa a naimbag ti pumili cadagiti lallaki ket ibaonmi ida cadacayo agraman cada ayayatenmi a Bernabe ken Pablo.

26Lallaki nga insaldada dagiti biagda gapu iti nagan ni Apotayo a Jesu-Cristo.

27Imbaonmi ngarud da Judas ken Silas, a mangipacaammonto met cadacayo gapu iti panangisaoda met laeng iti daytoy a banag.

28Ta maipagarup a naimbag iti Espiritu Santo ken cadacami ti di mangipabaclay cadacayo iti dacdackel nga awit ngem cadagitoy banag a masapul:

29Isu nga adaywanyo dagiti banag a naidaton cadagiti saan a pudno a dios, ken ti dara, ken ti animal a nalmes, ken ti pannakicamalala, ket no agaluadcayto cadagitoy a banag, naimbagto ti aramidenyo. Sapay coma ta naimbagcayo amin.

30Gapuna nga isuda, idi a naibaondan simmalogda idiay Antioquia ket idi nga inurnongda dagiti adu a tao, intedda ti surat.

31Ket idi nga nabasan, nagragsacda gapu iti panangliwliwa.

32Ket ni Judas ken ni Silas idinto a mammadtoda met, liniwliwada dagidi cacabsat iti adu a sao, ket pinasinkedanda ida.

33Ket idi napalabasdan ti sumagmamano nga aldaw, dagidi cacabsat pinalubosanda ida a sitatalna a nagsubli cadagidi nangibaon cadacuada.

34(Ngem ni Silas impagarupna a nasayaat ti panagbatina sadiay.)

35Ket da Pablo ken Bernabe nagnaedda idiay Antioquia, a nangisursuroda ken incascasabada agraman met dagiti adu a tao a sabsabali, ti sao ti Apo.

36Ket idi nalabes ti sumagmamano nga aldaw, ni Pablo kinunana ken Bernabe: Agsublitan ket sarungcaranta dagiti cacabsat iti tunggal Ili a nangicascasabaanta ti sao ti Apo, a kitaen ti casasaadda,

37Ket ni Bernabe cayatna coma nga icuyogda met cadacuada ni Juan a managan ti Marcos.

38Ngem ni Pablo pinagarupna a saan a naimbag nga icuyogda daydi simmina cadacuada nanipud idiay Pamfilia, ken saan a nakitulong cadacuada iti aramid.

39Ket napataud cadacuada ti dackel a suppiat, a nagsinada a dua; ket ni Bernabe innalana ni Marcos ket naglayag a nagturong sadi Chipre:

40Ngem ni Pablo, idi a pinilina ni Silas, nagluas nga intalec dagiti cacabsat iti parabur ti Apo.

41Ket pinagnana ti Siria ken Cilicia, a pinatalgedanna dagiti Iglesia.

← Chapter 14 Jump to: Chapter 16 →