Acts 3

Ilokano (Ti Biblia (1973))

← Chapter 2 Jump to: Chapter 4 →

1Ket da Pedro ken Juan sumangsang-atda idiay templo iti horas a maicasiam nga isu horas ti panagcararag.

2Ket inyegda ti maysa a tao, a pilay nanipud pannacayanacna isu nga icabcabilda nga inaldaw iti ruangan ti templo, a managan ti Napintas tapno dumawat ti limos cadagiti sumrec iti templo;

3Daytoy, idi nakitana da Pedro ken Juan a sumsumrecda iti templo, dinawatna nga limosanda.

4Ket ni Pedro, isu minatmatanna, cas ken ni Juan, ket kinunana: Kitaennacami.

5Ket minatmatanna ida, nga ururayenna nga umawat ti bassit cadacuada.

6Ket ni Pedro kinunana: Awan caniac ti pirac uray balitoc; ngem ti adda caniac, isu ti itdec kenca: iti nagan ni Jesu-Cristo a taga Nazaret, magnaca.

7Ket isu iniggamanna iti imana a macanawan, ket pinatacderna: ket naigiddato a timmibker dagiti sacsaca ken lansalansana.

8Ket idi a limmagto, nagtacder ket rinugianna ti nagna, ket simrec iti templo a nakicuyog cadacuada a magmagna, ken lumaglagto ken daydayawenna ti Dios.

9Ket dagiti amin nga umili nakitada a magmagna ken agdaydayaw iti Dios:

10Ket nabigbigda nga isu daydi agtugtugaw a makilimlimos iti Ruangan a Napintas ti templo: ket napnoanda ti siddaaw ken kigtot gapu iti naaramid kencuana.

11Ket idi a nakiapongol daydi pilay cada Pedro ken Juan, amin dagiti umili nagtarayda a napan a sisisiddaaw unay cadacuada iti ruangan a managan ruangan ni Salomon.

12Ket idi nakita ni Pedro daytoy, nagsao cadagidi umili: O lallaki nga Israelitas, apayapay a pagsiddaawanyo daytoy? wenno apayapay matmatandacami a cas la ket gapu iti talugading wenno ti kinasingpetmi pinapagnami daytoy?

13Ti Dios da Abraham, ken Isaac, ken Jacob, ti Dios dagidi ammatayo iniccanna ti dayag ni Adipenna a Jesus, isu nga inyawatyo ken tinallicudanyo iti sangoanan ni Pilato, idi pinanggepna nga ibbatan.

14Ngem tinal-licudanyo daydi Santo ken Nalinteg ket dinawatyo a maited cadacayo ti maysa a nacapatay.

15Ket pinapatayyo ti Principe iti biag, isu a pinagungar ti Dios cadagiti natay, isu a masacsianmi.

16Ket gapu iti pammati iti nagan ni Jesus napatibker daytoy tao a makitayo ken amammoyo: wen, ti pammati iti nagan na isu ti nangted naananay a pannacaagas daytoy a tao iti sangoananyo amin.

17Ket ita cacabsat, ammoc nga agsipud iti dicay pannacaammo inaramidyo daytoy, a cas iti inaramid met dagiti mangituray cadacayo.

18Ngem cas ti impacaammo ti Dios idi damo iti ngiwat dagiti amin a mammadto, a ti Cristona agsagabanto tinungpalna.

19Agbabawicayo ngarud, ket agsublicayo tapno mapunas dagiti basbasolyo: iti casta umayto dagiti aldaw ti bang-ar aggapu iti sangoanan ti Apo;

20Ken ibaonna coma daydi Cristo, a naituding idi damo a maipaay cadacayo nga isu ni Jesus:

21Isu a masapul a ti langit awatenna agingga cadagiti aldaw ti pannacaisubli dagiti amin a banag, nga insao ti Dios iti ngiwat dagiti sasanto a mammadtona idi ginasgasut a tawtawen.

22Ta ni Moises kinunana: Ti Apo a Diosyo ibangonannacayto manipud cadagiti cacabsatyo ti maysa a mammadto a cas caniac: isu denggenyonto cadagiti aniaman nga isaona cadacayo.

23Ket maaramidto, nga amin a cararua a dinto dumngeg iti dayta a mammadto, mapucawto cadagiti umili.

24Ket amin met dagiti mammadto manipud ken Samuel, ken dagiti simmaruno kencuana, amin a nagsao, impacaammoda met dagitoy nga aldaw.

25Dacayo dagiti annac dagiti mammadto ken ti tulag nga inaramid ti Dios cadagiti ammayo, a cuncunana ken Abraham: Ket iti caputotam mabendicionanto dagiti amin nga caputotan ditoy daga.

26Ti Dios iti calpasan ti panamagungarna ken Adipenna a Jesus imbaonna nga umuna cadacayo, tapno bendicionannacayo, iti yaadayuyo tunggal maysa cadagiti kinadakesyo.

← Chapter 2 Jump to: Chapter 4 →