Acts 13 — Ilokano (Ti Biblia (1973))

1Ket adda idi iti Iglesia sadi Antioquia, dagiti mammadto ken dagiti mannursuro: da Bernabe ken Simon a managan Niger; ken ni Lucio a taga Cirine, ken ni Manahen, (a kinatagibian ni Herodes a tetrarca), ken ni Saulo.

2Ket idi nga agdaydayaw ngarud dagitoy iti Apo ket agayayunarda, kinuna ti Espiritu Santo: Ilasinyo a maipaay caniac da Bernabe ken Saulo a maicabil iti aramid a nangayabac cadacuada.

3Iti casta idi nalpasda a nagayunar ken nagcararag, ken idi nalpasda nga impatay dagiti imimada cadacuada, pinalubosanda ida,

4Gapuna nga isuda, idinto nga imbaon ida ti Espiritu Santo, simmalogda idiay Seleucia; ket nanipud idiay naglayagda a napan idiay Chipre.

5Ket idi addada idiay Salamina, inpacaammoda ti sao ti Dios cadagidi sinagoga dagiti Judio: ket adda met cadacuada ni Juan a tumultulong cadacuada.

6Ket idi a nalasatda ti amin a puro agingga idiay Pafo, nasaracanda ti maysa a tao a managsalamangca, saan a pudno a mammadto, Judio, a managan Bar-jesus:

7Isu nga adda ken Gobernador Sergio Palo, lalaki a manakem. Daytoy inayabanna da Bernabe ken Saulo, ket tinarigagayanna a denggen ti sao ti Dios.

8Ngem ni Elimas a managsalamangca (ta castoy ti caipapanan ti naganna), sinupringna ida, nga inagawaanna nga inyadayu ti pammati daydi Gobernador.

9Ngem ni Saulo, a managan met ti Pablo, sipupunno iti Espiritu Santo, minatmatanna.

10Ket kinunana: O napno ti amin nga ulbod ken amin a kinadakes, anac ti sairo, cabusor ti amin a kinalinteg, dicanto umingga a mangilkilo cadagiti nalinteg a dalan ti Apo?

11Ket ita, adtoy, ti ima ti Apo agdisso kenca, ket agbulseccanto, a dicanto makita ti init iti sumagmamano nga aldaw. Ket naigiddato a kinul-laapan ti sipnget: ket napan a nagararicap a nagsapsapul ti mangibin kencuana.

12Idin daydi Gobernador, idi nakitana ti naaramid, namati a sisisiddaaw iti sursuro ti Apo.

13Ket nanipud idiay Pafo naglayag da Pablo ken dagidi caduana, ket dimtengda idiay Perge ti Pamfilia, ket ni Juan simmina cadacuada ket nagsubli idiay Jerusalem.

14Ket idinto a naglaslasatda nanipud Perge, dimtengda idiay Antioquia ti Pisidia, ket simrecda iti sinagoga iti aldaw a panaginana, ket nagtugawda.

15Ket iti calpasan ti pannacabasa ti linteg ken dagiti sursurat dagiti mammadto, dagidi turayen ti sinagoga nangibaonda cadacuada ti nagcuna: Lallaki a cacabsat no adda cadacayo ti sao a pammagbaga cadagiti umili, isaoyo.

16Ket ni Pablo timmacder ket idi a sininasanna ida iti imana a pamaulimec, cunana: lallaki nga Israelitas, ken dacayo nga agbuteng iti Dios, dumngegcayo:

17Ti Dios daytoy ili nga Israel pinilina dagiti ammatayo, ket intan-ocna ti ili idi nagtaengda idiay Egipto, ket iti nabileg a tackiagna inruarna ida idiay.

18Ket iti bayat ti aguppat a pulo a tawen, cas maysa a manangaywan nga ama inubbana ida idiay let-ang,

19Ket idi a rinebbecna dagiti pito a nacion idiay daga ti Canaan, biningayna cadacuada nga impatawid ti daga a nacion: iti aguppat a gasut ket lima pulo a tawen:

20Ket iti calpasan dagitoy, iniccanna ida ti oc-ocom agingga ken mammadto a Samuel.

21Ket nanipud idi dimmawatda ti ari; ket inted ti Dios cadacuada ni Saul, anac ni Kis: lalaki iti caputotan ni Benjamin iti bayat ti uppat a pulo a tawen.

22Ket idi nga iniccatna daydi, binangonna cadacuada a pannacaari ni David, nga iniccanna met ti pangpanecnec, a kinunana. Nasaracac ni David, anac ni Jesse, lalaki a sumurot iti pusoc isu a mangaramidto iti amin a pagayatac.

23Iti capuonan daytoy a tao, ti Dios cas ti carina, imbangonanna ti Israel ti maysa a Manangisalacan, nga isu ni Jesus;

24Idi incascasaba ni Juan nga impacpacauna ti pammautizar ti panagbabawi iti isu-amin nga umili ti Israel, idi saan pay a dimteng.

25Ket idi madama ni Juan a turposen ti nacaibaonanna, kinunana: Asinoac iti panangipapanyo? Saan a siac daydi: ngem adtoy, umay sumaruno caniac ti maysa, a diac maicari a mangwarwar cadagiti zapatos cadagiti sacsacana.

26Lallaki a cacabsat, annac ti caputotan ni Abraham, ken cadacayo nga agbuteng iti Dios, cadatayo ti pacaibaonan ti sao daytoy a pannacaisalacan.

27Ta dagidi agnaed idiay Jerusalem, ken dagidi agturayda, idinto a dida nailasin daytoy, ken dagiti timec dagiti mammadto a mabasa cadagiti amin nga aldaw a panaginana tinungpalda dagitoy a padto, iti panangdusada kencuana.

28Ket uray awan ti nasaracanda kencuana a gapu ti pangpapatayanda, dinawatda laeng ken Pilato nga isu mapapatay.

29Ket idi a natungpal dagiti isu-amin a banag a naisuraten a maipapan kencuana, isu pinacsuda idi cayo, ket incabilda iti tanem.

30Ngem ti Dios pinagungarna cadagiti natay:

31Ket iti adu nga aldaw isu nakita dagidi naicuyog kencuana a simmang-at nanipud Galilea agingga iti Jerusalem, nga isuda ita dagiti sacsina cadagiti umili.

32Ket ipacaammomi cadacayo ti naimbag a damag daydi cari a naaramid cadagidi ammatayo,

33Isu a tinungpal ti Dios cadagiti annactayo, a pinagungarna ni Jesus: a cas met iti naisuraten iti Salmo a maicadua: Sica ti Anacco; pinutotca itoy nga aldaw.

34Ket no maipapan iti panamagungarna kencuana cadagiti natay, tapno uray caano saanen nga agrupsa, castoy ti kinunana; Itdecto cadacayo dagiti nasantoan ken di bumurong a bendicion a naicari ken David.

35Ta cunana met iti sabali a Salmo: Dicanto ipalubos a ti Santom mapadasna ti agrupsa.

36Ta ni David, idi tiempona, calpasan ti panagservina iti pagayatan ti Dios, nacaturog ken patay, ket naitipon cadagidi ammana ket napadasna ti nagrupsa:

37Ngem daydi pinagungar ti Dios, saanna a napadasan ti nagrupsa.

38Ammoenyo, ngarud, lallaki a cacabsat, a maipoon iti nagan daytoy a tao maipacaammo cadacayo ti pannacaiccat dagiti basbasol:

39Ket dagiti isu-amin a dicay nacajustificaran gapu iti linteg ni Moises, gapu kencuana majustificaran amin a mamati.

40Agaluadcayo, ngarud di la ket ta umay cadacayo ti sinao dagiti mammadto:

41Kitaenyo, dacayo a managuyaw; ket agsiddaawcayo ket mapucawcayo; Ta aramidec ti maysa nga aramid cadagiti aldawyo. Maysa nga aramid a dicayto patien uray caanoman no adda mangsarita iti daytoy cadacayo.

42Ket idi rimmuarda, dinawatda nga iti sumuno nga aldaw a panaginana maipalawag coma cadacuada dagitoy a sao,

43Ket idi a nagsisina ti gimung, adu cadagidi Judio ken dagidi nasingpet a napasurot, simmurotda cada Pablo ken Bernabe; isuda a nakisao cadacuada ket binagbagaanda ida nga agtaengda iti parabur ti Dios.

44Ket iti sumuno nga aldaw a panaginana naurnong ti nganngani isu-amin nga umili a nagdengngeg ti sao ti Dios.

45Ngem dagidi Judio, idi nakitada dagiti adu a tattao napnoda iti agum, ket sinuppiatda ti sasaoen ni Pablo, ket nagtabbaawda.

46Ket da Pablo ken Bernabe, kinunada a sibibileg: Masapul a ti sao ti Dios maipalawag coma nga umun-una cadacayo; ngem yantangay paidenyo ken ipatoyo a dicay maicari iti biag nga agnanayon, adtoy, incami cadagiti Gentil.

47Ta casta ti imbilin cadacami ti Apo: Incabilca, Cristo, a maysa a silaw dagiti Gentil, tapno sica ti pacaisalacanan agingga iti ungto ti daga,

48Ket dagidi Gentil idi nangngegda daytoy, nagragsacda ket indaydayawda ti sao ti Dios: ket namatida amin dagidi natudingan iti biag nga agnanayon.

49Ket ti sao ti Apo nagdinamag iti isu-amin daydi a provincia.

50Ngem dagiti Judio sinulbogda dagidi babbai a nasingpet ken nanacman, ken dagidi panguloen ti Ili ket dinuroganda ida a mangidadanes cada Pablo ken Bernabe ket pinagtalawda ida cadagiti beddengda.

51Ngem pinampagda a maibusor cadacuada ti tapoc dagiti sacsacada, ket napanda idiay Iconio.

52Ket dagidi adalan napnoda idi iti rag-o ken iti Espiritu Santo.