Acts 14

Ilokano (Ti Biblia (1973))

← Chapter 13 Jump to: Chapter 15 →

1Ket napasamac idiay Iconio, a nagcucuyogda a simrec iti sinagoga dagiti Judio, ket nagsaoda iti nagbanaganna, namati dagiti adu unay a Judio ken Griego.

2Ngem dagidi Judio a di namati riniribucda ti nakem dagiti Gentil a bumusor cadagidi cacabsat.

3Nagbayagda ngarud ti adu nga aldaw, a nagsasao a sitatalged iti Apo, a nangpanecnec iti sao ti paraburna, nga impalubosna a dagiti imimada inaramidda dagiti datdatlag ken pagsidsiddaawan.

4Ngem nagcaddua dagiti tattao iti Ili; ket dagiti dadduma nakitimpuyogda cadagidi Judio, ngem dagidi sabali nakitimpuyogda cadagiti Apostol.

5Ket idi a dumuclos coma dagidi Judio ken dagidi Gentil, agraman dagidi panguloenda, a mangcabil ken mangubor cadacuada,

6Naamadda daytoy, ket napanda naglemmeng cadagiti Il-ili ti Licaonia, Listra ken Derbe, ken iti daga a caparanget:

7Ket idiay incascasabada ti evangelio.

8Ket idiay Listra agtutugaw idi ti maysa a tao a nacapuy dagiti sacsacana, pilay nanipud idi nayanac, isu nga saan a nagna uray caano.

9Daytoy nangngegna ni Pablo nga agsasao; isu nga idi a minatmatanna, ket idi makitana nga adda pammatina a maagasan,

10Kinunana a nagpuccaw: Tumacderca nga aglinteg dagiti sacsacam. Ket limmagto ket nagna.

11Ket dagidi adu a tao, idi nakitada ti inaramid ni Pablo, impigsada ti timecda a nagcuna iti pagsasao idiay Licaonia: Dagiti dios bimmabada cadatayo a cas la tattao.

12Ket ninaganda ni Bernabe ti Jupiter ket ni Pablo, Mercurio, ta daytoy isu idi ti nangnangrona a mangisasao.

13Ket daydi padi ni Jupiter, a ti templona adda idi iti sangoanan ti Ili, nangyeg cadagiti toro ken balangat iti sangoanan dagiti ruangan, ket cayatna coma ti mangidaton agraman cadagiti adu a tao.

14Ket idi mangngeg daytoy da apostol, Bernabe ken Pablo, pinigisda dagiti pagananayda ket nagpucpuccawda a simmaranget cadagiti adu a tao.

15Ket cuncunada: Lallaki, apayapay aramidenyo dagitoy? Tattaocami met a cas iti kinataoyo, ket ipacaammomi cadacayo ti naimbag a damag, tapno manipud cadagitoy palangguad a banag agsublicay coma iti Dios a sibibiag, a nagaramid iti langit ken daga, ken ti taaw ken ti isu-amin nga adda cadacuada:

16Isu a cadagiti caputotan a limmabas, impalubosna cadagiti amin a nacion, a nagnada cadagiti daldalanda.

17Ngem saanna a binaybay-an nga awan macasacsi kencuana, a nagararamid ti imbag, ken iniccannacayo cadagiti tudtudo ti langit, ken nabunga a tiempo, a pinunnona dagiti puspusoyo ti taraon ken ragsac.

18Ket uray pay cadagitoy a sao nagistay dida nabalinan a pinasardeng dagidi adu a tao iti panangigay-atda ti daton cadacuada.

19Idin dimteng dagiti Judio a taga Antioquia ken Iconio, ket idi a sinulbogda dagiti adu a tao, inuborda ni Pablo, ket ginuyudguyodda nga inruar iti Ili, nga impapanda a natay.

20Ngem idi nga isu linicmut dagidi adalan, timmacder ket simrec iti Ili; ket iti cabigatan napan agraman ken Bernabe idiay Derbe.

21Ket idi a naicascasabada ti evangelio iti daydi nga Ili ken nacaisursuroda cadagiti adu nga adalan, nagsublida idiay Listra ken Iconio ken Antioquia,

22A pinatibkerda dagiti cararua dagiti adalan, a binagbagaanda ida nga agtalinaedda iti pammati, ket kinunada a masapul a lasatentayo dagiti adu a rigrigat iti iseserrectayo iti pagarian ti Dios.

23Ket iti calpasan ti panangtudingda cadagiti panglacayen a maipaay iti tungal Iglesia, ket iti calpasan iti panagcararagda a napacuyogan cadagiti panagayunar intalecda ida iti Apo, a pinatida.

24Ket limmabasda idiay Pisidia, ket immayda sadi Pamilia.

25Ket iti calpasan ti panangipacaammoda iti sao idiay Perge, simmalogda idiay Atalia;

26Ket nanipud sadiay naglayagda a napan idiay Antioquia, isu a nacaidatonanda iti parabur ti Dios, a maipaay iti aramid a tinurposda.

27Ket idi a nacagtengda ken naurnongda ti Iglesia, sinaritada dagiti amin a banag nga inaramid ti Dios nga inaramatna ida ken no casano ti pananglucatna ti ruangan ti pammati cadagiti Gentil.

28Ket nakipagnaedda idiay iti nabayag cadagidi adalan.

← Chapter 13 Jump to: Chapter 15 →