Acts 26

Ilokano (Ti Biblia (1973))

← Chapter 25 Jump to: Chapter 27 →

1Ket kinuna ni Agripa ken Pablo: Maipalubos kenca nga isaoam ti bagim, Idin ni Pablo intayagna ti imana; ket impalawagna ti calinteganna:

2Iti maipapan cadagiti isu-amin a banag, a nangidaruman caniac dagiti Judio, ari Agripa, cunac a nagasatac agsipud ta iti sangoanam salacnibac ti bagic.

3Nangrona ta sica ammom dagiti isu-amin nga ugugali ken supsuppiat nga adda cadagiti Judio; gapuna dawatec kenca a denggenac a siaanus.

4Ti panagbiagco ngarud nanipud kinaubingco, isu a pinalabasco iti tengnga dagiti cailiac nanipud idi damo ken sadi Jerusalem, ammo amin dagiti Judio;

5Isuda amammodac nanipud idi damo, no cayatda a sacsian, a nagbiagac a Fariseo a sumursurot iti caingetan a gimong ti pammatimi.

6Ket ita, gapu iti pananginanama iti cari nga inaramid ti Dios cadagidi ammami, agtatacderac a maocom:

7Daytoy a cari, ururayen a dumteng dagiti sangapulo ket dua a tribumi nga agserservida a sireregta iti Dios iti aldaw ken rabii. Ket maipapan itoy a pananginanama. O ari! idarumdac dagiti Judio.

8Apayapay pagarupenyo a di mabalin a patien a ti Dios pagungarenna dagiti natay?

9Siac kinapudnona a napanunotco idi nga adu ti banag a rebbengco nga aramiden a maicaniwas iti nagan ni Jesus a taga Nazaret.

10Ket daytoy inaramidco idiay Jerusalem; ket impupocco cadagiti pagbaludan dagiti adu cadagiti sasanto, idi adda inawatco a pannacabalin cadagiti panguloen dagiti papadi; ket idi mapapatayda, intedco ti iyaanamongco a maicaniwas cadacuada.

11Ket naminadu nga idi madama a dusdusaec ida cadagiti isu-amin a sinagoga, pinilitco ida nga agtabbaaw ken Jesus; ket sipupungtotac unay cadacuada, indadanesco ida agingga cadagiti Ilili a gangannaet.

12Idi magmagnaac maipanggep itoy, a mapan idiay Damasco nga incuyogco ti palubos ken bilin dagiti panguloen dagiti papadi.

13Idi tengnga ti aldaw, O ari, nakitac iti dalan ti maysa a lawag ti langit, a naranraniag ngem iti init, isu a nanglicmut caniac ken cadagiti kimmuyog caniac.

14Ket idi a napasagcam amin iti daga, nangngegco ti maysa a timec a nagcuna caniac iti sao ti Hebreo: Saulo, Saulo, apayapay irurumennac? Narigat kenca ti cumugtar iti tirad.

15Ket kinunac: Asinoca, Apo? Ket ti Apo kinunana: siac ni Jesus, nga irurumenmo.

16Ngem bumangonca ket patacderem dagiti sacsacam; ta gapu itoy a panggep nagparangac kenca, tapno icabilca a ministro ken macasacsi cadagiti banag a nakitam, ken cadagiti met banag a pagparangacto kenca:

17Nga isalacancanto iti umili ken cadagiti Gentil, a pangibaonac kenca,

18Tapno lucatam dagiti matada, tapno manipud cadagiti sipnget agsublida iti lawag, ket manipud iti pannacabalin ni Satanas agsublida iti Dios; tapno awatenda ti pannacaiccat dagiti basbasol, ken pannakipagtawid cadagiti mapagsanto gapu iti pammati caniac.

19Gapuna, O ari Agripa, saanac a simmukir iti nailangitan a parparmata:

20No di ket impacaammoc nga immuna cadagiti adda idiay Damasco, ken idiay Jerusalem, ket iti isu-amin a daga ti Judea, ken cadagiti Gentil, nga agbabawida coma ket agsublida iti Dios, nga agararamidda cadagiti aramid a maitutop iti panagbabawi:

21Gapu itoy, dagiti Judio tiniliwdac idiay templo ket ginayagaydac a papatayen.

22Idi ngarud a naragpatco ti tulong ti Dios, agingga itoy nga aldaw sitatacderac a mangpanecnec cadagiti babassit ken dadackel, a diac sawen ti uray aniaman, no di laeng dagidi banag a dagidi mammadto ken ni Moises, insaoda a mapasamacto;

23A ni Cristo masapul coma nga agtuoc ket isu coma ti umuna gapu iti panagungarna cadagiti natay, a mangipacaammo ti lawag iti umili ti Israel ken castamet cadagiti Gentil.

24Ket idi agpalawag a casta ti calinteganna, ni Festo kinunana iti napigsa a timec: Mauyongca, Pablo; ti adu a panagadalmo pagmauyongennaca.

25Ngem ni Pablo cunana; Saanac a mauyong, natan-ok unay a Festo, no di ket iyebcasco dagiti sao a pudno ken nanacman.

26Ta dagitoy a banag ammo toy ari isu met a casasaoc a sitatalged. Ta siammoac nga awan cadagitoy a banag ti mailemmeng kencuana, ta daytoy saan a naaramid iti suli.

27Mamatica, ari Agripa, cadagiti mammadto? Ammoc a mamatica.

28Ket ni Agripa kinunana ken Pablo: Iti apagbassit a sao gayagayennac nga agcristiano.

29Ket kinuna ni Pablo: Ipaay coma ti Dios nga iti apagbassit wenno adu, saan laeng a sica, no diket isu amin pay met nga agdengdengngeg caniac ita, agbalincay coma met a cas caniac, malacsid dagitoy a cawcawar.

30Ket timmacder ti ari, ken ti gobernador, ken ni Bernice, ken dagiti nakicatugaw cadacuada:

31Ket idi a nacapanawdan, nagsasao ti maysa ken maysa, a cuncunada: Awan ti aniaman nga araramiden daytoy a tao a maicari iti patay wenno cadagiti balbalud.

32Ket ni Agripa kinunana ken Festo: Mabalinen coma a wayawayaan daytoy a tao no di coma nagapelar ken Cesar.

← Chapter 25 Jump to: Chapter 27 →