Acts 25

Ilokano (Ti Biblia (1973))

← Chapter 24 Jump to: Chapter 26 →

1Ni Festo ngarud, idi a simrec idiay a provincia, simmang-at idiay Jerusalem idi nalabes ti tal-lo nga aldaw, nanipud Cesarea.

2Ket dagiti panguloen dagidi papadi ken dagidi panguloen dagiti Judio imparangda ti darumda kencuana a maicaniwas ken ni Pablo; ket nagpacpacaasida kencuana.

3A dimmawatda ti tulong a macapadakes kencuana, tapno paipanna coma idiay Jerusalem, a saneben dagiti mamapatay kencuana iti dalan.

4Ngem ni Festo insungbatna a ni Pablo adda a maaywanan idiay Cesarea ket ngannganiac met agluas a mapan idiay iti madaras.

5Ngarud dagiti macabalin cadacayo, sumalogda a makigiddan caniac; ket no adda basol itoy a lalaki, idarumda.

6Ket idi a nakipagnaed cadacuada iti saan a naglabes ti walo wenno sangapulo nga aldaw, simmalog idiay Cesarea; ket iti sumuno nga aldaw nagtugaw iti pangocoman, ket imbilinna nga ipanda ni Pablo.

7Ket idi immayen linicmut dagidi Judio a simmalog nanipud Jerusalem, nga imbagada dagiti adu ken nadagsen a darum a macapadakes kencuana, a dida nabalin a pinanecnecan;

8Idi madama nga impalawag ni Pablo ti calinteganna kinunana: Uray maicaniwas iti linteg dagiti Judio, uray maicaniwas iti templo wenno maicaniwas ken Cesar, awan ti nacabasolac a pulos.

9Ngem ni Festo, agsipud ta cayatna a magamgaman ti parabur dagidi Judio, simmungbat ken Pablo a kinunana: Cayatmo ti sumang-at idiay Jerusalem, ken maocom idiay iti sangoanac cadagitoy a banag?

10Ngem ni Pablo kinunana: Sitatacderac iti sangoanan ti pangocoman ni Cesar, isu a rebbengco a pacaocoman. Awan ti dakes nga inaramidco cadagiti Judio, a cas iti pagaammom met unay.

11No ngarud no managdacdakesac ken nacaaramidac ti aniaman a maicari iti pannacapapatay, saanco a paglicudan ti matay; ngem no awan ti pudno cadagitoy a banag a pangidaruman dagitoy caniac, awan ti tao a mangyawat caniac cadacuada a pakigayyemda: umamangac ken Cesar.

12Idin ni Festo, idi nalpasna nga inyuman iti consejo dagiti mamalbalacad kencuana, simmungbat: Immamangca ken Cesar; mapancanto ken Cesar.

13Ket idi nalabes ti sumagmamano nga aldaw, ni ari Agripa ken ni Bernice dimtengda idiay Cesarea ket kinablaawanda ni Festo.

14Ket agsipud ta naggianda sadiay iti adu nga aldaw, ni Festo imbagana iti ari ti maipanggep ken Pablo, a kinunana: Maysa a tao a balud ti napanawan ni Felix;

15Iti maipapan kencuana, idi napanac idiay Jerusalem, dagiti panguloen dagiti papadi, ken dagiti panglacayen dagiti Judio nagdarumda a maicaniwas kencuana a dinawatda ti pannacadusana.

16Simmungbatac cadacuada a saan nga ugali dagiti taga Roma nga iyawat ti uray asino a pakigayyem, no di ket umuna nga ti maidarum adda a maissango, cadagiti mangidarum, ket maiccan ti wayawayana a mangsalacnib iti bagina cadagiti pacaidarumanna.

17Idi ngarud immayda a nagcucuyog ditoy, diac nagtactac, no di ket iti sumuno nga aldaw, nagtugawac iti pangocoman, ket imbilinco a yegda di tao.

18Ket idi adda a sisasango dagidi mangidarum, awan ti naiparangarangda a babac a cas cadagiti dakes a banag nga inatapco;

19Isuna laeng a ti nangidarumanda kencuana, dagiti panagsusuppiatda iti maipapan iti pammatida, ken maipapan iti maysa nga agnagan Jesus a natay, isu a pinasingkedan ni Pablo nga adda sibibiag.

20Ket siac idi nga agduaduaac iti panangsalaysay cadagiti cacastoy a ringgor, inintuudco no cayatna ti mapan idiay Jerusalem, ken maocom sadiay cadagitoy a banag.

21Ngem idi a nagapelar ni Pablo, tapno maibanag iti saclang ni Augusto, imbilinco nga aywananda nga agingga iti panagpaituludco kencuana iti biang ni Cesar.

22Ket ni Agripa kinunana ken Festo: Cayatco coma met a denggen dayta a tao. Ket kinunana: Inton bigat isu mangngegmonto.

23Gapuna nga iti cabigatan, idi nga immay da Agripa ken Bernice agraman ti adu a pammadayaw, ken simrecda idi pangocoman a kinuyog dagiti coronel ken dagiti panguloen ti ciudad, gapu iti panagbilin ni Festo naiyeg ni Pablo.

24Ket ni Festo kinunana: Ari Agripa ken dacay amin nga adda a sisasango cadacami: makitayo daytoy, isu nga indarum caniac dagiti amin a Judio idiay Jerusalem ken ditoy met, nga ipucpuccawda a di maipaay nga agbiagen.

25Ngem nasaracac nga awan ti inaramidna a maicari iti pannacapapatay, ket agsipud ta isu nagapelar ken ni Augusto, inkeddengco nga isu maibaon kencuana.

26Iti maipapan kencuana awan ti nalawag a banag a mabalinco nga isurat iti apoc, gapuna iparangco cadacayo ket nangnangrona kenca, ari Agripa, tapno iti calpasan ti panangsalaysay, adda mabalinco nga isurat.

27Ta pagarupec a saan a maiparbeng nga ibaon ti maysa a balud ket di met ibaga dagiti pacaidarumanna.

← Chapter 24 Jump to: Chapter 26 →