Acts 8

Ilokano (Ti Biblia (1973))

← Chapter 7 Jump to: Chapter 9 →

1Ket ni Saulo inanamunganna ti ipapatay ni Esteban. Ket cadagidi nga aldaw naaramid ti maysa a dackel a pannacaidadanes ti Iglesia nga adda idi sadi Jerusalem; ket naiwarawarada amin cadagiti dagdaga ti Judea ken Samaria, malacsid dagidi apostol.

2Ket dagiti lallaki a nasingpet intanemda ni Esteban ket nagdungdung-awda a maigapu kencuana.

3Ngem ni Saulo pinarparigatna ti Iglesia, ket simsimrec cadagiti amin a balay; ket nagtiltiliw cadagiti lallaki ken babbai ket inpupocna ida iti pagbaludan.

4Dagidi ngarud naiwarawara, napanda cadagiti amin a luglugar nga incascasabada ti sao ti Dios.

5Ket simmalog ni Felipe iti ili a Samaria ket impacaammona cadacuada ni Cristo.

6Ket dagiti adu a tattao nagmaymaysada a nangipangag cadagiti banag a sasaoen ni Felipe, idi nangngegda ken nakitada dagiti pagilasinan nga inaramidna.

7Ta cadagiti adu nga addaan espiritu a narugit, rimmuarda nga nagririaw ti napigsa: ket adu dagiti saan a macagunay ken pilay a naagasan.

8Ket adda idi ti dackel a ragsac iti daydi nga Ili.

9Ngem idi nagnaed idiay nga Ili ti maysa a managan Simon, a nagararamid ti salamangca ket pinagsidsiddaawna dagiti tattao ti Samaria, a cuncunana nga isu dackel a tao:

10Isu a pinatida amin idi, nanipud iti cabassitan agingga iti cadackelan, a cuncunada: Daytoy a tao isu daydi pannacabalin ti Dios, a managan Dackel.

11Ket isu patienda idi, ta gapu cadagiti salsalamangcana pinagsiddaawna ida iti adu nga aldaw.

12Ngem idi namatida ken Felipe a mangicascasaba idi ti naimbag a damag ti pagarian ti Dios ken ti nagan ni Jesu-Cristo, lallaki ken babbai nabautizaranda.

13Uray ni Simon namati met idi, ket idinto a nabautizaran, simmurot ken Felipe: ket idi makitana dagiti datdatlag ken dadackel a pannacabalin, nagmalmalanga.

14Ket dagidi apostol idiay Jerusalem, idinto a nadamagda a ti Samaria inawatna ti sao ti Dios, imbaonda cadacuada da Pedro ken Juan:

15Isuda a simmalog ket incarcararaganda ida; tapno awatenda coma ti Espiritu Santo;

16Ta agingga idi, awan pay binabaanna iti uray siasino cadacuada, no di ket nabautizaranda laeng iti nagan ni Apo Jesus.

17Idin impatayda cadacuada dagiti imimada ket inawatda ti Espiritu Santo.

18Ket agsipud ti nakita ni Simon a gapu iti panangipatay dagiti apostol cadagiti imimada, ket naited ti Espiritu Santo, ingay-atanna ida ti pirac.

19A cuncunana: Itedyo met caniac daytoy a pannacabalin, tapno uray siasino a pangipatayac cadagiti imimac, awatenna ti Espiritu Santo.

20Ngem ni Pedro kinunana kencuana: Mapucaw coma ti piracmo a maicanunong kenca, ta pinanunotmo a magun-odan ti parangcap ti Dios gapu iti pirac.

21Awan ti bagim wenno gundawaymo itoy a banag; ta ti pusom saan a nalinteg iti imatang ti Dios.

22Pagbabawiam ngarud daytoy a kinadakesmo ket cumararagca iti Apo, bareng mapacawan dayta panunot ti pusom.

23Ta makitac nga addaca iti pait ti apro ken iti cawar ti kinadakes.

24Ket idi simmungbat ni Simon, kinunana: Idawdawatandac iti Apo tapno awan coma cadagiti banag a sinaoyo ti umay caniac.

25Isuda ngarud, iti calpasan ti panangpanecnecda ken panangicascasabada iti sao ti Apo, nagsublida sadi Jerusalem, ket incascasabada ti evangelio cadagiti adu a purpuro dagiti taga Samaria.

26Ket ti maysa nga angel ti Apo kinasaona ni Felipe, a cuncunana: Tumacderca ket inca iti Abagatan, idiay dalan a pagsalugan manipud Jerusalem agingga idiay Gaza, isu a let-ang.

27Ket isu timmacder, ket napan: ket adtoy, maysa a tao a taga Etiopia, maysa nga eunuco, mannacabalin babaen ni Candace, a reina dagiti taga Etiopia, isu nga agaywan iti isu-amin a gamengna, a napan nagcararag sadi Jerusalem;

28Ket nagawid ket situtugaw iti luganna, ket basbasaenna ti libro ni mammadto nga Isaias.

29Ket ti Espiritu kinunana ken Felipe: Umasidegca ket makicuyogca itoy a lugan.

30Ket timmaray ni Felipe kencuana, ket nangngegna nga agbasbasa iti libro ni mammadto nga Isaias ket kinunana: Maawatam ti basbasaem?

31Ket kinunana kencuana: Casano ti pannacabalinco no awan ti mangisuronto caniac? Ket kiniddawna ken Felipe a lumugan ken makicatugaw kencuana.

32Ket ti paset ti surat a basbasaenna, isu daytoy: Naipan iti pagpartian a cas la carnero a cabayan; ken cas la urbon ti carnero nga agumel iti sangoanan ti mamukis kencuana, casta a dina luctan ti ngiwatna:

33Iti panagpacumbabana iniccatda ti calinteganna: asino ti mangipaduyacyacto iti caputotanna? Ta ti biagna maiccat ditoy daga.

34Ket simmungbat ti eunuco ken Felipe, ket kinunana: Dawatec kenca, asino ti pangisaoan ni mammadto iti daytoy; isu met laeng, wenno adda sabali?

35Ket ni Felipe nagsao ket idinto a rinugianna maniyud itoy a surat, incasabana kencuana ti evangelio ni Jesus.

36Ket idi magmagnada iti dalan, dimtengda iti maysa a danum; ket kinuna ti eunuco: Adtoy ti danum; ania ti macapawil caniac a mabautizaran?

37(Ket kinuna ni Felipe: No patiem iti amin a pusom, mabalinmo. Ket simmungbat ket kinunana: Patiec a ni Jesu-Cristo isu ti Anac ti Dios:)

38Ket imbilinna a pagsardengenda ti lugan: ket immulogda a dua idi danum da Felipe ken ti eunuco, ket binautizaranna.

39Ket idi simmang-atdan iti danum, ti Espiritu ti Apo inyadayona ni Felipe, ket daydi eunuco saanna a nakitan ket siraragsac a nagtuloy iti dalanna.

40Ngem ni Felipe nasaracan idiay Azoto: ket idi a lumablabas sadiay, incasabana ti evangelio cadagiti amin nga Il-ili agingga iti nacagteng idiay Cesarea.

← Chapter 7 Jump to: Chapter 9 →