Acts 12

Ilokano (Ti Biblia (1973))

← Chapter 11 Jump to: Chapter 13 →

1Ket idi met la nga tiempo, ni ari Herodes rinanggasanna dagiti dadduma cadagidi camcameng ti Iglesia.

2Ket pinatayna iti campilan ni Santiago a cabsat ni Juan.

3Ket idi a nakitana a napaayatan dagidi Judio, intuloyna a tiniliw met ni Pedro. Ket idi isu dagiti aldaw ti tinapay nga awan levadurana.

4Ket idi a natiliwna impupocna iti pagbaludan, ket inyawatna iti uppat a sagpapat a soldado nga agbantay kencuana; a cayatna nga isaclang iti umili no malpas ti Pascua.

5Ni Pedro ngarud, adda a naipupoc iti pagbaludan, ngem ti Iglesia nagcarcararag a sipapasnec iti Dios maipuon kencuana.

6Ket idi ngannganin alaen coma ni Herodes, daydi met laeng a rabii adda ni Pedro a matmaturog a sicacawar iti nagtengngaan dagiti dua a soldado, ket dagidi guardia addada iti sangoanan ti ruangan a bantayanda ti pagbaludan.

7Ket adtoy, maysa nga angel ti Apo nagtacder iti dinnana, ket maysa a silaw linawaganna ti pagbaludan: ket tinugkicna ti bacrang ni Pedro, ket riniingna a cuncuna: Tumacderca a napardas. Ket dagidi cawarna nagtinnagda cadagidi imana.

8Ket kinuna kencuana ti angel: Agbarikesca ket icabilmo dagiti pallucam. Ket casta ti inaramidna. Ket kinunana kencuana: Agcawesca ket surutennac.

9Ket isu simmurot kencuana a rimmuar ket dina impagarup a napudno daydi araramiden ti angel; no di ket impapanna a nacakita ti maysa a parparmata.

10Ket idi nalabasanda ti umuna ken maicadua a managbantay, dimtengda iti ruangan a landoc nga agturong iti ciudad, a naglucat nga is-isu cadacuada: ket idi a rimmuarda, nagnada iti maysa a dalan; ket idin daydi angel simmina kencuana.

11Ket ni Pedro, idi a nabigbigna ti casasaadna, kinunana: Ita mapnecac a pudno a ti Apo imbaonna ti angelna, ket insalacannac iti ima ni Herodes, ken iti amin nga inanamaen dagiti tattao a Judio.

12Ket idi apaman a naawatanna, napan iti balay ni Maria nga ina ni Juan, a napanaganan ti Marcos, isu a yan dagiti adu a naurnong nga agcarcararag.

13Ket iti ruangan ti paraangan immayab ni Pedro, napan a sumungbat ti maysa a balasang a managan Rode.

14Ket idi nailasinna ti timec ni Pedro, iti rag-ona dina linuctan ti ruangan, no di ket timmaray iti uneg, ket impadamagna a ni Pedro agtatacder iti sangoanan ti ruangan.

15Ket kinunada kencuana: Mauyongca. Ngem isu impanecnecna a casta ti pudno. Ket kinunada: Daytay angelna.

16Ngem ni Pedro tinuloyna ti immayab, ket idi naglucatda, isu nakitada, ket namalmalangada.

17Ngem isu idi a sininasanna ida iti imana nga agulimecda sinaritana cadacuada no casano ti panangala kencuana ti Apo iti pagbaludan, ket kinunana: Ipacaammoyo daytoy ken Santiago ken cadagiti cacabsat. Ket pimmanaw ket napan iti sabali a disso.

18Idi a bimmigat, dackel a riri ti napataud cadagidi soldado no ania ti naaramid ken Pedro.

19Ket ni Herodes idi sinapulna ket dina nasaracan, pinalutputna dagidi managbantay ket pinaipanna ida ken patay. Ket simmalog a nanipud Judea agingga iti Cesarea, ket nagnaed sadiay.

20Ket ni Herodes silulucsaw unay cadagidi taga Tiro ken cadagidi taga Sidon; ket nagtitimpuyogda a napan kencuana, ket idi a ginayyemda ni Blasto, a mapagtalcan iti balay ti ari, dinawatda ti cappia; ta dagiti Il-ilida mataraonanda cadagidi dagdaga ti ari.

21Ket iti maysa nga aldaw a natudingan, ni Herodes, nagcawes iti naarian a pagananay, ket timmugaw iti trono, ket nagbitla cadacuada.

22Ket dagiti umili indir-ida: Timec ti maysa a dios, a di ket ti maysa a tao.

23Ket dagus a ti maysa nga angel ti Apo kinabilna gapu ta dina pinadayawan ti Dios; ket inigges ket natay.

24Ngem ti sao ti Apo nagtuloy a rimmang-ay.

25Ket da Bernabe ken Saulo nagsublida nanipud Jerusalem, idi nalpasda ti nacaibaonanda, nga incuyogda ni Juan a napanaganan ti Marcos.

← Chapter 11 Jump to: Chapter 13 →