Acts 18

Ilokano (Ti Biblia (1973))

← Chapter 17 Jump to: Chapter 19 →

1Idi napalabas dagitoy a banag, isu pimmanaw idiay Atenas, ket napan idiay Corinto.

2Ket nasaracanna ti maysa a Judio a managan Aquila, nayanac idiay Ponto, casangsangpetna a naggapu idiay Italia, ken ni Priscila nga asawana ta ni Claudio imbilinna nga isu-amin dagiti Judio pumanawda idiay Roma, ket napan cadacuada;

3Ket agsipud ta agcaoficioda, nagdagus cadacuada, ket nagtrabajoda; ta ti panggedanda agararamid cadagiti tolda.

4Ket nakisupsupiat idiay sinagoga cadagiti amin nga aldaw a panaginana ket inuy-uyotanna dagidi Judio ken Griego.

5Ngem idi simmalog da Silas ken Timoteo a naggapuda sadi Macedonia, ni Pablo careggetna unay a mangascasaba nga ipanpanecnecna cadagidi Judio a ni Jesus isu ti Cristo.

6Ket idi sinalungasingda ken nagtabbaawda, idinto a pinampagna dagidi pagananayna ket kinunana cadacuada: Ti darayo agdisso coma iti uloyo; siac nadalusac; manipud ita innacto cadagiti Gentil.

7Ket pimmanaw idiay, ket simrec iti balay ti maysa a tao nga agnagan Tito Justo, a managdaydayaw iti Dios, ket ti balay daytoy adda iti dinna ti sinagoga.

8Ket ni Crispo, a panguloen ti sinagoga, namati iti Apo agraman ti amin a cabbalayna: ket adu cadagiti taga Corinto ti nagdengngeg, namatida ken nabautizaranda.

9Ket ti Apo kinunana iti rabii iti maysa a parparmata ken Pablo: Dica agbuteng, no di ket agsaoca ket dica agulimec:

10Ta siac addaac kenca ket awanto ti mangtignay a mangabil kenca, ta adu dagiti tattaoc iti daytoy a ciudad.

11Ket nagtaeng sadiay ti macatawen ken innem a bulan nga insursurona iti nagtengngaanda ti sao ti Dios.

12Ket idi agdama a Gobernador ni Galion ti Acaya, dagidi Judio nagmaymaysada a simmupiat ken Pablo ket impanda iti sangoanan ti pangocoman,

13A kinunada: Daytoy uyutanna dagiti tao nga agdayaw iti Dios a maicaniwas iti linteg.

14Ngem idi nganngani agsao ni Pablo, ni Galion kinunana cadagidi Judio; No adda coma ranggas wenno babac a nadagsen, O dacayo a Judio, cas iti adda iti linteg anusancay coma:

15Ngem no panagsusupiat laeng a maipapan cadagiti sao, ken nagnagan, ken iti lintegyo, kitaenyo met laeng a dacdacayo; diac cayat ti mangocom cadagitoy a banag.

16Ket pinagtalawna ida idiay pangocoman.

17Ket isuda amin innalada ni Sostenes, turayen ti sinagoga, ket kinabilda iti sangoanan ti pangocoman: ket saan nga incascaso ni Galion, daytoy.

18Ket ni Pablo, idi nalpas a nagtaeng pay laeng ti adu nga aldaw, nagpacada cadagidi cacabsat ket naglayag a napan idiay Siria, ket kinacuyogna da Priscila ken Aquila, iti calpasan ti panangkiskisna iti ulona idiay Cencrea, ta adda carina.

19Ket simmalogda idiay Efeso ket pinanawanna ida sadiay; ket isu simrec iti sinagoga, ket nakisuppiat cadagiti Judio.

20Ket idi a nagdawatda, nga agbati iti adadu nga aldaw, saan nga immanamong;

21No di ket nagpacada cadacuada, a kinunana: Inton maminsan agsubliacto cadacayo, no pagayatan ti Dios. Ket naglayag nanipud idiay Efeso.

22Ket idi a dimsaag idiay Cesarea, simmang-at; ket kinablaawanna ti Iglesia ket simmalog a napan idiay Antioquia.

23Ket idi a nagnaed idiay iti sumagmamano nga aldaw, pimmanaw a pinagnana a nagsasaganad ti provincia ti Galacia ken ti Frigia a pinatalgedanna dagiti amin nga adalan.

24Ket immay idiay Efeso ti maysa a Judio, a managan Apolos, nayanac sadi Alejandria, lalaki a nasursuroan ket mannacaawat cadagiti Sursurat.

25Daytoy a tao naisuro iti dalan ti Apo, ket sirarayray iti pakinakemna, insasaona ken insursurona a sililinteg dagiti banag a maipapan ken Jesus, nga ti laeng pammautizar ni Juan, ti ammona.

26Ket daytoy nangrugi a nagsao a situtured idiay sinagoga; ngem idi nangngeg da Priscila ken Aquila, isu innalada ket impalawagda kencuana a naan-anay pay ti dalan ti Dios.

27Ket idi cayatna ti umalis nga apan idiay Acaya, dagidi cacabsat pinabilegda ket nagsuratda cadagidi adalan nga isu awatenda coma; ket idi a simmangpeten idiay, adu ti naitulongna gapu iti parabur, cadagiti namatin.

28Ta inabacna a sibibileg unay iti nalatac dagidi Judio, nga impakitana gapu cadagiti Sursurat a ni Jesus isu daydi Cristo.

← Chapter 17 Jump to: Chapter 19 →