Acts 22

Ilokano (Ti Biblia (1973))

← Chapter 21 Jump to: Chapter 23 →

1Lallaki a cacabsat ken amma denggenyo ti calintegac nga ita sawec cadacayo.

2Ket idi mangngegda a casaona ida ti sao ti Hebreo, nangnangrona ti panagulimecda. Ket cuncunana:

3Siac maysaac a Judio a nayanac idiay Tarso ti Cilicia, ngem dimmackelac itoy a ciudad nasursuroan ken ni Gamaliel, cas iti inget ti linteg dagidi ammatayo a napno ti regta iti Dios, a cas cadacay amin ita nga aldaw:

4Ket indadanesco daytoy a Dalan agingga ken patay, a nangrep-reppetac ken nangiawatac cadagiti pagbaludan cadagidi lallaki ken babbai pay.

5Kas masacsiannac met ti cangatoan a padi, ken ti gimong dagiti amin a lallacay; isuda a nangawatac met ti sursurat maipaay cadagiti cacabsat ket napanac idiay Damasco, tapno yegco a sirereppet ditoy Jerusalem uray pay dagidi adda sadiay, tapno madusada.

6Ket naaramid nga, idi magmagnaac ken umasidegac idiay Damasco, iti agngalay ti aldaw, pagamoanen nanipud sadi langit linicmutnac ti maysa a dackel a raniag.

7Ket napasagac iti daga ket nangngegco ti maysa a timec a cuncunana caniac: Saulo, Saulo, apayapay idadanesnac?

8Ket simmungbatac: Asinoca, Apo? Ket kinunana caniac: Siac ni Jesus a taga Nazaret, nga idadanesmo.

9Ket dagidi adda a naicuyog caniac pudno a nakitada daydi lawag; ngem dida nangngeg ti timec daydi nakisao caniac.

10Ket kinunac; Anianto ti aramidec, Apo? Ket ti Apo kinunana caniac: Tumacderca ket inca idiay Damasco, ket idiay maibaganto kenca amin daiti naituding nga aramidem.

11Ket idi diac macakita gapu ti raniag daydi a lawag, napanac idiay Damasco a kinibin dagidi adda a naicuyog caniac.

12Ket maysa nga agnagan ti Ananias lalaki a nasingpet cas mayannurot iti linteg, naimbag ti damagna cadagiti isu-amin a Judio nga agnaed sadiay.

13Immay caniac, ket immasideg, ket kinunana caniac: Cabsat a Saulo, awatem ti pannacakita. Ket idi met la nga horas isu nakitac.

14Ket isu kinunana: Ti Dios dagiti ammatayo, tinudingannaca idi tapno maammoam ti nakemna, ken makitam daydi Nalinteg, ken mangegmo ti timec ti ngiwatna.

15Ta sicanto ti sacsina cadagiti isu-amin a tao ti nakitam ken nangngegmo.

16Ket ita, apayapay agtactacca? Tumacderca, ket pabautizaranca, ket ugasam dagiti basbasolmo, nga awagam ti naganna.

17Ket naaramid nga, idi nagsubliac ditoy Jerusalem ken idi agcarcararagac idiay templo, naimayeng ti ricnac,

18Ket Isu makitac a nagcuna caniac: Agpardasca ket darasem ti rummuar iti Jerusalem; ta didanto awaten ti pangpanecnecmo a maipapan caniac,

19Ket kinunac: Apo, isuda met laeng amomda a nangbaludac ket nangsapsaplitac iti amin a sinagoga cadagiti namati kenca:

20Ket idi maiparucpoc ti dara ni Esteban a sacsim, addaac met a sisasango, ket inanamungac, ket inaywanac idi dagiti pagananay dagidi namapatay kencuana.

21Ket kinunana caniac: Inca, ta siac ibaoncanto iti adayu cadagiti Gentil.

22Ket dimngegda kencuana agingga itoy a sao: idin indackelda ti timecda a nagcuna. Iccatem ditoy daga ti castoy a tao, ta saan a maipaay nga agbiag.

23Ket agsipud ta agic-ickisda ket imbacalda dagiti pagan-anayda ket nagipuruacda ti tapoc iti tangatang,

24Imbilin daydi coronel nga isu ipanda idi castillo, a kinunana a palutputenda a sapliten, tapno maammoan no ania ti gapuna a nagic-ickisda ti castoy a bumusor kencuana.

25Ket idi pinarautanda cadagiti taltali, ni Pablo kinunana idi capitan a sitatacder iti dinnana: Maipalubos aya cadacayo ti mangsaplit ti maysa nga umili iti Roma ket dipay naocom?

26Ket idi nangngeg daydi capitan daytoy, napan ket impacaammona idi coronel, a cuncunana: Ania ti inca aramiden? Ta daytoy a tao umili iti Roma.

27Ket immay di coronel, ket kinunana kencuana: Ibagam caniac, sica umilica iti Roma? Ket isu kinunana: Wen.

28Ket simmungbat di coronel: Ginun-udco babaen ti dackel a dagup ti pirac daytoy pannakipagilic iti Roma. Ket ni Pablo simmungbat: Ngem siac umiliac iti Roma maipoon ti pannacayanacco.

29Dagus ngarud nga immadayuda dagidi mangpalutpot a mangsaplit coma kencuana, ket uray pay di coronel nagbuteng, idi naammoanna nga umili iti Roma, ken gapu iti panangparautna kencuana.

30Ket iti sumuno nga aldaw, idi a cayatna a maammoan ti pudno a gapu ti pangidaruman dagidi Judio, isu inruarna ket pinaayabanna dagiti panguloen dagiti papadi ken ti isu-amin a consejo: ket imbabana ni Pablo, ket imparagna iti sangoananda.

← Chapter 21 Jump to: Chapter 23 →