Acts 28

Ilokano (Ti Biblia (1973))

← Chapter 27 Jump to:

1Ket idi a nacasangladcamin, naammoanmi a daydi puro managan ti Melita.

2Ket dagidi umili idiay impaayandacami ti naisingayan, a naimbag a nakem: ta idi a nagpadarangda ti apuy, ket agsipud iti tudo nga agtinnag idi ken daydi lam-ec, inawatdacam amin.

3Ket idi a nangurnong ni Pablo ti sangsanga a nagango incabilna ida idi apuy, ket gapu iti pudot rimmuar ti maysa a carasaen a kimpet idi imana.

4Ket idi makita dagidi umili daydi agay-ayam a nagbitin idi imana, kinunada iti maysa ken maysa: saan a pagduaduaan a daytoy a tao nacapapatay, isu nga idinto a nacatalaw iti baybay, ti kinajusticia dina baybay-an nga agbiag.

5Ngem isu inwagsacna idi apuy daydi uleg ket awan ti dakes a napasamac kencuana.

6Ngem isuda ur-urayenda idi nga umbalto wenno mapasag a makellaat a matay; ngem agsipud ta nagur-urayda ti nabayag ket makitada nga awan ti dakes nga umay kencuana nagbaliw ti isipda ket kinunada nga isu maysa a dios.

7Ket cadagidi arubayan daydi a disso adda dagdaga daydi panguloen ti puro, nga agnagan Publio, isu a nangawat cadacami, ket pinagdagusnacami iti tal-lo nga aldaw a siaayat.

8Ket nairana a daydi ama ni Publio adda iti pagiddaan a masakit cadagiti gorigor ken sica; ket simrec ni Pablo a kimmita kencuana, ket iti calpasan ti panagcararagna, impatayna kencuana dagiti imimana ket inagasanna.

9Ket idi naaramid daytoy, dagidi sabsabali met nga addaan nasacsakit idiay a puro, immayda ket naagasanda:

10Isuda a nangpadayaw met cadacami cadagiti adu a pammadayaw; ket idi aglayagcami, incargada idi barangay dagiti masapsapulmi.

11Ket idi nalabes ti tal-lo a bulan, naglayagcami iti maysa a barangay a taga Alejandria, a nanaganan ti “ Dioscuri,” isu nga naggian idiay a Puro bayat ti calam-ecna.

12Ket idi a simmangladcam idiay Siracusa, nagiancam idiay iti tal-lo nga aldaw.

13Manipud sadiay, nanglicawcami, ket dimtengcam idiay Regio; ket idi nalabes ti maysa nga aldaw nagangin ti abagat, ket nacagtengcami iti maicadua nga aldaw idiay Puteoli;

14Isu a nacasaracanmi cadagiti cacabsat ket dinawatda nga agbaticami cadacuada iti pito nga aldaw: ket castoy ti ipapanmi idiay Roma.

15Ket dagiti cacabsat sadiay, idi a nadamagdacami, immayda a simmabet cadacami agingga idiay plaza ni Appio, ken dagiti Tal-lo a Taberna, ket idi makita ni Pablo ida, nagyaman iti Dios, ket napabileg unay.

16Ket idi dimtengcami idiay Roma, naipalubos ken Pablo nga agwaywayas iti balay, agraman maysa a soldado nga agaywan kencuana.

17Ket naaramid nga idi napalabas ti tal-lo nga aldaw, ni Pablo inayabanna dagiti panguloen dagiti Judio; ket idi addadan a nagtitipon, kinunana cadacuada: Siac lallaki a cacabsat, idinto nga awan ti inaramidco a maisalungasing iti umili wenno cadagiti ug-ugali dagidi ammatayo, nayawatac a balud cadagiti imima dagiti taga Roma nanipud idiay Jerusalem,

18Isuda, nga idi a nasalaysaydac, cayatdac coma a wayawayaan agsipud ta awan ti gapu a madusac iti ipapatay.

19Ngem idi simmalungasing dagiti Judio, napilitac a nagapelar ken Cesar; nga awan ket ti pangidarumac iti ilic.

20Gapu itoy a banag ngarud inayabancayo tapno kitaencayo ket casaocayo: ta gapu iti inanama ti Israel addaac a nagalutan itoy a cawar.

21Ket kinunada kencuana: Saancami nga immawat ti sursurat a maipapan kenca a naggapu idiay Judea, ket awan met cadagiti cacabsat ti immay a mangidarum wenno agsao ti dakes a maipapan kenca.

22Ngem cayatmi a denggen kenca ti capanunutam: ta no maipapan iti daytoy a secta naammoanmi a masupsuppiat cadagiti isu-amin a disso.

23Ket idi a tinudinganda ti maysa nga aldaw, adu dagiti immay kencuana iti nagdagusanna; ket manipud iti bigat agingga iti rumabii, impalawagna cadacuada a pinanecnecanna ti pagarian ti Dios, ket inuy-uyutanna ida ti maipapan ken Jesus nga inaramatna ti linteg ni Moises ken dagiti mammadto.

24Ket dagiti dadduma pinatida dagidi saona; ngem dagidi sabsabali saanda a namati.

25Ket idi saanda a nagsusurot, nagawidda idi nayebcas ni Pablo ti maysa a sao: Naimbag ti panagsao ti Espiritu Santo babaen ni mammadto nga Isaias cadagidi ammatayo.

26A kinunana: Inca itoy nga ili, ket ibagam: iti lapayag macangngegcayto ket dicayto maawatan; ket idinto a kitkitaenyo, makitayonto ket dicayto mailasin:

27Ta ti puso daytoy nga ili dimmakes, ket cadagiti lapayagda nabengngeg; ket inkidemda dagiti matada; di la ket ta macakitada cadagiti matada, ken macangngegda cadagiti lapayagda, ken macaawatda cadagiti puspusoda, ken agbabawida coma manen, ket isuda coma ti agasac.

28Ammoenyo ngarud a daytoy a pangisalacan ti Dios: maipan cadagiti Gentil ket isuda dumngegdanto.

29(Ket idi nasaona daytoy, pimmanaw dagidi Judio, a nagsisinnupiatda).

30Ket ni Pablo nagtaeng bayat ti dua a taoen iti inabanganna a balay; isa a nagawawatanna cadagiti isu-amin a simmarungcar kencuana.

31Nga incascasabana ti pagarian ti Dios ket insursurona dagiti banag a maipapan ken Apo Jesu-Cristo, a situtured, nga awan ket ti nanglapped kencuana.

← Chapter 27 Jump to: