Jeremiah 16

Icelandic 2007 (Biblían (2007))

← Chapter 15 Jump to: Chapter 17 →

1Orð Drottins kom til mín:

2Þú skalt ekki taka þér eiginkonu og hvorki eignast syni né dætur á þessum stað.

3Því að svo segir Drottinn um syni og dætur sem fæðast hér og um mæðurnar sem ala þau og feðurna sem geta þau í þessu landi:

4Þau munu deyja úr banvænum sjúkdómum og verða hvorki grátin né grafin. Þau munu verða áburður fyrir jarðveginn. Þau munu falla fyrir sverði og farast úr hungri og lík þeirra verða fuglum himinsins og dýrum merkurinnar að æti.

5Svo segir Drottinn: Gakktu ekki inn í sorgarhús, taktu ekki þátt í sorgarathöfninni og sýndu enga samúð því að ég hef svipt þetta fólk friði mínum, segir Drottinn, kærleika og miskunnsemi.

6Bæði stórir og smáir munu deyja í þessu landi. Þeir verða hvorki grafnir né grátnir. Enginn mun rista á sig skinnsprettur né raka höfuð sitt þeirra vegna.

7Brauð verður ekki brotið fyrir neinn syrgjanda honum til huggunar eftir látinn mann og honum verður ekki réttur huggunarbikar að drekka af eftir móður eða föður.

8Þú mátt ekki heldur ganga inn í hús, þar sem veisla er haldin, til að setjast með fólkinu og eta og drekka.

9Því að Drottinn hersveitanna, Guð Ísraels, segir: Ég mun þagga niður öll gleðihróp og fagnaðaróp, raddir brúðguma og brúðar, hér á þessum stað, fyrir augum yðar og á yðar dögum.

10Þegar þú kunngjörir þjóðinni allt þetta mun hún spyrja þig: „Hvers vegna hefur Drottinn hótað oss allri þessari ógæfu? Hver er sekt vor og hvaða synd höfum vér drýgt gegn Drottni, Guði vorum?“

11Þá skaltu svara: „Af því að feður yðar yfirgáfu mig, segir Drottinn. Þeir eltu aðra guði, þjónuðu þeim og sýndu þeim lotningu, þeir yfirgáfu mig og héldu ekki lög mín.“

12Sjálfir hafið þér breytt enn verr en feður yðar. Sérhver yðar hefur fylgt þrjósku síns illa hjarta í stað þess að hlusta á mig.

13Þess vegna fleygi ég yður úr þessu landi til lands sem hvorki þér né feður yðar hafið þekkt. Þar munuð þér þjóna öðrum guðum, bæði dag og nótt, af því að ég sýni yður enga miskunn.

14Þeir dagar munu því koma, segir Drottinn, að ekki verður lengur sagt: „Svo sannarlega sem Drottinn lifir sem leiddi Ísraelsmenn frá Egyptalandi,“

15heldur verður sagt: „Svo sannarlega sem Drottinn lifir sem leiddi Ísraelsmenn frá landinu í norðri og öllum öðrum löndum sem hann hafði hrakið þá til.“ Ég flyt þá aftur til heimalands síns sem ég gaf feðrum þeirra.

16Ég sendi menn eftir mörgum fiskimönnum, segir Drottinn, þeir eiga að veiða þá. Því næst sendi ég eftir mörgum veiðimönnum. Þeir eiga að veiða þá á hverju fjalli og á hverri hæð og í klettaskorunum.

17Þar sem augu mín fylgjast með öllum ferðum þeirra geta þeir ekki falið sig fyrir mér og sekt þeirra verður ekki dulin fyrir augum mínum.

18Fyrst mun ég gjalda þeim tvöfalt fyrir sekt þeirra og synd því að þeir hafa vanhelgað land mitt með hræjum fórnardýra sinna viðurstyggilegu guða og fyllt erfðahlut minn með andstyggilegum skurðgoðum sínum.

19Drottinn, styrkur minn og vígi, athvarf mitt á degi neyðarinnar. Til þín koma þjóðirnar frá endimörkum jarðar og segja: „Arfur feðra vorra var tál, guðir þeirra vindur sem engum hjálpar.“

20Getur maðurinn gert sér guði? Það væru engir guðir.

21Nú mun ég birta þeim afl mitt og mátt og þeir skulu játa að nafn mitt er Drottinn.

← Chapter 15 Jump to: Chapter 17 →