Exodus 10

Mien Bible (Thai Script) © Thailand Bible Society, 2007

← Chapter 9 Jump to: Chapter 11 →

1เฒี้ยว แอ๋ง ก๊อง บั๋ว โมเซ, “เม่ย แอ๋ง มี่ง ล์อ ฟาโล. เยีย ปุน นิ่น เหธา นิ่น เญย เจียน เฮญี้ยว แหง่ง, เหว่ย ปุน เยีย เยียม นิ่น บัว บุด๋ง โหฒว น้าย เต๋ย บัวะ ฮ่อง เญย จั๋ง-โห่,

2เหว่ย ปุน เม่ย บัว ก๊อง บั๋ว เม่ย บัว เญย ตอน-เจว๊ย ฟุน-ฟะ หมวัง เยีย ฮนั้ง หาย นอ โหฒว ปุน อียิบ เมี่ยน, เลี่ยม เยีย เยียม อียิบ เมี่ยน บุด๋ง โหฒว บัวะ ฮ่อง เญย จั๋ง-โห่. เม่ย บัว ฯฒฯ ฮิ้ว ตุ๊ เยีย เซ เฒี้ยว. ”

3โมเซ เหธา อาโลน ฯฒฯ มี่ง ก๊อง บั๋ว ฟาโล, “ เฒี้ยว, ฮิบลู เมี่ยน เญย ทิน-ฮู่ง, ฮนั้ง น้าย นอ ก๊อง, ‘เม่ย อ๋อย แหง่ง เจี๊ยน, ไม้ คั้ง เยียม เยีย เญย หฑะเฮมียน เหญี่ยม กั้น โหฒว ไฝ ด่ง หาย เล่า? ปู๋ง เยีย เญย แปะ ฝีง เหว่ย ปุน นิ่น บัว มี่ง หฒั่ง เยีย ม่าะ!

4เม่ย ไม้ คั้ง ปู๋ง เยีย เญย แปะ ฝีง มี่ง นอ, ฌัง ฮนอย เยีย ปุน จ๊บ-เหญ่ย เปียะ เม่ย เญย กั๊วะ.

5จ๊บ-เหญ่ย อ๋อย เหฌี่ย ต้าย เยียม ปวั๊ง เดา-เป้ย, ฒู้ง หมั่ง ไม้ ปวัด เดา. ต้ง เปาะ เบ๊าะ เหฒ่ง วั้ว เต๋ย กะน้าย, จ๊บ-เหญ่ย อ๋อย หญั่น เถา เหฑ่ง. เลี่ยม เหฒ่ง เหฌี่ย เญย เดี๋ยง, จ๊บ-เหญ่ย หย่า อ๋อย หญั่น ฌัง เหฑ่ง.

6จ๊บ-เหญ่ย อ๋อย เปียะ ปวั๊ง เม่ย เญย ติ่น เหธา เม่ย เญย เจียน เหธา เม่ย เญย แปะ ฝีง เญย เปย๊า. เม่ย บัว เญย อง-ถาย, เม่ย บัว เญย เตีย ต้าย เยียม เจี๊ยน น้าย ลู่ง เดี๊ย เถา อี้ หฒั่น ไม้ ปวัด เจี๋ย ด่ง น้าย โค้ว.’” ก๊อง ลิ์ว, โมเซ บัว มี่ง หมี่ อ๊ะ.

7ฟาโล ฮู่ง เญย เจียน ก๊อง บั๋ว ฟาโล, “น้าย เต้า เมี่ยน อ๋อย ห่อย บัว เถา หาย หฒั่น? ปุน น้าย เต๋ย เมี่ยน มี่ง หฒั่ง เฒี้ยว, นิ่น บัว เญย ทิน-ฮู่ง อ๊ะ ม่าะ! เม่ย เฒียะ ไม้ ตุ๊ ไฟ? บัว เญย เต่ย-ปูง ฒู้ง หว่าย เหฑ่ง อ๊ะ.”

8เมี่ยน แอ๋ง มี่ง ล์อ โมเซ เหธา อาโลน หฑวน เถา ฟาโล ฮู่ง วั้ว. ฟาโล ก๊อง, “เม่ย บัว มี่ง หฒั่ง เฒี้ยว เม่ย บัว เญย ทิน-ฮู่ง ตุ๊ เญย. มป่า หาย เต้า เหธา หาย เต้า มี่ง?”

9โมเซ เตา, “เยีย บัว โก๋ หลุน โฮล ไฝ, เยีย บัว เญย ตอน, เซียะ, ง่ง กวั้น, ยู่ง กวั้น เหธา ปะกี ยู่ง กวั้น เหยียด ฒู้ง อ๋อย หฒุ มี่ง เหฑ่ง เหว่ย หฒุ เถา วั้ว เยีย บัว อ๋อย หฒุ โหฒว นอม ยิ่น โห่ว เฒี้ยว. ”

10ฟาโล ก๊อง, “สี ก๊อง เยีย ปุน เม่ย บัว เหธา เม่ย บัว เญย มเซียะ ตอน เหธา ฝุเจว๊ย มี่ง เหฑ่ง, โท้ เฒี้ยว เหธา เม่ย บัว เยียม. มป่า เยีย ฮิ้ว ตุ๊ เม่ย บัว ต๊า กู๊ ไกว๋ เญย หฒะเอ๋ย.

11เยีย ไม้ ปุน มี่ง! เยีย ขูง ปุน มจั่ง ตอน มี่ง หฒั่ง เฒี้ยว ฮนั้ง, เหว่ย หฒุ เม่ย บัว โท้ เญย เซ ปุน มจั่ง ตอน มี่ง.” ก๊อง ลิ์ว น้าย เต๋ย หว่า, โมเซ เหธา อาโลน เยียม ฟาโล เญย หฑะเฮมียน หฒุ หฒุ่น ธ้วด หมี่ อ๊ะ.

12เฒี้ยว ก๊อง บั๋ว โมเซ, “ซูง เม่ย เญย ปั์ว เจี๋ย อียิบ เต่ย-ปูง กู้ หงว่าย ปุน จ๊บ-เหญ่ย ฟ้าน ปวั๊ง เต่ย-ปูง หญั่น เหฑ่ง เปาะ เบ๊าะ เหฒ่ง เหฌี่ย วั้ว เต๋ย กะน้าย.”

13โมเซ ฯฒฯ ซูง ปย๊า-บย่า เจี๋ย อียิบ เต่ย-ปูง กู้ หงว่าย. เฒี้ยว ปุน ตง ปูง แหมง เญย หฑยาว ป่วน เหยียด ฮนอย เหยียด ม์วน. ตะเหญ่ย ดอม หฑยาว ฯฒฯ ป่วน เจี๊ยน จ๊บ-เหญ่ย ฌุ่นๆ เญย เปียะ เต่ย-ปูง อ๊ะ.

14จ๊บ-เหญ่ย ฟ้าดๆ เญย เหฌี่ย อียิบ เต่ย-ปูง. หาย นอม ต๋อง หย่า จ๊บ-เหญ่ย ปวั๊ง เหฑ่ง. ฒิ่น ด่าง ไม้ แก้ง ม่าย เจี๋ย จ๊บ-เหญ่ย ด่ง น้าย ธั้ม. ฆะฮ้า ฮี้ง เหยียด ลิ์ว หย่า ไม้ ม่าย.

15จ๊บ-เหญ่ย ดุย ดิบ เดา-เป้ย หฮมวัง เหฑ่ง. เปาะ เบ๊าะ ลิ์ว เหฒ่ง เหฌี่ย เญย หญู่งๆ กะน้าย จ๊บ-เหญ่ย หญั่น เหฑ่ง. เยียม เด่ย เญย แกง-หฒวัง กะน้าย เหธา เยียม เดี๋ยง เญย เปี๊ยว หญั่น เหฑ่ง. อียิบ เต่ย-ปูง ไม้ ม่าย เหยียด คว้าย เดี๋ยง-น่อม แมง ไฟ เหยียด ติ้ว เมี้ย-แมง อ๊ะ.

16ฟาโล เซี้ยบๆ เญย เห่ว โมเซ เหธา อาโลน ต้าย. นิ่น ก๊อง, “เยีย ป์าม ฒุ์ย ต่อง เฒี้ยว เม่ย บัว เญย ทิน-ฮู่ง, หย่า ต่อง เม่ย บัว.

17อี้ หฒั่น โท้ แอ๋ง กวั่ง หฑุ่น เยีย เญย ฒุ์ย, เหว่ย เยีย เต๋า เก๋า โท้ เฒี้ยว, เม่ย บัว เญย ทิน-ฮู่ง, เถง เยีย ซิ้ม ดุ๊ด น้าย เต๋ย ห่อย แหม่ง เญย ต้ม สี่.”

18โมเซ ฯฒฯ เยียม ฟาโล วั้ว ธ้วด. นิ่น มี่ง เต๋า เก๋า โท้ เฒี้ยว เถง.

19เฒี้ยว ฯฒฯ ทิ้ว ตง ปูง หฑยาว เป๋น ไฟ ปูง เญย ต้ม หฑยาว ป่วน ต้าย ฮล้อ จ๊บ-เหญ่ย มี่ง กวั่ง วั้ว ค้อย-ซิ. อียิบ เต่ย-ปูง ไม้ เหฒ่ง เหยียด นอม จ๊บ-เหญ่ย อ๊ะ.

20มป่า เฒี้ยว ปุน ฟาโล เญย เฮญี้ยว แหง่ง, ไม้ คั้ง ปู๋ง อิสะลาเอน เมี่ยน มี่ง.

21เฒี้ยว แอ๋ง บั๋ว โมเซ, “ซูง เจี์ย เม่ย เญย ปั์ว เฒี้ยง ลู่ง เหว่ย ปุน เฒี่ยง นอม อียิบ เต่ย-ปูง มับ แม่ง มับ หฮมวัง เญย, ฮนั้ง ฮลัว ตุ๊ ไฮ์ เญย นอ.”

22โมเซ ฯฒฯ ซูง ปั์ว เฒี้ยง เจี๊ยน ลู่ง. ก๋อม อียิบ เต่ย-ปูง ฯฒฯ หฮมวัง ปัว ฮนอย.

23ปัว ฮนอย กะญั์ว นิ่น บัว ล่าน หมั่ง ไม้ ปวัด ล่าน หย่า ไม้ ไฮ่ ธ้วด เปย๊า มี่ง หาย เดา. มป่า อิสะลาเอน เมี่ยน เยียม เญย ต๋อง ฌัง เญย.

24ฟาโล ปุน เมี่ยน มี่ง เห่ว โมเซ ต้าย ฯฒฯ ก๊อง, “เม่ย บัว กุ๊น มี่ง หฒั่ง เฒี้ยว อ๊ะ. เลี่ยม เม่ย บัว เญย มเซียะ ตอน เหธา ฝุเจว๊ย มี่ง หย่า ตุ๊. มป่า เม่ย บัว เญย ง่ง กวั้น, ยู่ง เหธา ปะกี ยู่ง กวั้น อ๋อย หฒุ เยียม เจี๊ยน น้าย.”

25โมเซ ก๊อง, “เม่ย ฒู้ง อ๋อย หฒุ ปุน เยีย บัว ม่าย ปั๊ว เหฒี่ย เญย เหธา ฝ่ง ห่อ เหฒี่ย เญย แซง-คู้ ปุน เยีย บัว เหฒี่ย ปุน เฒี้ยว, เยีย บัว เญย ทิน-ฮู่ง.

26เยีย บัว เญย แซง-คู้ เหยียด ฒู้ง หย่า อ๋อย หฒุ ต้อ มี่ง เหฑ่ง. เลี่ยม เหยียด นอม เต้ย หย่า ไม้ เลี่ยว. เยีย บัว อ๋อย หฒุ เยียม แซง-คู้ กวั้น กิ๊น ธ้วด เต๋ย หฒั่ง เฒี้ยว เยีย บัว เญย ทิน-ฮู่ง, มป่า เถา วั้ว หฒั่น หธีง ต้าย ฮิ้ว ตุ๊ หล่ง หาย หญู่ง เหฒี่ย นิ่น.”

27มป่า เฒี้ยว ปุน ฟาโล เญย เฮญี้ยว แหง่ง, ไม้ คั้ง ปู๋ง นิ่น บัว ธ้วด.

28ฟาโล ก๊อง บั๋ว โมเซ, “เปย๋า ฆอย เยีย ม่าะ! ไฝ ฟิม อ๊ะ. ยั่ง น้าย เจี๋ย ไม้ ตู๋ง ปุน เยีย ปวัด เม่ย. หาย ฮนอย เม่ย แอ๋ง ปวัด เยีย เญย เฮมียน, เม่ย ฯฒฯ หฒุ ไต๋ อ๊ะ.”

29โมเซ ก๊อง, “เม่ย ก๊อง ตุ๊ หอบ เญย. เยีย ฒู้ง ไม้ แอ๋ง ต้าย ปวัด เม่ย เญย เฮมียน อ๊ะ.”

← Chapter 9 Jump to: Chapter 11 →