Exodus 4

Mien Bible (Thai Script) © Thailand Bible Society, 2007

← Chapter 3 Jump to: Chapter 5 →

1โมเซ เตา, “สี ก๊อง อิสะลาเอน เมี่ยน ไม้ เสียน เยีย หย่า ไม้ หมวัง เยีย ก๊อง เญย หว่า, นิ่น บัว ก๊อง, ‘ เฒี้ยว ไม้ หิ่น ธ้วด ปุน เม่ย ปวัด,’ วั้ว หญู่ง ฮนั้ง หาย นอ โหฒว?”

2เฒี้ยว หน่าย ก๋า นิ่น, “อี้ หฒั่น เม่ย เญย ปั์ว นั้น หาย หญู่ง?” โมเซ เตา, “เยีย นั้น ปย๊า-บย่า.”

3เฒี้ยว ก๊อง, “แกว๋ง เหฌี่ย เดา ม่าะ!” โมเซ ฯฒฯ แกว๋ง ปย๊า-บย่า เหฌี่ย เดา. ปย๊า-บย่า ฯฒฯ เป๋น ติ้ว นาง ต้าย, แฮะ นิ่น เปย๋า ฆอย หมี่ อ๊ะ.

4เฒี้ยว ก๊อง บั๋ว โมเซ, “ซูง ปั์ว นั้น เจี๊ยน นาง-เตว๊ย ม่าะ!” โมเซ ฯฒฯ ซูง ปั์ว นั้น เจี๊ยน นาง-เตว๊ย. นาง ฯฒฯ แอ๋ง เป๋น ปย๊า-บย่า หมี่ อ๊ะ.

5เฒี้ยว ก๊อง, “ฮนั้ง น้าย โหฒว เหว่ย ปุน อิสะลาเอน เมี่ยน ฮิ้ว ตุ๊ เฒี้ยว, นิ่น บัว เญย อง-ถาย เญย ทิน-ฮู่ง, เซ อับลาฮัม เญย ทิน-ฮู่ง, อีสัก เญย ทิน-ฮู่ง เหธา ยาโค้บ เญย ทิน-ฮู่ง, หิ่น ธ้วด ปุน เม่ย ปวัด.”

6เฒี้ยว แอ๋ง บั๋ว โมเซ, “เฒาะ เม่ย เญย ปั์ว ลม เปียะ เม่ย เญย ลุย-เกม ม่าะ!” โมเซ ฯฒฯ ลม เปียะ ลุย-เกม. ฮล้วด ปั์ว ธ้วด ต้าย ปวัด เป๋น ก้ม ฮู้ แป่ง, บ๊บ แปะ เญย, ฮนั้ง ซอง นอ.

7ทิน-ฮู่ง ก๊อง, “แอ๋ง ลม หฑุ่น ลุย-เกม ม่าะ!” โมเซ ฯฒฯ แอ๋ง ลม เปียะ ลุย-เกม. ฮล้วด ปั์ว ธ้วด ต้าย ปวัด หลง หมี่ อ๊ะ, ฮนั้ง โล์ วั้ว นอ, เหธา ซิน หฒั่ง เญย ด๊บ ฟี่ ฮนั้ง เหฑ่ง.

8ทิน-ฮู่ง แอ๋ง ก๊อง, “สี ก๊อง อิสะลาเอน เมี่ยน ไม้ เสียน เม่ย เญย หว่า ไฟ ไม้ เสียน ต้าว หฑุ่น บัวะ ฮ่อง เญย จั๋ง-โห่, เหฑีย นิ่น บัว เสียน ตะเหญ่ย หฑุ่น เญย จั๋ง-โห่.

9มป่า สี ก๊อง นิ่น บัว ไม้ เสียน น้าย เต๋ย อี หญู่ง จั๋ง-โห่ หย่า ไม้ หมวัง เม่ย เญย หว่า นอ, เม่ย อ๋อย หฒุ ดั๊ม เต๋ย ไนอา ด้าย เญย ววม โต๋ เหฌี่ย เดา-ฆาย. เม่ย ดั๊ม เญย ววม ฯฒฯ เยียม วั้ว เดา-ฆาย เป๋น ฑย้าม หมี่ อ๊ะ.”

10โมเซ แอ๋ง ก๊อง บั๋ว เฒี้ยว “โอ เฒี้ยว อ่า, เยีย มต้าย ไม้ ไฮ่ ก๊อง หว่า บย่าง เญย เมี่ยน. เจี๋ย ต้าย เญย เฒี่ยง โห่ ไม้ ไฮ่. เม่ย เหธา เยีย, เม่ย เญย โปว, ก๊อง หว่า เถา อี้ หฒั่น เยีย หธ่อ ไม้ ไฮ่ ก๊อง หว่า บย่าง. เยีย ก๊อง หว่า ต่น, งั่มๆ งุดๆ เญย.”

11เฒี้ยว ก๊อง บั๋ว นิ่น, “หาย เต้า เหฒย เมี่ยน เญย ฑุ่ย? หาย เต้า ปุน เมี่ยน มน่อม ดูง, ไม้ ไฮ่ ก๊อง หว่า? หาย เต้า ปุน เมี่ยน หมั่ง ตุ๊ ปวัด ไฟ ปุน เมี่ยน มฒีง แม่ง? เซ เยีย, เฒี้ยว กั้น ฮนั้ง, ไม้ เฒ์ย?

12เม่ย กุ๊น มี่ง อ๊ะ. เยีย กั้น อ๋อย เถง เม่ย ก๊อง. หอบ หฒุ ฮนั้ง หาย นอ ก๊อง เยีย หย่า หฌาว เม่ย.”

13มป่า โมเซ เตา, “เฒี้ยว อ้า! โท้ เม่ย พ้าย กั้น เต้า มี่ง ม่าะ!”

14เฒี้ยว เฉีย เจี์ย ไห่ โมเซ. นิ่น ก๊อง, “วั้ว หญู่ง, เม่ย เญย ก๋อ, เลวี เมี่ยน, อาโลน, นี? เยีย ฮิ้ว ตุ๊ นิ่น ก๊อง หว่า บย่าง เญย. นิ่น ฒู้ง ธ้วด เจ๊า ต้าย ล์อ เม่ย อ๊ะ. นิ่น ตุ๊ ปวัด เม่ย, นิ่น หฒะเก้ง อะเฮน้ย ไห่.

15เม่ย เหธา นิ่น ก๊อง ม่าะ! อ๋อย หฒุ บั๋ว นิ่น หอบ หฒุ ฮนั้ง หาย นอ ก๊อง. เยีย อ๋อย เถง เม่ย บัว อี เต้า ก๊อง หว่า หย่า หฌาว เม่ย บัว อ๋อย หฒุ ฮนั้ง หาย นอ โหฒว.

16อาโลน อ๋อย เถง เม่ย ต๋อย แปะ ฝีง ก๊อง หว่า ตี๊ เม่ย, ฮนั้ง เม่ย กั้น เญย ฑุ่ย ก๊อง นอ. เม่ย หย่า อ๋อย โหฒว ฮนั้ง นิ่น เญย ทิน-ฮู่ง.

17นิ่น หย่า อ๋อย หฒุ ต้อ เจี๊ยน เม่ย เญย ปั์ว นั้น เจี๊ยน น้าย ติ้ว ปย๊า-บย่า มี่ง หล่ง โหฒว บัวะ ฮ่อง เญย สี่.”

18โมเซ หฑวน มี่ง บั๋ว นิ่น เญย อง-ตา, เยโท, “โท้ ปุน เยีย หฑวน อียิบ เต่ย-ปูง หมั่ง ก๋า, เยีย เญย มั์ว-ต่อย หธ่อ เยียม เญย ไฟ?” เยโท ก๊อง, “กุ๊น แป้ง ออน เญย หฑวน โอ่.”

19โมเซ หธ่อ เยียม มีเดียน เต่ย-ปูง วั้ว หฒั่น เฒี้ยว แอ๋ง บั๋ว นิ่น, “เม่ย กุ๊น หฑวน อียิบ เต่ย-ปูง อ๊ะ. อ๋อย ไต๋ เม่ย วั้ว เต๋ย เมี่ยน เหยียด ฒู้ง ไต่ เหฑ่ง หมี่ อ๊ะ.”

20โมเซ ฯฒฯ ปุน นิ่น เญย เอ๊า เหธา อี เต้า ตอน เก้ เจี๊ยน ล่อ ธ้วด เจ๊า หฑวน อียิบ เต่ย-ปูง. โมเซ นั้น เจี๊ยน ทิน-ฮู่ง บั๋ว นิ่น ต้อ วั้ว ติ้ว ปย๊า-บย่า มี่ง.

21เฒี้ยว แอ๋ง ก๊อง บั๋ว โมเซ, “เม่ย หฑวน เถา อียิบ เต่ย-ปูง เญย เฒี่ยง โห่, อ๋อย หฒุ ตอง เจี๊ยน ฟาโล ฮู่ง โหฒว ต้ง เยีย ปุน เม่ย ม่าย ชะ โหฒว วั้ว เต๋ย หญู่งๆ บัวะ ฮ่อง เญย สี่. มป่า เยีย อ๋อย ปุน ฟาโล เญย เฮญี้ยว แหง่ง, นิ่น ฯฒฯ ไม้ คั้ง ปุน อิสะลาเอน เมี่ยน มี่ง.

22เม่ย อ๋อย หฒุ ก๊อง บั๋ว ฟาโล, ‘น้าย เซ เฒี้ยว กั้น ก๊อง, “อิสะลาเอน เมี่ยน เซ เยีย เญย ตอน-โฮล.

23เยีย บั๋ว เม่ย ปุน เยีย เญย ตอน-โฮล มี่ง หฒั่ง เยีย.” เม่ย ไม้ คั้ง ปุน นิ่น บัว มี่ง นอ, เยีย อ๋อย ไต๋ เม่ย เญย ตอน-โฮล.’”

24เยียม เจ๊า หฒั่ง นิ่น บัว ฮิด เจี๋ย ม์วน เญย เหยียด นอม ต๋อง, เฒี้ยว แอ๋ง ต้าย ปวั้ง โมเซ, อ๋อย ไต๋ นิ่น.

25สิบโปลา ฯฒฯ เฒาะ คว้าย หละเปย๊ย ไหล่ เญย, ก๊าด นิ่น เญย ตอน เญย ไจ๋-เฒว้ย ด๊บ ต้าย กั๊วะ โมเซ เญย เหฒา หย่า ก๊อง, “เม่ย เซ เยีย หล่ง ฑย้าม ตุ๊ ต้าย เญย เซียง-ล่าง.”

26เฒี้ยว ฯฒฯ ไม้ โหฒว หาย หญู่ง ปุน โมเซ. (สิบโปลา ก๊อง, “เม่ย เซ เยีย หล่ง ฑย้าม ตุ๊ ต้าย เญย เซียง-ล่าง,” วั้ว เต๋ย หว่า ก๊อง หฒุ เจี๋ย ก๊าด เญย เล์ย.)

27เฒี้ยว ก๊อง บั๋ว อาโลน, “มี่ง วั้ว เต่ย-ปูง-ฮวาง ปวั้ง โมเซ ม่าะ!” อาโลน ฯฒฯ มี่ง ปวั้ง โมเซ เยียม ทิน-ฮู่ง เญย บง วั้ว, ฯฒฯ ฒม โมเซ.

28โมเซ เฒียง เฒี้ยว พ้าย นิ่น ก๊อง เญย เหยียด ฒู้ง หว่า บั๋ว อาโลน, หย่า บั๋ว นิ่น เถา เฒี้ยว เห่ว นิ่น โหฒว วั้ว เต๋ย บัวะ ฮ่อง ไห่ เญย จั๋ง-โห่.

29โมเซ เหธา อาโลน ฯฒฯ เห่ว อิสะลาเอน เมี่ยน เญย หฒวัง เมี่ยน โก๋ กั๊บ ฒุ้น.

30อาโลน ฯฒฯ เฒียง เฒี้ยว บั๋ว โมเซ เญย เหยียด ฒู้ง หว่า บั๋ว นิ่น บัว. นิ่น หย่า ตอง เจี๊ยน แปะ ฝีง โหฒว เหฑ่ง วั้ว เต๋ย บัวะ ฮ่อง ไห่ เญย จั๋ง-โห่.

31แปะ ฝีง ฯฒฯ เสียน. นิ่น บัว ไฮ์ ก๊อง เฒี้ยว ต้าย ล์อ นิ่น บัว อิสะลาเอน เมี่ยน หย่า ปวัด นิ่น บัว หฒุ เมี่ยน ห่อย เญย โค้ว หน่าน, นิ่น บัว ฯฒฯ โด๊ะ เหฌี่ย ป๋าย เฒี้ยว

← Chapter 3 Jump to: Chapter 5 →