Exodus 36

Mien Bible (Thai Script) © Thailand Bible Society, 2007

← Chapter 35 Jump to: Chapter 37 →

1เบซาเลน, โอโฮลีอับ เหธา เหยียด ฒู้ง ม่าย ปั้น เหฒ่ย เญย เมี่ยน, ต้ง เฒี้ยว ปุน ม่าย ปั์ว-เต้า หลง, ม่าย ธง-เม่ง ฮิ้ว ตุ๊ ฮนั้ง หาย นอ โหฒว สีง ติ่น เญย หญู่งๆ ฯฒฯ หฒิว เฒี้ยว พ้าย-โผว เญย เหยียด ฒู้ง หว่า โหฒว.”

2โมเซ เห่ว เบซาเลน, โอโฮลีอับ เหธา เต้าๆ ม่าย ปั้น เหฒ่ย เญย เมี่ยน, เซ เฒี้ยว เหธย ปุน ม่าย ปั้น เหฒ่ย ไฮ่ โหฒว หย่า ม่าย เฮญี้ยว โหฒว เญย เมี่ยน, ต้าย โหฒว กง.

3หฒั่ง เมี่ยน เหยียด ฒู้ง มี่ง โมเซ วั้ว ฒิบ อิสะลาเอน เมี่ยน ธ้วด ฟิม ฝ่ง ห่อ โหฒว สีง ติ่น วั้ว เต๋ย กะน้าย. อิสะลาเอน เมี่ยน ดอมๆ หธ่อ ต้อ กะน้าย ต้าย ฝ่ง ห่อ ปุน โมเซ.

4ตะฟ่าน ม่าย ปั์ว-เต้า หลง โหฒว สีง ติ่น เญย หฒั่ง เมี่ยน, เก๊าะ-เมี่ยน ฯฒฯ กวั่ง เจี๊ยน นิ่น บัว เญย กง มี่ง

5บั๋ว โมเซ, “เมี่ยน ต้อ กะน้าย ต้าย ธั้ม เจี๋ย ด่าง เฉียม หฒุ หล่ง เหว่ย โหฒว เฒี้ยว พ้าย โหฒว เญย กง.”

6โมเซ ฯฒฯ บั๋ว เมี่ยน ฒุ่น ก๋อม ด๊บ-ลิ่ว เธี้ยง, บั๋ว แปะ ฝีง, “หาย เต้า มจั่ง มเซียะ ไม้ หฒุ ต้อ หาย หญู่ง ฝ่ง ห่อ เหว่ย โหฒว สีง ติ่น อ๊ะ.” หฒวัง เมี่ยน ฯฒฯ ตี้ง เหฌี่ย, ไม้ ต้อ กะน้าย ต้าย ฝ่ง ห่อ.

7เซียว ต้าย เญย กะน้าย ฒู้ง เก้า ธั้ม เฉียม หฒุ หล่ง โหฒว หญู่งๆ กง.

8เยียม หฒวัง กง-เมี่ยน บุด๋ง, ม่าย ปั์ว-เต้า เก้า หลง เจี๋ย วั้ว เต๋ย หฒั่ง เมี่ยน, โหฒว ด๊บ-ลิ่ว. นิ่น บัว หล่ง ล่าม่า สุย-หม่วน หฒอบ เจี๊ยน ปะกี สุย เซ้ด บั๊ว, หลัวะ, ซิ-ห่ง, ดั๊ด เหฒียบ คว้าย เดีย แอ๋ง หธง เจี๊ยน เคลูบิม เญย ฝัง.

9คว้ายๆ ฟี่ เฌี้ยด ฟี่ ดาว. ด๊าว หญี่ เหฒียบ เป๊ด เดาะ, จั๊ง เปยย เดาะ.

10นิ่น บัว เฒาะ ปยา คว้าย กั๊บ เจี๊ยน ลุ่น เป๋น เหยียด คว้าย, แอ๋ง เฒาะ วั้ว เต๋ย ปยา คว้าย ลุ่น เป๋น เหยียด คว้าย.

11นิ่น บัว หล่ง เดีย-บั๊ว โหฒว เน้ก ตี๋ง เจี๊ยน วั้ว เต๋ย อี คว้าย ต้ม เดีย เญย เดีย-เฮลน.

12เหยียด คว้าย ตี๋ง ฮม์ เหฒียบ นอม เน้ก. น้าย คว้าย เญย เน้ก เหธา วั้ว คว้าย เญย เน้ก ต๋อย เหฒียง.

13นิ่น บัว แอ๋ง หล่ง เจียม โหฒว ฮม์ เหฒียบ นอม กะน้าย-เขา, เฒาะ น้าย คว้าย เญย เน้ก ปั่ง วั้ว คว้าย เญย เน้ก เขา เจี๊ยน เป๋น เหยียด นอม ด๊บ-ลิ่ว หมี่ อ๊ะ.

14นิ่น บัว แอ๋ง หล่ง ยู่ง เปยย ดั๊ด เหฒียบ เยี้ยด คว้าย ต้าย ก๊ม ด๊บ-ลิ่ว กะเหญี่ย วั้ว เหยี่ยม.

15น้าย เต๋ย คว้ายๆ ฟี่ เฌี้ยด ฟี่ ดาว, ด๊าว ฟ่า เหฒียบ เดาะ, จั๊ง เปยย เดาะ.

16นิ่น บัว เฒาะ ปยา คว้าย กั๊บ เจี๊ยน ลุ่น เป๋น เหยียด คว้าย. แอ๋ง เฒาะ จุ๊ คว้าย ฟี่ ฮนั้ง เญย ลุ่น เป๋น เหยียด คว้าย.

17เยียม น้าย เต๋ย อี คว้าย ต้ม เดีย เญย เดีย-เฮลน, เหยียด คว้าย นิ่น บัว ตี๋ง ฮม์ เหฒียบ นอม เน้ก.

18นิ่น บัว หล่ง ต้ง ซิ โหฒว ฮม์ เหฒียบ นอม กะน้าย-เขา, เขา เจี๊ยน วั้ว เต๋ย อี คว้าย ต้ม เดีย เญย เน้ก ฯฒฯ เป๋น เหยียด คว้าย หมี่ อ๊ะ.

19นิ่น บัว แอ๋ง หล่ง หญ่ม ต้าย ซิ เญย ยู่ง โก๊ว ด๊บ ก๊ม เหยี่ยม. แอ๋ง หล่ง ฟัวะ ต้าย หลง เญย แซง-คู้ ด๊บ ก๊ม เหยี่ยม.

20นิ่น บัว หล่ง ตะซุ เดี๋ยง โหฒว ด๊บ-ลิ่ว เญย ชอง, เหลียบ หฒะ.

21นอมๆ ชอง ฮลัง เหฒียบ เดาะ, จั๊ง เดาะ เปี๋ยน.

22นอมๆ ชอง, อี ปูง ชอง-เหฒา นิ่น บัว ไพ กะเหญี่ย แหมง ปุน นิ่น ธิด เต๋ย, เหยียด นอม ชอง เญย เหฒา ฯฒฯ เหธา ตะเหญ่ย นอม ชอง เญย เหฒา กั๊บ เจี๊ยน. ด๊บ-ลิ่ว เญย เหยียด ฒู้ง ชอง นิ่น บัว ฮนั้ง น้าย นอ โหฒว.

23น่าม ปูง แหมง นิ่น บัว โหฒว หญี่ เหฒียบ นอม ชอง.

24แอ๋ง หล่ง ญ่าน โหฒว เฝย เหฒียบ นอม ท้าบ ทบ ชอง เญย เหฒา. เหยียด นอม ชอง ม่าย อี นอม ท้าบ.

25เหว่ย ป๊ะ ปูง แหมง นิ่น บัว แอ๋ง โหฒว หญี่ เหฒียบ นอม ชอง.

26แอ๋ง โหฒว เฝย เหฒียบ นอม ญ่าน ท้าบ ทบ ชอง เญย เหฒา. เหยียด นอม ชอง ม่าย อี นอม ท้าบ.

27เหว่ย ด๊บ-ลิ่ว ฆาง, ไฟ ปูง วั้ว ปูง, นิ่น บัว โหฒว จุ๊ นอม ชอง.

28แอ๋ง กั้น โหฒว อี นอม ชอง เหว่ย ฆะฮ้า แหมง เญย เก๊าะ.

29เก๊าะ เญย อี นอม ชอง เยียม กะเดี๊ย หอบ เถา กู้ หงว่าย หย่า จวั่ง นอม โคว โคว เจี๊ยน. อี นอม เก๊าะ ฒู้ง ฟี่ ฮนั้ง เญย โหฒว.

30ฮนั้ง หน่าย, เหยียด ฒู้ง ม่าย เหฮยียด นอม ชอง หย่า ม่าย เหฒียบ หลัวะ นอม ญ่าน ท้าบ. เหยียด นอม ชอง ทบ อี นอม ท้าบ.

31นิ่น บัว หล่ง ตะซุ เดี๋ยง โหฒว กู้ง กั่ง เญย เดี๋ยง. เหยียด ปูง ด๊บ-ลิ่ว เญย ชอง ม่าย ปยา ติ้ว.

32วั้ว ปูง ชอง หย่า ม่าย ปยา ติ้ว. ด๊บ-ลิ่ว ฆะฮ้า แหมง, ไฟ ปูง วั้ว ปูง, แอ๋ง ม่าย ปยา ติ้ว.

33บุด๋ง วั้ว หว่วน กู้ง กั่ง เดี๋ยง เป๋น เหยียด ติ้ว เดี๋ยง เยียม น้าย ปูง มี่ง ตอง วั้ว ปูง.

34น้าย เต๋ย ชอง เหยียด ฒู้ง ปวัง เจี๊ยน เจียม แอ๋ง ตี๋ง เจี๊ยน เจียม-ควีง หธุน กู้ง กั่ง เดี๋ยง. กู้ง กั่ง เดี๋ยง เหยียด ฒู้ง หย่า ปวัง เจี๊ยน เจียม.

35นิ่น บัว หล่ง ปะกี สุย เซ้ด บั๊ว, หลัวะ, ซิ-ห่ง หฒอบ เจี๊ยน ล่าม่า สุย-หม่วน ดั๊ด คว้าย แบะ แก้ง เดีย. ปั์ว-เต้า หลง เญย เมี่ยน แอ๋ง หธง เจี๊ยน เคลูบิม เญย ฝัง.

36นิ่น บัว หล่ง ตะซุ เดี๋ยง โหฒว เปยย นอม ต่ง หย่า ปวัง เจี๊ยน เจียม, ตี๋ง เจี๊ยน เจียม-เงา ขวัง แบะ แก้ง เดีย. นิ่น บัว หย่า โหฒว เปยย นอม ญ่าน ท้าบ ทบ วั้ว เต๋ย ต่ง.

37แบะ ด๊บ-ลิ่ว เญย แก้ง วั้ว คว้าย แบะ แก้ง เดีย, นิ่น บัว หล่ง ปะกี สุย เซ้ด บั๊ว, หลัวะ, ซิ-ห่ง, หฒอบ เจี๊ยน ล่าม่า สุย-หม่วน ดั๊ด ต้าย หย่า ม่าย ปั์ว-เต้า หธงๆ เญย เมี่ยน หธง เจี๊ยน หธง.

38นิ่น บัว หย่า โหฒว ปยา นอม ต่ง เหธา ตี๋ง ต่ง เญย เงา. ต่ง เตว๊ย-เมว์ย ปวัง เจี๊ยน เจียม. ปย๊า หย่า ปวัง เจี๊ยน เจียม. นิ่น บัว หย่า โหฒว ปยา นอม ต้ง ซิ ท้าบ ทบ ต่ง.

← Chapter 35 Jump to: Chapter 37 →