Exodus 26

Mien Bible (Thai Script) © Thailand Bible Society, 2007

← Chapter 25 Jump to: Chapter 27 →

1“อ๋อย หฒุ หล่ง เหฒียบ คว้าย เดีย โหฒว นอม หฒั่ง ทิน-ฮู่ง เญย ด๊บ-ลิ่ว. น้าย เต๋ย เดีย หล่ง ล่าม่า สุย-หม่วน หฒอบ เจี๊ยน ปะกี สุย เซ้ด บั๊ว, หลัวะ, ซิ-ห่ง ดั๊ด ต้าย. ล์อ ปั์ว-เต้า หลง เญย เมี่ยน หธง เจี๊ยน เคลูบิม เญย ฝัง.

2คว้ายๆ อ๋อย หฒุ ฟี่ เฌี้ยด ฟี่ ดาว, ด๊าว หญี่ เหฒียบ เป๊ด เดาะ, จั๊ง เปยย เดาะ.

3เฒาะ ปยา คว้าย กั๊บ เจี๊ยน ลุ่น เป๋น เหยียด คว้าย. แอ๋ง ม่าย วั้ว เต๋ย ปยา คว้าย ฟี่ ฮนั้ง เญย ลุ่น เป๋น เหยียด คว้าย.

4อ๋อย หฒุ หล่ง เดีย-บั๊ว โหฒว เน้ก ตี๋ง เจี๊ยน น้าย เต๋ย อี คว้าย ต้ม เดีย เญย เดีย-เฮลน.

5เหยียด คว้าย ตี๋ง ฮม์ เหฒียบ นอม เน้ก. น้าย คว้าย เญย เน้ก เหธา วั้ว คว้าย เญย เน้ก อ๋อย หฒุ ต๋อย เหฒียง.

6แอ๋ง หล่ง เจียม โหฒว ฮม์ เหฒียบ นอม กะน้าย-เขา เฒาะ น้าย คว้าย เญย เน้ก ปั่ง วั้ว คว้าย เญย เน้ก เขา เจี๊ยน เป๋น เหยียด นอม ด๊บ-ลิ่ว หมี่ อ๊ะ.

7“แอ๋ง หล่ง ยู่ง เปยย ดั๊ด เหฒียบ เยี้ยด คว้าย เดีย ต้าย ก๊ม ด๊บ-ลิ่ว กะเหญี่ย วั้ว เหยี่ยม.

8โหฒว คว้ายๆ ฟี่ เฌี้ยด ฟี่ ดาว, ด๊าว ฟ่า เหฒียบ เดาะ, จั๊ง เปยย เดาะ.

9เฒาะ ปยา คว้าย กั๊บ เจี๊ยน ลุ่น เป๋น เหยียด คว้าย. แอ๋ง เฒาะ จุ๊ คว้าย ฟี่ ฮนั้ง เญย ลุ่น เป๋น เหยียด คว้าย. น้าย คว้าย เญย กะเฮลน อ๋อย หฒุ ฑิบ หฑวน โหฒว อี เหยี่ยม เยียม ด๊บ-ลิ่ว เญย หฑะเฮมียน แหมง.

10เยียม น้าย เต๋ย อี คว้าย ต้ม เดีย เญย เดีย-เฮลน, เหยียด คว้าย อ๋อย หฒุ ตี๋ง ฮม์ เหฒียบ นอม เน้ก.

11แอ๋ง หล่ง ต้ง ซิ โหฒว ฮม์ เหฒียบ นอม กะน้าย-เขา, เขา เจี๊ยน วั้ว เต๋ย เน้ก ปุน นิ่น เป๋น เหยียด นอม ด๊บ-ลิ่ว.

12เหฒ่ง เหฌี่ย วั้ว เต๋ย อี เดาะ เดีย อ๋อย หฒุ ปู๋ง ซั่ว เหฌี่ย ด๊บ-ลิ่ว ฆะฮ้า แหมง.

13ก๊ม ด๊บ-ลิ่ว เญย เดีย อี ปูง กะเฮลน, เหยียด ปูง ด๊าว เหยียด เดาะ เหว่ย เฑีย เจี๊ยน หฒั่ง ทิน-ฮู่ง เญย ด๊บ-ลิ่ว กะเฮลน ปวัง เจี๊ยน.

14แอ๋ง หล่ง ยู่ง ด๊บ หญ่ม ต้าย ซิ เญย ก๊ม เหยี่ยม, เหธา ฟัวะ ต้าย หลง เญย แซง-คู้ ด๊บ ก๊ม เหยี่ยม.

15“อ๋อย หฒุ หล่ง ตะซุ เดี๋ยง โหฒว ด๊บ-ลิ่ว เญย ชอง เหลียบ หฒะ.

16นอมๆ ชอง อ๋อย หฒุ โหฒว ฮลัง เหฒียบ เดาะ, จั๊ง เดาะ เปี๋ยน.

17นอมๆ ชอง อี ปูง ชอง-เหฒา ไพ กะเหญี่ย แหมง ปุน นิ่น ธิด เต๋ย. เหยียด นอม ชอง เญย เหฒา ฯฒฯ เหธา ตะเหญ่ย นอม ชอง เญย เหฒา กั๊บ เจี๊ยน. ด๊บ-ลิ่ว เญย เหยียด ฒู้ง ชอง อ๋อย หฒุ ฮนั้ง น้าย นอ โหฒว.

18ด๊บ-ลิ่ว เญย น่าม ปูง อ๋อย หฒุ โหฒว หญี่ เหฒียบ นอม ชอง.

19แอ๋ง หล่ง ญ่าน โหฒว เฝย เหฒียบ นอม ท้าบ ทบ ชอง เญย เหฒา. เหยียด นอม ชอง หล่ง อี นอม ท้าบ.

20เหว่ย ด๊บ-ลิ่ว เญย ป๊ะ ปูง หย่า อ๋อย หฒุ โหฒว หญี่ เหฒียบ นอม ชอง.

21แอ๋ง โหฒว เฝย เหฒียบ นอม ญ่าน ท้าบ เหว่ย ทบ ชอง เญย เหฒา. เหยียด นอม ชอง หล่ง อี นอม ท้าบ.

22ด๊บ-ลิ่ว ฆาง, ไฟ ปูง วั้ว ปูง, อ๋อย หฒุ โหฒว จุ๊ นอม ชอง.

23แอ๋ง กั้น โหฒว อี นอม ชอง เหว่ย ด๊บ-ลิ่ว ฆะฮ้า แหมง เญย เก๊าะ.

24เก๊าะ เญย อี นอม ชอง อ๋อย หฒุ เยียม กะเดี๊ย หอบ เถา กู้ หงว่าย หย่า จวั่ง นอม โคว โคว เจี๊ยน. อี ปูง เก๊าะ อ๋อย หฒุ โหฒว ฟี่ ฮนั้ง เญย.

25ฮนั้ง น้าย เหยียด ฒู้ง ม่าย เหฮยียด นอม ชอง หย่า ม่าย เหฒียบ หลัวะ นอม ญ่าน ท้าบ. เหยียด นอม ชอง ทบ อี นอม ท้าบ.

26“อ๋อย หฒุ หล่ง ตะซุ เดี๋ยง โหฒว กู้ง กั่ง เดี๋ยง. เหยียด ปูง ด๊บ-ลิ่ว เญย ชอง อ๋อย หฒุ ม่าย ปยา ติ้ว.

27วั้ว ปูง หย่า อ๋อย หฒุ ม่าย ปยา ติ้ว. ฆะฮ้า แหมง, ไฟ ปูง วั้ว ปูง, แอ๋ง ม่าย ปยา ติ้ว.

28บุด๋ง วั้ว หว่วน อ๋อย หฒุ โหฒว เป๋น เหยียด ติ้ว เดี๋ยง เยียม น้าย ปูง หธุน ตอง วั้ว ปูง.

29น้าย เต๋ย ชอง เหยียด ฒู้ง อ๋อย หฒุ ปวัง เจี๊ยน เจียม แอ๋ง หล่ง เจียม โหฒว ควีง ตี๋ง เจี๊ยน หธุน กู้ง กั่ง วั้ว เต๋ย หฌ่ง-ลาน. กู้ง กั่ง หฌ่ง-ลาน เหยียด ฒู้ง หย่า อ๋อย หฒุ ปวัง เจี๊ยน เจียม.

30“อ๋อย หฒุ หฒิว เยียม บง บั๋ว เม่ย เญย หญู่ง เฒ้ย ธอง น้าย นอม ด๊บ-ลิ่ว.

31“อ๋อย หฒุ หล่ง ปะกี สุย เซ้ด บั๊ว, หลัวะ, ซิ-ห่ง หฒอบ เจี๊ยน ล่าม่า สุย-หม่วน ดั๊ด คว้าย แบะ แก้ง เดีย, แอ๋ง ล์อ ปั์ว-เต้า หลง เญย เมี่ยน หธง เจี๊ยน เคลูบิม เญย ฝัง.

32น้าย คว้าย เดีย อ๋อย หฒุ หล่ง เจียม-เงา ขวัง เจี๊ยน เปยย นอม ต่ง. ต่ง อ๋อย หฒุ หล่ง ตะซุ เดี๋ยง โหฒว หย่า ปวัง เจี๊ยน เจียม แอ๋ง ทบ เจี๊ยน เปยย นอม ญ่าน ท้าบ.

33อ๋อย หฒุ เฒาะ แบะ แก้ง เดีย ขวัง เจี๊ยน เงา, แอ๋ง เฒาะ แล์ง แหง่ง หว่า ฟาง ตน เจี๊ยน แบะ แก้ง เดีย กะญั์ว แหมง. น้าย คว้าย เดีย เหฆน เจี๊ยน เก้า ธีง-เหฑ่ง เจี๋ย วั้ว ฉง เหธา ธีง-เหฑ่ง วั้ว ฉง.

34อ๋อย หฒุ เฒาะ เหธย เอน เญย เหว่ย ก๊ม เจี๊ยน แล์ง แหง่ง หว่า ฟาง กู้ หงว่าย, อัน เจี๊ยน เก้า ธีง-เหฑ่ง เจี๋ย วั้ว ฉง กะญั์ว.

35เฒาะ เตี้ย ตน เจี๊ยน วั้ว คว้าย เดีย กะเหญี่ย แหมง, ด๊บ-ลิ่ว เญย ป๊ะ ปูง. แอ๋ง เฒาะ ตัง ตน น่าม ปูง แหมง ต๋อย เหฒียง วั้ว นอม เตี้ย.

36“แบะ ด๊บ-ลิ่ว เญย แก้ง ด่าง วั้ว คว้าย เดีย อ๋อย หฒุ หล่ง ล่าม่า สุย-หม่วน หฒอบ เจี๊ยน ปะกี สุย เซ้ด บั๊ว, หลัวะ, เหธา ซิ-ห่ง ดั๊ด ต้าย หย่า ม่าย ปั์ว-เต้า หธง เญย เมี่ยน หธง เจี๊ยน เหฑว่ย เญย.

37อ๋อย หฒุ หล่ง ตะซุ เดี๋ยง โหฒว ปยา นอม ต่ง, หย่า ปวัง เจี๊ยน เจียม, แอ๋ง ตี๋ง เจี๊ยน เจียม-เงา ขวัง เจี๊ยน แบะ แก้ง เดีย. แอ๋ง หล่ง ต้ง ซิ โหฒว ปยา นอม ท้าบ เหว่ย ทบ ต่ง.

← Chapter 25 Jump to: Chapter 27 →