Exodus 21

Mien Bible (Thai Script) © Thailand Bible Society, 2007

← Chapter 20 Jump to: Chapter 22 →

1“เม่ย อ๋อย หฒุ ก๊อง น้าย เต๋ย เล์ย บั๋ว อิสะลาเอน เมี่ยน.

2“สี ก๊อง เม่ย ม์าย เต้า ฮิบลู เมี่ยน โหฒว โน่ว, นิ่น อ๋อย หฒุ เถง เม่ย โหฒว จุ๊ หฮญัง กง. เถา ตะเธี้ยด หฮญัง วั้ว หฮญัง อ๋อย หฒุ ปุน นิ่น ธ้วด. นิ่น หย่า ไม้ หฒุ ธ้วด ญ่าน.

3สี ก๊อง นิ่น ต้าย เญย เฒี่ยง โห่ ตาน-ซิน เมี่ยน, นิ่น ธ้วด เญย เฒี่ยง โห่ หย่า ปุน นิ่น ตาน-ซิน ธ้วด. สี ก๊อง ต้าย เญย เฒี่ยง โห่ ต้อ เจี๊ยน เอ๊า ต้าย, ธ้วด เญย เฒี่ยง โห่ หย่า อ๋อย หฒุ ปุน เอ๊า กัน เจี๊ยน มี่ง.

4ก๊อง ฮนั้ง นิ่น เญย เฒี้ยว ล์อ เอ๊า ปุน นิ่น หล่ง, น้าย เต้า เอ๊า ยู์ง ตุ๊ ตอน ไฟ เซียะ, วั้ว เต้า เอ๊า เหธา นิ่น เญย ฝุเจว๊ย เป๋น นิ่น เญย เฒี้ยว เญย หมี่ อ๊ะ. ขูง วั้ว เต้า มจั่ง ตอน กั้น ตุ๊ ธ้วด ฮนั้ง.

5“มป่า สี ก๊อง วั้ว เต้า โน่ว ก๊อง, ‘เยีย ฮนั้ม เยีย เญย เฒี้ยว เหธา เยีย เญย เอ๊า-เจว๊ย. เยีย ไม้ อ๋อย ธ้วด โหฒว ปู๋ง ฆอย เญย เมี่ยน,’

6นิ่น เญย เฒี้ยว อ๋อย หฒุ ต้อ นิ่น มี่ง ตอง เจี๊ยน เบ่น สี่ เมี่ยน เฒาะ โน่ว เญย มน่อม ปั่ง แก้ง ไฟ แก้ง โหฒ่ว, หล่ง เฒวย เฒวย ทง มี่ง. นิ่น ฯฒฯ เหยียด เสย เถง วั้ว เต้า เฒี้ยว โหฒว โน่ว.

7“สี ก๊อง เมี่ยน หม่าย กั้น เญย เซียะ เถง เมี่ยน โหฒว โน่ว เป์ย, วั้ว เต้า เซียะ ไม้ ตุ๊ ปู๋ง ฆอย ฮนั้ง โหฒว โน่ว เก๊า เญย เมี่ยน นอ.

8สี ก๊อง ม์าย นิ่น ต้าย วั้ว เต้า เฒี้ยว อ๋อย หล่ง โหฒว กั้น เญย เอ๊า, ฆะฮ้า ไฮ์ ไม้ ปวั๊ง เฮญี้ยว, นิ่น อ๋อย หฒุ ปุน เมี่ยน หฒัวะ เซียะ หฑวน. นิ่น ไม้ ม่าย เล์ย หม่าย ปุน กั้น ฝีง เมี่ยน เหว่ย หฒุ นิ่น โหฒว ไม้ เหฒียบ ฒัวะ ปุน วั้ว เต้า เซียะ หมี่ อ๊ะ.

9สี ก๊อง วั้ว เต้า เฒี้ยว กิ๊น วั้ว เต้า เซียะ ปุน กั้น เญย ตอน หล่ง โหฒว เอ๊า, อ๋อย หฒุ ฝุน นิ่น โหฒว ฮนั้ง กั้น เญย เซียะ นอ.

10สี ก๊อง นิ่น แอ๋ง หล่ง เอ๊า-ตอน, ไม้ ตู๋ง เควย หญั่น ฮบ ไฟ ลุย-โหว, หย่า ไม้ ตู๋ง หฒ่าน นิ่น เญย เอ๊า-โฮล.

11สี ก๊อง นิ่น เอย ไม้ ตุ๊ น้าย เต๋ย ปัว หญู่ง นอ, นิ่น อ๋อย หฒุ ปุน นิ่น เญย เอ๊า-โฮล เฒียง หน่าย ธ้วด. เอ๊า หย่า ไม้ หฒุ ธ้วด หาย หญู่ง ญ่าน.

12“หาย เต้า เบ๊าะ เมี่ยน หย่า เบ๊าะ ไต่, วั้ว เต้า ฒู้ง อ๋อย หฒุ ตี่ง ฒุ์ย ไต๋ ไต่.

13หาย เต้า ไม้ เฒ์ย ป่าๆ ไต๋ เมี่ยน, นิ่น ธะ-โป่ว ไต๋, เซ ทิน-ฮู่ง ตี่ง ปุน เมี่ยน ฮนั้ง น้าย นอ หฒุ ไต่, เยีย ฯฒฯ เหลียบ นอม ต๋อง ปุน นิ่น เปย๋า มี่ง เยียม วั้ว.

14มป่า หาย เต้า เจี์ย เฮญี้ยว ป่าๆ ไต๋ เมี่ยน ไต่, ไม้ กุ๊น นิ่น เปย๋า มี่ง เหฒี่ยว เหฒี่ย-ต้อง, ฒู้ง อ๋อย หฒุ เฒาะ นิ่น ทอ มี่ง ตี่ง ฒุ์ย ไต๋ ไต่.

15“หาย เต้า เบ๊าะ นิ่น เญย เตีย ไฟ มา นอ, วั้ว เต้า หย่า อ๋อย หฒุ ตี่ง ฒุ์ย ไต๋ ไต่.

16“หาย เต้า หนิ่ม เมี่ยน ต้าย หม่าย ไฟ หนิ่ม ต้าย หธ่อ เยียม นิ่น เญย ปั์ว-เดี๊ย ม่าย เมี่ยน ปวัด, วั้ว เต้า อ๋อย หฒุ ตี่ง ฒุ์ย ไต๋ ไต่ อ๊ะ.

17“หาย เต้า เหฒียว นิ่น เญย เตีย ไฟ มา, อ๋อย หฒุ เฒาะ นิ่น ไต๋ กวั่ง.

18“สี ก๊อง ม่าย เมี่ยน แฑง จ๋า, ม่าย เต้า เฒาะ หละเปย๊ย ฒง ไฟ หล่ง ปั์ว-จ้วน เฑวย, หฒุ มุน วั้ว เต้า หย่า ไม้ ไต่ มป่า เปว๋ย เจี๊ยน โหธว,

19สี ก๊อง ฆะฮ้า นิ่น เจี์ย ซิน บย่า เจี๊ยน ปย๊า ธ้วด กะเหญี่ย แหมง, เบ๊าะ นิ่น วั้ว เต้า ไม้ หฒุ ตี่ง ฒุ์ย. มป่า นิ่น อ๋อย หฒุ ธ้วด เตี๊ย มุน ฒิ่น หย่า หฒ่อ นิ่น หลง ฮนั้ง โล์ วั้ว นอ.

20“สี ก๊อง เมี่ยน หล่ง ปย๊า เบ๊าะ นิ่น เญย โน่ว เก๊า ไฟ โน่ว เป์ย, โน่ว ฯฒฯ เลี่ยม เฒ่ย ไต่ นอ, วั้ว เต้า เฒี้ยว อ๋อย หฒุ ตี่ง ฒุ์ย.

21มป่า เบ๊าะ ลิ์ว อี ปัว ฮนอย หธีง ต้าย ไต่, เบ๊าะ นิ่น วั้ว เต้า ไม้ หฒุ ตี่ง ฒุ์ย เหว่ย หฒุ นิ่น ฒู้ง ด๊อด ม์าย โน่ว เญย ญ่าน หมี่ อ๊ะ.

22“สี ก๊อง ม่าย อี เต้า เมี่ยน เบ๊าะ จ๋า, ธะ-โป่ว เบ๊าะ หฒุ ม่าย เจี๊ยน ซิน เญย มเซียะ ตอน ฯฒฯ ห่อย นิ่น หว่าย ซิน, มป่า มเซียะ ตอน กั้น ไม้ เป๋น หาย หญู่ง, อ๋อย หฒุ ปาด เบ๊าะ เญย เมี่ยน หฒิว วั้ว เต้า มเซียะ ตอน เญย โหฆ ก๊อง อ๋อย หล่ง บัวะ เหฒีย หย่า หฒิว ตุ๋น สี่ เมี่ยน พ้าย บัวะ เหฒีย.

23สี ก๊อง วั้ว เต้า มเซียะ ตอน หฒุ หาย เดา มุน, อ๋อย หฒุ ฮนั้ง น้าย นอ เบ่น. แหม่ง จ๊าว แหม่ง,

24มฒีง จ๊าว มฒีง, ญ่า จ๊าว ญ่า, ปั์ว จ๊าว ปั์ว, เหฒา จ๊าว เหฒา,

25โต์ว ปั๊ว แอ๋ง เฒาะ โต์ว ปั๊ว จ๊าว, ฮั่น จ๊าว ฮั่น, ด๊บ ฝาว ฑย้าม จ๊าว ด๊บ ฝาว ฑย้าม.

26“หาย เต้า เบ๊าะ นิ่น เญย โน่ว เก๊า ไฟ โน่ว เป์ย เญย เหยียด ปูง มฒีง แม่ง นอ, อ๋อย หฒุ ปู๋ง วั้ว เต้า โน่ว ธ้วด โหฒว ปู๋ง ฆอย เญย เมี่ยน เหว่ย จ๊าว นิ่น เญย มฒีง แม่ง.

27หาย เต้า เบ๊าะ นิ่น เญย โน่ว เก๊า ไฟ โน่ว เป์ย เญย ญ่า ดุ๊ด เหยียด นอม, หย่า อ๋อย หฒุ ปู๋ง วั้ว เต้า โน่ว ธ้วด โหฒว ปู๋ง ฆอย เญย เมี่ยน เหว่ย จ๊าว นิ่น เญย ญ่า.

28“สี ก๊อง ม่าย เต้า ง่ง โก๊ว เหธว เต้า มจั่ง ตอน ไฟ มเซียะ ตอน ไต่ นอ, อ๋อย หฒุ หล่ง หละเปย๊ย ฒง วั้ว เต้า ง่ง ไต่, หย่า ไม้ ตู๋ง หญั่น ง่ง เญย อ๊อ. ง่ง เฒี้ยว หย่า ไม้ ฝุน ม่าย ฒุ์ย อ๊ะ.

29มป่า สี ก๊อง วั้ว เต้า ง่ง เหธว เจี๋ย เมี่ยน, เมี่ยน บั๋ว เจี๋ย ง่ง เฒี้ยว, เฒี้ยว หย่า ไม้ หววน, วั้ว เต้า ง่ง แอ๋ง เหธว มจั่ง ตอน ไฟ มเซียะ ตอน ไต่ นอ, อ๋อย หฒุ เฒาะ หละเปย๊ย ฒง วั้ว เต้า ง่ง ไต่. หย่า อ๋อย หฒุ ตี่ง ง่ง เฒี้ยว เญย ฒุ์ย หฒุ ไต๋ ไต่.

30สี ก๊อง เมี่ยน เห่ว ธ้วด หฒัวะ แหม่ง ญ่าน บัวะ เหฒีย, อ๋อย หฒุ หฒิว ตี่ง ต้าย เญย ธ้วด เหว่ย หฒัวะ นิ่น เญย แหม่ง.

31สี ก๊อง ง่ง เหธว เซียะ ไฟ ตอน, อ๋อย หฒุ หฒิว น้าย เต๋ย เล์ย เบ่น.

32สี ก๊อง ง่ง เหธว เมี่ยน เญย โน่ว เก๊า ไฟ โน่ว เป์ย ไต่ นอ, ง่ง เฒี้ยว อ๋อย หฒุ ธ้วด เป๊ด ลู์ง ญ่าน ปุน โน่ว เญย เฒี้ยว หย่า อ๋อย หฒุ เฒาะ หละเปย๊ย ฒง วั้ว เต้า ง่ง โก๊ว ไต่.

33“หาย เต้า คอย ฆอย ค้วด ไฟ เว้ด ค้วด ต้าย หย่า ไม้ ก๊ม, ง่ง ไฟ ล่อ ฯฒฯ ด๊อด ค้วด ไต่,

34ค้วด เญย เฒี้ยว อ๋อย หฒุ ทิบ แซง-คู้ เญย จ๋า-ฒิ่น. ไต่ วั้ว เต้า แซง-คู้ หย่า เป๋น ค้วด-เฒี้ยว เญย หมี่ อ๊ะ.

35“สี ก๊อง ม่าย เต้า เมี่ยน เญย ง่ง เหธว กั้น เต้า เมี่ยน เญย ง่ง ไต่, อ๋อย หฒุ หม่าย นั่ง วั้ว เต้า ง่ง ต้าย, เฒาะ ญ่าน หฒิว จ๋า-ฒิ่น แป้ง ปุน ฆอย. ไต่ วั้ว เต้า ง่ง เญย อ๊อ หย่า ปุน ฆอย.

36สี ก๊อง ฮิ้ว ตุ๊ น้าย เต้า ง่ง เหธว เจี๋ย เมี่ยน ไฟ ง่ง, ง่ง เฒี้ยว หย่า ไม้ หววน, ง่ง เฒี้ยว อ๋อย หฒุ ทิบ ง่ง จ๊าว ง่ง. ไต่ วั้ว เต้า ง่ง เป๋น นิ่น กั้น เญย หมี่ อ๊ะ.

← Chapter 20 Jump to: Chapter 22 →