Exodus 40

Mien Bible (Thai Script) © Thailand Bible Society, 2007

← Chapter 39 Jump to:

1เฒี้ยว ก๊อง บั๋ว โมเซ,

2“ฒี่ หฮลา แซง-เยี้ยด วั้ว ฮนอย, อ๋อย หฒุ ธอง หวุ่ย ปวั้ง เญย ด๊บ-ลิ่ว.

3เฒาะ แล์ง แหง่ง หว่า ฟาง อัน เจี๊ยน ด๊บ-ลิ่ว กะญั์ว แอ๋ง เฒาะ เดีย-แบะ ท้อง เจี๊ยน.

4ต้อ เตี้ย เปียะ ต้าย ตน เจี๊ยน หย่า เฒาะ เตี้ย เญย จา-สี่ อัน เจี๊ยน เตี้ย กู้ หงว่าย. ต้อ ตัง-จ๋า เปียะ ต้าย แอ๋ง เฒาะ ตัง-ฒ้าน อัน เจี๊ยน นิ่น บัว เญย ต๋อง.

5เฒาะ ปั๊ว ฮูง เญย เจียม-เตี้ย ตน เจี๊ยน แล์ง แหง่ง หว่า ฟาง หฑะเฮมียน แหมง, แอ๋ง เฒาะ แบะ ด๊บ-ลิ่ว เญย แก้ง วั้ว คว้าย เดีย แบะ เจี๊ยน.

6“เฒาะ ปั๊ว เหฒี่ย เญย กะน้าย เญย เหฒี่ย-ต้อง ตน เจี๊ยน ต๋อย หวุ่ย ปวั้ง ด๊บ-ลิ่ว เญย แก้ง ด่าง.

7เฒาะ ปุ้น ตน เจี๊ยน เหฒี่ย-ต้อง เหธา ด๊บ-ลิ่ว บุด๋ง, แอ๋ง ตั๊บ เจี๊ยน ววม.

8ธอง หลาด เว่ย เจี๊ยน เปยย ปูง ด๊บ-ลิ่ว, แอ๋ง เฒาะ เดีย แบะ เจี๊ยน หลาด แก้ง.

9“เฒาะ ออน เมี่ยน เญย โย่ว โต๋ ด๊บ-ลิ่ว เหธา ด๊บ-ลิ่ว เญย เหยียด ฒู้ง จา-สี่ ฝูง ปุน เฒี้ยว. หญู่งๆ ฯฒฯ ธีง-เหฑ่ง หมี่ อ๊ะ.

10แอ๋ง หล่ง โย่ว โต๋ เหฒี่ย-ต้อง, เซ ปั๊ว เหฒี่ย เญย กะน้าย เญย เหฒี่ย-ต้อง, เหธา เหฒี่ย-ต้อง เญย เหยียด ฒู้ง จา-สี่, ฯฒฯ สา เหฒี่ย-ต้อง ธีง-เหฑ่ง. เหฒี่ย-ต้อง ฯฒฯ เก้า ธีง-เหฑ่ง เจี๋ย.

11ปุ้น เหธา ปุ้น เญย ท้าบ หย่า อ๋อย หฒุ เฒาะ โย่ว โต๋ เจี๊ยน สา ธีง-เหฑ่ง ฝูง ปุน เยีย, เฒี้ยว.

12“ต้อ อาโลน เหธา นิ่น เญย ตอน เถา ด๊บ-ลิ่ว เญย แก้ง ด่าง, ปุน นิ่น บัว เยียม วั้ว หล่ง ววม หฑาว ซิน.

13เถง อาโลน ฒุ เจี๊ยน โหฒว ไซ เญย ธีง-เหฑ่ง ลุย-โหว, แอ๋ง เฒาะ โย่ว โต๋ เจี๊ยน สา นิ่น ธีง-เหฑ่ง ฝูง ปุน เยีย, เหว่ย โหฒว ไซ เมี่ยน ฟู-สู เยีย.

14ต้อ อาโลน เญย ตอน บัว ต้าย ปุน นิ่น บัว ฒุ เจี๊ยน กะญั์ว วั้ว เหยี่ยม ลุย-ด๊าว.

15เฒาะ โย่ว โต๋ นิ่น บัว ฮนั้ง โต๋ นิ่น บัว เญย เตีย นอ, เหว่ย ปุน นิ่น บัว โหฒว ไซ เมี่ยน ฟู-สู เยีย. ฮนั้ง น้าย โหฒว ไซ ต่อย เจี๋ย ต่อย เหยียด ลิ์ว หฑิบ เจี๊ยน มี่ง.”

16เฒี้ยว ฮนั้ง หาย นอ พ้าย โมเซ โหฒว หาย หญู่ง, โมเซ ฯฒฯ ฮนั้ง วั้ว นอ โหฒว หญู่งๆ.

17เยียม อียิบ เต่ย-ปูง ธ้วด ต้าย ตะเหญ่ย หฮญัง, ฒี่ หฮลา แซง-เยี้ยด วั้ว ฮนอย, นิ่น บัว ธอง หวุ่ย ปวั้ง เญย ด๊บ-ลิ่ว อ๊ะ.

18ธอง ด๊บ-ลิ่ว วั้ว หฒั่น, โมเซ เฒาะ ท้าบ อัน เจี๊ยน, เหลียบ ชอง ทบ เจี๊ยน ท้าบ, หธุน เจี๊ยน กู้ง กั่ง เดี๋ยง แอ๋ง เฒาะ ต่ง ตน เจี๊ยน.

19นิ่น เฒาะ ด๊บ-ลิ่ว กะญั์ว วั้ว เหยี่ยม ธอง เจี๊ยน, แอ๋ง ก๊ม กู้ หงว่าย ฮนั้ง เฒี้ยว พ้าย โมเซ วั้ว นอ.

20นิ่น เฒาะ เฟี้ย เหฒียบ ติ้ว เล์ย-หลัด วั้ว เต๋ย อี คว้าย หละเปย๊ย ตั๊บ เจี๊ยน แล์ง แหง่ง หว่า ฟาง กะญั์ว, เฒาะ แกง เญย เดี๋ยง หธุน เจี๊ยน อี ปูง ฟาง กะเฮลน เญย ควีง, แอ๋ง เฒาะ เหธย เอน เญย เหว่ย เญย ฟาง-หฆาย ก๊ม เจี๊ยน,

21ต้อ ฟาง อัน เจี๊ยน ด๊บ-ลิ่ว กะญั์ว, แอ๋ง เฒาะ วั้ว คว้าย เดีย-แบะ แบะ เจี๊ยน ท้อง แล์ง แหง่ง หว่า ฟาง, หฒิว เฒี้ยว พ้าย โมเซ เญย หว่า โหฒว.

22โมเซ ต้อ เตี้ย มี่ง ตน เจี๊ยน หวุ่ย ปวั้ง เญย ด๊บ-ลิ่ว กะญั์ว, ป๊ะ ปูง แหมง, แบะ แก้ง เดีย กะเหญี่ย แหมง,

23แอ๋ง เฒาะ ฌั้ว หฒิว เหยียด เหญ่ย อัน วั้ว เตี้ย เก๋ง เฒี้ยว, เอย เฒี้ยว ก๊อง เญย หว่า โหฒว.

24นิ่น เฒาะ ตัง-จ๋า อัน เจี๊ยน หวุ่ย ปวั้ง ด๊บ-ลิ่ว กะญั์ว เญย น่าม ปูง แหมง ต๋อย เหฒียง วั้ว นอม เตี้ย,

25แอ๋ง เตี๊ยม ตัง เยียม เฒี้ยว เญย หฑะเฮมียน, หฒิว เฒี้ยว พ้าย โมเซ เญย หว่า โหฒว.

26โมเซ เฒาะ ปั๊ว ฮูง เญย เจียม-เตี้ย อัน เจี๊ยน หวุ่ย ปวั้ง เญย ด๊บ-ลิ่ว กะญั์ว, แบะ แล์ง แหง่ง หว่า ฟาง เญย เดีย หฑะเฮมียน แหมง,

27แอ๋ง ปั๊ว เจี๊ยน ฮูง วั้ว นอม เตี้ย กู้ หงว่าย, หฒิว เฒี้ยว พ้าย โมเซ เญย หว่า.

28นิ่น ฯฒฯ เฒาะ แบะ ด๊บ-ลิ่ว เญย แก้ง วั้ว คว้าย เดีย แบะ เจี๊ยน.

29นิ่น เฒาะ ปั๊ว เหฒี่ย เญย กะน้าย เญย เหฒี่ย-ต้อง อัน เจี๊ยน หวุ่ย ปวั้ง ด๊บ-ลิ่ว เญย แก้ง ด่าง, แอ๋ง ต้อ ปั๊ว เหฒี่ย เญย กะน้าย เหธา ฝ่ง ห่อ เหฒี่ย เญย ล่าง หฒิ อัน เจี๊ยน เหฒี่ย-ต้อง ปั๊ว เหฒี่ย ฮนั้ง เฒี้ยว พ้าย โมเซ เญย หว่า โหฒว วั้ว นอ.

30นิ่น เฒาะ ปุ้น อัน เจี๊ยน หวุ่ย ปวั้ง เญย ด๊บ-ลิ่ว เหธา เหฒี่ย-ต้อง บุด๋ง, แอ๋ง ตั๊บ เจี๊ยน ววม หล่ง หฑาว ปั์ว-เหฒา.

31โมเซ เหธา อาโลน เญย ตอน บัว ฯฒฯ หล่ง น้าย นอม ปุ้น เญย ววม หฑาว ปั์ว-เหฒา.

32นิ่น บัว หาย หฒั่น เปียะ หวุ่ย ปวั้ง เญย ด๊บ-ลิ่ว ไฟ มี่ง วั้ว เหฒี่ย-ต้อง, นิ่น บัว หฑาว เหฑ่ง ปั์ว-เหฒา ฮนั้ง เฒี้ยว พ้าย โมเซ เญย หว่า นอ.

33โมเซ แอ๋ง เว่ย ก๋อม ด๊บ-ลิ่ว เหธา เหฒี่ย-ต้อง, แอ๋ง เฒาะ แบะ หลาด แก้ง เญย เดีย แบะ เจี๊ยน. ฮนั้ง หน่าย, โมเซ โหฒว เหฒียง น้าย เต๋ย หญู่งๆ กง.

34วั้ว หฒั่น ม่าย บ๋วน อม เจี๊ยน หวุ่ย ปวั้ง เญย ด๊บ-ลิ่ว, เฒี้ยว เญย ฌัง-หล่าง ฯฒฯ ปวั๊ง เหฑ่ง ด๊บ-ลิ่ว.

35โมเซ ไม้ ไฮ่ เปียะ หวุ่ย ปวั้ง เญย ด๊บ-ลิ่ว เหว่ย หฒุ บ๋วน อม เจี๊ยน, หย่า ม่าย เฒี้ยว เญย ฌัง-หล่าง เยียม ปวั๊ง.

36อม ด๊บ-ลิ่ว วั้ว ต๊อ บ๋วน หาย หฒั่น เซียว ฝาว, อิสะลาเอน เมี่ยน ฯฒฯ ธ้วด เจ๊า มี่ง อ๊ะ.

37ก๊อง ฮนั้ง บ๋วน ไม้ เซียว ฝาว นอ, นิ่น บัว ไม้ ธ้วด เจ๊า มี่ง. ฒั้ว เถา บ๋วน ฝาว หธีง ต้าย ธ้วด เจ๊า.

38อิสะลาเอน เมี่ยน เยียม นิ่น บัว เญย เจ๊า-ต้าว โหล่ว เมว์ย, ลู่ง ฮนอย หฒั่น นิ่น บัว ปวัด เฒี้ยว เญย บ๋วน เยียม ด๊บ-ลิ่ว กู้ หงว่าย. ลู่ง ม์วน หฒั่น ปวัด โต์ว เยียม บ๋วน กะญั์ว.

← Chapter 39 Jump to: