Exodus 3

Mien Bible (Thai Script) © Thailand Bible Society, 2007

← Chapter 2 Jump to: Chapter 4 →

1โมเซ เถง นิ่น เญย อง-ตา, มีเดียน เมี่ยน เญย ไซ เมี่ยน, เยโท, โก๋ว ปะกี ยู่ง เหธา ยู่ง. โมเซ ฮ่อง ยู่ง เจี๋ย เต่ย-ปูง-ฮวาง มี่ง ไฟ ปูง แหมง เถา ทิน-ฮู่ง เญย บง, โฮเล้บ.

2เยียม วั้ว, เฒี้ยว เญย ฟิน-เมี่ยน หิ่น ธ้วด ฮนั้ง กว๋า โต์ว เยียม เดี๋ยง-ตอน-ฟ้ม กะญั์ว. โมเซ ปวัด โต์ว เยียม วั้ว เดี๋ยง-ตอน-ฟ้ม มป่า ไม้ ปั๊ว ชุย.

3โมเซ เยียม เฮญี้ยว ฮนั้ม, “อา, เยีย มี่ง ฟัด เต๋ย หมั่ง ก๋า น้าย เต๋ย บัวะ ฮ่อง เญย สี่. โต์ว เหว่ย หาย ติ่ว ไม้ เหฒียะ เดี๋ยง-ตอน-ฟ้ม?”

4เฒี้ยว ปวัด โมเซ มี่ง หมั่ง, ทิน-ฮู่ง ฯฒฯ เยียม วั้ว เดี๋ยง-ตอน-ฟ้ม เห่ว, “โมเซ อ้า! โมเซ!” โมเซ เตา, “โอ๋ย! เยีย เยียม น้าย โอ่.”

5ทิน-ฮู่ง บั๋ว นิ่น, “เม่ย ไม้ ตู๋ง ต้าย เก้า ฟัด อ๊ะ. อ๋อย หฒุ ทุด ฆอย เฮ่. เม่ย อี้ หฒั่น โซ้ว เจี๊ยน น้าย เต๋ย ต๋อง เซ ธีง-เหฑ่ง เญย เดา.

6เยีย โหฒว เม่ย เญย อง-ถาย เญย ทิน-ฮู่ง, เซ อับลาฮัม, อีสัก, เหธา ยาโค้บ เญย ทิน-ฮู่ง.” โมเซ ฯฒฯ ปวัง เจี๊ยน เฮมียน, กั้ม เหฑีย ไม้ หมั่ง ทิน-ฮู่ง.

7เฒี้ยว ก๊อง, “เยีย ปวัด เยีย เญย แปะ ฝีง เยียม อียิบ เต่ย-ปูง เสี่ยว เญย โค้ว หน่าน. เยีย หย่า ไฮ์ นิ่น บัว เห่ว หลาย นิ่น บัว หฒุ กง-โปว-เปย๊ย ห่อย นิ่น บัว. เยีย ฮิ้ว ตุ๊ นิ่น บัว เญย โค้ว-ฒี่ง โค้ว-หลัด เซียม เญย.

8เยีย ฯฒฯ เหฌี่ย ต้าย เหฌียว นิ่น บัว เปย๋า ดุ๊ด อียิบ เมี่ยน เญย ปั์ว-เดี๊ย, อ๋อย ต้อ นิ่น บัว ธ้วด อียิบ เต่ย-ปูง เปย๋า มี่ง เยียม นอม หลง ไห่, จั๊ง ไห่ เญย เต่ย-ปูง, เป๋น นอม เดา-โท้ว หลง เญย เต่ย-ปูง. เซ ม่าย คานาอัน เมี่ยน, ฮิดไท เมี่ยน, อาโมไล เมี่ยน, เปลิดซี เมี่ยน, ฮีไว เมี่ยน เหธา เยบุด เมี่ยน เยียม เจี๊ยน เญย เต่ย-ปูง.

9อี้ หฒั่น เยีย ไฮ์ อิสะลาเอน เมี่ยน เญย เฉีย เถา เยีย เญย มน่อม หมี่ อ๊ะ. หย่า ปวัด นิ่น บัว หฒุ อียิบ เมี่ยน ห่อย ตุ๊ โค้ว ไห่.

10อี้ หฒั่น เยีย พ้าย เม่ย มี่ง ฟาโล ฮู่ง วั้ว, อ๋อย เม่ย ต้อ เยีย เญย แปะ ฝีง, อิสะลาเอน เมี่ยน, ธ้วด อียิบ เต่ย-ปูง.”

11มป่า โมเซ ก๊อง บั๋ว ทิน-ฮู่ง, “เยีย เป๋น หาย หญู่ง เมี่ยน หธีง ไฮ่ มี่ง เถา ฟาโล ฮู่ง วั้ว, ต้อ อิสะลาเอน เมี่ยน ธ้วด อียิบ เต่ย-ปูง?”

12ทิน-ฮู่ง ก๊อง, “เยีย อ๋อย เหธา เม่ย เยียม. น้าย โหฒว จั๋ง-โห่ ปุน ธีง เยีย พ้าย เม่ย มี่ง. เม่ย ต้อ อิสะลาเอน เมี่ยน ธ้วด อียิบ เต่ย-ปูง, เม่ย บัว อ๋อย ต้าย น้าย นอม บง หฒั่ง เยีย.”

13โมเซ ก๊อง บั๋ว ทิน-ฮู่ง, “สี ก๊อง เยีย มี่ง เถา อิสะลาเอน เมี่ยน วั้ว, เยีย ก๊อง บั๋ว นิ่น บัว, ‘เม่ย เญย อง-ถาย เญย ทิน-ฮู่ง เห่ว เยีย ต้าย ล์อ เม่ย บัว,’ สี ก๊อง นิ่น บัว หน่าย ก๋า เยีย, ‘นิ่น เญย บั๋ว เห่ว หาย หญู่ง?’ เยีย อ๋อย หฒุ ฮนั้ง หาย นอ เตา นิ่น บัว?”

14ทิน-ฮู่ง ก๊อง บั๋ว โมเซ, “เยีย เญย บั๋ว เห่ว, เหยียด ลิ์ว เฒี่ยง เจี๊ยน วั้ว เต้า. เม่ย อ๋อย หฒุ บั๋ว นิ่น บัว, ‘บั๋ว เห่ว เหยียด ลิ์ว เฒี่ยง เจี๊ยน วั้ว เต้า พ้าย เยีย ต้าย ล์อ เม่ย บัว.’”

15ทิน-ฮู่ง แอ๋ง ก๊อง บั๋ว โมเซ, “อ๋อย หฒุ บั๋ว อิสะลาเอน เมี่ยน, ‘ เฒี้ยว, เม่ย บัว เญย อง-ถาย เญย ทิน-ฮู่ง, เซ อับลาฮัม เญย ทิน-ฮู่ง, อีสัก เญย ทิน-ฮู่ง, เหธา ยาโค้บ เญย ทิน-ฮู่ง, พ้าย เยีย ต้าย ล์อ เม่ย บัว.’ เฒี้ยว เซ เยีย เญย บั๋ว เหว่ย เหยียด ลิ์ว. อ๋อย หฒุ จั๋ง เจี๊ยน ฮนั้ง น้าย นอ เห่ว เหยียด ต่อย ฒุ่น เจี๋ย เหยียด ต่อย.

16“เม่ย อ๋อย หฒุ มี่ง บั๋ว อิสะลาเอน เมี่ยน เญย หฒวัง เมี่ยน โก๋ ต้าย กั๊บ ฒุ้น ก๊อง บั๋ว นิ่น บัว, ‘ เฒี้ยว, เม่ย บัว เญย อง-ถาย เญย ทิน-ฮู่ง, เซ อับลาฮัม, อีสัก, เหธา ยาโค้บ เญย ทิน-ฮู่ง, หิ่น ธ้วด ต้าย ปุน เยีย ปวัด. นิ่น ก๊อง, “เยีย สัม หมั่ง เม่ย บัว, หย่า ปวัด เม่ย บัว เยียม อียิบ เต่ย-ปูง หฒุ นิ่น บัว ฮนั้ง หาย นอ ห่อย เม่ย บัว.

17เยีย แล์ง ต้อ เม่ย บัว ธ้วด อียิบ เต่ย-ปูง, เปย๋า ดุ๊ด เม่ย บัว เญย โค้ว-ฒี่ง โค้ว-หลัด. เยีย อ๋อย ต้อ เม่ย บัว มี่ง เยียม คานาอัน เมี่ยน, ฮิดไท เมี่ยน, อาโมไล เมี่ยน, เปลิดซี เมี่ยน, ฮีไว เมี่ยน เหธา เยบุด เมี่ยน เญย เต่ย-ปูง. เป๋น เดา-โท้ว หลง เญย เต่ย-ปูง.”’

18“อิสะลาเอน เมี่ยน เญย หฒวัง เมี่ยน โก๋ ฒู้ง อ๋อย หมวัง เม่ย เญย หว่า. เม่ย เหธา น้าย เต๋ย เมี่ยน โก๋ อ๋อย หฒุ มี่ง อียิบ ฮู่ง วั้ว ก๊อง บั๋ว นิ่น, ‘ เฒี้ยว, ฮิบลู เมี่ยน เญย ทิน-ฮู่ง, ต้าย ล์อ เยีย บัว. อี้ หฒั่น โท้ ปุน เยีย บัว มี่ง วั้ว เต่ย-ปูง-ฮวาง ปัว ฮนอย เญย เจ๊า-ตี้ง เหว่ย เหฒี่ย ปุน เฒี้ยว เยีย บัว เญย ทิน-ฮู่ง.’

19มป่า เยีย ฮิ้ว ตุ๊ อียิบ ฮู่ง ไม้ คั้ง ปุน เม่ย บัว มี่ง, ธ้วด ลิ์ว ม่าย ต้ม ชะ เญย ปั์ว อ๊าบ นิ่น.

20เยีย อ๋อย ซูง เยีย เญย ปั์ว ธ้วด เยียม อียิบ เมี่ยน บุด๋ง โหฒว ธั้ม-หญู่ง บัวะ ฮ่อง ไห่ เญย สี่. ฆะฮ้า ฮู่ง เตี๋ย อ๋อย ปุน เม่ย บัว มี่ง.

21“เยีย หย่า อ๋อย ปุน อียิบ เมี่ยน ท่าย เม่ย บัว. เม่ย บัว ธ้วด เญย เฒี่ยง โห่ ฯฒฯ ไม้ หฒุ ขูง-ปั์ว แปะ เหฒา เญย มี่ง.

22เต้าๆ มเซียะ ตอน อ๋อย หฒุ โท้ จวั่ง ล์าง จวั่ง เปย๊า เญย อียิบ เมี่ยน เญย เจียม เซียว-เซ้ด, ญ่าน เซียว-เซ้ด, เหธา ลุย-โหว ปุน เม่ย บัว เญย ตอน, เม่ย บัว เญย เซียะ ฒอง เจี๊ยน. ฮนั้ง หน่าย เม่ย บัว ฯฒฯ เฒาะ อียิบ เมี่ยน เญย กะน้าย กว๊าด เจี๊ยน มี่ง เหฑ่ง อ๊ะ.”

← Chapter 2 Jump to: Chapter 4 →