Exodus 8

Mien Bible (Thai Script) © Thailand Bible Society, 2007

← Chapter 7 Jump to: Chapter 9 →

1เฒี้ยว แอ๋ง ก๊อง บั๋ว โมเซ, “เม่ย อ๋อย หฒุ มี่ง บั๋ว ฟาโล ฮู่ง, ‘ เฒี้ยว ฮนั้ง น้าย นอ ก๊อง, “ปู๋ง เยีย เญย แปะ ฝีง เหว่ย ปุน นิ่น บัว มี่ง หฒั่ง เยีย.

2เม่ย ไม้ คั้ง ปู๋ง นิ่น บัว มี่ง นอ, เยีย อ๋อย ปุน แก๊ง ฟ้าน ปวั๊ง เหฑ่ง เม่ย เญย เต่ย-ปูง.

3แก๊ง หย่า อ๋อย ปวั๊ง เหฑ่ง ไนอา ด้าย. แก๊ง หย่า อ๋อย ฝาว มี่ง เปียะ เม่ย เญย ฮู่ง ติ่น, เม่ย เญย เกน, ฝาว เม่ย เญย โหธว, หย่า อ๋อย เปียะ เม่ย เญย เจียน เญย เปย๊า, ฝาว เม่ย เญย แปะ ฝีง เญย ซิน, แอ๋ง เปียะ ฒิ ฌั้ว เญย โหฑ เหธา ไหธ ฌั้ว เญย ปุ้น.

4แก๊ง หย่า อ๋อย ฝาว เม่ย เญย ซิน, เหธา เม่ย เญย แปะ ฝีง เหธา เม่ย เญย หฒวัง เจียน เญย ซิน.”’”

5เฒี้ยว แอ๋ง ก๊อง บั๋ว โมเซ, “บั๋ว อาโลน, ‘เฒาะ ปย๊า-บย่า นั้น เจี๊ยน ซูง เจี๋ย ด้าย, โด๊ะ, ฌ่าง กู้ หงว่าย ปุน แก๊ง ธ้วด ต้าย ปวั๊ง อียิบ เต่ย-ปูง อ๊ะ.’”

6อาโลน ซูง ปั์ว เจี๋ย อียิบ เต่ย-ปูง เญย ววม กู้ หงว่าย. แก๊ง ฯฒฯ ธ้วด ต้าย ปวั๊ง อียิบ เต่ย-ปูง หมี่ อ๊ะ.

7มป่า โหฒว หฮวา-ญิ์น เญย เมี่ยน หล่ง นิ่น บัว เญย ฟ้าด ฟี่ ฮนั้ง เญย โหฒว, ปุน แก๊ง ธ้วด ต้าย เยียม อียิบ เต่ย-ปูง.

8ฟาโล ฮู่ง เห่ว โมเซ เหธา อาโลน ต้าย, ก๊อง บั๋ว นิ่น บัว, “โท้ เม่ย บัว เต๋า เก๋า โจ้ว เฒี้ยว ปุน แก๊ง เปย๋า ฆอย เยีย เหธา เยีย เญย แปะ ฝีง. เยีย ฯฒฯ ปุน เม่ย เญย แปะ ฝีง มี่ง เหฒี่ย ปุน เฒี้ยว อ๊ะ.”

9โมเซ ก๊อง บั๋ว ฟาโล ฮู่ง, “วั้ว หญู่ง, เซว่ย เม่ย ตี่ง เฒี่ยง โห่ อ๋อย เยีย หาย หฒั่น เถง เม่ย เหธา เม่ย เญย เจียน เหธา เม่ย เญย แปะ ฝีง เต๋า เก๋า โท้ เฒี้ยว ปุน แก๊ง เปย๋า, เล่ย เม่ย บัว เหธา เม่ย บัว เญย เปย๊า, ปุน แก๊ง ขูง เยียม วั้ว ไนอา ด้าย ฮนั้ง.”

10ฟาโล ก๊อง, “ฌัง ฮนอย โท้ อ๊ะ.” โมเซ เตา, “เยีย หฒิว เม่ย ก๊อง เญย หว่า เต๋า เก๋า, เม่ย ฯฒฯ ฮิ้ว ตุ๊ ไม้ ม่าย หาย เต้า ฮนั้ง เฒี้ยว, เยีย บัว เญย ทิน-ฮู่ง.

11แก๊ง อ๋อย เปย๋า เม่ย เหธา เม่ย เญย เจียน เหธา เม่ย เญย แปะ ฝีง, เหธา เม่ย บัว เญย เปย๊า. ขูง เหฒ่ง เยียม วั้ว ไนอา ด้าย วั้ว เต๋ย ฮนั้ง.”

12โมเซ เหธา อาโลน เยียม ฟาโล วั้ว ธ้วด มี่ง หมี่ อ๊ะ. โมเซ เหว่ย ธ้วด ต้าย ห่อย ฟาโล น้าย เต๋ย แก๊ง ชะ เต๋า เก๋า โท้ เฒี้ยว เถง.

13เฒี้ยว ฯฒฯ หฒิว โมเซ โท้ เญย หว่า โหฒว. เยียม เปย๊า, เยียม เปย๊า-เฮลน, เยียม เด่ย เญย แก๊ง ไต่ เหฑ่ง.

14อียิบ เมี่ยน เฑ์า แก๊ง-ไต่ ต้าย ดุยๆ เญย. เหยียด นอม เต่ย-ปูง เหฒวย เหฑ่ง.

15มป่า ฟาโล ฮู่ง ปวัด แก๊ง ไต่ เหฑ่ง, นิ่น เญย เฮญี้ยว แอ๋ง แหง่ง อ๊ะ. นิ่น ไม้ คั้ง หมวัง โมเซ เหธา อาโลน เญย หว่า, ฮนั้ง เฒี้ยว ก๊อง นอ.

16เฒี้ยว แอ๋ง ก๊อง บั๋ว โมเซ, “บั๋ว อาโลน ‘เฒาะ ปย๊า-บย่า เบ๊าะ เนีย-บูง. เนีย-บูง ฯฒฯ เป๋น แกง-บูง ปวั๊ง อียิบ เต่ย-ปูง.’”

17นิ่น บัว อี เต้า เอย เจี๊ยน โหฒว. อาโลน ย่าม เจี์ย ปย๊า-บย่า เบ๊าะ เนีย-บูง. เนีย-บูง ฯฒฯ เป๋น แกง-บูง ต้าย ปวั๊ง เมี่ยน เญย ซิน เหธา แซง-คู้ เญย ซิน. อียิบ เต่ย-ปูง เญย เนีย-บูง เป๋น แกง-บูง เหฑ่ง.

18โหฒว หฮวา-ญิ์น เญย เมี่ยน อ๋อย หล่ง นิ่น บัว เญย ฟ้าด โหฒว แกง-บูง หย่า โหฒว ไม้ ธ้วด. แกง-บูง ต้าย ฟยาว เมี่ยน เญย ซิน เหธา แซง-คู้ เญย ซิน.

19โหฒว หฮวา-ญิ์น เญย เมี่ยน ก๊อง บั๋ว ฟาโล, “น้าย เซ ทิน-ฮู่ง โหฒว เญย สี่.” มป่า ฟาโล ฮู่ง เญย เฮญี้ยว แหง่ง ไห่, ไม้ คั้ง หมวัง นิ่น บัว เญย หว่า, ฮนั้ง เฒี้ยว ก๊อง นอ.

20เฒี้ยว แอ๋ง ก๊อง บั๋ว โมเซ, “ฌัง ดอม เจี์ย ซิน เฑี้ยว เญย ฒั้ว เจี๊ยน ฟาโล ฮู่ง เหฌี่ย วั้ว ด้าย เฮลน ฯฒฯ ก๊อง บั๋ว นิ่น, ‘ เฒี้ยว ฮนั้ง น้าย นอ ก๊อง, “อ๋อย หฒุ ปู๋ง เยีย เญย แปะ ฝีง มี่ง, เหว่ย ปุน นิ่น บัว ไฮ่ หฒั่ง เยีย.

21สี ก๊อง เม่ย ไม้ ปู๋ง เยีย เญย แปะ ฝีง มี่ง นอ, เยีย อ๋อย ปุน มู์ง ฟ้าน, ฟยาว เญย ฟยาว, ปย้อม เญย ปย้อม เม่ย เหธา เม่ย เญย เจียน เหธา เม่ย เญย แปะ ฝีง, หย่า เปียะ เม่ย บัว เญย เปย๊า กะญั์ว. อียิบ เมี่ยน เญย เปย๊า, เลี่ยม นิ่น บัว เยียม เญย เดา, มู์ง อ๋อย ปวั๊ง เหฑ่ง.

22“‘“ต้ง วั้ว ฮนอย เยีย อ๋อย เหฆน ธ้วด โกเซน เต่ย-ปูง, เยีย เญย แปะ ฝีง เยียม เญย ต๋อง, ไม้ ปุน ม่าย มู์ง. ฮนั้ง น้าย เม่ย ฯฒฯ ฮิ้ว ตุ๊ เยีย, เฒี้ยว, เยียม น้าย นอม เต่ย-ปูง.

23เยีย ฯฒฯ เหฆน เจี๊ยน เยีย เญย แปะ ฝีง เหธา เม่ย เญย แปะ ฝีง. น้าย เต๋ย บัวะ ฮ่อง เญย จั๋ง-โห่ ฌัง ฮนอย ธ้วด อ๊ะ.”’”

24เฒี้ยว ฯฒฯ ฮนั้ง น้าย โหฒว. มู์ง ฟ้าน ง่มๆ เญย เปียะ ฟาโล เญย ฮู่ง ติ่น เหธา นิ่น เญย เจียน เญย เปย๊า. เต่ย-ปูง หาย เดา ม่าย มู์ง ปวั๊ง เหฑ่ง. หลาย น้าย เต๋ย มู์ง ฟ้าน, ฯฒฯ ห่อย เต่ย-ปูง หว่าย เหฑ่ง หมี่ อ๊ะ.

25ฟาโล ฯฒฯ เห่ว โมเซ เหธา อาโลน ต้าย. นิ่น ก๊อง, “กุ๊น เยียม น้าย นอม เต่ย-ปูง เหฒี่ย ปุน เม่ย เญย ทิน-ฮู่ง อ๊ะ.”

26โมเซ ก๊อง, “ฮนั้ง น้าย โหฒว เซ ไม้ หอบ. เยีย บัว หล่ง เหฒี่ย ปุน เฒี้ยว, เยีย บัว เญย ทิน-ฮู่ง, วั้ว เต๋ย แซง-คู้, อียิบ เมี่ยน ไฮ์ กั้ม เฑี้ย เญย. สี ก๊อง เยีย บัว เยียม นิ่น บัว หมั่ง ตุ๊ ปวัด เญย ต๋อง หล่ง นิ่น บัว กั้ม เฑี้ย เญย แซง-คู้ เหฒี่ย, นิ่น บัว ไม้ เฒ์ย อ๋อย เฒาะ หละเปย๊ย ฒง ไต่ เยีย บัว ไฟ?

27เยีย บัว อ๋อย หฒุ มี่ง ปัว ฮนอย เญย เจ๊า-ตี้ง, เยียม วั้ว เต่ย-ปูง-ฮวาง เหฒี่ย ปุน เฒี้ยว เยีย บัว เญย ทิน-ฮู่ง, ฮนั้ง นิ่น พ้าย เยีย บัว โหฒว วั้ว นอ.”

28ฟาโล ก๊อง, “เยีย ปุน เม่ย บัว มี่ง เต่ย-ปูง-ฮวาง วั้ว, ปุน เม่ย บัว เหฒี่ย ปุน เฒี้ยว, เม่ย บัว เญย ทิน-ฮู่ง, มป่า ไม้ ตู๋ง มี่ง โก. หย่า โท้ เหว่ย เยีย เต๋า เก๋า.”

29โมเซ เตา, “เยีย เยียม น้าย ธ้วด มี่ง ฯฒฯ เถง เม่ย เต๋า เก๋า โท้ เฒี้ยว. ฌัง ฮนอย มู์ง ฯฒฯ เปย๋า เม่ย เหธา เม่ย เญย เจียน เหธา เม่ย เญย แปะ ฝีง. มป่า น้าย หฑุ่น ฮนั้ง หาย ฒู้ง ไม้ ตู๋ง เบี๊ยน เฮญี้ยว แอ๋ง ถุย หว่า, ไม้ ปุน แปะ ฝีง มี่ง เหฒี่ย ปุน เฒี้ยว โอ่.”

30โมเซ ฯฒฯ มี่ง อ๊ะ, แอ๋ง เต๋า เก๋า โท้ เฒี้ยว เถง.

31เฒี้ยว หย่า เอย โมเซ โท้ เญย หว่า โหฒว. มู์ง เปย๋า เหฑ่ง ฟาโล เหธา นิ่น เญย เจียน เหธา นิ่น เญย แปะ ฝีง. ไม้ เหฒ่ง เหยียด นอม อ๊ะ.

32มป่า น้าย หฑุ่น ฟาโล แอ๋ง แหง่ง เจี๊ยน เฮญี้ยว, ไม้ ปุน แปะ ฝีง มี่ง.

← Chapter 7 Jump to: Chapter 9 →