Exodus 22

Mien Bible (Thai Script) © Thailand Bible Society, 2007

← Chapter 21 Jump to: Chapter 23 →

1“สี ก๊อง ม่าย เมี่ยน โหฒว หฒะ หนิ่ม ง่ง ไฟ ปะกี ยู่ง ต้อ มี่ง ไต๋ ไฟ หม่าย, เหยียด เต้า ง่ง อ๋อย หฒุ ปุ้ย ปยา เต้า, เหยียด เต้า ปะกี ยู่ง ปุ้ย เปยย เต้า.

2“สี ก๊อง เมี่ยน ปวัด จั๋น-หฒะ เว้ด ค้วด เปียะ เปย๊า ฯฒฯ เบ๊าะ จั๋น-หฒะ ไต่ นอ, เบ๊าะ จั๋น-หฒะ วั้ว เต้า ไม้ ม่าย ไต๋ เมี่ยน เญย ฒุ์ย.

3มป่า สี ก๊อง บะฮนอย ธ้วด ต้าย นิ่น เบ๊าะ ไต่ นอ, นิ่น ฯฒฯ ม่าย ไต๋ เมี่ยน เญย ฒุ์ย. “จั๋น-หฒะ ฒู้ง อ๋อย หฒุ ปุ้ย นิ่น หนิ่ม เญย กะน้าย. ไม้ ม่าย หาย หญู่ง ปุ้ย นอ, อ๋อย หฒุ หม่าย นิ่น กั้น ต้าย ปุ้ย.

4“สี ก๊อง นิ่น หนิ่ม ต้าย เญย แซง-คู้, ไม้ กุ๊น ง่ง ไฟ ล่อ ไฟ ปะกี ยู่ง, หธ่อ เยียม นิ่น เญย ปั์ว-เดี๊ย, ไม้ แก้ง หม่าย ไม้ แก้ง ไต๋, เหยียด เต้า อ๋อย หฒุ ปุ้ย อี เต้า.

5“หาย เต้า ปู๋ง แซง-คู้ เยียม นิ่น กั้น เญย เด่ย ไฟ อะหงุ่น หฮวีง หญั่น เมี้ย, แซง-คู้ หย่า ซาว มี่ง เปียะ กั้น เต้า เญย เด่ย หญั่น กะน้าย, แซง-คู้ เฒี้ยว อ๋อย หฒุ เฒาะ กั้น เญย เด่ย เก้า หลง เจี๋ย เญย กะน้าย ไฟ อะหงุ่น หฮวีง เก้า หลง เจี๋ย เญย เปี๊ยว ต้าย ทิบ.

6“หาย เต้า เยียม เด่ย ปั๊ว โต์ว, โต์ว หย่า ลั่น ฌิ้ม-เบยาะ, แอ๋ง ลั่น หฒุ เมี่ยน เญย เบย้า ดุย ไฟ ไม้ แก้ง ก๊าด เญย เบย้า ไฟ ปั๊ว เหฑ่ง เฒี่ยง ฑง เด่ย, ปั๊ว โต์ว วั้ว ล่าน เมี่ยน อ๋อย หฒุ ทิบ จุ้น เหฑ่ง.

7“สี ก๊อง ม่าย เมี่ยน ต้อ ญ่าน ไฟ จ๋าย เญย กะน้าย ปุน เต้า จวั่ง ล์าง เญย ก๋อ-โย์ว เถง เซียว, วั้ว เต๋ย กะน้าย หย่า หฒุ จั๋น-หฒะ หนิ่ม หมี่ อ๊ะ, เฒาะ ตุ๊ จั๋น-หฒะ นอ, จั๋น-หฒะ กั้น อ๋อย หฒุ ปุ้ย. เหยียด โก๊ว อ๋อย หฒุ ปุ้ย อี โก๊ว.

8เฒาะ ไม้ ตุ๊ จั๋น-หฒะ นอ, อ๋อย หฒุ ต้อ เซียว กะน้าย วั้ว เต้า เปย๊า-เฒี้ยว มี่ง ตุ๋น สี่ เมี่ยน วั้ว ฒ่า หมั่ง ก๋า, เฒ์ย นิ่น กั้น หนิ่ม ไฟ ไม้ เฒ์ย.

9หาย หฒั่น ม่าย โก๋ เญย สี่, ไม้ กุ๊น เซ หลาย ง่ง, ไฟ ล่อ, ปะกี ยู่ง, ลุย-โหว ไฟ หาย หญู่ง กะน้าย ตี๋ง ล่าย, สี ก๊อง ม่าย เต้า ก๊อง, ‘น้าย เซ เยีย เญย,’ อ๋อย หฒุ ต้อ นิ่น บัว อี เต้า มี่ง เถา ตุ๋น สี่ เมี่ยน วั้ว ตุ๋น. ตี่ง หาย เต้า ต่อง, ต่อง วั้ว เต้า อ๋อย หฒุ ปุ้ย อี โก๊ว.

10“หาย เต้า ต้อ ล่อ ไฟ ง่ง ไฟ ปะกี ยู่ง ไฟ หาย หญู่ง แซง-คู้ หย่า ตุ๊, ปุน เต้า จวั่ง ล์าง เญย ก๋อ-โย์ว เถง นิ่น โก๋ว, สี ก๊อง แซง-คู้ ไต่ ไฟ หฒุ มุน, ไฟ หฒุ เมี่ยน ธ้าง มี่ง หย่า ไม้ ม่าย หาย เต้า ปวัด นอ,

11เถง หมั่ง เญย เมี่ยน อ๋อย หฒุ ตอง เจี๊ยน เฒี้ยว โฮ้ว หว่า ก๊อง, ไม้ เฒ์ย นิ่น หนิ่ม วั้ว เต้า เญย กะน้าย. แซง-คู้ เญย เฒี้ยว กั้น อ๋อย หฒุ แล์ง ด๊อด. เถง โก๋ว วั้ว เต้า ไม้ หฒุ ปุ้ย อ๊ะ.

12มป่า สี ก๊อง เถง โก๋ว เญย เมี่ยน โก๋ว เจี๊ยน เญย เฒี่ยง โห่ หฒุ จั๋น-หฒะ หนิ่ม วั้ว เต้า แซง-คู้ นอ, โก๋ว เญย เมี่ยน อ๋อย หฒุ ทิบ จุ้น.

13สี ก๊อง เฮยี่ย กะน้าย ต้าย หงาด แซง-คู้ ไต่, อ๋อย หฒุ ต้อ เฮยี่ย กะน้าย หญั่น เหฒ่ง เญย อ๊อ ต้าย ปุน แซง-คู้ เฒี้ยว หมั่ง. โก๋ว เญย เมี่ยน ฯฒฯ ไม้ หฒุ ทิบ อ๊ะ.

14“ก๊อง ฮนั้ง ม่าย เมี่ยน ก๊า ล์าง หฒั่ง ก๋อ-โย์ว เญย แซง-คู้ มี่ง หล่ง, แซง-คู้ เญย เฒี้ยว ไม้ ปวัด เญย เฒี่ยง โห่ วั้ว เต้า แซง-คู้ หฒุ มุน ไฟ ไต่ นอ, ก๊า เญย เมี่ยน อ๋อย หฒุ ทิบ จุ้น.

15สี ก๊อง แซง-คู้ เญย เฒี้ยว เหธา เจี๊ยน เยียม นอ, ก๊า หล่ง เญย เมี่ยน ไม้ หฒุ ทิบ. สี ก๊อง เป๋น โก๊ว ต้าย เญย แซง-คู้, แซง-คู้ เฒี้ยว ตุ๊ โก๊ว เญย ญ่าน ตี๊ แซง-คู้ เญย มฆ้อง ฮนั้ง.

16“สี ก๊อง ม่าย เต้า เซียะ ไม้ หฑย่าว เจี๋ย ตอน หย่า ไม้ แก้ง ม่าย หาย เต้า ก๊อง เฒี่ยง นิ่น มป่า ม่าย เต้า มจั่ง ตอน ดั๊ว นิ่น เหธา เปว๋ย นอ, วั้ว เต้า มจั่ง ตอน ฒู้ง อ๋อย หฒุ ธ้วด เล์ย-กีง ญ่าน หย่า อ๋อย หฒุ หล่ง วั้ว เต้า เซียะ โหฒว นิ่น เญย เอ๊า อ๊ะ.

17ก๊อง ฮนั้ง เซียะ เญย เตีย ไม้ คั้ง ปุน วั้ว เต้า มจั่ง ตอน หล่ง, มจั่ง ตอน หธ่อ อ๋อย หฒุ ธ้วด บัวะ ต้ง ไม้ เปว๋ย เจี๋ย ตอน เญย เซียะ เญย เล์ย-กีง ญ่าน.

18“โหฒว ฟ้าด เญย มเซียะ ตอน, อ๋อย หฒุ ไต๋ กวั่ง.

19“หาย เต้า เมี่ยน เหฮยียน แซง-คู้, วั้ว เต้า อ๋อย หฒุ ตี่ง ฒุ์ย ไต๋ ไต่.

20“หาย เต้า ต้อ กะน้าย เหฒี่ย ปุน กั้น เต้า เฒี่ยน, ไม้ เฒ์ย ขูง เหฒี่ย ปุน เฒี้ยว ฮนั้ง, วั้ว เต้า ฒู้ง อ๋อย หฒุ เหมียด อ๊ะ.

21“ไม้ ตู๋ง โหฒว โตะ ห่อย เหธา เม่ย บัว เยียม เญย กั้น ฝีง เมี่ยน, เหว่ย หฒุ ฒิ่น ด่าง เม่ย บัว หย่า เยียม อียิบ เต่ย-ปูง เป๋น กั้น ฝีง เมี่ยน.

22“ไม้ ตู๋ง โหฒว โตะ เอ๊า-กว๊า เหธา กู้ ฮั่น ฝุเจว๊ย.

23สี ก๊อง โหฒว ห่อย นิ่น บัว, นิ่น บัว เห่ว เจี๊ยน โท้ เยีย เถง, เยีย ด่ง หาย ฒู้ง อ๋อย หมวัง นิ่น บัว.

24เยีย ฯฒฯ เฉีย เจี์ย! ไห่, ปุน เม่ย บัว หฒุ หฑุ ด๊าว ไต๋. เม่ย บัว เญย เอ๊า ฯฒฯ เป๋น เอ๊า-กว๊า, เม่ย บัว เญย ฝุเจว๊ย หย่า เป๋น กู้ ฮั่น ฝุเจว๊ย หมี่ อ๊ะ.

25“สี ก๊อง เยียม เม่ย บัว บุด๋ง ม่าย เต้า เยีย เญย แปะ ฝีง จ่ม ไห่, เถง เม่ย บัว ก๊า ญ่าน, ไม้ ตู๋ง โหฒว ฮนั้ง ปู๋ง แฒะ เญย เมี่ยน เห่ว นิ่น ธ้วด เหล่ย ฒิ่น.

26สี ก๊อง เม่ย หล่ง หาย เต้า เญย ต้ม ลุย โหฒว ต๋อง-ต้าว นอ, บะฮนอย ไม้ แก้ง ม้วด อ๋อย หฒุ ถุย หฑวน ปุน นิ่น,

27เหว่ย หฒุ นิ่น ขูง ม่าย น้าย ดุ เต๋ย ต้ม ลุย-ด๊าว ปุ๋ย ซิน ฮนั้ง. นิ่น ไม้ ม่าย นอ, นิ่น หล่ง หาย หญู่ง ห่ม เจี๊ยน เปว๋ย มฌ่อม? สี ก๊อง นิ่น เห่ว เจี๊ยน โท้ เยีย เถง, เยีย ฯฒฯ หมวัง นิ่น เญย หว่า, เหว่ย หฒุ เยีย ค้อ-เลี่ยน เมี่ยน.

28“ไม้ ตู๋ง คี ทิน-ฮู่ง. หย่า ไม้ ตู๋ง เหฒียว โก๋ว แปะ ฝีง เญย เจียน.

29“ไม้ ตู๋ง ไง่, พยัด ฮนอย ต้อ เม่ย บัว เญย ล่าง หฒิ, อะหงุ่น ติ๊ว เหธา กะลั้น โย่ว ฝ่ง ห่อ ปุน เยีย. “อ๋อย หฒุ ต้อ เต้าๆ ตอน-หละเก๊า ต้าย ปุน เยีย.

30เม่ย บัว เญย ง่ง, ยู่ง เหธา ปะกี ยู่ง ตอน เญย ต้าว ทอย ตอน หย่า อ๋อย หฒุ ฝูง ปุน เยีย. ปุน ตอน เหธา มา เยียม ปวั๊ง เสี่ย ฮนอย. เหฮยียด ฮนอย วั้ว ฮนอย อ๋อย หฒุ ฝูง ปุน เยีย.

31“เม่ย บัว โหฒว เยีย เญย ธีง-เหฑ่ง เมี่ยน. เหว่ย น้าย ไม้ ตู๋ง หญั่น เฮยี่ย กะน้าย หงาด เญย แซง-คู้ อ๊อ. อ๋อย หฒุ กวั่ง ปุน จู๊ หญั่น.

← Chapter 21 Jump to: Chapter 23 →