Exodus 39

Mien Bible (Thai Script) © Thailand Bible Society, 2007

1นิ่น บัว หล่ง ปะกี สุย เซ้ด บั๊ว, หลัวะ, ซิ-ห่ง, ดั๊ด เดีย โหฒว ไซ เมี่ยน ฒุ เจี๊ยน เยียม สีง ติ่น ฟู-สู เญย ลุย-โหว. นิ่น บัว เอย เจี๊ยน เฒี้ยว พ้าย โมเซ เญย หว่า โหฒว ธีง-เหฑ่ง เญย ลุย-โหว ปุน อาโลน.

2นิ่น บัว หล่ง เจียม เหธา ปะกี สุย เซ้ด บั๊ว, หลัวะ, ซิ-ห่ง เหธา ล่าม่า สุย-หม่วน โหฒว เอโฟ้ด.

3นิ่น บัว ต๊า เจียม เป๋น เหยียด คว้าย เหยียด คว้าย เปียะ เญย, แอ๋ง จั๊บ ต้าย หม่วน เญย ฮนั้ง สุย นอ, หฒอบ เจี๊ยน ปะกี สุย เซ้ด บั๊ว, หลัวะ, ซิ-ห่ง เหธา ล่าม่า สุย-หม่วน ปุน ปั์ว-เต้า หลง เญย หฒั่ง เมี่ยน ดั๊ด ต้าย.

4นิ่น บัว เหว่ย เอโฟ้ด โหฒว อี ติ้ว กอง ปั่ง เอโฟ้ด เญย อี ปูง เก๊าะ ตี๋ง เจี๊ยน ผาน บะเต้า.

5ไซ เอโฟ้ด วั้ว ติ้ว ไซ จ๊าย เดีย นิ่น บัว หล่ง กะน้าย ฟี่ ฮนั้ง เญย หย่า ฟี่ ฮนั้ง เญย โหฒว. นิ่น บัว หล่ง เจียม, หล่ง ปะกี สุย เซ้ด บั๊ว, หลัวะ, ซิ-ห่ง เหธา ล่าม่า สุย-หม่วน หฒิว เฒี้ยว พ้าย โมเซ.

6นิ่น บัว แอ๋ง เฒาะ วั้ว เต๋ย อี คว้าย จ๋าย เญย หละเปย๊ย-ซิ, แอ๋ง หล่ง เจียม-ฝิน ธิ เหลาะ เหลาะ เจี๊ยน, แอ๋ง ติว เจี๊ยน อิสะลาเอน เญย ตอน เญย บั๋ว ฮนั้ง เหยียน นอ.

7นิ่น บัว แอ๋ง เฒาะ น้าย เต๋ย หละเปย๊ย ตี๋ง เจี๊ยน เอโฟ้ด เญย บะเต้า วั้ว นอม ต๋อง, โหฒว จั๋ง-โห่ ปิ๋ว เม่ง ฝีงๆ อิสะลาเอน เมี่ยน, หฒิว เฒี้ยว พ้าย โมเซ เญย หว่า.

8ปั์ว- เต้า หลง เญย หฒั่ง เมี่ยน โหฒว คว้าย ปวัง หละค้วด เญย กะน้าย, เหธา เอโฟ้ด ฟี่ ฮนั้ง เญย โหฒว. นิ่น หล่ง เจียม เหธา ปะกี สุย เซ้ด บั๊ว, หลัวะ, ซิ-ห่ง เหธา ล่าม่า สุย-หม่วน.

9นิ่น ฑิบ เจี๊ยน เป๋น อี เหยี่ยม เหยียด หนาม เฝย-ปูง,

10แอ๋ง ตี๋ง เจี๊ยน เปยย เลี์ยว หละเปย๊ย-จ๋าย. ตะเยี้ยด เลี์ยว ม่าย นอม ซิ เญย, ฑัง เญย, ม่าย นอม ยั่ง อู๊ง เญย, ม่าย นอม แมง-บยาน.

11ตะเหญ่ย เลี์ยว ม่าย นอม เดี้ยม แมง เญย, ฑัง เญย. ม่าย นอม บั๊น บั๊ว เญย, ฑัง เญย. ม่าย นอม แปะ เญย, เฌ้ยๆ วั้ว.

12ตะฟาม เลี์ยว ม่าย นอม บั๊ว-แมง เญย, ม่าย นอม แปะ เจี๊ยะ เปน เญย, ม่าย นอม หลัวะ, ฑัง เญย.

13ตะเฝย เลี์ยว ม่าย นอม ยั่ง แปะ, ม่าย นอม เซ้ด เฒ้ย แปะ เจี๊ยะ, แอ๋ง ม่าย นอม แมง-โก๋. น้าย เต๋ย หละเปย๊ย หล่ง เจียม ธิ เหลาะ เหลาะ เจี๊ยน.

14เหยียด ฒู้ง ม่าย เหฒียบ เหญ่ย นอม หละเปย๊ย. เหยียด นอม หละเปย๊ย ติว อิสะลาเอน เญย เหยียด เต้า ตอน เญย บั๋ว ฮนั้ง เหยียน นอ, ปิ๋ว เม่ง เหฒียบ เหญ่ย ฝีง อิสะลาเอน เมี่ยน.

15เหว่ย ปวัง หละค้วด เญย กะน้าย นิ่น บัว หล่ง เจียม กิ๊ด บิ์น ต้าย โหฒว หลิ่ม ฮนั้ง ฮลาง นอ.

16แอ๋ง โหฒว อี นอม เจียม-เหลาะ เหธา อี นอม เจียม-ควีง ตี๋ง เจี๊ยน ปวัง หละค้วด วั้ว คว้าย กะน้าย กู้ หงว่าย อี ปูง เก๊าะ.

17เฒาะ วั้ว เต๋ย อี ติ้ว เจียม-หลิ่ม หธุน เปียะ ปวัง หละค้วด วั้ว คว้าย กะน้าย เญย อี ปูง เก๊าะ เญย ควีง.

18หลิ่ม เตว๊ย-เมว์ย ปั่ง บะเต้า วั้ว เต๋ย อี นอม หละเปย๊ย-เหลาะ ญัด เจี๊ยน. ฮนั้ง น้าย นอ, ปวัง หละค้วด วั้ว คว้าย กะน้าย แน้ด เจี๊ยน เอโฟ้ด เญย กอง หฑะเฮมียน แหมง.

19นิ่น บัว แอ๋ง โหฒว อี นอม เจียม-ควีง ตี๋ง เจี๊ยน ปวัง หละค้วด วั้ว คว้าย กะน้าย กะเดี๊ย, วั้ว เต๋ย อี นอม เก๊าะ กะญั์ว แหมง.

20หย่า โหฒว อี นอม เจียม-ควีง ตี๋ง เจี๊ยน เอโฟ้ด หฑะเฮมียน แหมง, ผาน บะเต้า เญย กอง กะเดี๊ย, นิด ไซ เจี๊ยน ไซ จ๊าย เดีย เญย ต๋อง กู้ หงว่าย ติ๊ เตียน, ตี๋ง เจี๊ยน เอโฟ้ด เญย งุด.

21นิ่น บัว แอ๋ง หล่ง ฮลาง-บั๊ว หธุน เจี๊ยน ปวัง หละค้วด วั้ว คว้าย กะน้าย กะเดี๊ย เญย ควีง, ปั่ง เอโฟ้ด เญย ควีง ญัด เจี๊ยน, ปุน ปวัง หละค้วด วั้ว คว้าย กะน้าย เยียม ตี่ง, หฒิว เฒี้ยว พ้าย โมเซ นอ.

22นิ่น บัว แอ๋ง หล่ง ปะกี สุย เซ้ด บั๊ว ดั๊ด เหยี่ยม ลุย-ด๊าว ฒุ เอโฟ้ด กะญั์ว แหมง,

23หย่า เลี่ยว นอม ค้วด เยียม เดีย บุด๋ง โหฒว ลุย-จาง, หล่ง เดีย ห่อน เจี๊ยน ฮวีง ก๋อม เหว่ย ไม้ ปุน ลุย-จาง บ๋าย.

24นิ่น บัว หล่ง ปะกี สุย เซ้ด บั๊ว, หลัวะ, ซิ-ห่ง เหธา ล่าม่า สุย-หม่วน โหฒว หฒิ เลี่ยว เปี๊ยว ตี๋ง ฮวีง ก๋อม ลุย-จั๊วะ.

25แอ๋ง หล่ง เจียม โหฒว ลี่ง ตี๋ง เจี๊ยน,

26เหยียด นอม เจียม-ลี่ง เหฆน นอม หฒิ เลี่ยว เปี๊ยว ตี๋ง ฮวีง ก๋อม ฒุ ฟู-สู เฒี้ยว เญย ลุย-จั๊วะ, หฒิว เฒี้ยว พ้าย โมเซ เญย หว่า.

27นิ่น บัว หย่า หล่ง ล่าม่า เดีย-หม่วน โหฒว กะญั์ว วั้ว เหยี่ยม ลุย-ด๊าว ปุน อาโลน เหธา นิ่น เญย ตอน บัว.

28มฆ้อง-เปว, หมั่ว เหธา โหว-นั้ง นิ่น บัว หล่ง ล่าม่า เดีย-หม่วน โหฒว.

29นิ่น บัว แอ๋ง หล่ง ล่าม่า สุย-หม่วน หฒอบ เจี๊ยน ปะกี สุย เซ้ด บั๊ว, หลัวะ, ซิ-ห่ง, ดั๊ด ติ้ว ไซ จ๊าย เดีย, หย่า ม่าย ปั์ว-เต้า หธงๆ เญย เมี่ยน หธง เจี๊ยน หธง หฒิว เฒี้ยว พ้าย โมเซ เญย หว่า.

30นิ่น บัว แอ๋ง ต๊า คว้าย เจียม โหฒว ธีง-เหฑ่ง จั๋ง-โห่, ดี้ง เจี๊ยน หฑั่ง ฮนั้ง เหยียน นอ ก๊อง, “ธีง-เหฑ่ง เหว่ย เฒี้ยว. ”

31แอ๋ง หล่ง ฮลาง-บั๊ว ตี๋ง เจี๊ยน น้าย คว้าย กะน้าย ญัด เจี๊ยน มฆ้อง-เปว หฒิว เฒี้ยว บั๋ว โมเซ เญย หว่า โหฒว.

32หวุ่ย ปวั้ง ด๊บ-ลิ่ว เญย เหยียด ฒู้ง กง โหฒว เหฒียง เหฑ่ง. เฒี้ยว ฮนั้ง หาย นอ พ้าย โมเซ, อิสะลาเอน เมี่ยน ฮนั้ง วั้ว นอ เอย เจี๊ยน โหฒว หญู่งๆ.

33นิ่น บัว ฯฒฯ ต้อ ด๊บ-ลิ่ว มี่ง โมเซ วั้ว. เซ ต้อ กะญั์ว วั้ว เหยี่ยม ด๊บ-ลิ่ว เหธา ด๊บ-ลิ่ว เญย เหยียด ฒู้ง จา-สี่, กะน้าย-เขา, ด๊บ-ลิ่ว เญย ชอง, กู้ง กั่ง เดี๋ยง, ต่ง เหธา ต่ง เญย ท้าบ.

34ก๊ม ด๊บ-ลิ่ว วั้ว เต๋ย ปะกี ยู่ง ด๊บ หญ่ม ต้าย ซิ เญย เหธา ฟัวะ ต้าย หลง เญย วั้ว เต๋ย แซง-คู้ ด๊บ เหธา แบะ เจี๊ยน แล์ง แหง่ง หว่า ฟาง วั้ว คว้าย เดีย.

35นิ่น บัว แอ๋ง ต้อ แล์ง แหง่ง หว่า ฟาง เหธา แกง ฟาง เญย เดี๋ยง เหธา เหธย เอน เญย เหว่ย วั้ว นอม ฟาง-หฆาย,

36เตี้ย เหธา เตี้ย เญย เหยียด ฒู้ง จา-สี่ เหธา เก๋ง ทิน-ฮู่ง เญย ฌั้ว,

37วั้ว นอม เจียม-ตัง-จ๋า, เหธา ตัง-จ๋า กู้ หงว่าย เญย ตัง-ฒ้าน เหธา ตัง-จ๋า เญย เหยียด ฒู้ง จา-สี่ เหธา ตัง เญย โย่ว,

38ปั๊ว ฮูง เญย เจียม-เตี้ย, ออน เมี่ยน เญย โย่ว, ฮูง, เหธา เปียะ ด๊บ-ลิ่ว วั้ว คว้าย แบะ แก้ง เดีย,

39ต้ง ซิ เหฒี่ย-ต้อง เหธา ต้ง ซิ แพยง, แกง เหฒี่ย-ต้อง เญย เดี๋ยง เหธา เหฒี่ย-ต้อง เญย เหยียด ฒู้ง จา-สี่, ปุ้น เหธา ปุ้น เญย ท้าบ,

40เว่ย หลาด เญย เดีย, หลาด ต่ง, ต่ง เญย ท้าบ, แบะ หลาด แก้ง เดีย, ธอง หลาด เญย ฮลาง, บอง เดา ธอง หลาด เญย ต่ง, หวุ่ย ปวั้ง ด๊บ-ลิ่ว เญย เหยียด ฒู้ง จา-ต๋อง,

41เหธา เยียม สีง ติ่น ฒุ เจี๊ยน ฟู-สู เญย ฌัง-หล่าง ลุย-โหว, เซ อาโลน ไซ เมี่ยน เญย ธีง-เหฑ่ง ลุย-โหว, เหธา นิ่น เญย ตอน บัว ฒุ เจี๊ยน โหฒว ไซ เมี่ยน ฟู-สู เฒี้ยว เญย ลุย-โหว.

42น้าย เต๋ย เหยียด ฒู้ง กง อิสะลาเอน เมี่ยน หฒิว เฒี้ยว พ้าย เญย หว่า โหฒว เหฒียง เหฑ่ง.

43โมเซ ติ๊ม หมั่ง นิ่น บัว เญย เหยียด ฒู้ง กง หย่า ปวัด เซ ต๋อย เหฑ่ง เฒี้ยว พ้าย เญย หว่า, นิ่น ฯฒฯ ปวัง หว่า ปุน นิ่น บัว.

← Chapter 38 Jump to: Chapter 40 →