Exodus 28

Mien Bible (Thai Script) © Thailand Bible Society, 2007

1“อ๋อย หฒุ เห่ว เม่ย เญย ก๋อ, อาโลน, เหธา นิ่น เญย ตอน บัว, นาดับ, อาบีฮู, เอเลอาซา เหธา อิทามา ต้าย เม่ย น้าย, เยียม อิสะลาเอน เมี่ยน บุด๋ง ธ้วด ต้าย เหว่ย โหฒว ไซ เมี่ยน ฟู-สู เยีย.

2อ๋อย หฒุ เหว่ย เม่ย เญย ก๋อ, อาโลน, ลุ่น โหฒว ไซ เญย ธีง-เหฑ่ง ลุย-โหว ปุน นิ่น ฒุ เจี๊ยน ฌัง-หล่าง เญย, เหฑว่ย เญย.

3อ๋อย หฒุ บั๋ว ม่าย ปั์ว-เต้า หลง เญย เมี่ยน, ต้ง เยีย ปุน ม่าย ธง-เม่ง, ม่าย ปั้น เหฒ่ย เญย หฒั่ง เมี่ยน, โหฒว น้าย เต๋ย ลุย-โหว ปุน อาโลน ฒุ เจี๊ยน ออน นิ่น โหฒว ไซ เมี่ยน ฟู-สู เยีย.

4นิ่น บัว อ๋อย หฒุ โหฒว เญย ฒอง-ฒุ เซ ปวัง หละค้วด เญย กะน้าย, เอโฟ้ด, ลุย-ด๊าว, ดั๊ด ต้าย เญย ลุย-แฆะ, มฆ้อง-เปว เหธา ไซ จ๊าย เดีย. อ๋อย หฒุ โหฒว น้าย เต๋ย โหฒว ไซ เญย ธีง-เหฑ่ง ลุย-โหว ปุน เม่ย เญย ก๋อ, อาโลน, เหธา นิ่น เญย ตอน บัว ฒอง เจี๊ยน โหฒว ไซ เมี่ยน ฟู-สู เยีย.

5หฒั่ง เมี่ยน อ๋อย หฒุ หล่ง เจียม เหธา ปะกี สุย เซ้ด บั๊ว, หลัวะ, ซิ-ห่ง, เหธา ล่าม่า เดีย-หม่วน.

6“ปุน ปั์ว-เต้า หลง เญย หฒั่ง เมี่ยน หล่ง เจียม เหธา ปะกี สุย เซ้ด บั๊ว, หลัวะ, ซิ-ห่ง, เหธา ล่าม่า เดีย-หม่วน โหฒว เอโฟ้ด.

7อ๋อย หฒุ โหฒว อี ติ้ว กอง ปั่ง เอโฟ้ด เญย อี ปูง เก๊าะ ตี๋ง เจี๊ยน ผาน บะเต้า.

8ไซ เอโฟ้ด วั้ว ติ้ว ไซ จ๊าย เดีย โหฒว เญย หฒะเอ๋ย เหธา หล่ง เญย กะน้าย หย่า อ๋อย หฒุ ฟี่ ฮนั้ง เญย. อ๋อย หฒุ หล่ง เจียม, หล่ง ปะกี สุย เซ้ด บั๊ว, หลัวะ, ซิ-ห่ง, เหธา ล่าม่า สุย-หม่วน.

9“อ๋อย หฒุ หล่ง อี คว้าย หละเปย๊ย-จ๋าย ซิ เญย, ติว เจี๊ยน อิสะลาเอน เญย ตอน เญย บั๋ว,

10เยียม ตอน-โฮล มี่ง เถา ตอน-ไฝ. เหยียด นอม หละเปย๊ย ติว เจี๊ยน จุ๊ เต้า เญย บั๋ว.

11ปุน ติว หละเปย๊ย-จ๋าย เญย หฒั่ง เมี่ยน ติว เจี๊ยน อิสะลาเอน เญย ตอน เญย บั๋ว เยียม น้าย เต๋ย อี คว้าย หละเปย๊ย-จ๋าย. แอ๋ง หล่ง เจียม-ฝิน ธิ เหลาะ เหลาะ เจี๊ยน.

12หย่า อ๋อย หฒุ เฒาะ น้าย เต๋ย อี คว้าย หละเปย๊ย ตี๋ง เจี๊ยน เอโฟ้ด เญย อี ปูง บะเต้า โหฒว จั๋ง-โห่. ฮนั้ง หน่าย, อาโลน หฒั่นๆ ดาม เจี๊ยน อิสะลาเอน เญย ตอน เญย บั๋ว เยียม เฒี้ยว เญย หฑะเฮมียน เหว่ย ปุน เฒี้ยว จั๋ง นิ่น บัว.

13หล่ง เจียม-ฝิน ธิ เหลาะ เหลาะ เจี๊ยน หละเปย๊ย,

14หย่า หล่ง เจียม กิ๊ด อี ติ้ว บิ์น เนี้ยว เป๋น ฮลาง-เซี้ยด ต้าย เขา เจี๊ยน วั้ว เต๋ย อี นอม หละเปย๊ย-เหลาะ.

15“ปุน ปั์ว-เต้า หลง เญย หฒั่ง เมี่ยน โหฒว คว้าย ปวัง หละค้วด เญย กะน้าย ปุน ไซ เมี่ยน เหว่ย ตุ๋น สี่. อ๋อย หฒุ เหธา เอโฟ้ด ฟี่ ฮนั้ง เญย โหฒว. หล่ง เจียม, ปะกี สุย เซ้ด บั๊ว, หลัวะ, ซิ-ห่ง, เหธา ล่าม่า สุย-หม่วน.

16ฑิบ เจี๊ยน เป๋น อี เหยี่ยม, เหยียด หนาม เฝย-ปูง.

17ตี๋ง เจี๊ยน เปยย เลี์ยว หละเปย๊ย-จ๋าย. ตะเยี้ยด เลี์ยว ม่าย นอม ซิ เญย, ฑัง เญย, ม่าย นอม ยั่ง อู๊ง, ม่าย นอม แมง-บยาน.

18ตะเหญ่ย เลี์ยว ม่าย นอม เดี้ยม แมง, ฑัง เญย, ม่าย นอม บั๊น บั๊ว, ฑัง เญย, ม่าย นอม แปะ เญย, เฌ้ยๆ วั้ว.

19ตะฟาม เลี์ยว ม่าย นอม บั๊ว-แมง, ม่าย นอม แปะ เจี๊ยะ, เปน เญย, ม่าย นอม หลัวะ, ฑัง เญย.

20ตะเฝย เลี์ยว ม่าย นอม ยั่ง แปะ, ม่าย นอม เซ้ด เฒ้ย แปะ เจี๊ยะ, แอ๋ง ม่าย นอม แมง-โก๋. น้าย เต๋ย หละเปย๊ย อ๋อย หฒุ หล่ง เจียม ธิ เหลาะ เหลาะ เจี๊ยน.

21เหยียด ฒู้ง ม่าย เหฒียบ เหญ่ย นอม หละเปย๊ย. เหยียด นอม หละเปย๊ย ติว เจี๊ยน อิสะลาเอน เญย เหยียด เต้า ตอน เญย บั๋ว ฮนั้ง เหยียน นอ, ปิ๋ว เม่ง ฝีงๆ อิสะลาเอน เมี่ยน.

22“อ๋อย หฒุ เหว่ย ปวัง หละค้วด เญย กะน้าย หล่ง เจียม กิ๊ด บิ์น ต้าย โหฒว หลิ่ม ฮนั้ง ฮลาง นอ.

23โหฒว อี นอม เจียม-ควีง ตี๋ง เจี๊ยน ปวัง หละค้วด วั้ว คว้าย กะน้าย กู้ หงว่าย อี ปูง เก๊าะ.

24เฒาะ วั้ว เต๋ย อี ติ้ว เจียม-หลิ่ม เขา เจี๊ยน ปวัง หละค้วด วั้ว คว้าย กะน้าย เญย ควีง.

25หลิ่ม เตว๊ย-เมว์ย ปั่ง บะเต้า วั้ว เต๋ย อี นอม หละเปย๊ย-เหลาะ ญัด เจี๊ยน. ฮนั้ง น้าย นอ ปวัง หละค้วด วั้ว คว้าย กะน้าย แน้ด เจี๊ยน เอโฟ้ด เญย กอง หฑะเฮมียน แหมง.

26แอ๋ง โหฒว อี นอม เจียม-ควีง ตี๋ง เจี๊ยน ปวัง หละค้วด วั้ว คว้าย กะน้าย กะเดี๊ย วั้ว เต๋ย อี นอม เก๊าะ, เยียม เอโฟ้ด เญย กะญั์ว แหมง.

27แอ๋ง โหฒว อี นอม เจียม-ควีง ตี๋ง เจี๊ยน เอโฟ้ด ผาน บะเต้า วั้ว ติ้ว กอง กะเดี๊ย, ไซ เจี๋ย จ๊าย เญย ต๋อง กู้ หงว่าย ติ๊ เตียน, ตี๋ง เจี๊ยน เอโฟ้ด เญย งุด.

28แอ๋ง เฒาะ ฮลาง-บั๊ว หธุน เจี๊ยน ปวัง หละค้วด วั้ว คว้าย กะน้าย กะเดี๊ย เญย ควีง ปั่ง ตี๋ง เอโฟ้ด เญย ควีง ญัด เจี๊ยน ปุน ปวัง หละค้วด วั้ว คว้าย กะน้าย เยียม ตี่ง.

29“อาโลน หาย หฒั่น เปียะ ธีง-เหฑ่ง เญย ต๋อง, นิ่น อ๋อย หฒุ เฒาะ หล่ง เหว่ย ตุ๋น สี่ วั้ว คว้าย กะน้าย ปวัง เจี๊ยน หละค้วด, ต้ง ติว เจี๊ยน อิสะลาเอน เญย ตอน เญย บั๋ว เหว่ย เยียม เฒี้ยว เญย หฑะเฮมียน หฒั่นๆ โหฒว จั๋ง-โห่.

30เฒาะ อุลิม เหธา ทุมมิม, ตั๊บ เจี๊ยน ปวัง หละค้วด วั้ว คว้าย กะน้าย กะญั์ว. อาโลน หาย หฒั่น เยียม เฒี้ยว เญย หฑะเฮมียน เถง อิสะลาเอน เมี่ยน ตุ๋น สี่, ม่าย น้าย เต๋ย กะน้าย เยียม นิ่น เญย หละค้วด.

31“แอ๋ง หล่ง ปะกี สุย เซ้ด บั๊ว ดั๊ด ลุย-ด๊าว ฒุ เอโฟ้ด กะญั์ว แหมง.

32เลี่ยว นอม ค้วด เยียม เดีย บุด๋ง โหฒว ลุย-จาง. ลุย-จาง อ๋อย หฒุ หล่ง ดั๊ด ต้าย เญย เดีย ห่อน เจี๊ยน ปุน ลุย-จาง ไม้ ไฮ่ บ๋าย.

33หล่ง ปะกี สุย เซ้ด บั๊ว, หลัวะ, ซิ-ห่ง โหฒว หฒิ เลี่ยว เปี๊ยว ตี๋ง ก๋อม ลุย-จั๊วะ, แอ๋ง ตี๋ง เจี๊ยน เจียม-ลี่ง เหฆน เจี๊ยน.

34ตี๋ง นอม เจียม-ลี่ง แอ๋ง ตี๋ง นอม หฒิ เลี่ยว เปี๊ยว เหฆน เหยียด หญู่ง เหยียด นอม ฮวีง ก๋อม ลุย-จั๊วะ.

35อาโลน ฟู-สู เฒี้ยว เญย เฒี่ยง โห่ อ๋อย หฒุ ฒุ น้าย เต๋ย ลุย. หาย หฒั่น เปียะ ธีง-เหฑ่ง เญย ต๋อง เยียม เฒี้ยว เญย หฑะเฮมียน ไฟ ธ้วด ต้าย เญย เฒี่ยง โห่ ไฮ์ ลี่ง บุย นอ, ฯฒฯ ไม้ หฒุ ไต่.

36“หล่ง เจียม ต๊า คว้าย เจียม-ป้าย ต้าย ดี้ง เจี๊ยน หฑั่ง ฮนั้ง เหยียน นอ, ก๊อง, “ธีง-เหฑ่ง เหว่ย เฒี้ยว.”

37แอ๋ง หล่ง ฮลาง-บั๊ว ญัด เจี๊ยน น้าย คว้าย กะน้าย, ญัด เจี๊ยน มฆ้อง-เปว หฑะเฮมียน แหมง.

38น้าย คว้าย กะน้าย อ๋อย หฒุ เยียม อาโลน เญย ปย้อง. อิสะลาเอน เมี่ยน ต้อ กะน้าย ต้าย ฝ่ง ห่อ เฒี้ยว, ไม้ กุ๊น ต้อ หาย หญู่ง, สี ก๊อง โหฒว หาย หญู่ง ต่อง เล์ย, อาโลน อ๋อย หฒุ ดาม-ตอง. อาโลน อ๋อย หฒุ หฒั่นๆ ตั้ง เจี๊ยน วั้ว คว้าย กะน้าย, เฒี้ยว ฯฒฯ หอบ เฮญี้ยว เมี่ยน ฝ่ง ห่อ เญย กะน้าย.

39“แอ๋ง หล่ง ล่าม่า สุย-หม่วน ดั๊ด กะญั์ว วั้ว เหยี่ยม ลุย-ด๊าว ปุน อาโลน ฒุ. หย่า หล่ง ล่าม่า เดีย-หม่วน โหฒว มฆ้อง-เปว. แอ๋ง หล่ง ปั์ว-เต้า หลง เญย หฒั่ง เมี่ยน หธง ติ้ว ไซ จ๊าย เดีย.

40หย่า อ๋อย หฒุ เหว่ย อาโลน เญย ตอน บัว โหฒว ลุย, ไซ จ๊าย เดีย, เหธา หมั่ว ปุน นิ่น บัว ฒอง เจี๊ยน ม่าย ฌัง-หล่าง หย่า เหฑว่ย เญย.

41อ๋อย หฒุ เฒาะ น้าย เต๋ย โหฒว ไซ เญย ลุย-โหว ปุน เม่ย เญย ก๋อ, อาโลน, เหธา นิ่น เญย ตอน บัว ฒุ เจี๊ยน, แอ๋ง เฒาะ โย่ว เฮยี้ยด เจี๊ยน สา นิ่น บัว ธีง-เหฑ่ง, ออน นิ่น บัว โหฒว ไซ เมี่ยน ฟู-สู เยีย.

42“อ๋อย หฒุ หล่ง ล่าม่า เดีย โหฒว โหว ท้อง เจี๊ยน ซิน เยียม จ๊าย เหฌี่ย เถา ธั่ม ฒุ่ย.

43อาโลน เหธา นิ่น เญย ตอน บัว หาย หฒั่น เปียะ หวุ่ย ปวั้ง เญย ด๊บ-ลิ่ว ไฟ มี่ง เถา เหฒี่ย-ต้อง แอ๋ง เปียะ ธีง-เหฑ่ง เญย ต๋อง ฟู-สู, นิ่น บัว อ๋อย หฒุ ฒุ เจี๊ยน เหว่ย ปุน ปี๋ง-เธี้ยว ไม้ ธ้วด, ฯฒฯ ไม้ ต่อง เฒี้ยว, ไม้ หฒุ ไต่. “น้าย เซ อาโลน เหธา นิ่น เญย เฒ้ย-ฟุน อ๋อย หฒุ เหยียด ลิ์ว กัน เญย เล์ย.

← Chapter 27 Jump to: Chapter 29 →