Exodus 20

Mien Bible (Thai Script) © Thailand Bible Society, 2007

← Chapter 19 Jump to: Chapter 21 →

1ทิน-ฮู่ง ก๊อง น้าย เต๋ย เหยียด ฒู้ง หว่า.

2“เยีย เซ เฒี้ยว, เม่ย บัว เญย ทิน-ฮู่ง, ต้ง ต้อ เม่ย บัว ธ้วด อียิบ เต่ย-ปูง, หฒุ โหฒว โน่ว เญย เต่ย-ปูง วั้ว เต้า.

3“ธ้วด ลิ์ว เยีย, ไม้ ตู๋ง หฒั่ง กั้น เต้า เฒี่ยน.

4“ไม้ ตู๋ง เหว่ย กั้น โหฒว หาย หญู่ง หมิ่ว-ฝัง. ไม้ กุ๊น เยียม กู้ หงว่าย ลู่ง, เยียม กะเดี๊ย เดา, ไฟ เยียม เดา-เดี๊ย เญย ววม กะญั์ว หาย หญู่ง เญย ฝัง.

5ไม้ ตู๋ง เกว่ย เหฌี่ย ป๋าย น้าย เต๋ย หมิ่ว-ฝัง หย่า ไม้ ตู๋ง หฒั่ง, เหว่ย หฒุ เยีย, เฒี้ยว, เม่ย บัว เญย ทิน-ฮู่ง, แฑง เจี๊ยน เม่ย บัว. เยีย อ๋อย ตี่ง ฑอง เยีย วั้ว เต๋ย เมี่ยน เญย ฒุ์ย, ตี่ง เถา นิ่น บัว เญย ปัว เปยย ต่อย เฒ้ย-ฟุน.

6มป่า หาย เต้า ฮนั้ม เยีย, เอย เจี๊ยน เยีย เญย เล์ย-หลัด โหฒว, เยีย ฯฒฯ ฮนั้ม นิ่น เจี๋ย มี่ง เถา เหยียด ธิน ต่อย.

7“ไม้ ตู๋ง หละไกว้ หล่ง เฒี้ยว, เม่ย บัว เญย ทิน-ฮู่ง, เญย บั๋ว. หาย เต้า หละไกว้ หล่ง เฒี้ยว เญย บั๋ว, เฒี้ยว อ๋อย ตี่ง วั้ว เต้า เญย ฒุ์ย.

8“อ๋อย หฒุ จั๋ง เจี๊ยน หล่ง ตี้ง กง ฮนอย เป๋น นอม ธีง-เหฑ่ง ฮนอย.

9ม่าย จุ๊ ฮนอย โหฒว เม่ย บัว เญย เหยียด ฒู้ง กง.

10มป่า ตะเธี้ยด ฮนอย วั้ว ฮนอย เซ ตี้ง กง ฮนอย เหว่ย ฝูง ปุน เฒี้ยว. วั้ว ฮนอย ไม้ ตู๋ง โหฒว หาย หญู่ง กง. เม่ย บัว กั้น เหธา เม่ย บัว เญย น่าม โญ์ว, เม่ย บัว เญย โน่ว เก๊า โน่ว เป์ย, เม่ย บัว เญย แซง-คู้, ไฟ เยียม เม่ย บัว เญย ฒี่ง เญย กั้น ฝีง เมี่ยน หย่า ไม้ ตู๋ง โหฒว หาย หญู่ง กง.

11เหว่ย หฒุ เฒี้ยว หล่ง จุ๊ ฮนอย เหฒย ลู่ง เหฒย เดา เหฒย ค้อย เหธา เยียม น้าย เต๋ย กะญั์ว เญย เหยียด ฒู้ง กะน้าย. มป่า เสี่ย ฮนอย วั้ว ฮนอย ทิน-ฮู่ง ตี้ง กง อ๊ะ. เหว่ย น้าย เฒี้ยว เหธย ฟุ วั้ว นอม ฮนอย เป๋น นิ่น เญย ธีง-เหฑ่ง ฮนอย.

12“อ๋อย หฒุ ถง หนิ่ม เม่ย บัว เญย เตี๋ย หม่า, เม่ย บัว หธีง ต้าย เฒี่ยง ตุ๊ เสี่ยว ญ่วน ด๊าว เยียม เฒี้ยว, เม่ย บัว เญย ทิน-ฮู่ง, จิว ปุน เม่ย บัว เญย เต่ย-ปูง.

13“ไม้ ตู๋ง ไต๋ เมี่ยน.

14“ไม้ ตู๋ง เหฮยียน เอ๊า เหฮยียน โหฆ.

15“ไม้ ตู๋ง โหฒว หฒะ.

16“ไม้ ตู๋ง โหฒว จ๊า ฒอง-เหฒง ห่อย เมี่ยน.

17“ไม้ ตู๋ง เม้า เมี่ยน เญย เปย๊า. ไม้ ตู๋ง เหมว่ย เจี๊ยะ เมี่ยน เญย เอ๊า, เมี่ยน เญย โน่ว เก๊า โน่ว เป์ย, เมี่ยน เญย ง่ง ไฟ ล่อ ไฟ นิ่น ม่าย เญย หาย หญู่ง กะน้าย.”

18หฒวัง แปะ ฝีง ไฮ์ บะอง บุย, ปวัด ป์อง บะหลี่ง, ไฮ์ หฑัด เญย เฉีย, หย่า ปวัด โต์ว-เสียว เยียม บง ธุดๆ เญย ธ้วด, นิ่น บัว เก้ง! กั้ม เหฑีย ไห่, ซิน หฒิน เหฑ่ง. แปะ ฝีง โซ้ว โกๆ เญย,

19แอ๋ง ก๊อง บั๋ว โมเซ, “โท้ เม่ย กั้น โต่ว หว่า ปุน เยีย บัว ม่าะ! เยีย บัว ฯฒฯ หมวัง. ไม้ ตู๋ง ปุน ทิน-ฮู่ง เหธา เยีย บัว ก๊อง หว่า. เหฑีย เยีย บัว หฒุ ไต่.”

20โมเซ ก๊อง บั๋ว หฒวัง เมี่ยน, “ไม้ ตู๋ง กั้ม เหฑีย ม่าะ! ทิน-ฮู่ง ต้าย เสย เม่ย บัว, ปุน เม่ย บัว หฒั่นๆ กั้ม เหฑีย นิ่น, ท่าย นิ่น, ฯฒฯ ไม้ ป์าม ฒุ์ย.”

21แปะ ฝีง โซ้ว เจี๊ยน วั้ว โก เญย. ขูง โมเซ มี่ง ฟัด ทิน-ฮู่ง เยียม วั้ว นอม มับ แม่ง มับ หฮมวัง เญย ต๋อง ฮนั้ง.

22เฒี้ยว ก๊อง บั๋ว โมเซ, “อ๋อย หฒุ ฮนั้ง น้าย นอ บั๋ว อิสะลาเอน เมี่ยน, ‘เม่ย บัว กั้น ปวัด เยีย เยียม กู้ หงว่าย ลู่ง เหธา เม่ย บัว ก๊อง หว่า.

23เม่ย บัว ไม้ ตู๋ง หล่ง เจียม ไฟ ญ่าน โหฒว หาย หญู่ง เฒี่ยน เญย ฝัง ต้าย เหธา เจี๊ยน เยีย หฒั่ง.

24“‘อ๋อย หฒุ หล่ง เนีย เหว่ย เยีย เหธย เหฒี่ย-ต้อง, หย่า หล่ง เม่ย บัว เญย ง่ง ไฟ ปะกี ยู่ง ไฟ ยู่ง โหฒว ปั๊ว เหฒี่ย เญย กะน้าย เหธา เหฒี่ย เหว่ย จิว ทง เญย กะน้าย. ตะฟ่าน เยียม หาย นอม ต๋อง เยีย ปุน เมี่ยน จั๋ง เยีย เญย บั๋ว, เยีย ฯฒฯ มี่ง วั้ว นอม ต๋อง เหธย ฟุ ปุน เม่ย บัว.

25สี ก๊อง หล่ง หละเปย๊ย เหว่ย เยีย เหธย เหฒี่ย-ต้อง, ไม้ ตู๋ง หล่ง หฒุ ต้าย เญย ไฟ ดี้ง ต้าย เญย หละเปย๊ย. สี ก๊อง หล่ง หฒุ ต้าย ไฟ ดี้ง ต้าย เญย หละเปย๊ย นอ, น้าย เต๋ย หละเปย๊ย ม่าย หวุย อ๊ะ.

26หย่า ไม้ ตู๋ง จ๋า เทย ฝาว เยีย เญย เหฒี่ย-ต้อง. เหฑีย ปี๋ง-เธี้ยว ไฮ่ ธ้วด.’

← Chapter 19 Jump to: Chapter 21 →