Exodus 35

Mien Bible (Thai Script) © Thailand Bible Society, 2007

← Chapter 34 Jump to: Chapter 36 →

1โมเซ เห่ว อิสะลาเอน เญย เหยียด ฒู้ง เมี่ยน กั๊บ ฒุ้น, ก๊อง บั๋ว นิ่น บัว, “น้าย เซ เฒี้ยว หัด เญย หว่า, เห่ว เม่ย บัว เอย เจี๊ยน โหฒว.

2หล่ง จุ๊ ฮนอย โหฒว กง. เสี่ย ฮนอย วั้ว ฮนอย อ๋อย หฒุ ฝุน เป๋น ธีง-เหฑ่ง ฮนอย, เซ ตี้ง กง ฮิด ขวน ฮนอย ฝูง ปุน เฒี้ยว. วั้ว นอม ฮนอย หาย เต้า โหฒว หาย หญู่ง กง, อ๋อย หฒุ ไต๋ ไต่.

3ตี้ง กง ฮนอย, เยียม เม่ย บัว เญย หาย นอม เปย๊า, เลี่ยม ไม้ ตู๋ง ปั๊ว โต์ว.”

4โมเซ ก๊อง บั๋ว อิสะลาเอน เญย หฒวัง เมี่ยน, “ เฒี้ยว ฮนั้ง น้าย นอ พ้าย-โผว.

5อ๋อย หฒุ เยียม เม่ย บัว กั้น ม่าย เญย กะน้าย เฒาะ ต้าย ฝ่ง ห่อ ปุน เฒี้ยว. หาย เต้า ฆอย ฟิม ฆอย เอ๋ย, ปุน วั้ว เต้า ต้อ กะน้าย ต้าย ฝ่ง ห่อ เฒี้ยว, เซ เจียม, ญ่าน, ต้ง ซิ,

6ปะกี สุย เซ้ด บั๊ว, หลัวะ, ซิ-ห่ง, ล่าม่า เดีย-หม่วน, ยู่ง เปยย,

7หญ่ม ต้าย ซิ เญย ยู่ง โก๊ว ด๊บ เหธา ฟัวะ ต้าย หลง เญย แซง-คู้ ด๊บ, ตะซุ เดี๋ยง,

8ปั๊ว ตัง เญย กะลั้น โย่ว, ดาง เญย หลาบ หลิ่ว เหว่ย โหฒว ออน เมี่ยน เญย โย่ว เหธา ฮูง,

9เหยียด หญู่ง จ๋าย ไห่ เญย หละเปย๊ย-ซิ เหธา เหฒีย หญู่ง หละเปย๊ย เหว่ย แน้ด เจี๊ยน ต้ม ไซ เมี่ยน เญย เอโฟ้ด เหธา ปวัง หละค้วด วั้ว คว้าย กะน้าย.

10“อ๋อย หฒุ เห่ว เยียม เม่ย บัว บุด๋ง, ปั์ว-เต้า หลง เญย เหยียด ฒู้ง หฒั่ง เมี่ยน เอย เจี๊ยน เฒี้ยว พ้าย-โผว เญย หว่า โหฒว หญู่งๆ จา-ต๋อง.

11อ๋อย หฒุ โหฒว ด๊บ-ลิ่ว เหธา ด๊บ-ลิ่ว กะญั์ว วั้ว เหยี่ยม เหธา กะเหญี่ย วั้ว เหยี่ยม, ด๊บ-ลิ่ว เญย เงา, ชอง, กู้ง กั่ง เดี๋ยง, ต่ง เหธา ต่ง เญย ท้าบ,

12แล์ง แหง่ง หว่า ฟาง เหธา แกง ฟาง เญย เดี๋ยง, เหธย เอน เญย เหว่ย วั้ว นอม ฟาง-หฆาย, เหธา แบะ ท้อง แล์ง แหง่ง หว่า ฟาง วั้ว คว้าย เดีย,

13เตี้ย เหธา แกง เตี้ย เญย เดี๋ยง เหธา เตี้ย เญย หญู่งๆ จา-สี่, เหธา เก๋ง ทิน-ฮู่ง เญย ฌั้ว,

14ตัง-จ๋า เหว่ย หฒิว ฌัง เหธา ตัง เญย จา-สี่, ตัง-ฒ้าน เหธา ตัง เญย โย่ว,

15ปั๊ว ฮูง เตี้ย เหธา แกง เตี้ย เดี๋ยง, ออน เมี่ยน เญย โย่ว เหธา ฮูง, เปียะ ด๊บ-ลิ่ว เญย แบะ แก้ง เดีย,

16ปั๊ว เหฒี่ย เญย กะน้าย เญย เหฒี่ย-ต้อง, เหธา เหฒี่ย-ต้อง เญย ต้ง ซิ แพยง, แกง เหฒี่ย-ต้อง เญย เดี๋ยง, เหธา เหฒี่ย-ต้อง เญย เหยียด ฒู้ง จา-สี่, ต้ง ซิ ปุ้น เหธา ปุ้น เญย ท้าบ,

17เว่ย ด๊บ-ลิ่ว เญย หลาด เดีย, หลาด ต่ง เหธา ต่ง เญย ท้าบ, แบะ หลาด แก้ง เญย เดีย,

18บอง เดา ธอง ด๊บ-ลิ่ว เญย ต่ง เหธา ธอง หลาด เญย ต่ง เหธา น้าย เต๋ย อี หญู่ง เญย ฮลาง,

19เหธา เยียม สีง ติ่น กะญั์ว ฟู-สู ฒุ เญย ธีง-เหฑ่ง ลุย-โหว, ต้ง อาโลน ไซ เมี่ยน เหธา นิ่น เญย ตอน บัว ฒุ เหว่ย โหฒว ไซ เมี่ยน เญย กง เญย ลุย-โหว เหฑว่ย.”

20โมเซ ก๊อง ลิ์ว, อิสะลาเอน เญย หฒวัง เมี่ยน ปุน หฑาน หฑวน เหฑ่ง หมี่ อ๊ะ.

21หาย เต้า ฆอย ฟิม ฆอย เอ๋ย, ม่าย เฮญี้ยว ธ้วด ฟิม ฝ่ง ห่อ, ฯฒฯ ต้อ กะน้าย ต้าย ฝ่ง ห่อ ปุน เฒี้ยว เหว่ย โหฒว หวุ่ย ปวั้ง เญย ด๊บ-ลิ่ว, เหธา เยียม วั้ว เฉียม หล่ง เหว่ย ฟู-สู เฒี้ยว เญย หญู่งๆ กะน้าย เหธา โหฒว ไซ เญย ธีง-เหฑ่ง ลุย-โหว.

22หาย เต้า ฆอย ฟิม ฆอย เอ๋ย ฝ่ง ห่อ, ไม้ กุ๊น มจั่ง มเซียะ ฯฒฯ ต้าย. เก๊าะ-เมี่ยน ต้อ หญู่งๆ เจียม-เซียว-เซ้ด ต้าย ฝูง ปุน เฒี้ยว, เซ เจียม-เปี้ยง, มน่อม ฮยุน, ปั์ว-โด๊ะ-แฑง, เหธา เหฒีย หญู่ง เจียม-เซียว-เซ้ด.

23หาย เต้า ม่าย ปะกี สุย เซ้ด บั๊ว, หลัวะ, ซิ-ห่ง, ล่าม่า เดีย-หม่วน, ยู่ง เปยย, หญ่ม ต้าย ซิ เญย ยู่ง โก๊ว ด๊บ เหธา ฟัวะ ต้าย หลง เญย แซง-คู้ ด๊บ, นิ่น บัว ฯฒฯ ต้อ ต้าย.

24หาย เต้า ม่าย ญ่าน, ม่าย ต้ง ซิ, ฯฒฯ ต้อ ต้าย ฝ่ง ห่อ ปุน เฒี้ยว. หาย เต้า ม่าย ตะซุ เดี๋ยง หอบ หล่ง โหฒว ตุ๊ หาย หญู่ง ฯฒฯ ต้อ ต้าย.

25ตะฟ่าน ม่าย ปั์ว-เต้า หลง เญย มเซียะ ตอน, นิ่น บัว แปง ปะกี สุย เซ้ด บั๊ว, หลัวะ, ซิ-ห่ง, หย่า แปง ล่าม่า สุย-หม่วน ต้อ ต้าย ฝ่ง ห่อ.

26หาย เต้า มเซียะ ตอน ม่าย เฮญี้ยว โหฒว หย่า ม่าย ปั์ว-เต้า หลง ฯฒฯ แปง ยู่ง เปยย สุย.

27หฒวัง เปย๊ย เฒ้ย ต้อ หญู่ง เหฑว่ย เญย, จ๋าย เญย หละเปย๊ย-ซิ เหธา เหฒีย หญู่ง หละเปย๊ย-จ๋าย ต้าย เหว่ย แน้ด เจี๊ยน ไซ เมี่ยน เญย เอโฟ้ด เหธา ปวัง หละค้วด เญย กะน้าย.

28นิ่น บัว หย่า ต้อ หลาบ หลิ่ว เหธา กะลั้น โย่ว เหว่ย ปั๊ว ตัง, เหว่ย ออน เมี่ยน เญย โย่ว, หย่า เหว่ย เผว ฮูง.

29อิสะลาเอน เมี่ยน มจั่ง มเซียะ, ตะฟ่าน ม่าย เฮญี้ยว ฝ่ง ห่อ เญย เมี่ยน, ฯฒฯ เฒาะ นิ่น บัว ม่าย เญย กะน้าย ต้อ ต้าย ฝ่ง ห่อ ปุน เฒี้ยว เหว่ย หล่ง โหฒว หฒิว เฒี้ยว หล่ง โมเซ พ้าย นิ่น บัว โหฒว เญย เหยียด ฒู้ง กง.

30โมเซ ก๊อง บั๋ว อิสะลาเอน เมี่ยน, “ เฒี้ยว กิ๊น เต้า ยูดา ฝีง เญย เมี่ยน, ฮูอา เญย ฟุน, อุลี เญย ตอน, เบซาเลน.

31ทิน-ฮู่ง ปุน เบซาเลน ม่าย สีง ลี่ง ปวั๊ง เหฑ่ง, ปุน นิ่น ม่าย ปั์ว-เต้า หลง, ม่าย ปั้น เหฒ่ย หย่า ม่าย ธง-เม่ง โหฒว หญู่งๆ กง เญย หฒั่ง เมี่ยน,

32ไฮ่ ต๊า ธ้วด หฒะเอ๋ย หล่ง เจียม หล่ง ญ่าน หล่ง ต้ง ซิ โหฒว หญู่งๆ เหฑว่ย เญย กะน้าย.

33นิ่น ไฮ่ ก๊าด หละเปย๊ย-จ๋าย, ธิ เหลาะ เหลาะ เจี๊ยน, ไฮ่ โหฒว เดี๋ยง-หฒั่ง ติว เปี้ยง ติว เปี๊ยว, เซ ม่าย ปั์ว-เต้า หลง, ไฮ่ โหฒว ตุ๊ หญู่งๆ.

34เฒี้ยว หย่า ปุน เบซาเลน เหธา ดาน ฝีง, อาหิสะมัก เญย ตอน, โอโฮลีอับ, ม่าย ปั้น เหฒ่ย ไฮ่ หฌาว เมี่ยน.

35เฒี้ยว ปุน นิ่น บัว ม่าย ปั้น เหฒ่ย ไฮ่ โหฒว หญู่งๆ กง. นิ่น บัว ม่าย ปั์ว-เต้า โหฒว หฒั่ง, ไฮ่ ฮนั้ม ธ้วด หฒะเอ๋ย โหฒว ธั้ม-หญู่ง, ไฮ่ หล่ง ปะกี สุย เซ้ด บั๊ว, หลัวะ, ซิ-ห่ง เหธา ล่าม่า สุย-หม่วน หธง เปี้ยง หธง เปี๊ยว หย่า ดั๊ด เดีย. นิ่น บัว ม่าย ปั์ว-เต้า โหฒว หญู่งๆ กง หย่า ไฮ่ ฮนั้ม ธ้วด หฒะเอ๋ย โหฒว หญู่งๆ เญย โมว.

← Chapter 34 Jump to: Chapter 36 →