Exodus 37

Mien Bible (Thai Script) © Thailand Bible Society, 2007

← Chapter 36 Jump to: Chapter 38 →

1เบซาเลน หล่ง ตะซุ เดี๋ยง โหฒว แล์ง แหง่ง หว่า ฟาง, ด๊าว อี เดาะ เปี๋ยน, ฮลัง เดาะ เปี๋ยน, จั๊ง เดาะ เปี๋ยน,

2แอ๋ง หล่ง เจียม ปวัง เจี๊ยน กะเหญี่ย เหธา กะญั์ว. นิ่น แอ๋ง หล่ง เจียม โหฒว ปิน ฮวีง ก๋อม.

3นิ่น โต๋ เปยย นอม เจียม-ควีง ตี๋ง เจี๊ยน เปยย เจี๊ยะ ฟาง-เหฒา เญย กู้ หงว่าย, เหยียด ปูง ม่าย อี นอม.

4นิ่น หล่ง ตะซุ เดี๋ยง โหฒว อี ติ้ว แกง ฟาง เญย เดี๋ยง หย่า ปวัง เจี๊ยน เจียม,

5เฒาะ ต้าย หธุน เจี๊ยน ฟาง กะเฮลน เญย ควีง เหว่ย แกง ฟาง.

6นิ่น หล่ง เจียม โหฒว เหธย เอน เญย เหว่ย วั้ว นอม ฟาง-หฆาย, ด๊าว อี เดาะ เปี๋ยน, จั๊ง เดาะ เปี๋ยน.

7นิ่น แอ๋ง หล่ง เจียม ต๊า อี เต้า เคลูบิม อัน อี ปูง ฟาง-ต้าว.

8เหยียด ปูง ม่าย เต้า. นิ่น หย่า ปุน อี ปูง ฟาง-ต้าว เญย เคลูบิม เฒี่ยง เจี๊ยน เหธา ฟาง-หฆาย เป๋น เหยียด คว้าย หมี่ อ๊ะ.

9น้าย เต๋ย อี เต้า เคลูบิม เฮมียน ต๋อย เฮมียน, ยัง ด๊าด เฑีย เจี๊ยน ฟาง กู้ หงว่าย. อี เต้า ฒู้ง หมั่ง เจี๊ยน ฟาง-หฆาย.

10นิ่น แอ๋ง หล่ง ตะซุ เดี๋ยง โหฒว นอม เตี้ย, ด๊าว อี เดาะ, จั๊ง เหยียด เดาะ, ฮลัง เดาะ เปี๋ยน,

11แอ๋ง หล่ง เจียม ปวัง เจี๊ยน เตี้ย, หย่า หล่ง เจียม โหฒว ปิน ฮ่อม ก๋อม เตี้ย เฮลน.

12นิ่น หล่ง เจียม ฮ่อม เตี้ย เฮลน ฝาว เหยียด แว่ง ฒ้าง ฮลัง, แอ๋ง หล่ง เจียม โหฒว ปิน ฮวีง ก๋อม.

13นิ่น แอ๋ง โต๋ เปยย นอม เจียม-ควีง ตี๋ง เจี๊ยน เปยย นอม เตี้ย เก๊าะ กะเฮลน, ต้ง แหฒง เหฒา วั้ว นอม ต๋อง.

14น้าย เต๋ย ควีง ตี๋ง นิด เจี๊ยน ฮ่อม เตี้ย วั้ว เต๋ย ต๋อง เหว่ย หธุน แกง เตี้ย เญย เดี๋ยง.

15แกง เตี้ย เญย เดี๋ยง นิ่น หล่ง ตะซุ เดี๋ยง ปวัง เจี๊ยน เจียม.

16นิ่น หล่ง เจียม โหฒว เตี้ย เญย จา-ต๋อง. ม่าย เปี้ยน, ต้ม ปะเกน, หฑ่อม, เหธา เธี้ย ติ๊ว เญย งว่า แป้ง.

17นิ่น หย่า หล่ง เจียม โหฒว นอม ตัง. ตัง-จ๋า เหธา ตัง-ซิน นิ่น ต๊า ต้าย. ตัง เญย ฒ้าน เหธา เปี้ยง เญว์ย เปี้ยง เอย หย่า จวั่ง น้าย ดุ้น เจียม ต๊า ธ้วด ต้าย.

18ตัง-ซิน ปุน โหฒว จุ๊ หธา ฆว่า, เหยียด ปูง ม่าย ปัว หธา.

19น้าย เต๋ย ฆว่า, เหยียด หธา ม่าย ปัว นอม ฒ้าน ฮนั้ง อันมัน เปี้ยง นอ. นอมๆ ม่าย เปี้ยง เญว์ย เหธา เปี้ยง เอย. ตะเหญ่ย หธา ม่าย ฟี่ ฮนั้ง เญย. เยียม ตัง-ซิน ธ้วด เญย จุ๊ หธา ฟี่ ฮนั้ง เหฑ่ง.

20ตัง-ซิน ม่าย เปยย นอม ฒ้าน ฮนั้ง อันมัน เปี้ยง นอ, นอมๆ ม่าย เปี้ยง เญว์ย เหธา เปี้ยง เอย.

21จุ๊ หธา ฆว่า, หธาๆ ฆว่า กอน กะเดี๊ย แหมง ม่าย นอม เปี้ยง เญว์ย.

22เปี้ยง เญว์ย เหธา หธาๆ ฆว่า, เหธา ตัง-จ๋า, ตัง-ซิน, จวั่ง เหยียด ดุ้น เจียม ต๊า ธ้วด ต้าย เป๋น เหยียด นอม.

23นิ่น บัว แอ๋ง หล่ง เจียม โหฒว เสี่ย นอม ตัง-ฒ้าน เหธา จั๊บ ตัง-โธ้ เญย ฌิ้ว เหธา อัน ฌิ้ว เญย เปี้ยน.

24ตัง เหธา ตัง เญย จา-สี่ หล่ง หญี่ เหฒียบ เยี้ยด จ้อย เจียม ต๊า ต้าย.

25นิ่น แอ๋ง หล่ง ตะซุ เดี๋ยง โหฒว นอม ปั๊ว ฮูง เตี้ย, เหยียด เดาะ เฝย-ปูง, ด๊าว เหยียด เดาะ, จั๊ง เหยียด เดาะ, ฮลัง อี เดาะ. เปยย ปูง เก๊าะ เญย จอง เหธา เตี้ย จวั่ง ด้ง เดี๋ยง โหฒว ต้าย.

26กู้ หงว่าย แหมง เตี้ย, เปยย ปูง เตี้ย เฮลน เหธา จอง, นิ่น หล่ง เจียม ปวัง ดิบ เหฑ่ง หย่า หล่ง เจียม โหฒว ปิน ฮวีง ก๋อม เตี้ย เฮลน.

27นิ่น หล่ง เจียม แอ๋ง โหฒว อี นอม เจียม-ควีง ตี๋ง เจี๊ยน อี ปูง กะเฮลน, ปิน กะเดี๊ย แหมง, เหว่ย หธุน แกง เตี้ย เญย เดี๋ยง.

28นิ่น แอ๋ง หล่ง ตะซุ เดี๋ยง โหฒว แกง เตี้ย เดี๋ยง หย่า ปวัง เจี๊ยน เจียม.

29นิ่น ปุน เต้า โหฒว ววม-ดาง เญย หฒั่ง เมี่ยน เผว ออน เมี่ยน เญย ธีง-เหฑ่ง โย่ว เหธา ธีง-เหฑ่ง ฮูง.

← Chapter 36 Jump to: Chapter 38 →