Exodus 18

Mien Bible (Thai Script) © Thailand Bible Society, 2007

← Chapter 17 Jump to: Chapter 19 →

1โมเซ เญย อง-ตา, มีเดียน เต่ย-ปูง เญย ไซ เมี่ยน, เยโท, ไฮ์ ก๊อง ทิน-ฮู่ง ฮนั้ง หาย นอ เถง โมเซ เหธา ทิน-ฮู่ง เญย แปะ ฝีง, อิสะลาเอน เมี่ยน, เญย เหยียด ฒู้ง เจ๊า-โหล่ว, หย่า ไฮ์ ก๊อง เฒี้ยว ฮนั้ง หาย นอ ต้อ นิ่น บัว ธ้วด อียิบ เต่ย-ปูง.

2ฒิ่น ด่าง โมเซ ฝูง นิ่น เญย เอ๊า, สิบโปลา, หฑวน. นิ่น เญย อง-ตา, เยโท, ฒิบ หมี่ อ๊ะ. อี้ หฒั่น เยโท ต้อ เจี๊ยน โมเซ เญย เอ๊า

3เหธา อี เต้า ตอน มี่ง โมเซ วั้ว. ม่าย เต้า ตอน, บั๋ว เห่ว เกโซม, (เหว่ย หฒุ โมเซ ก๊อง, “เยีย เซ กั้น ฝีง เมี่ยน ต้าย เยียม น้าย นอม เต่ย-ปูง.”)

4ม่าย เต้า เห่ว เอลีเยเซ, (เหว่ย หฒุ โมเซ ก๊อง, “เยีย เญย เตีย เญย ทิน-ฮู่ง เถง เยีย. นิ่น เหฌียว เยีย เล่ย ดุ๊ด ฟาโล เญย หฑุ ด๊าว.”)

5โมเซ เญย อง-ตา, เยโท, ต้อ โมเซ เญย เอ๊า เหธา อี เต้า ตอน มี่ง เถา เต่ย-ปูง-ฮวาง เยียม ทิน-ฮู่ง เญย บง, โมเซ ธอง ด๊บ-ลิ่ว เญย ต๋อง วั้ว.

6เยโท ปุน หว่า มี่ง บั๋ว โมเซ, “เม่ย เญย อง-ตา, เยโท, ต้อ เม่ย เญย เอ๊า เหธา เม่ย เญย อี เต้า ตอน ต้าย ล์อ เม่ย อ๊ะ.”

7โมเซ ฯฒฯ ธ้วด มี่ง ฒิบ นิ่น เญย อง-ตา, โด๊ะ เหฌี่ย ป๋าย หย่า ฒม นิ่น. ล่าน เหธา ล่าน ก๊อง ลิ์ว หวุ่ย ปวั้ง หว่า, นิ่น บัว เปียะ ด๊บ-ลิ่ว หมี่ อ๊ะ.

8โมเซ ก๊อง เฒี้ยว เหว่ย อิสะลาเอน เมี่ยน โหฒว ปุน ฟาโล เหธา อียิบ เมี่ยน เญย เหยียด ฒู้ง สี่ ปุน นิ่น เญย อง-ตา หมวัง. นิ่น หย่า ก๊อง นิ่น บัว เยียม ด๊าม-เจ๊า ปวั้ง หฒุ เญย เหยียด ฒู้ง โค้ว หน่าน,, หย่า ก๊อง เฒี้ยว ฮนั้ง หาย นอ เหฌียว นิ่น บัว.

9เยโท ไฮ์ ลิ์ว เฒี้ยว ฮนั้ง น้าย นอ เถง อิสะลาเอน เมี่ยน ตุ๊ หลง, เหฌียว นิ่น บัว เปย๋า ดุ๊ด อียิบ เมี่ยน เญย ปั์ว-เดี๊ย, นิ่น เก้ง อะเฮน้ย ไห่.

10นิ่น ก๊อง, “เธง เฒี้ยว, ต้ง ต้อ เม่ย บัว ธ้วด ฟาโล ฮู่ง เหธา อียิบ เมี่ยน เญย ปั์ว-เดี๊ย, หย่า เถง นิ่น เญย แปะ ฝีง ไม้ หฒุ โหฒว อียิบ เมี่ยน เญย โน่ว.

11อี้ หฒั่น เยีย ฮิ้ว ตุ๊ เฒี้ยว เก้า โฮล เจี๋ย หม่าน เฒี่ยน เหว่ย หฒุ นิ่น ฮนั้ง หาย นอ โหฒว ปุน โหฒว เหมา ห่อย อิสะลาเอน เมี่ยน วั้ว เต๋ย.”

12โมเซ เญย อง-ตา, เยโท, ฯฒฯ ต้อ ปั๊ว เหฒี่ย เญย เหธา ฝ่ง ห่อ เหฒี่ย เญย กะน้าย ต้าย เหฒี่ย ปุน ทิน-ฮู่ง. อาโลน เหธา อิสะลาเอน เมี่ยน เญย หฒวัง เมี่ยน โก๋ ต้าย เหธา โมเซ เญย อง-ตา เยียม ทิน-ฮู่ง เญย หฑะเฮมียน หญั่น หฮนาง.

13ตะเหญ่ย ฮนอย โมเซ เฒว์ย เจี๊ยน วั้ว เถง นิ่น เญย แปะ ฝีง ตุ๋น สี่. แปะ ฝีง โซ้ว เว่ย ก๋อม โมเซ ลู่ง ดอม เถา ลู่ง หฮมวัง.

14โมเซ เญย อง-ตา ปวัด โมเซ อ๋อย หฒุ เถง นิ่น เญย แปะ ฝีง โหฒว น้าย เต๋ย เหยียด ฒู้ง สี่, นิ่น ฯฒฯ ก๊อง, “น้าย, เม่ย ฮนั้ง หาย นอ โหฒว เถง เม่ย เญย แปะ ฝีง? น้าย เต๋ย เมี่ยน ลู่ง ดอม โซ้ว เว่ย เจี๊ยน เม่ย เถา หฮมวัง. โหฒว หาย หญู่ง เม่ย กั้น ฮนั้ง เฒว์ย เจี๊ยน เถง นิ่น บัว เบ่น สี่?”

15โมเซ เตา นิ่น เญย อง-ตา, “เยีย ฮนั้ง น้าย นอ โหฒว เหว่ย หฒุ แปะ ฝีง ต้าย ล์อ เยีย โท้ หน่าย ทิน-ฮู่ง.

16หาย เต้า ม่าย สี่ นิ่น บัว ต้าย ล์อ เยีย, เยีย เถง นิ่น บัว พ้าย หย่า ปุน นิ่น บัว ฮิ้ว ตุ๊ ทิน-ฮู่ง เญย เล์ย-หลัด เหธา เล์ย.”

17โมเซ เญย อง-ตา ก๊อง, “เม่ย ฮนั้ง น้าย นอ โหฒว เซ ไม้ หย่าว.

18เม่ย เหธา ต้าย ล์อ เม่ย น้าย เต๋ย เมี่ยน กุ๊น โหฒว กุ๊น โค้ว เจี๊ยน เหฌี่ย. กง ด่ง น้าย เฮนี้ย เซ เจี๋ย ด่าง เม่ย เญย ชะ. เม่ย กั้น ฮนั้ง โหฒว ไม้ ฮี่ง เหลาะ.

19เม่ย หมวัง เยีย ม่าะ! เยีย อ๋อย เถง เม่ย ต๊า หฒะเอ๋ย. โท้ ทิน-ฮู่ง เหธา เม่ย เยียม. เม่ย อ๋อย หฒุ ตี๊ แปะ ฝีง เยียม ทิน-ฮู่ง เญย หฑะเฮมียน, เฒาะ นิ่น บัว เญย สี่ บั๋ว นิ่น.

20อ๋อย หฒุ หฌาว แปะ ฝีง ฮิ้ว ตุ๊ ทิน-ฮู่ง เญย เล์ย-หลัด เหธา เล์ย. หย่า อ๋อย หฒุ พ้อ เม่ง ปุน นิ่น บัว ฮิ้ว ตุ๊ เยียม น้าย เสย หฒั่ง ฮนั้ง หาย นอ เยียม, ฮนั้ง หาย นอ โหฒว.

21มป่า เม่ย อ๋อย หฒุ เยียม แปะ ฝีง บุด๋ง กิ๊น ม่าย ปั้น เหฒ่ย เญย เมี่ยน, เซ กิ๊น ท่าย ทิน-ฮู่ง เญย เมี่ยน, เฮญี้ยว หฒีง เญย, ไม้ หญั่น ญ่าน หฮมวัง เญย เมี่ยน. อ๋อย หฒุ พ้าย นิ่น บัว โหฒว เปย๊ย เฒ้ย. ม่าย เต๋ย กุ๊น เหยียด ธิน เต้า, ม่าย เต๋ย กุ๊น เหยียด แป๊ะ เต้า, ม่าย เต๋ย กุ๊น ฮม์ เหฒียบ เต้า, ม่าย เต๋ย กุ๊น เหฒียบ เต้า.

22อ๋อย หฒุ ปุน นิ่น บัว หฒั่นๆ เถง แปะ ฝีง เบ่น สี่. ม่าย ต้ม สี่ ปุน นิ่น บัว ต้าย ล์อ เม่ย. ไฝ-ฟิ้ว สี่ นิ่น บัว กั้น เบ่น. ฮนั้ง หน่าย เม่ย เญย กง ฯฒฯ เฮง เต๋ย เหว่ย หฒุ นิ่น บัว เถง เจี๊ยน ดาม.

23สี ก๊อง เม่ย ฮนั้ง น้าย นอ โหฒว, ทิน-ฮู่ง หย่า ฮนั้ง น้าย นอ พ้าย เม่ย โหฒว, เม่ย ฯฒฯ ไม้ หนั่ง โค้ว อ๊ะ. น้าย เต๋ย แปะ ฝีง หฑวน, นิ่น บัว หย่า แป้ง ออน เญย หฑวน นิ่น บัว เยียม เญย ต๋อง.”

24โมเซ หมวัง นิ่น เญย อง-ตา ก๊อง เญย หว่า หย่า หฒิว นิ่น ก๊อง เญย หญู่งๆ เอย เจี๊ยน โหฒว.

25โมเซ ฯฒฯ เยียม อิสะลาเอน เญย หฒวัง เมี่ยน บุด๋ง กิ๊น ธ้วด ม่าย ปั้น เหฒ่ย เญย เมี่ยน หย่า ออน นิ่น บัว โหฒว เปย๊ย เฒ้ย. ม่าย เต๋ย กุ๊น เหยียด ธิน เต้า, ม่าย เต๋ย กุ๊น เหยียด แป๊ะ เต้า, ม่าย เต๋ย กุ๊น ฮม์ เหฒียบ เต้า, ม่าย เต๋ย กุ๊น เหฒียบ เต้า.

26น้าย เต๋ย เมี่ยน หฒั่นๆ เถง เบ่น สี่. อะ ตุ๊ ตุ๋น เญย สี่ นิ่น บัว ต้อ มี่ง ปุน โมเซ เบ่น. ไฝ-ฟิ้ว สี่ นิ่น บัว กั้น เบ่น.

27โมเซ ฯฒฯ ฝูง นิ่น เญย อง-ตา ธ้วด เจ๊า หฑวน. นิ่น เญย อง-ตา ฯฒฯ หฑวน นิ่น กั้น เญย เต่ย-ปูง.

← Chapter 17 Jump to: Chapter 19 →