Exodus 14

Mien Bible (Thai Script) © Thailand Bible Society, 2007

← Chapter 13 Jump to: Chapter 15 →

1เฒี้ยว แอ๋ง บั๋ว โมเซ,

2“บั๋ว อิสะลาเอน เมี่ยน ต๋าว ฆาง หฑวน ธอง ด๊บ-ลิ่ว เยียม ปีหะหิโล้ด วั้ว ด่าง แหมง, มิกโดน เหธา ค้อย บุด๋ง. อ๋อย หฒุ เหลียบ เธี้ยง เยียม บาอันเซโฟน ต๋อย-หง่าน, นิด ค้อย-เฮลน.

3ฟาโล ฮู่ง ฯฒฯ หล่าย, ‘อิสะลาเอน เมี่ยน เยียม วั้ว เต่ย-ปูง โย่ว มี่ง โย่ว ต้าย ฮนั้ง. หย่า ม่าย เต่ย-ปูง-ฮวาง ขวน เจี๊ยน นิ่น บัว.’

4เยีย อ๋อย ปุน ฟาโล เญย เฮญี้ยว แหง่ง, นิ่น อ๋อย หฒุ่น อิสะลาเอน เมี่ยน. มป่า เยีย อ๋อย ฮี่ง เจี๋ย ฟาโล เหธา นิ่น เญย หฒวัง แปง. เมี่ยน ฯฒฯ ท่าย เยีย. อียิบ เมี่ยน หย่า อ๋อย ฮิ้ว ตุ๊ เยีย เซ เฒี้ยว. ” อิสะลาเอน เมี่ยน ฯฒฯ เอย เจี๊ยน น้าย เต๋ย หว่า โหฒว.

5ม่าย เมี่ยน ก๊อง บั๋ว อียิบ เญย ฟาโล ฮู่ง, อิสะลาเอน เมี่ยน เปย๋า หมี่ อ๊ะ. นิ่น เหธา นิ่น เญย เจียน ฯฒฯ ฮนั้ม-หฑวน. นิ่น บัว ก๊อง, “บัว เหว่ย หาย ติ่ว ฮนั้ง น้าย นอ โหฒว? บัว ปู๋ง อิสะลาเอน เมี่ยน มี่ง เหฑ่ง, ไม้ ตุ๊ นิ่น บัว ฟู-สู บัว อ๊ะ นีอา.”

6ฮู่ง เตี๋ย ฯฒฯ เห่ว เมี่ยน หลิ่ว เล์ย นิ่น เบ๊าะ จ๋า เญย ม์า-เธีย หย่า ต้อ เจี๊ยน นิ่น เญย แปง-กวั้น มี่ง อ๊ะ.

7นิ่น ต้อ เก้า หลง เจี๋ย วั้ว เต๋ย หลัวะ แป๊ะ นอม เบ๊าะ จ๋า เธีย เหธา เยียม อียิบ เต่ย-ปูง เหยียด ฒู้ง เบ๊าะ จ๋า เญย ม์า-เธีย, แอ๋ง เหธา กุ๊น ม์า-เธีย เญย แปง-เปย๊ย เหยียด ฒู้ง กัน เจี๊ยน มี่ง.

8เฒี้ยว ปุน อียิบ เต่ย-ปูง เญย ฟาโล ฮู่ง เฮญี้ยว แหง่ง, ฟาโล ฯฒฯ หฒุ่น อิสะลาเอน เมี่ยน, ต้ง นิ่น บัว ปู๋ง หล่าง เญย ธ้วด อียิบ เญย เฒี่ยง โห่.

9อียิบ เมี่ยน เญย หฒวัง แปง หฒุ่น เจี๊ยน มี่ง. ม่าย ฟาโล เญย เหยียด ฒู้ง ม์า เหธา เบ๊าะ จ๋า เญย ม์า-เธีย, เก้ ม์า เญย แปง เหธา แปง-กวั้น, เหยียด ฒู้ง หฒุ่น เจี๊ยน นิ่น บัว มี่ง, หฒุ่น หฒ่าย อิสะลาเอน เมี่ยน ธอง เจี๊ยน ด๊บ-ลิ่ว เยียม วั้ว ค้อย-ซิ เฮลน, นิด ปีหะหิโล้ด, ต๋อย เหฒียง บาอันเซโฟน.

10ฟาโล ฮู่ง หฒุ่น อ๊า ลั่ม หฒ่าย วั้ว หฒั่น, อิสะลาเอน เมี่ยน เธา เฮมียน ปวัด อียิบ เมี่ยน หฒุ่น เจี๊ยน นิ่น บัว ต้าย. นิ่น บัว หฒะเก้ง! กั้ม เหฑีย ไห่, เหฌี่ย ชะ โท้ เฒี้ยว เถง.

11นิ่น บัว ตอง เจี๊ยน โมเซ ก๊อง, “เยียม อียิบ เต่ย-ปูง ไม้ ม่าย ต๋อง ปย๊บ จั๋น-ไต่ เม่ย หธีง ต้าย ต้อ เยีย บัว ธ้วด น้าย เต่ย-ปูง-ฮวาง ไต่? เม่ย ฝู่ง ฮนั้ง น้าย นอ ต้อ เยีย บัว ธ้วด อียิบ เต่ย-ปูง?

12เยียม อียิบ วั้ว หฒั่น เยีย บัว มต้าย บั๋ว เม่ย, ‘ไม้ ตู๋ง หละเญ้า เยีย บัว. เซว่ย เยีย บัว โหฒว อียิบ เมี่ยน เญย โน่ว’ ไม้ เฒ์ย? โหฒว โน่ว หธ่อ เก้า หลง ต้าย น้าย เต่ย-ปูง-ฮวาง ไต่.”

13โมเซ ก๊อง บั๋ว แปะ ฝีง, “ไม้ ตู๋ง กั้ม เหฑีย. ปู๋ง ตี่ง เฮญี้ยว ฒั้ว เจี๊ยน. เม่ย บัว ฯฒฯ ปวัด อี้ ฮนอย เฒี้ยว อ๋อย ฮนั้ง หาย นอ เหฌียว เม่ย บัว. ต้ง เม่ย บัว อี้ ฮนอย ปวัด น้าย เต๋ย อียิบ เมี่ยน, ฆะฮ้า ฮี้ง เหยียด ลิ์ว ไม้ ตุ๊ ปวัด อ๊ะ.

14เฒี้ยว กั้น อ๋อย เหว่ย เม่ย บัว เบ๊าะ จ๋า. เม่ย บัว เลี่ยม ไม้ หฒุ โหฒว หาย หญู่ง.”

15เฒี้ยว ก๊อง บั๋ว โมเซ, “เม่ย เหว่ย หาย ติ่ว เห่ว เจี๊ยน โท้ เยีย? กุ๊น บั๋ว อิสะลาเอน เมี่ยน หูง เจี๊ยน วั้ว ด่าง มี่ง อ๊ะ.

16ซูง เม่ย เญย ปย๊า-บย่า เจี๋ย ค้อย กู้ หงว่าย, ววม ฯฒฯ ปุน ฆอย ปุน อิสะลาเอน เมี่ยน ยั่ง เจ๊า-ฆาย เจี๋ย วั้ว หง่าน หฒิ ค้อย.

17เยีย อ๋อย ปุน อียิบ เมี่ยน เฮญี้ยว แหง่ง, นิ่น บัว ฯฒฯ หฒุ่น เจี๊ยน อิสะลาเอน เมี่ยน มี่ง. เหว่ย หฒุ เยีย ฮี่ง ฟาโล เหธา นิ่น เญย หฒวัง แปง เหธา นิ่น เบ๊าะ จ๋า เญย ม์า-เธีย เหธา นิ่น เญย เก้ ม์า แปง, เมี่ยน ฯฒฯ ท่าย เยีย.

18เยีย ฮี่ง ฟาโล เหธา นิ่น เบ๊าะ จ๋า เญย ม์า-เธีย เหธา เก้ ม์า แปง ตุ๊ เมี่ยน ท่าย เยีย วั้ว หฒั่น, อียิบ เมี่ยน ฯฒฯ ฮิ้ว ตุ๊ เยีย เซ เฒี้ยว. ”

19ทิน-ฮู่ง เญย ฟิน-เมี่ยน, ต้ง เยี์ยน อิสะลาเอน แปง เญย เจ๊า วั้ว เต้า, แอ๋ง ฮล้วด หฑวน ฆะฮ้า ฆาง. เยียม วั้ว ด่าง แหมง วั้ว นอม บ๋วน-เดี้ยว หย่า ฮล้วด หฑวน เยียม ฆะฮ้า ฆาง,

20ตั๊ง เจี๊ยน เยียม อียิบ แปง เหธา อิสะลาเอน แปง บุด๋ง. บ๋วน-เดี้ยว ปุน เหยียด ปูง หฮมวัง, เหยียด ปูง ฌัง. เฒี่ยง ม์วน อี ปูง แปง ไม้ ตุ๊ นิด ฟัด.

21โมเซ ซูง ปั์ว เจี๋ย ค้อย กู้ หงว่าย. เฒี้ยว ปุน ตง ปูง แหมง เญย ต้ม หฑยาว ป่วน เหยียด ม์วน, ค้อย ฯฒฯ ทิ้ว เป๋น เดา-ฆาย. ววม ปุน ฆอย,

22อิสะลาเอน เมี่ยน ฯฒฯ ตุ๊ ยั่ง เจ๊า-ฆาย เจี๋ย ค้อย. เยียม นิ่น บัว เญย หฒาย แหมง, บย่าว แหมง, อี ปูง ววม ฮนั้ง ฒี่ง หลาด นอ.

23อียิบ เมี่ยน หฒุ่น เจี๊ยน อิสะลาเอน เมี่ยน มี่ง. ฟาโล เญย เหยียด ฒู้ง ม์า, เบ๊าะ จ๋า เญย ม์า-เธีย, เหธา เก้ ม์า เญย แปง กัน เจี๊ยน เหฌี่ย ค้อย.

24ลู่ง อ๊า ลั่ม เต๋ย ฌัง, เฒี้ยว เยียม วั้ว นอม โต์ว-เดี้ยว บ๋วน-เดี้ยว หมั่ง อียิบ เญย แปง-กวั้น ฯฒฯ ปุน นิ่น บัว หลุ่น เหฑ่ง.

25นิ่น โหฒว ปุน ม์า-เธีย เญย เยี่ยน เหฒียด, ไม้ ไฮ่ มี่ง เซี้ยบ. อียิบ เมี่ยน ก๊อง, “บัว อ๋อย หฒุ ก๊าน เปย๋า อิสะลาเอน เมี่ยน. เฒี้ยว เถง นิ่น บัว เบ๊าะ เยีย บัว อียิบ เมี่ยน อ๊ะ.”

26เฒี้ยว แอ๋ง ก๊อง บั๋ว โมเซ, “แอ๋ง ซูง ปั์ว เจี๋ย ค้อย กู้ หงว่าย ปุน ค้อย เญย ววม แอ๋ง ต้าย กั๊บ เจี๊ยน เหยียม อียิบ เมี่ยน, เลี่ยม นิ่น บัว เญย ม์า-เธีย เหธา เก้ ม์า เญย แปง.”

27โมเซ ฯฒฯ ซูง ปั์ว เจี๋ย ค้อย กู้ หงว่าย. ลู่ง ฌัง, ค้อย เญย ววม ฯฒฯ กั๊บ เจี๊ยน ฮนั้ง โล์ วั้ว นอ. อียิบ เมี่ยน เหฌี่ย ชะ เปย๋า มป่า เฒี้ยว เฒาะ นิ่น บัว กว๊าด เหฌี่ย ค้อย หมี่ อ๊ะ.

28ววม กั๊บ เจี๊ยน เหยียม เหฑ่ง ม์า-เธีย เหธา เก้ ม์า เญย แปง เหธา เหยียด ฒู้ง กัน อิสะลาเอน เมี่ยน เหฌี่ย ค้อย เญย แปง. ไม้ ม่าย เหยียด เต้า ตุ๊ แหม่ง ธ้วด.

29มป่า อิสะลาเอน เมี่ยน ยั่ง เจ๊า-ฆาย เจี๋ย ค้อย. เยียม บย่าว แหมง หฒาย แหมง, อี ปูง ววม ฮนั้ง ฒี่ง หลาด นอ.

30ต้ง วั้ว ฮนอย เฒี้ยว เหฌียว อิสะลาเอน เมี่ยน เปย๋า ดุ๊ด อียิบ เมี่ยน เญย ปั์ว-เดี๊ย. อิสะลาเอน เมี่ยน หย่า ปวัด อียิบ เมี่ยน ไต่ วั้ว ค้อย-เฮลน.

31อิสะลาเอน เมี่ยน ปวัด เฒี้ยว หล่ง ต้ม ชะ โหฒว ปุน อียิบ เมี่ยน เญย สี่, นิ่น บัว ฯฒฯ ท่าย เฒี้ยว หย่า เสียน นิ่น หย่า เสียน นิ่น เญย โปว, โมเซ.

← Chapter 13 Jump to: Chapter 15 →