Exodus 32

Mien Bible (Thai Script) © Thailand Bible Society, 2007

← Chapter 31 Jump to: Chapter 33 →

1แปะ ฝีง ปวัด โมเซ เยียม วั้ว บง เล่า ไห่, ไม้ เหฌี่ย, นิ่น บัว ฯฒฯ กั๊บ ฒุ้น ก๊อง บั๋ว อาโลน, “ต้าย ม่าะ! เหฒย เต้า เฒี่ยน เญย ฝัง เยี์ยน เยีย บัว เญย เจ๊า ม่าะ! ต้อ เยีย บัว ธ้วด อียิบ เต่ย-ปูง วั้ว เต้า โมเซ อง, เยีย บัว ไม้ ฮิ้ว ตุ๊ เจี๋ย หาย หมี่ อ๊ะ.”

2อาโลน บั๋ว นิ่น บัว, “เฒาะ เม่ย บัว เญย เอ๊า, เม่ย บัว เญย ตอน, เม่ย บัว เญย เซียะ ตั้ง เจี๊ยน เญย เจียม-มน่อม ฮยุน ต้าย ปุน เยีย.”

3หฒวัง เมี่ยน ฯฒฯ เฒาะ นิ่น บัว เญย มน่อม ฮยุน ต้อ ต้าย ปุน อาโลน.

4อาโลน เฒาะ น้าย เต๋ย มน่อม ฮยุน โต๋ เต้า เจียม-ง่ง ตอน แอ๋ง หล่ง จา-สี่ ดี้ง เหฒียง. หฒวัง เมี่ยน ฯฒฯ ก๊อง, “โอ อิสะลาเอน เมี่ยน อ้า! ต้อ บัว ธ้วด อียิบ เต่ย-ปูง เญย เฒี่ยน ต้ง น้าย อ๊ะ.”

5อาโลน ปวัด ฮนั้ง น้าย นอ นิ่น ฯฒฯ เหธย นอม เหฒี่ย-ต้อง เยียม เจียม-ง่ง ตอน เญย หฑะเฮมียน แหมง หย่า ก๊อง, “ฌัง ฮนอย บัว เจี๋ย นอม ฒิบ โห่ว เฒี้ยว. ”

6ตะเหญ่ย ดอม แปะ ฝีง เจี์ย ซิน เฑี้ยว เญย, ต้อ แซง-คู้ ต้าย ปั๊ว เหฒี่ย หย่า ฝ่ง ห่อ เหฒี่ย เหว่ย จิว ทง. เหฒี่ย ลิ์ว, นิ่น บัว เฒว์ย เจี๊ยน หญั่น, เฒว์ย เจี๊ยน ฮบ, เจี์ย ซิน ต้าย เยียม วั้ว สาน.

7เฒี้ยว ก๊อง บั๋ว โมเซ, “ก๊าน เซี้ยบ เญย เหฌี่ย อ๊ะ. เม่ย เญย แปะ ฝีง, ต้ง เม่ย เยียม อียิบ เต่ย-ปูง ต้อ ธ้วด วั้ว เต๋ย เมี่ยน, ป์าม ฒุ์ย แหง่ง เยีย.

8นิ่น บัว ฟ้าน เฮญี้ยว ด่ง หน่าย เซี้ยบ, กวั่ง เยีย หัด นิ่น บัว ยั่ง เญย เจ๊า. นิ่น บัว หล่ง เจียม โต๋ เต้า ง่ง โก๊ว ต้าย เกว่ย เหฌี่ย ป๋าย. อี้ หฒั่น นิ่น บัว ฒู้ง ต้อ แซง-คู้ มี่ง เหฒี่ย อ๊า โล่ะ! นิ่น บัว หย่า ก๊อง, ‘โอ อิสะลาเอน เมี่ยน อ้า! น้าย เซ เม่ย บัว เญย เฒี่ยน, ต้ง ต้อ เม่ย บัว ธ้วด อียิบ เต่ย-ปูง วั้ว เต้า.’”

9เฒี้ยว แอ๋ง ก๊อง บั๋ว โมเซ, “เยีย ปวัด น้าย เต๋ย เมี่ยน เซ เฮญี้ยว แหง่ง เญย แปะ ฝีง.

10เซว่ย เยีย โหฒว อ๊ะ. เยีย เฉีย เจี์ย! ไห่ นิ่น บัว, อ๋อย เหมียด เหฑ่ง นิ่น บัว. เยีย ฯฒฯ ปุน เม่ย เหธา เม่ย เญย เฒ้ย-ฟุน โหฒว เหยียด ฝีง โฮล เญย.”

11มป่า โมเซ เหฌี่ย ชะ โท้ เฒี้ยว, นิ่น เญย ทิน-ฮู่ง. นิ่น ก๊อง, “โอ เฒี้ยว อ้า! เม่ย ฝู่ง ฮนั้ง น้าย นอ เฉีย เจี์ย เม่ย เญย แปะ ฝีง, ต้ง เม่ย หล่ง ต้ม ชะ เหธา เฮ้น ไห่ เญย ปั์ว ต้อ ธ้วด อียิบ เต่ย-ปูง ต้าย เญย เมี่ยน?

12เม่ย ฮนั้ง น้าย นอ โหฒว, อียิบ เมี่ยน อ๋อย ก๊อง เม่ย ไม้ เฒ์ย? นิ่น บัว อ๋อย ก๊อง เม่ย ต๊า หฒะเอ๋ย ต้อ เม่ย เญย เมี่ยน ธ้วด เหว่ย โหฒว หว่าย นิ่น บัว, ต้อ นิ่น บัว มี่ง วั้ว บง ไต๋, อ๋อย เหมียด เหฑ่ง นิ่น บัว. โท้ เม่ย กวั่ง ฆอย, ไม้ ตู๋ง ฮนั้ง น้าย เฉีย เจี์ย ม่าะ! โท้ เม่ย ก๊อย เฮญี้ยว ไม้ ตู๋ง ห่อย เม่ย เญย แปะ ฝีง.

13จั๋ง เจี๊ยน เม่ย เญย โปว, อับลาฮัม, อีสัก เหธา อิสะลาเอน. เม่ย เฒี้ยง เจี๊ยน เม่ย กั้น เหธา นิ่น บัว แล์ง แหง่ง หว่า ก๊อง, ‘เยีย อ๋อย ปุน เม่ย บัว หฮยาง ต้าย ม่าย เฒ้ย-ฟุน ด่ง เหฮลย ธั้ม. เยีย หย่า อ๋อย เฒาะ น้าย นอม เต่ย-ปูง เหยียด ฒู้ง จิว ปุน เม่ย บัว หฑิบ เหยียด ลิ์ว เป๋น เม่ย บัว เญย ป่วน.’”

14เฒี้ยว ฯฒฯ ก๊อย เฮญี้ยว, ไม้ ห่อย นิ่น เญย แปะ ฝีง ฮนั้ง นิ่น ก๊อง นิ่น อ๋อย โหฒว นอ.

15โมเซ เยียม วั้ว บง เหฌี่ย ต้าย หย่า นั้น เจี๊ยน วั้ว เต๋ย อี คว้าย แล์ง แหง่ง หว่า เญย หละเปย๊ย-เป๊น เหฌี่ย. อี ปูง ฒู้ง เฟี้ย เจี๊ยน หฑั่ง. น้าย ปูง หย่า ม่าย, วั้ว ปูง หย่า ม่าย.

16น้าย เต๋ย หละเปย๊ย ทิน-ฮู่ง กั้น เญย ปั์ว-เต้า โหฒว. หฑั่ง หย่า ทิน-ฮู่ง กั้น ดี้ง ต้าย เญย หฑั่ง.

17โยซูวา ไฮ์ แปะ ฝีง เห่ว บุย เญย. นิ่น ฯฒฯ ก๊อง บั๋ว โมเซ, “เยียม วั้ว ด๊บ-ลิ่ว เธี้ยง เยีย ไฮ์ ม่าย เฉีย บุย ฮนั้ง เบ๊าะ ต้ม จ๋า นอ.”

18โมเซ เตา, “น้าย ไม้ เฒ์ย เบ๊าะ จ๋า ฮี่ง เญย เฉีย, หย่า ไม้ เฒ์ย เบ๊าะ จ๋า เซวย เญย เฉีย, เยีย ไฮ์ เญย เซ เมี่ยน ป๋าว ฑูง เญย เฉีย.”

19โมเซ เถา ฟัด เต๋ย ด๊บ-ลิ่ว เธี้ยง, ปวัด วั้ว เต้า ง่ง ตอน หย่า ปวัด เมี่ยน หธัง เหย, นิ่น ฯฒฯ เฉีย เจี์ย! ไห่. เยียม วั้ว บง-จั๊วะ นิ่น เฒาะ นิ่น โป้ว เจี๊ยน วั้ว เต๋ย อี คว้าย หละเปย๊ย-เป๊น ฒง เหฌี่ย เดา ฯฒฯ ฮู้ เหฑ่ง หมี่ อ๊ะ.

20นิ่น เฒาะ นิ่น บัว โหฒว ต้าย วั้ว เต้า ง่ง ตอน ปั๊ว หยุ, หม่อ เป๋น บ๊วน ต้าย หฮยาม เจี๊ยน ววม อ๊าบ อิสะลาเอน เมี่ยน ฮบ.

21โมเซ หน่าย ก๋า อาโลน, “น้าย เต๋ย เมี่ยน ฮนั้ง หาย นอ โหฒว ปุน เม่ย, เม่ย หธีง ต้าย ปุน นิ่น บัว ป์าม ฒุ์ย ด่ง หน่าย โฮล?”

22อาโลน เตา, “โท้ เยีย เญย เฒี้ยว ไม้ ตู๋ง เฉีย เจี์ย เยีย. เม่ย กั้น ฮิ้ว ตุ๊ น้าย เต๋ย แปะ ฝีง หาย หฒั่น หย่า ขูง อ๋อย โหฒว หว่าย ฮนั้ง.

23นิ่น บัว ก๊อง บั๋ว เยีย, ‘โท้ เหฒย เต๋ย เฒี่ยน เยี์ยน เยีย บัว เญย เจ๊า ม่าะ! ต้อ เยีย บัว ธ้วด อียิบ เต่ย-ปูง วั้ว เต้า โมเซ อง เจี๋ย หาย หมี่ อ๊ะ, เยีย บัว ไม้ ฮิ้ว.’

24เยีย ฯฒฯ ก๊อง บั๋ว นิ่น บัว, ‘หาย เต้า ม่าย เจียม โหฒว ต้าย เญย เซียว-เซ้ด, เฒาะ ต้าย ปุน เยีย.’ นิ่น บัว ฯฒฯ ปุน เจียม เยีย, เยีย เฒาะ ต้าย แกว๋ง เปียะ โต์ว-เหฑ่า. น้าย เต้า ง่ง ตอน ฯฒฯ ธ้วด ต้าย อ๊ะ.”

25โมเซ ปวัด แปะ ฝีง หลุ่น เหฑ่ง เหว่ย หฒุ อาโลน เซว่ย นิ่น บัว หลุ่น, ฯฒฯ หฒุ นิ่น บัว เญย วิน-วั้ง จั๊ด นิ่น บัว.

26โมเซ ฯฒฯ โซ้ว เจี๊ยน ด๊บ-ลิ่ว เธี้ยง เญย แก้ง ด่าง เห่ว, “หาย เต้า เกวย เฒี้ยว, ต้าย เยียม เยีย น้าย.” หฒวัง เลวี เมี่ยน ฯฒฯ กั๊บ ฒุ้น โมเซ วั้ว.

27โมเซ บั๋ว นิ่น บัว, “ เฒี้ยว, อิสะลาเอน เมี่ยน เญย ทิน-ฮู่ง, ฮนั้ง น้าย นอ ก๊อง, ‘เม่ย บัว เก๊าะ-เมี่ยน อ๋อย หฒุ ปุ๋ย เจี๊ยน หฑุ ด๊าว, เยียม น้าย ปูง ด๊บ-ลิ่ว เธี้ยง เญย แก้ง ด่าง เจี๋ย เถา วั้ว ปูง แก้ง ด่าง ไต๋ เม่ย บัว เญย ก๋อ-โย์ว, โล์-แกง ต่อย เหธา ล์าง หฒั่ง เมี่ยน.’”

28เลวี เมี่ยน ฯฒฯ เอย เจี๊ยน โหฒว. วั้ว ฮนอย หฒุ ไต๋ ไต่ เญย เมี่ยน ม่าย เล่ย ไม้ โก ปัว ธิน เต้า.

29โมเซ ก๊อง บั๋ว เลวี เมี่ยน, “อี้ ฮนอย เม่ย บัว สา กั้น ธีง-เหฑ่ง เหว่ย ฟู-สู เฒี้ยว, เหว่ย หฒุ เม่ย บัว ไต๋ เม่ย บัว เญย ตอน-เจว๊ย ก๋อ-โย์ว. เหว่ย น้าย เฒี้ยว อี้ ฮนอย อ๋อย เหธย ฟุ ปุน เม่ย บัว.”

30ตะเหญ่ย ฮนอย โมเซ ก๊อง บั๋ว หฒวัง แปะ ฝีง, “เม่ย บัว หฒะเก้ง ป์าม ฒุ์ย โฮล ไห่, มป่า อี้ หฒั่น เยีย อ๋อย ฝาว บง มี่ง เฒี้ยว วั้ว. เหฑีย ไฮ่ โท้ นิ่น กวั่ง เม่ย บัว เญย ฒุ์ย.”

31โมเซ ฯฒฯ แอ๋ง หฑวน มี่ง ล์อ เฒี้ยว. นิ่น ก๊อง, “ เฒี้ยว อ่า, น้าย เต๋ย เมี่ยน ป์าม ฒุ์ย โฮล ไห่. นิ่น บัว หล่ง เจียม โหฒว เฒี่ยน เญย ฝัง เหว่ย กั้น ป๋าย.

32มป่า อี้ หฒั่น โท้ กวั่ง ฆอย นิ่น บัว เญย ฒุ์ย. สี ก๊อง เม่ย ไม้ กวั่ง นิ่น บัว เญย ฒุ์ย นอ, เยียม เม่ย เฟี้ย เญย โซว-ตาน โท้ เม่ย ซ้อด ธ้วด เยีย เญย บั๋ว อ๊ะ.”

33เฒี้ยว เตา โมเซ, “หาย เต้า ป์าม ฒุ์ย ต่อง เยีย, เยีย ซ้อด วั้ว เต้า เญย บั๋ว ธ้วด เยีย เญย โซว-ตาน.

34เม่ย อี้ หฒั่น มี่ง อ๊ะ. ต้อ น้าย เต๋ย เมี่ยน มี่ง เถา เยีย บั๋ว เจี๋ย เม่ย วั้ว นอม ต๋อง. เยีย เญย ฟิน-เมี่ยน อ๋อย เยียม เม่ย บัว เญย วั้ว ด่าง แหมง เยี์ยน เจ๊า. มป่า เถา เฒี่ยง โห่ ตี่ง ฒุ์ย เยีย ฯฒฯ ตี่ง นิ่น บัว เญย ฒุ์ย อ๊ะ.”

35เฒี้ยว ฯฒฯ ปุน วั้ว เต๋ย เมี่ยน ปุ๊ด ต้ม ววน-แป่ง หลาย นิ่น บัว อ๊าบ อาโลน โหฒว วั้ว เต้า ง่ง ตอน.

← Chapter 31 Jump to: Chapter 33 →