Exodus 9

Mien Bible (Thai Script) © Thailand Bible Society, 2007

← Chapter 8 Jump to: Chapter 10 →

1เฒี้ยว แอ๋ง ก๊อง บั๋ว โมเซ, “มี่ง บั๋ว ฟาโล, ‘ เฒี้ยว, ฮิบลู เมี่ยน เญย ทิน-ฮู่ง, ฮนั้ง น้าย นอ ก๊อง, “ปู๋ง เยีย เญย แปะ ฝีง มี่ง อ๊ะ, เหว่ย ปุน นิ่น บัว ไฮ่ หฒั่ง เยีย.”

2สี ก๊อง เม่ย ไม้ ปู๋ง นิ่น บัว มี่ง, หธ่อ คั่ง เจี๊ยน นิ่น บัว นอ,

3เฒี้ยว อ๋อย ปุน เม่ย บัว เญย แซง-คู้ เธี้ยง เญย เหยียด ฒู้ง ล่อ ม์า, ล่อ ท่อ, ง่ง, ปะกี ยู่ง เหธา ยู่ง ปุ๊ด ต้ม ววน.

4มป่า เฒี้ยว อ๋อย ปุน อิสะลาเอน เมี่ยน เญย แซง-คู้ เหธา อียิบ เมี่ยน เญย แซง-คู้ ไม้ ฟี่ ฮนั้ง. อิสะลาเอน เมี่ยน เญย แซง-คู้ ไม้ หฒุ ไต่ เหยียด เต้า.’”

5เฒี้ยว ตี่ง เหฒียง เฒี่ยง โห่ หย่า ก๊อง, “ฌัง ฮนอย เฒี้ยว อ๋อย เยียม น้าย นอม เต่ย-ปูง ฮนั้ง น้าย นอ โหฒว.”

6ตะเหญ่ย ฮนอย เฒี้ยว หฒะเก้ง เอย เจี๊ยน นิ่น เญย หว่า โหฒว. อียิบ เมี่ยน เญย แซง-คู้ ไต่ เหฑ่ง หมี่ อ๊ะ. มป่า อิสะลาเอน เมี่ยน เญย ไม้ ไต่ เหยียด เต้า.

7ฟาโล พ้าย เมี่ยน มี่ง หมั่ง ฯฒฯ ฮิ้ว ตุ๊ อิสะลาเอน เมี่ยน เญย แซง-คู้ ไม้ ไต่ เหยียด เต้า. มป่า ฟาโล เญย เฮญี้ยว หธ่อ แหง่ง เญย, ไม้ คั้ง ปู๋ง แปะ ฝีง มี่ง.

8เฒี้ยว แอ๋ง ก๊อง บั๋ว โมเซ เหธา อาโลน, “เฒาะ อี เหฒีย เญา โต์ว-เหฑ่า เญย ซ้าย มี่ง ตอง เจี๊ยน ฟาโล เญย หฑะเฮมียน ปุน โมเซ ฟ้าด ฝาว ลู่ง.

9ซ้าย ฯฒฯ ฮนั้ง เนีย-บูง-หม่วน บูง มี่ง ปวั๊ง อียิบ เต่ย-ปูง. เลี่ยม เมี่ยน เลี่ยม แซง-คู้ ฯฒฯ เฒี่ยง เฒว่ย กุ๋น หน่ง หย่า ฟ้าน ก๋อม เต่ย-ปูง.”

10โมเซ บัว ฯฒฯ เญา เจี๊ยน โต์ว-เหฑ่า เญย ซ้าย มี่ง เถา ฟาโล เญย หฑะเฮมียน, หย่า ฟ้าด ซ้าย ฝาว. เลี่ยม เมี่ยน เลี่ยม แซง-คู้ ฯฒฯ เฒี่ยง เฒว่ย เหฑ่ง. เฒว่ย หย่า ฮู้ เจี๊ยน เยียม.

11โหฒว หฮวา-ญิ์น เญย เมี่ยน เลี่ยม ไม้ ไฮ่ มี่ง โซ้ว เจี๊ยน โมเซ เญย หฑะเฮมียน, เหว่ย หฒุ นิ่น บัว ฮนั้ง อียิบ เต่ย-ปูง เญย หฒวัง เมี่ยน นอ, เฒี่ยง เฒว่ย ปวั๊ง เหฑ่ง เฒี่ยง ซิน.

12มป่า เฒี้ยว ปุน ฟาโล เญย เฮญี้ยว แหง่ง, ไม้ คั้ง หมวัง โมเซ เหธา อาโลน เญย หว่า ฮนั้ง เฒี้ยว บั๋ว เจี๋ย โมเซ นอ.

13เฒี้ยว แอ๋ง ก๊อง บั๋ว โมเซ, “ฌัง ดอม เจี์ย ซิน เฑี้ยว เญย มี่ง ตอง เจี๊ยน ฟาโล ก๊อง, ‘ เฒี้ยว, ฮิบลู เมี่ยน เญย ทิน-ฮู่ง, ฮนั้ง น้าย นอ ก๊อง, “ปู๋ง เยีย เญย แปะ ฝีง เหว่ย ปุน นิ่น บัว มี่ง หฒั่ง เยีย.

14ไม้ เฒย แอ๊ะ, น้าย หฑุ่น เยีย อ๋อย ปุน เม่ย เหธา เม่ย เญย เจียน เหธา เม่ย เญย แปะ ฝีง หฒุ เหยียด ฒู้ง เหฒะ หน่าน, เหว่ย ปุน เม่ย ฮิ้ว ตุ๊ เยียม น้าย ลู่ง เดี๊ย ไม้ ม่าย หาย เต้า ฮนั้ง เยีย.

15สี ก๊อง เยีย อ๋อย โหฒว นอ, เยีย ฒู้ง ปุน เม่ย บัว ปุ๊ด ต้ม ววน-แป่ง ไต่ เหฑ่ง, ไม้ ตุ๊ เยียม น้าย ลู่ง เดี๊ย.

16มป่า เยีย เลี่ยว เม่ย บัว เหว่ย ปุน เม่ย บัว ปวัด เยีย เญย ต้ม ชะ หย่า ไฮ่ ม่าย เมี่ยน ฒุ่น เยีย เญย เม่ง ปวั๊ง ลู่ง เดี๊ย.

17เม่ย หธ่อ แหง่ง เจี๊ยน เยีย เญย แปะ ฝีง, ไม้ คั้ง ปู๋ง นิ่น บัว มี่ง.

18หมวัง เจี๊ยน โอ่. ฌัง ฮนอย เถา น้าย นอม เฒี่ยง โห่ อ๋อย ตุ้ย ต้ม เปาะ. เยียม เหลียบ เจี์ย อียิบ เต่ย-ปูง เถา อี้ หฒั่น, ไม้ แก้ง ตุ้ย เจี๋ย เปาะ ด่ง น้าย หฑุ่น โฮล.

19อี้ หฒั่น อ๋อย หฒุ พ้าย เมี่ยน มี่ง ต้อ เยียม ลี่ง เต่ย เญย แซง-คู้ เหธา ม่าย เญย เหยียด ฒู้ง กะน้าย หฑวน ต้าย ปี๋ง เจี๊ยน. ไม้ กุ๊น เมี่ยน ไฟ แซง-คู้, ไม้ ต้อ หฑวน ต้าย ปี๋ง นอ, ฒู้ง หฒุ เปาะ เบ๊าะ ไต่ เหฑ่ง อ๊ะ.”’”

20ฟาโล เญย เจียน, ต้ง กั้ม เหฑีย เฒี้ยว เญย หว่า วั้ว เต๋ย, ก๊าน เจี๊ยน ต้อ นิ่น บัว เญย โน่ว เหธา แซง-คู้ หฑวน ต้าย ปี๋ง.

21มป่า ไม้ หมวัง เฒี้ยว เญย หว่า วั้ว เต๋ย, เซว่ย นิ่น บัว เญย โน่ว เหธา แซง-คู้ เยียม วั้ว เด่ย.

22เฒี้ยว บั๋ว โมเซ, “ซูง เม่ย เญย ปั์ว เฒี้ยง เจี๊ยน ลู่ง. ลู่ง ฯฒฯ ตุ้ย เปาะ เหฌี่ย ก๋อม อียิบ เต่ย-ปูง, เบ๊าะ เยียม ลี่ง เต่ย เญย เมี่ยน เหธา แซง-คู้ เหธา เหยียด ฒู้ง ไล-เมี้ย.”

23โมเซ ฯฒฯ หล่ง ปย๊า-บย่า เฒี้ยง เจี๊ยน ลู่ง, เฒี้ยว ฯฒฯ ปุน ป์อง บะอง, ตุ้ย เปาะ, ป์อง บะหลี่ง หฌับๆ เญย เหฌี่ย เถา เดา. เฒี้ยว ฯฒฯ ปุน ลู่ง ตุ้ย เปาะ เหฌี่ย อียิบ เต่ย-ปูง.

24เปาะ ตุ้ย เจี๊ยน เหฌี่ย, บะหลี่ง หฌับๆ เญย. เยียม เหลียบ เจี์ย อียิบ เต่ย-ปูง เถา อี้ หฒั่น, ไม้ แก้ง ม่าย เหยียด หฑุ่น ตุ้ย เปาะ ด่ง น้าย หฑุ่น โฮล.

25อียิบ เต่ย-ปูง นอมๆ ต๋อง, ตะฟ่าน เยียม เด่ย เญย เมี่ยน เหธา แซง-คู้, หฒุ เปาะ เบ๊าะ เหฑ่ง. เลี่ยม กะน้าย-หฒวัง เหธา เหยียด ฒู้ง เดี๋ยง เบ๊าะ หว่าย เหฑ่ง.

26ขูง โกเซน เต่ย, อิสะลาเอน เมี่ยน เยียม เญย ต๋อง, ไม้ ตุ้ย เปาะ ฮนั้ง.

27ฟาโล ฯฒฯ ปุน เมี่ยน มี่ง เห่ว โมเซ เหธา อาโลน ต้าย. นิ่น ก๊อง, “น้าย หฑุ่น เยีย หฒะเก้ง ป์าม ฒุ์ย อ๊ะ. เฒี้ยว โหฒว ตุ๊ หอบ. เยีย กั้น เหธา เยีย เญย แปะ ฝีง โหฒว ต่อง.

28เถง เต๋า เก๋า โท้ เฒี้ยว, เหว่ย หฒุ ป์อง บะอง, ตุ้ย เปาะ เก๋า ไห่ อ๊ะ. เยีย ฯฒฯ ปู๋ง เม่ย บัว มี่ง. เม่ย บัว ไม้ หฒุ แอ๋ง เยียม น้าย อ๊ะ.”

29โมเซ เตา, “เยีย ธ้วด หฒิ ฒี่ง เยีย ฯฒฯ เธา เจี์ย ปั์ว เถง เม่ย บัว เต๋า เก๋า. บะอง ฯฒฯ ตี้ง, เปาะ หย่า ไม้ ตุ้ย อ๊ะ. เม่ย บัว ฯฒฯ ฮิ้ว ตุ๊ ลู่ง เดี๊ย เหยียด ฒู้ง เซ เฒี้ยว เญย.

30มป่า เยีย ฮิ้ว ตุ๊ เม่ย เหธา เม่ย เญย เจียน หธ่อ ไม้ กั้ม เหฑีย เฒี้ยว ทิน-ฮู่ง.”

31(ตุ้ย เปาะ วั้ว หฒั่น, ล่าม่า เหธา เบย้า บาลี หฒุ เปาะ เบ๊าะ หว่าย เหฑ่ง, เหว่ย หฒุ เบย้า บาลี เปา, ล่าม่า หย่า ฆอย เปี้ยง.

32ม่าย อี หญู่ง เบย้า วิด ไม้ หว่าย ฮนั้ง, เหว่ย หฒุ น้าย เต๋ย อี หญู่ง ตุ้ย ลิ์ว เปาะ หธีง ต้าย ธ้วด.)

33โมเซ ฯฒฯ เล่ย ฆอย ฟาโล ฮู่ง แอ๋ง ธ้วด กะเหญี่ย หฒิ ฒี่ง มี่ง เธา เจี์ย ปั์ว เต๋า เก๋า โท้ เฒี้ยว. บะอง ฯฒฯ ตี้ง, เปาะ เหธา บยู่ง หย่า หฮลอง.

34ฟาโล ปวัด บยู่ง เหธา เปาะ หฮลอง, บะอง หย่า ไม้ บุย, นิ่น แอ๋ง ป์าม ฒุ์ย อ๊ะ. นิ่น เหธา นิ่น เญย เจียน เฮญี้ยว แอ๋ง แหง่ง อ๊ะ.

35ฟาโล เญย เฮญี้ยว แหง่ง, ไม้ ปู๋ง อิสะลาเอน เมี่ยน มี่ง, ฮนั้ง เฒี้ยว หล่ง โมเซ ก๊อง เจี๋ย เญย นอ.

← Chapter 8 Jump to: Chapter 10 →