Exodus 13

Mien Bible (Thai Script) © Thailand Bible Society, 2007

← Chapter 12 Jump to: Chapter 14 →

1เฒี้ยว ก๊อง บั๋ว โมเซ,

2“อิสะลาเอน เมี่ยน เญย โม์ว เต้า ตอน-หละเก๊า อ๋อย หฒุ ฝูง ปุน เยีย. ไม้ กุ๊น เมี่ยน เญย ไฟ แซง-คู้ เญย, ตะฟ่าน โก๊ว วั้ว เต๋ย ต้าว ทอย ตอน, อ๋อย หฒุ ฝูง ปุน เยีย.”

3โมเซ ก๊อง บั๋ว อิสะลาเอน เมี่ยน, “อ๋อย หฒุ จั๋ง เจี๊ยน น้าย นอม ฮนอย, ต้ง เม่ย บัว ธ้วด อียิบ, หฒุ โหฒว โน่ว เญย เต่ย-ปูง, วั้ว นอม ฮนอย, เฒี้ยว หล่ง นิ่น เญย ต้ม ชะ ต้อ เม่ย บัว ธ้วด ต้าย. ไม้ ตู๋ง หญั่น หาย หญู่ง อัน ปี๊ง เญย กะน้าย.

4อาบีบ หฮลา, น้าย นอม ฮนอย, เม่ย บัว ธ้วด อ๊ะ.

5เฒี้ยว ต้อ เม่ย บัว เปียะ คานาอัน เมี่ยน, ฮิดไท เมี่ยน, อาโมไล เมี่ยน, ฮีไว เมี่ยน, เยบุด เมี่ยน เยียม เญย เต่ย-ปูง, เซ ต้ง เฒี้ยว เหธา เม่ย บัว เญย อง-ถาย โฮ้ว เจี๊ยน แล์ง จิว ปุน เม่ย บัว วั้ว นอม เดา-โท้ว หลง เญย เต่ย-ปูง, หฮญังๆ เถา น้าย นอม หฮลา เม่ย บัว อ๋อย หฒุ เจี๋ย น้าย นอม ฒิบ.

6เสี่ย ฮนอย กะญั์ว อ๋อย หฒุ หญั่น ไม้ อัน ปี๊ง เญย ฌั้ว. ตะเธี้ยด ฮนอย วั้ว ฮนอย อ๋อย หฒุ เจี๋ย ฒิบ โห่ว เฒี้ยว.

7น้าย เต๋ย เสี่ย ฮนอย กะญั์ว อ๋อย หฒุ หญั่น ไม้ อัน ปี๊ง เญย ฌั้ว. เยียม เม่ย บัว บุด๋ง หย่า ไม้ ตู๋ง ม่าย หาย หญู่ง อัน ปี๊ง เญย กะน้าย. เลี่ยม ไม้ ตู๋ง ม่าย ปี๊ง เยียม เม่ย บัว เญย เต่ย-จ๋าย กะญั์ว.

8“ต้ง วั้ว ฮนอย อ๋อย หฒุ ก๊อง บั๋ว เม่ย บัว เญย ตอน, ‘น้าย เซ อา เตีย ธ้วด อียิบ เต่ย-ปูง วั้ว หฒั่น, เฒี้ยว เหว่ย อา เตีย โหฒว เญย สี่.’

9น้าย นอม ฒิบ เซ ฮนั้ง นอม จั๋ง-โห่ แน้ด เจี๊ยน เม่ย บัว เญย ปั์ว, ญัด เจี๊ยน เม่ย บัว เญย ปย้อง, เหว่ย ปุน เม่ย บัว ก๊อง เฒี้ยว เญย เล์ย-หลัด. เหว่ย หฒุ เฒี้ยว หล่ง นิ่น เฮ้น ไห่ เญย ปั์ว ต้อ เม่ย บัว ธ้วด อียิบ เต่ย-ปูง.

10เม่ย บัว อ๋อย หฒุ หฮญังๆ เถา ตี่ง เหฒียง เญย เฒี่ยง โห่ เจี๋ย น้าย นอม ฒิบ.

11“ เฒี้ยว หฒิว นิ่น เหธา เม่ย บัว หย่า เหธา เม่ย บัว เญย อง-ถาย โฮ้ว เจี๊ยน แล์ง ต้อ เม่ย บัว เปียะ คานาอัน เมี่ยน เญย เต่ย-ปูง, เฒาะ วั้ว นอม เต่ย-ปูง จิว ปุน เม่ย บัว วั้ว หฒั่น,

12เม่ย บัว อ๋อย หฒุ เฒาะ โม์ว เต้า ตอน-หละเก๊า เหธา แซง-คู้ เญย ต้าว ทอย ตอน, โก๊ว วั้ว เต๋ย, ฝูง ปุน เฒี้ยว.

13อ๋อย หฒุ หล่ง เต้า ปะกี ยู่ง ตอน หฒัวะ ต้าว เต้า ล่อ โก๊ว ตอน. สี ก๊อง ไม้ หฒัวะ หฑวน นอ, อ๋อย หฒุ เบ๊าะ นิ่น เญย จาง เน้า. ตะฟ่าน เยียม เม่ย บัว บุด๋ง เญย เหยียด ฒู้ง ต้าว เต้า ตอน หย่า อ๋อย หฒุ หฒัวะ.

14“ฆะฮ้า ฮี้ง เม่ย บัว เญย ตอน หน่าย ก๋า, ‘เหว่ย หาย ติ่ว ฮนั้ง น้าย นอ โหฒว?’ อ๋อย หฒุ บั๋ว นิ่น, ‘ เฒี้ยว หล่ง นิ่น เญย ต้ม ชะ ต้อ เยีย บัว เยียม อียิบ เต่ย-ปูง หฒุ โหฒว โน่ว เญย ต๋อง ธ้วด ต้าย.

15ฟาโล ฮู่ง เฮญี้ยว แหง่ง, ไม้ คั้ง ปู๋ง เยีย บัว ธ้วด วั้ว หฒั่น, เฒี้ยว ไต๋ อียิบ เมี่ยน เญย เหยียด ฒู้ง ต้าว เต้า ตอน. เลี่ยม เมี่ยน เญย, เลี่ยม แซง-คู้ เญย ต้าว ทอย ตอน, โก๊ว วั้ว เต๋ย, นิ่น ไต๋. ฮนั้ง หน่าย เยีย บัว เฒาะ เหยียด ฒู้ง แซง-คู้ เญย ต้าว ทอย ตอน, โก๊ว วั้ว เต๋ย, เหฒี่ย ปุน เฒี้ยว. มป่า เยีย บัว เญย เหยียด ฒู้ง ต้าว เต้า ตอน เยีย บัว หฒัวะ หฑวน.’

16กัน น้าย หญู่ง เล์ย เซ ฮนั้ง โหฒว จั๋ง-โห่ แน้ด เจี๊ยน เม่ย บัว เญย ปั์ว ไฟ ญัด เจี๊ยน เม่ย บัว เญย ปย้อง, เถง เยีย บัว จั๋ง เฒี้ยว หล่ง นิ่น เฮ้น ไห่ เญย ปั์ว ต้อ เยีย บัว ธ้วด อียิบ เต่ย-ปูง.”

17ฟาโล ฮู่ง ปู๋ง อิสะลาเอน แปะ ฝีง มี่ง วั้ว หฒั่น, ทิน-ฮู่ง ไม้ ต้อ นิ่น บัว ยั่ง ฟีลิสะเตีย เมี่ยน เญย เต่ย-ปูง วั้ว ติ้ว เจ๊า เจี๋ย, ไม้ กุ๊น วั้ว ติ้ว เจ๊า เก้า หฒะ. ทิน-ฮู่ง ก๊อง, “เหฑีย แปะ ฝีง ปวั้ง หฒุ เบ๊าะ จ๋า เญย สี่ ฯฒฯ ทิ้ว เฮญี้ยว แอ๋ง ต๋าว ซิน หฑวน อียิบ เต่ย-ปูง.”

18ทิน-ฮู่ง ฯฒฯ ต้อ นิ่น บัว หวี่ง ยั่ง เต่ย-ปูง-ฮวาง, มี่ง ค้อย-ซิ วั้ว ติ้ว เจ๊า. ธ้วด อียิบ เต่ย-ปูง วั้ว หฒั่น, อิสะลาเอน เมี่ยน ต้อ เจี๊ยน เบ๊าะ จ๋า เญย หวัวะ กิ่น มี่ง.

19โมเซ หย่า ต้อ เจี๊ยน โยเซ้บ เญย บู๊ง มี่ง, เหว่ย หฒุ ฒิ่น ด่าง โยเซ้บ เห่ว อิสะลาเอน เมี่ยน โฮ้ว เจี๊ยน แล์ง แหง่ง หว่า. นิ่น ก๊อง, “ทิน-ฮู่ง ด่ง หาย ฒู้ง อ๋อย ต้าย เถง เม่ย บัว. เถา วั้ว หฒั่น เม่ย บัว อ๋อย หฒุ ต้อ เจี๊ยน เยีย เญย บู๊ง ธ้วด น้าย นอม ต๋อง.”

20อิสะลาเอน เมี่ยน ธ้วด สุกโค้ด มี่ง ธอง ด๊บ-ลิ่ว เยียม เต่ย-ปูง-ฮวาง กะเฮลน, เอทาม วั้ว.

21ลู่ง ฮนอย หฒั่น เฒี้ยว เยียม นิ่น บัว เญย วั้ว ด่าง แหมง, บ๋วน-เดี้ยว กะญั์ว, ต้อ นิ่น บัว เญย เจ๊า. ลู่ง ม์วน หฒั่น นิ่น เยียม โต์ว-เดี้ยว หฒิว ฌัง นิ่น บัว, ปุน นิ่น บัว ลู่ง ฮนอย ไฟ ลู่ง ม์วน ไฮ่ ยั่ง เจ๊า มี่ง.

22ลู่ง ฮนอย หฒั่น บ๋วน-เดี้ยว, ลู่ง ม์วน หฒั่น โต์ว-เดี้ยว ฒู้ง ไม้ เล่ย น้าย เต๋ย แปะ ฝีง เญย วั้ว ด่าง แหมง.

← Chapter 12 Jump to: Chapter 14 →