Exodus 33

Mien Bible (Thai Script) © Thailand Bible Society, 2007

← Chapter 32 Jump to: Chapter 34 →

1เฒี้ยว ก๊อง บั๋ว โมเซ, “อ๋อย หฒุ เล่ย ฆอย น้าย นอม ต๋อง มี่ง อ๊ะ. เม่ย เหธา เม่ย ต้อ ธ้วด อียิบ เต่ย-ปูง วั้ว เต๋ย เมี่ยน อ๋อย หฒุ มี่ง ต้ง เยีย เหธา อับลาฮัม, อีสัก เหธา ยาโค้บ โฮ้ว เจี๊ยน แล์ง, ‘เยีย อ๋อย จิว ปุน เม่ย เญย เฒ้ย-ฟุน วั้ว นอม เต่ย-ปูง.’

2เยีย อ๋อย พ้าย เต้า ฟิน-เมี่ยน มี่ง ด่าง เม่ย บัว. เยีย หย่า อ๋อย หฒุ่น ธ้วด คานาอัน เมี่ยน, อาโมไล เมี่ยน, ฮิดไท เมี่ยน, เปลิดซี เมี่ยน, ฮีไว เมี่ยน เหธา เยบุด เมี่ยน.

3อ๋อย หฒุ มี่ง เถา เดา-โท้ว หลง เญย เต่ย-ปูง. มป่า เยีย ไม้ เหธา เม่ย บัว มี่ง, เหว่ย หฒุ เม่ย บัว เฮญี้ยว แหง่ง. เหฑีย ด๊าม-เจ๊า เยีย ไฮ่ เหมียด เหฑ่ง เม่ย บัว มเปย.”

4แปะ ฝีง ไฮ์ น้าย เต๋ย หว่า นิ่น บัว หฒะเก้ง! เฑ่า ไห่ หย่า เญี้ยม. ไม้ ม่าย หาย เต้า ฒอง เซียว-เซ้ด,

5เหว่ย หฒุ เฒี้ยว ก๊อง บั๋ว โมเซ, “อ๋อย หฒุ ก๊อง บั๋ว อิสะลาเอน เญย หฒวัง เมี่ยน, ‘เม่ย บัว เหยียด ฒู้ง เซ เฮญี้ยว แหง่ง เญย เมี่ยน. สี ก๊อง เยีย กัน เม่ย บัว มี่ง ดุ ตั้ง! ฮนั้ง, เยีย ฒู้ง เหมียด เม่ย บัว อ๊ะ. อี้ หฒั่น เฒาะ ธ้วด เม่ย บัว เญย เซียว-เซ้ด, เยีย ฯฒฯ ตี่ง อ๋อย ฮนั้ง หาย นอ โหฒว ปุน เม่ย บัว.’”

6เหว่ย น้าย เยียม โฮเล้บ บง, อิสะลาเอน เมี่ยน เฒาะ ธ้วด นิ่น บัว ฒอง เจี๊ยน เญย เซียว-เซ้ด.

7อิสะลาเอน เมี่ยน หาย หฒั่น เหลียบ เธี้ยง, โมเซ หย่า ธอง นอม ด๊บ-ลิ่ว เล่ย ด๊บ-ลิ่ว เธี้ยง โก เต๋ย เญย. น้าย นอม ด๊บ-ลิ่ว นิ่น เห่ว “หวุ่ย ปวั้ง เญย ด๊บ-ลิ่ว.” หาย เต้า ม่าย หาย หญู่ง อ๋อย หน่าย เฒี้ยว, ฯฒฯ ธ้วด เธี้ยง มี่ง เถา วั้ว นอม ด๊บ-ลิ่ว.

8โมเซ หาย หฒั่น มี่ง วั้ว นอม ด๊บ-ลิ่ว, หฒวัง เมี่ยน เจี์ย ซิน โซ้ว เจี๊ยน เก๊าะ-เมี่ยน กั้น เญย แก้ง ด่าง หมั่ง เถา โมเซ เปียะ มี่ง.

9โมเซ เปียะ ด๊บ-ลิ่ว มี่ง วั้ว หฒั่น, วั้ว นอม บ๋วน-เดี้ยว เหฌี่ย ต้าย เยียม เจี๊ยน ด๊บ-ลิ่ว เญย แก้ง ด่าง. เฒี้ยว เยียม วั้ว บ๋วน-เดี้ยว กะญั์ว เหธา โมเซ ก๊อง หว่า.

10หฒวัง เมี่ยน ปวัด บ๋วน-เดี้ยว เยียม เจี๊ยน ด๊บ-ลิ่ว เญย แก้ง ด่าง, เก๊าะ-เมี่ยน โซ้ว เจี๊ยน เก๊าะ-เมี่ยน เญย แก้ง ด่าง ป๋าย.

11เฒี้ยว เหธา โมเซ เฮมียน ต๋อย เฮมียน ก๊อง หว่า, ฮนั้ง โล์-แกง ต่อย เหธา โล์-แกง ต่อย ก๊อง หว่า นอ. ก๊อง ลิ์ว, โมเซ หฑวน วั้ว ด๊บ-ลิ่ว เธี้ยง. มป่า ม่าย นิ่น เญย ปอง-ปั์ว เมี่ยน, นุน เญย ตอน วั้ว เต้า เมี่ยน หลุน เมี่ยน, โยซูวา, ไม้ ธ้วด หวุ่ย ปวั้ง ด๊บ-ลิ่ว.

12โมเซ ก๊อง บั๋ว เฒี้ยว, “ เฒี้ยว พ้าย เยีย, ‘ต้อ น้าย เต๋ย แปะ ฝีง มี่ง วั้ว นอม เต่ย-ปูง,’ มป่า เม่ย ไม้ แก้ง ปุน เยีย ฮิ้ว ตุ๊ เม่ย พ้าย หาย เต้า เหธา เยีย มี่ง. ขูง ก๊อง, ‘เยีย ฮิ้ว ตุ๊ เม่ย, หฒัวะ เม่ย, เม่ย หย่า หอบ เยีย เญย เฮญี้ยว.’

13สี ก๊อง หฒิว เม่ย หมั่ง, เยีย หอบ เม่ย เญย เฮญี้ยว นอ, โท้ ปุน เยีย ฮิ้ว ตุ๊ เม่ย เญย เจ๊า, ปุน เยีย ไฮ่ ฮิ้ว ตุ๊ เม่ย หย่า หฒิว เม่ย หมั่ง, ปวัด เยีย หอบ เม่ย เญย เฮญี้ยว. โท้ เม่ย จั๋ง เจี๊ยน น้าย ฝีง เมี่ยน เซ เม่ย เญย แปะ ฝีง.”

14เฒี้ยว ก๊อง, “เยีย กั้น อ๋อย เหธา เม่ย มี่ง, ปุน เม่ย ตุ๊ ฮิด ขวน.”

15โมเซ แอ๋ง ก๊อง บั๋ว เฒี้ยว, “เม่ย ไม้ เหธา เยีย บัว มี่ง นอ, ไม้ ตู๋ง เห่ว เยีย บัว ธ้วด น้าย นอม ต๋อง.

16หาย เต้า ไฮ่ ฮิ้ว ตุ๊ เยีย เหธา เม่ย เญย แปะ ฝีง หอบ เม่ย เญย เฮญี้ยว ธ้วด ลิ์ว เม่ย เหธา เยีย บัว มี่ง? ฮนั้ง น้าย เยีย เหธา เม่ย เญย แปะ ฝีง กั้น หญู่ง, ไม้ ฮนั้ง ลู่ง เดี๊ย หม่าน ฝีง เมี่ยน.”

17เฒี้ยว ก๊อง บั๋ว โมเซ, “เม่ย ฮนั้ง หาย นอ โท้, เยีย อ๋อย เอย เจี๊ยน เม่ย เญย หว่า โหฒว, เหว่ย หฒุ เม่ย หอบ เยีย เญย เฮญี้ยว. เยีย หย่า ฮิ้ว ตุ๊ เม่ย, หฒัวะ เม่ย.”

18โมเซ ฯฒฯ ก๊อง, “โท้ เม่ย ปุน เยีย ปวัด เม่ย เญย ฌัง-หล่าง ม่าะ!”

19เฒี้ยว เตา, “เยีย อ๋อย หิ่น ธ้วด เยีย เญย เหยียด ฒู้ง ฌัง-หล่าง เญย เอน เจี๋ย เม่ย เญย หฑะเฮมียน. เยีย หย่า อ๋อย เยียม เม่ย เญย หฑะเฮมียน ก๊อง ธ้วด เยีย เญย บั๋ว, ต้ง เฒี้ยว วั้ว นอม บั๋ว. เยีย อ๋อย เหธย เอน ปุน หาย เต้า, เยีย ฯฒฯ เหธย เอน ปุน วั้ว เต้า. เยีย อ๋อย ค้อ-เลี่ยน หาย เต้า, เยีย ฯฒฯ ค้อ-เลี่ยน วั้ว เต้า.”

20เฒี้ยว แอ๋ง ก๊อง, “มป่า เม่ย ปวัด ไม้ ตุ๊ เยีย เญย เฮมียน, เหว่ย หฒุ ไม้ ม่าย หาย เต้า ปวัด ลิ์ว เยีย เญย เฮมียน หธ่อ ม่าย แหม่ง เฒี่ยง.”

21เฒี้ยว แอ๋ง ก๊อง, “หมั่ง ม่าะ! เยียม เยีย เญย กะเฮลน ม่าย นอม ต๋อง, เม่ย มี่ง โซ้ว เจี๊ยน วั้ว นอม หละเปย๊ย กู้ หงว่าย.

22เยีย เญย ฌัง-หล่าง เจี๋ย เญย เฒี่ยง โห่ เยีย ฯฒฯ เฒาะ เม่ย ฟับ เจี๊ยน หละเปย๊ย-ฉัง กะญั์ว, หล่ง เยีย เญย ปั์ว ปวัง เจี๊ยน เม่ย, ฒั้ว เยีย เจี๋ย มี่ง.

23ฆะฮ้า เยีย ฮล้วด ฆอย ปั์ว, เม่ย ฯฒฯ ตุ๊ ปวัด เยีย เญย ฆะฮ้า ฆาง, มป่า ไม้ ตุ๊ ปวัด เยีย เญย เฮมียน.”

← Chapter 32 Jump to: Chapter 34 →