Exodus 31

Mien Bible (Thai Script) © Thailand Bible Society, 2007

← Chapter 30 Jump to: Chapter 32 →

1เฒี้ยว ก๊อง บั๋ว โมเซ,

2“หมั่ง ม่าะ! เยีย กิ๊น เต้า ยูดา ฝีง เญย เมี่ยน, ฮูอา เญย ฟุน, อุลี เญย ตอน, เบซาเลน.

3เยีย ปุน นิ่น ม่าย ทิน-ฮู่ง เญย สีง ลี่ง ปวั๊ง เหฑ่ง, ปุน นิ่น ม่าย ปั์ว-เต้า หลง, ม่าย ปั้น เหฒ่ย หย่า ม่าย ธง-เม่ง โหฒว หฒั่ง, ไฮ่ โหฒว หญู่งๆ กง.

4ไฮ่ ต๊า ธ้วด หฒะเอ๋ย หล่ง เจียม, หล่ง ญ่าน, หล่ง ต้ง ซิ โหฒว หญู่งๆ จา-สี่,

5ไฮ่ ก๊าด หละเปย๊ย-จ๋าย, ธิ เหลาะ เหลาะ เจี๊ยน, ไฮ่ โหฒว เดี๋ยง-หฒั่ง ติว เปี้ยง ติว เปี๊ยว, หย่า ไฮ่ โหฒว หม่าน หมวด หล่ง ปั์ว-เต้า โหฒว เหฑว่ย เญย กง.

6เยีย หย่า พ้าย ดาน ฝีง, อาหิสะมัก เญย ตอน, โอโฮลีอับ, เถง เจี๊ยน เบซาเลน. เยีย หย่า ปุน เต้าๆ ปั์ว-เต้า หลง เญย หฒั่ง เมี่ยน ม่าย ปั้น เหฒ่ย โหฒว หญู่งๆ ฮนั้ง เยีย พ้าย เม่ย โหฒว วั้ว นอ.

7เยีย ปุน นิ่น บัว ไฮ่ โหฒว หวุ่ย ปวั้ง เญย ด๊บ-ลิ่ว, โหฒว แล์ง แหง่ง หว่า ฟาง เหธา เหธย เอน เญย เหว่ย, โหฒว ด๊บ-ลิ่ว เญย หญู่งๆ จา-ต๋อง,

8เตี้ย เหธา เตี้ย เญย จา-สี่, เจียม-ตัง เหธา เจียม-ตัง เญย จา-สี่, ปั๊ว ฮูง เตี้ย,

9ปั๊ว เหฒี่ย เญย กะน้าย เญย เหฒี่ย-ต้อง เหธา เหฒี่ย-ต้อง เญย จา-สี่, ต้ง ซิ ปุ้น เหธา ปุ้น เญย ท้าบ,

10โหฒว ต้าย เหฑว่ย เญย ลุย-โหว, เซ อาโลน โหฒว ไซ เญย ธีง-เหฑ่ง ลุย-โหว เหธา นิ่น เญย ตอน โหฒว ไซ เมี่ยน เญย กง เญย เฒี่ยง โห่ ฒุ เญย ลุย-โหว,

11ออน เมี่ยน เญย โย่ว เหธา เยียม ธีง-เหฑ่ง วั้ว ฉง ปั๊ว เญย ฮูง. นิ่น บัว อ๋อย หฒุ หฒิว เยีย พ้าย เม่ย เญย เหยียด ฒู้ง โหฒว เหฑ่ง.”

12เฒี้ยว ก๊อง บั๋ว โมเซ,

13“อ๋อย หฒุ บั๋ว อิสะลาเอน เญย หฒวัง เมี่ยน, ‘เม่ย บัว อ๋อย หฒุ เซียว เยีย เญย ตี้ง กง ฮนอย เหว่ย หฒุ น้าย นอม ฮนอย เยียม เยีย เหธา เม่ย บัว บุด๋ง ต่อย เจี๋ย ต่อย โหฒว จั๋ง-โห่, เหว่ย ปุน เม่ย บัว ฮิ้ว ตุ๊ เยีย เซ เฒี้ยว, ต้ง ปุน เม่ย บัว ธีง-เหฑ่ง วั้ว เต้า.

14“‘อ๋อย หฒุ เซียว ตี้ง กง ฮนอย, เซ เหว่ย เม่ย บัว เป๋น ธีง-เหฑ่ง ฮนอย. หาย เต้า ป์าม น้าย นอม ฮนอย, ฒู้ง อ๋อย หฒุ ไต๋ กวั่ง. หาย เต้า หล่ง น้าย นอม ฮนอย โหฒว กง, วั้ว เต้า เยียม นิ่น เญย เมี่ยน บุด๋ง อ๋อย หฒุ ไพ กวั่ง.

15เม่ย บัว หล่ง จุ๊ ฮนอย โหฒว กง, มป่า เสี่ย ฮนอย วั้ว ฮนอย เซ ตี้ง กง ฮนอย, อ๋อย หฒุ ฮิด ขวน, เซ ธีง-เหฑ่ง ฮนอย ฝูง ปุน เฒี้ยว. หาย เต้า หล่ง วั้ว นอม ฮนอย โหฒว กง, อ๋อย หฒุ ไต๋ ไต่.

16อิสะลาเอน เมี่ยน ต่อย เจี๋ย ต่อย อ๋อย หฒุ เซียว ตี้ง กง ฮนอย โหฒว เหยียด ลิ์ว เหลียบ เญย แหง่ง หว่า.

17น้าย เซ เยีย เหธา อิสะลาเอน เมี่ยน เหยียด ลิ์ว โหฒว เญย จั๋ง-โห่, เหว่ย หฒุ เยีย, เฒี้ยว, หล่ง จุ๊ ฮนอย เหฒย ลู่ง เหฒย เดา. เสี่ย ฮนอย วั้ว ฮนอย เยีย ตี้ง กง ฮิด ขวน.’”

18เฒี้ยว เยียม ซีนาย บง เหธา โมเซ ก๊อง ลิ์ว หว่า, นิ่น เฒาะ เฟี้ย เจี๊ยน แล์ง เญย แหง่ง หว่า วั้ว เต๋ย อี คว้าย หละเปย๊ย-เป๊น จิว ปุน โมเซ, เซ ทิน-ฮู่ง หล่ง ปั์ว-โด๊ะ เฟี้ย เญย หละเปย๊ย-เป๊น.

← Chapter 30 Jump to: Chapter 32 →