2 Kings 1

Lahu Bible Edited © Thailand Bible Society and Bible Society of Myanmar, 2010, 2020.

Jump to: Chapter 2 →

1Iˉsaˍreˍlaˆ jawˇmawˇ Aˍhaˆ suh peuˬ hkʼaw‸ nawˉ, Mawˇbaˆ chaw teˇ hpaˍ Iˉsaˍreˍlaˆ chaw hta‸ kʼaw‸ hpfuhˆ ve yoˬ.

2Iˉsaˍreˍlaˆ jawˇmawˇ Aˍhkaˍziˆ lehˬ yawˇ ve hawˉ yehˬ yehˬ miˉ ehˉ hkʼaw ce leh naˬ jaˇ chehˇ ve yoˬ. Hkʼe te leh yawˇ kʼaw‸ na-e la tuˬ naˍ, maˇ heˆ kʼo suh-e tuˬ naˍ, yawˇ ve chaw hta‸ hpehˇ leh Hpiˇliˇtiˆ mvuhˇmiˬ Eˇkaˍronˍ venˇ hkʼaw cawˬ ve Baˍlaˆzeˍbuˆ gʼuiˬsha hta‸ ca na nyi tcuh ve yoˬ.

3Ya‸ hkʼaˇ, mvuhˇ naw tcuh yaˇ teˇ gʼaˇ, Tiˉshaˍbiˆ venˇ yaˇ Eˇliˇya‸ hta‸ tawˇ yaw piˇ leh, jawˇmawˇ Aˍhkaˍziˆ hpehˇ peu taˍ ve chaw oˇ ve teˇ hpaˍ hta‸ chi hkʼe ca na nyi tcuh ve yoˬ. Aˬ hto‸ ma pa taw, nawˬ hui Eˇkaˍronˍ venˇ hkʼaw cawˬ ve Baˍlaˆzeˍbuˆ gʼuiˬsha hta‸ ca na nyi tuˬ kʼai toˇ ve le. Iˉsaˍreˍlaˆ mvuhˇmiˬ hkʼaw Gʼuiˬsha maˇ cawˬ teh‸ nawˬ hui dawˇ ve laˇ.

4Chi beu‸ jawˇmawˇ geh kʼaw‸ kʼo‸-e leh, Nawˬ kʼaw‸ na-e la tuˬ ve maˇ heˆ. Gʼa suh-e tuˬ yoˬ, teh‸ yawˇ hta‸ ca kʼaw‸ kʼoˆ piˇ-oˆ, teh‸ Eˇliˇya‸ hta‸ ca kʼoˆ piˇ tcuh ve yoˬ.

5Eˇliˇya‸ lehˬ, Gʼuiˬsha kʼoˆ ve hkʼe te leh, chaw oˇ ve teˇ hpaˍ htawˇ jawˇmawˇ geh kʼaw‸ kʼo‸-e ve yoˬ. Oˇ htaˇ jawˇmawˇ lehˬ, Aˬ hto‸ ma pa taw nawˬ hui kʼaw‸ la ve le, teh‸ yawˇ hui hta‸ kʼoˆ piˇ ve yoˬ.

6Yawˇ hui kʼaw‸ yaw hkʼaw‸ leh kʼoˆ ve, Ya‸ kʼaw kʼaˉ lo ngaˬ hui chaw teˇ gʼaˇ hta‸ hpuˇ da‸ ve yoˬ. Yawˇ ngaˬ hui hta‸ nawˬ geh lo kʼaw‸ kʼo‸-e peu laˇ leh, Aˬ hto‸ ma pa taw, nawˬ hui Eˇkaˍronˍ venˇ hkʼaw cawˬ ve Baˍlaˆzeˍbuˆ gʼuiˬsha hta‸ ca na nyi tuˬ kʼai chehˇ ve le. Iˉsaˍreˍlaˆ mvuhˇmiˬ hkʼaw Gʼuiˬsha maˇ cawˬ, teh‸ nawˬ hui dawˇ ve laˇ. Chi beu‸ jawˇmawˇ geh kʼaw‸ kʼo‸-e leh, Nawˬ kʼaw‸ na-e la tuˬ ve maˇ heˆ. Gʼa suh-e tuˬ yoˬ, teh‸ jawˇmawˇ hta‸ ca kʼoˆ piˇ-oˆ, teh‸ ngaˬ hui hta‸ kʼoˆ laˇ ve yoˬ, teh‸ yawˇ hui jawˇmawˇ hta‸ kʼoˆ piˇ ve yoˬ.

7Oˇ htaˇ jawˇmawˇ lehˬ, Chaw oˇ ve a shu le, teh‸ yawˇ hui hta‸ na nyi ve yoˬ.

8Chaw oˇ ve lehˬ, shaˍ guiˬ kʼuˉ veu‸ deh taˍ leh, shaˍ guiˬ haˍ pi caˆ tsuh‸ taˍ ve yoˬ, teh‸ yawˇ hui yawˇ hta‸ kʼaw‸ yaw hkʼaw‸ piˇ ve yoˬ. Oˇ htaˇ jawˇmawˇ lehˬ, Chaw oˇ ve hpaˇ Eˇliˇya‸ hpeh‸ ve yoˬ, teh‸ kʼoˆ ve yoˬ.

9Hkʼe te leh, jawˇmawˇ lehˬ Eˇliˇya‸ hta‸ ca kuˬ veu laˇ tuˬ, ma‸ poˍ teˇ gʼaˇ leh ma‸ yaˇ 50 gʼaˇ hta‸ kʼai tcuh ve yoˬ. Yawˇ hui lehˬ, hkʼaw hkʼoˆ lo mui chehˇ taˍ ve Eˇliˇya‸ hta‸ gʼa mawˬ leh, Gʼuiˬsha ve chaw-oˬ, nawˬ hkʼaw hkʼoˆ lo ya‸ la tuˬ jawˇmawˇ tawˇ pe‸ laˇ ve yoˬ, teh‸ yawˇ hta‸ kʼoˆ piˇ ve yoˬ.

10Ngaˬ Gʼuiˬsha ve chaw hpeh‸ ve kʼo, mvuhˇ naw ma hkʼoˆ lo aˬ miˍ ce la leh nawˬ hui hta‸ to‸ baˬ piˇ lawˬ-o‸, teh‸ Eˇliˇya‸ yawˇ hui hta‸ kʼoˆ piˇ ve yoˬ. Teˇ cawˬ haˉ mvuhˇ naw ma hkʼoˆ lo aˬ miˍ ce la leh, yawˇ hui hta‸ to‸ baˬ sheˬ ve yoˬ.

11Oˇ ve hkʼaw‸ nawˉ, jawˇmawˇ lehˬ ma‸ poˍ teˇ gʼaˇ leh ma‸ yaˇ 50 gʼaˇ hta‸ teˇ pawˆ kʼaw‸ kʼai tcuh leh, Eˇliˇya‸ hta‸ ca kʼaw‸ shiˍ tcuh ve yoˬ. Gʼuiˬsha ve chaw-oˬ, nawˬ hkʼaw hkʼoˆ lo ya‸ la tuˬ, jawˇmawˇ tawˇ pe‸ laˇ ve yoˬ, teh‸ yawˇ hta‸ kʼoˆ piˇ ve yoˬ.

12Ngaˬ Gʼuiˬsha ve chaw hpeh‸ ve kʼo, mvuhˇ naw ma hkʼoˆ lo aˬ miˍ ce ya‸ la leh nawˬ hui hta‸ to‸ baˬ piˇ lawˬ-o‸, teh‸ Eˇliˇya‸ yawˇ hui hta‸ kʼoˆ piˇ ve yoˬ. Teˇ cawˬ haˉ mvuhˇ naw ma hkʼoˆ lo aˬ miˍ ce la leh, yawˇ hui hta‸ to‸ baˬ sheˬve yoˬ.

13Jawˇmawˇ lehˬ, shehˆ pawˆ teˇ pawˆ yawˇ ve ma‸ poˍ teˇ gʼaˇ leh ma‸ yaˇ 50 gʼaˇ hta‸ kʼaw‸ kʼai tcuh ve yoˬ. Ma‸ poˍ oˇ ve hkʼaw hkʼoˆ lo taˆ-e leh, Eˇliˇya‸ mehˆ gʼuˇ suhˍ lo boˆ taˍ ve yoˬ. Gʼuiˬsha ve chaw-oˬ, ngaˬ leh ngaˬ ve ma‸ yaˇ teˇ hpaˍ hta‸ ha kʼaˉ leh ngaˬ hui ve a sha‸ hta‸ a ciˉ ponˬ laˇ-oˆ.

14Ma‸ poˍ nyiˇ gʼaˇ leh yawˇ hui ve ma‸ yaˇ teˇ hpaˍ lehˬ, aˬ miˍ to‸ baˬ ve hta‸ gʼa hkanˍ peuˬ ve yoˬ. Ya‸ hkʼaˇ, ngaˬ hta‸ a ciˉ ha kʼaˉ laˇ-oˆ, teh‸ Eˇliˇya‸ hta‸ kʼoˆ piˇ ve yoˬ.

15Oˇ htaˇ Gʼuiˬsha ve mvuhˇ naw tcuh yaˇ Eˇliˇya‸ geh laˬ leh, Nawˬ yawˇ hui geh kʼai-o. Taˇ kawˆ, teh‸ yawˇ hta‸ kʼoˆ piˇ ve yoˬ. Hkʼe te leh, Eˇliˇya‸ yawˇ hui geh kʼai leh, jawˇmawˇ hta‸ chi hkʼe kʼoˆ piˇ ve yoˬ.

16Gʼuiˬsha chi hkʼe kʼoˆ ve yoˬ. Iˉsaˍreˍlaˆ mvuhˇmiˬ hkʼaw Gʼuiˬsha maˇ cawˬ ve hkʼe te leh, Eˇkaˍronˍ venˇ hkʼaw cawˬ ve Baˍlaˆzeˍbuˆ gʼuiˬsha geh nawˬ ve chaw hta‸ hpehˇ leh ca na nyi tcuh ve pa taw, nawˬ kʼaw‸ na-e la tuˬ ve maˇ heˆ. Gʼa suh-e tuˬ yoˬ, teh‸ yawˇ hta‸ kʼoˆ piˇ ve yoˬ.

17Gʼuiˬsha Eˇliˇya‸ hta‸ cuˇ leh kʼoˆ taˍ peuˬ ve hkʼe, Aˍhkaˍziˆ suh-e ve yoˬ. Aˍhkaˍziˆ lehˬ yaˇ paˍ teˇ gʼaˇ ka‸ maˇ cawˬ. Hkʼe te leh, Yuˇda‸ mvuhˇmiˬ hta‸ Yawˇshaˍhpaˆ ve yaˇ jawˇmawˇ Yeˍhawˇranˍ uˉ peunˍ ve 2 hkʼaw‸ teˇ hkʼaw‸ htaˇ, yawˇ ve awˬ nyi paˍ Yawˇranˍ yawˇ awˬ tan jawˇmawˇ kʼaw‸ te ve yoˬ.

18Jawˇmawˇ Aˍhkaˍziˆ hkʼa te taˉ ve kanˉ hkʼa peu-eˬ Iˉsaˍreˍlaˆ jawˇmawˇ teˇ hpaˍ ve li‸ daw hkʼaw bvuh‸ keu taˍ ve yoˬ.

Jump to: Chapter 2 →