2 Kings 4

Lahu Bible Edited © Thailand Bible Society and Bible Society of Myanmar, 2010, 2020.

1Gʼuiˬsha ve tcuh kaˍ paˍ teˇ gʼaˇ ve awˬ miˇ ma Eˇliˇshehˇ geh laˬ leh, Jawˇmawˇ-oˬ, ngaˬ ve awˬ hpawˇ suh peuˬ. Nawˬ shiˍ chehˇ ve hkʼe, yawˇ lehˬ Gʼuiˬsha hta‸ kawˆ puiˉ ve chaw hpeh‸ ve yoˬ. Yawˇ shu geh jeˬ cha taˍ ve pa taw, chi beu‸ jeˬ shehˍ hpaˇ oˇ ve laˬ leh, ngaˬ yaˇ paˍ nyiˇ gʼaˇ hta‸ jeˬ ca shawˍ yuˬ la ve yoˬ, teh‸ yawˇ hta‸ kʼoˆ piˇ ve yoˬ.

2Oˇ htaˇ Eˇliˇshehˇ lehˬ, Ngaˬ hkʼaˬ hkʼe gʼa ga laˇ tuˬ le. Nawˬ ve yehˬ hkʼaw aˬ hto‸ ma cawˬ le. Ngaˬ hta‸ kʼoˆ laˇ-oˆ, teh‸ yawˇ hta‸ kʼoˆ piˇ ve yoˬ. Yaˇ miˇ oˇ ve lehˬ, Ngaˬ geh te‸ chiˉ maˇ cawˬ. Shaˍlonˍ chu keu ve je‸ mu‸ hkʼu teˇ maˬ ceh cawˬ ve yoˬ, teh‸ Eˇliˇshehˇ hta‸ kʼaw‸ yaw hkʼaw‸ piˇ ve yoˬ.

3Oˇ htaˇ Eˇliˇshehˇ lehˬ, Nawˬ paˇ nawˬ kui lo chehˇ ve chaw hui geh kʼai leh, ngaˍ gʼa ve hkʼe je‸ mu‸ hkʼu hkʼa biˇ ca ngaˍ hpoˆ taˍ-o‸.

4Oˇ hkʼe te peuˬ hkʼaw‸ nawˉ, nawˬ leh nawˬ ve yaˇ paˍ nyiˇ gʼaˇ yehˬ hkʼaw lo‸-e leh, yehˬ miˉ hoˆ taˍ peuˬ hkʼaw‸ nawˉ, je‸ mu‸ hkʼu oˇ ve teˇ hpaˍ hkʼaw shaˍ chu ngeuˍ keu-o, teh‸ yaˇ miˇ hta‸ kʼoˆ piˇ ve yoˬ.

5Hkʼe te leh, yaˇ miˇ oˇ ve yawˇ ve yaˇ paˍ nyiˇ gʼaˇ hta‸ aˉ hkʼaw lo shiˍ kʼo‸-e leh, yehˬ miˉ hoˆ peuˬ hkʼaw‸ nawˉ, ca ngaˍ taˍ ve je‸ mu‸ hkʼu oˇ ve teˇ hpaˍ hkʼaw shaˍ chu ngeuˍ keu ve yoˬ.

6Yawˇ hui je‸ mu‸ hkʼu oˇ ve teˇ hpaˍ hkʼaw shaˍ chu keu biˇ peuˬve teˇ yanˇ, Maˇ gʼa keu sheˍ ve mu‸ hkʼu teˇ maˬ maˬ cawˬ sheˍ laˇ, teh‸ yawˇ ve yaˇ paˍ hta‸ na nyi ve yoˬ. Maˇ cawˬ-o. Chi lehˬ awˬ leh meuˇ teˇ maˬ yoˬ, teh‸ yaˇ paˍ yawˇ ve awˬ e hta‸ kʼaw‸ yaw hkʼaw‸ piˇ ve yoˬ. Oˇ htaˇ, shaˍ lonˍ chu maˇ kʼaw‸ ya‸ la ve yoˬ.

7Oˇ hkʼe te peuˬ hkʼaw‸ nawˉ, yaˇ miˇ oˇ ve tcuh kaˍ paˍ Eˇliˇshehˇ geh kʼaw‸ kʼai ve yoˬ. Shaˍ chu oˇ ve hta‸ hawˇ leh, nawˬ ve jeˬ hta‸ shaiˍ piˇ-oˆ. Nawˬ leh nawˬ ve yaˇ teˇ hpaˍ awˬ pon, hpu awˬ leuˉ ka‸ tawˆ la tuˬ sheˍ ve yoˬ, teh‸ Eˇliˇshehˇ yawˇ hta‸ kʼoˆ piˇ ve yoˬ.

8Teˇ nyi htaˇ, Eˇliˇshehˇ Suˆnenˍ venˇ lo kʼai ve yoˬ. Oˇ kaˬ lo paw sha jaˇ ve yaˇ miˇ teˇ gʼaˇ chehˇ taˍ ve yoˬ. Yaˇ miˇ oˇ ve yawˇ hta‸ awˍ teˇ poˬ kuˬ caˍ piˇ ve yoˬ. Oˇ ve teˇ nyi hta‸ te leh, yawˇ Suˆnenˍ venˇ lo kʼai ve teˇ pawˆ le le yaˇ miˇ oˇ ve geh awˍ ca caˇ ve yoˬ.

9Hkʼe te leh, yaˇ miˇ oˇ ve yawˇ ve awˬ hpawˇ hta‸ chi hkʼe kʼoˆ piˇ ve yoˬ. Ngaˬ hui ve yehˬ lo teˇ hkui teˇ hkui laˬ ve chaw oˇ ve lehˬ, da‸ kehˬ ve chaw hpeh‸ ve hta‸ ngaˬ shiˍ ve yoˬ.

10Chi hta‸ pa taw, ngaˬ huiˉ maˬ ve yehˬ awˬ na teˇ bawehˇ lo yawˇ ca haˉ la kʼo zuh‸ tuˬ ve ku-iˍ teˇ maˬ, hpui lawˇ teˇ maˬ, mui hkʼawˇ teˇ maˬ leh kawˆ faiˇ teˇ maˬ ca gu taˍ piˇ-a veuˬ, teh‸ yawˇ hta‸ jehˬ piˇ ve yoˬ.

11Teˇ nyi htaˇ Eˇliˇshehˇ lehˬ, Suˆnenˍ venˇ lo kʼai leh gʼaˇ ca jehˇ tuˬ yawˇ awˬ pon gu taˍ ve bawehˇ lo kʼai ve yoˬ.

12Oˇ htaˇ, yawˇ ve awˬ ceˬ paˍ Geˍhaˍziˆ hta‸ kuˬ leh, yehˬ shehˍ ma hta‸ ca kuˬ tcuh ve yoˬ.

13Yehˬ shehˍ ma gaˬ la htaˇ, Ngaˬ huiˉ maˬ awˬ pon yaˇ miˇ chi te laˇ ve kanˉ awˬ pon, ngaˬ aˬ hto‸ ma awˬ bon gʼa kʼaw‸ te hkʼaw‸ piˇ tuˬ leh naˍ. Maˇ heˆ kʼo, yawˇ awˬ tan jawˇmawˇ leh ma‸ poˍ lonˉ hta‸ tawˇ gʼa ca yaw piˇ tuˬ leh naˍ, yawˇ hta‸ a ciˉ na nyi-o, teh‸ Eˇliˇshehˇ yawˇ ve awˬ ceˬ paˍ hta‸ kʼoˆ piˇ ve yoˬ. Oˇ htaˇ yaˇ miˇ oˇ ve lehˬ, Ngaˬ ve chaw teˇ hpaˍ geh ngaˬ loˍ ve awˬ ceuˬ hkʼa peu-eˬ gʼa taˍ peuˬ, teh‸ kʼaw‸ yaw hkʼaw‸ piˇ ve yoˬ.

14Hkʼe te kʼo, ngaˬ yawˇ awˬ pon aˬ hto‸ ma gʼa te piˇ tuˬ ve le, teh‸ Eˇliˇshehˇ yawˇ ve awˬ ceˬ paˍ Geˍhaˍziˆ hta‸ kʼaw‸ na nyi ve yoˬ. Yawˇ lehˬ yaˇ paˍ teˇ gʼaˇ ka‸ maˇ cawˬ. Chi beu‸ yawˇ ve awˬ hpawˇ ka‸ mawˇ la peuˬ, teh‸ Geˍhaˍziˆ Eˇliˇshehˇ hta‸ kʼaw‸ yaw hkʼaw‸ piˇ ve yoˬ.

15Yaˇ miˇ oˇ ve hta‸ choˬ kaˬ lo jiˆ laˬ tuˬ kʼoˆ piˇ-oˆ, teh‸ Eˇliˇshehˇ yawˇ ve awˬ ceˬ paˍ hta‸ kʼoˆ piˇ ve yoˬ. Hkʼe te leh, yaˇ miˇ oˇ ve laˬ leh yehˬmiˉhpe‸ lo huˉ taˍ ve yoˬ.

16Oˇ htaˇ Eˇliˇshehˇ lehˬ, Nehˉ hkʼaw‸ chi teˇ yanˇ gaˬ kʼo, nawˬ yaˇ paˍ teˇ gʼaˇ gʼa chiˇ guiˇ tuˬ yoˬ, teh‸ yaˇ miˇ oˇ ve hta‸ kʼoˆ piˇ ve yoˬ. Jawˇmawˇ-oˬ, nawˬ ngaˬ hta‸ a ciˉ taˇ heˍ laˇ-oˆ. Awˬ lawn kʼo, nawˬ lehˬ Gʼuiˬsha ve chaw hpeh‸ ve yoˬ, teh‸ yaˇ miˇ kʼaw‸ yaw hkʼaw‸ piˇ ve yoˬ.

17Ya‸ hkʼaˇ, Eˇliˇshehˇ kʼoˆ taˍ peuˬ ve hkʼe, nehˉ hkʼaw‸ gaˬ ve teˇ yanˇ, yawˇ yaˇ paˍ teˇ gʼaˇ paw la ve yoˬ.

18Awˬ hkʼaw‸ nawˉ awˬ yanˇ maw la leh, caˬ gʼeu‸ yanˇ gaˬ la htaˇ, yaˇ paˍ oˇ ve ti mi hkʼaw lo kanˉ te chehˇ ve yawˇ ve awˬ pa geh kʼai ve yoˬ.

19Yawˇ oˇ kaˬ lo gaˬ ve teˇ yanˇ, Ngaˬ oˉ kʼoˍ naˬ jaˇ, ngaˬ oˉ kʼoˍ naˬ jaˇ, teh‸ yawˇ ve awˬ pa hta‸ kʼoˆ piˇ ve yoˬ. Yaˇ paˍ chi hta‸ yawˇ ve awˬ e geh chiˇ kʼo‸-e piˇ-oˆ, teh‸ awˬ pa yawˇ ve awˬ ceˬ hta‸ kʼoˆ piˇ ve yoˬ.

20Awˬ ceˬ lehˬ yaˇ paˍ oˇ ve hta‸ yawˇ ve awˬ e geh chiˇ kʼo‸-e piˇ ve yoˬ. Awˬ e lehˬ yawˇ ve yaˇ paˍ hta‸ taˆ mui taˍ ve yoˬ. Ya‸ hkʼaˇ, mvuhˇ law‸ kʼaw tcuhˆ la htaˇ, yaˇ paˍ oˇ ve suh-e ve yoˬ.

21Hkʼe te leh, yawˇ lehˬ yaˇ paˍ oˇ ve hta‸ Eˇliˇshehˇ ve bawehˇ lo yuˬ kʼai leh, yawˇ ve ku-iˍ hkʼoˆ teh taˍ ve yoˬ.

22Oˇ hkʼe te peuˬ hkʼaw‸ nawˉ, yawˇ ve awˬ hpawˇ hta‸ kuˬ yuˬ leh, Awˬ ceˬ paˍ teˇ gʼaˇ hta‸ choˬ kaˬ lo piˉ laˬ teˇ hkeh sheh veu laˇ tuˬ kʼoˆ piˇ-oˆ. Ngaˬ Eˇliˇshehˇ geh kʼai tuˬ loˍ ve yoˬ. Kʼai taˉ peuˬ kʼo, haˆ haˆ kʼaw‸ la tuˬ yoˬ, teh‸ yawˇ ve awˬ hpawˇ hta‸ kʼoˆ piˇ ve yoˬ.

23Aˬ hto‸ ma pa taw nawˬ ya‸ nyi kʼai gaˇ ve le. Ya‸ nyi lehˬ shinˉ nyi ka‸ maˇ heˆ. Ha pa tawˬ ve pawehˇ te ve awˬ nyi ka‸ maˇ heˆ, teh‸ yawˇ ve awˬ hpawˇ yawˇ hta‸ kʼaw‸ kʼoˆ piˇ ve yoˬ. Te‸ chiˉ maˇ heˆ, teh‸ yawˇ ve awˬ miˇ ma yawˇ hta‸ kʼaw‸ yaw hkʼaw‸ piˇ ve yoˬ.

24Piˉ laˬ hta‸ awˬ an tcuhˉ peuˬ hkʼaw‸ nawˉ, Piˇ laˬ hta‸ gehˬ gʼa ve hkʼe a ciˉ gehˬ chaweh gʼa‸ kʼai-o. Ngaˬ tawˇ maˇ pe‸ laˇ ve kʼo taˇ jehˇ, teh‸ yaˇ miˇ yawˇ ve awˬ ceˬ paˍ hta‸ kʼoˆ piˇ ve yoˬ.

25Hkʼe te leh yawˇ tawˆ kʼai leh, Eˇliˇshehˇ chehˇ taˍ kuiˬ Kaˍmeˍlaˆ lo kʼai ve yoˬ. Yawˇ vuiˇ kuiˬ lo laˬ chehˇ sheˍ htaˇ ka‸ Eˇliˇshehˇ yawˇ hta‸ mawˬ leh, Nyi loˬ. Suˆnenˍ venˇ hkʼaw chehˇ ve yaˇ miˇ laˬ chehˇ ve yoˬ.

26Yawˇ geh haˆ gʼuiˇ kʼai leh, yawˇ awˬ to, yawˇ ve awˬ hpawˇ leh yawˇ ve yaˇ paˍ hui chehˇ sha chehˇ leh naˍ, ca na nyi-o, teh‸ yawˇ ve awˬ ceˬ paˍ Geˍhaˍziˆ hta‸ kʼoˆ piˇ ve yoˬ. Hkʼa peu-eˬ chehˇ sha chehˇ ve awˬ lawn yaˇ miˇ oˇ ve Geˍhaˍziˆ hta‸ kʼoˆ piˇ ve yoˬ.

27Ya‸ hkʼaˇ, yawˇ Eˇliˇshehˇ geh gaˬ la ve teˇ yanˇ, yawˇ Eˇliˇshehˇ gʼuˇ suhˍ boˆ taˍ leh, yawˇ ve hkui sheh hta‸ yuˬ tiˍ taˍ ve yoˬ. Geˍhaˍziˆ lehˬ yaˇ miˇ oˇ ve hta‸ ca‸ baˬ-a teh‸ te ve yoˬ. Ya‸ hkʼaˇ Eˇliˇshehˇ lehˬ, Yawˇ hta‸ te‸ chiˉ taˇ te. Yawˇ dawˇ haˍ jaˇ chehˇ ve hta‸ nawˬ maˇ mawˬ laˇ. Yawˇ hkʼaˬ hkʼe hpeh‸ chehˇ ve awˬ lawn Gʼuiˬsha ngaˬ hta‸ te‸ chiˉ maˇ kʼoˆ laˇ sheˬ, teh‸ Geˍhaˍziˆ hta‸ kʼoˆ piˇ ve yoˬ.

28Oˇ htaˇ yaˇ miˇ oˇ ve lehˬ, Jawˇmawˇ-oˬ, nawˬ ngaˬ hta‸ yaˇ paˍ teˇ gʼaˇ cawˬ la tuˬ yoˬ, teh‸ kʼoˆ laˇ taˍ ve maˇ heˆ laˇ. Ngaˬ hta‸ a ciˉ taˇ heˍ laˇ-oˆ, teh‸ ngaˬ nawˬ hta‸ kʼoˆ piˇ taˍ peuˬ ve maˇ heˆ laˇ, teh‸ Eˇliˇshehˇ hta‸ kʼoˆ piˇ ve yoˬ.

29Eˇliˇshehˇ lehˬ, yawˇ ve awˬ ceˬ paˍ Geˍhaˍziˆ hta‸ hpfuhˆ nyi leh, Ngaˬ ve juˇ fuiˍ taˬ hta‸ yuˬ leh haˆ gʼuiˇ kʼai-o. Ya‸ kʼaw kʼaˉ lo chaw teˇ gʼaˇ hta‸ ka‸ na‸ uˉ taˇ te da‸ chehˇ. Yaˇ miˇ ma chi ve yehˬ lo gʼuiˇ kʼai leh, ngaˬ ve juˇ fuiˍ taˬ chi ve hta‸ yaˇ ehˉ awˬ hkʼoˆ lo che peu-o, teh‸ Geˍhaˍziˆ hta‸ kʼoˆ piˇ ve yoˬ.

30Oˇ htaˇ yaˇ miˇ oˇ ve lehˬ, Ngaˬ nawˬ hta‸ teh taˉ leh maˇ kʼo‸-e, teh‸ te‸ chehˇ ve Gʼuiˬsha ve awˬ meh hta‸ cuˇ leh hkanˍ ve yoˬ, teh‸ Eˇliˇshehˇ hta‸ kʼoˆ piˇ ve yoˬ. Hkʼe te leh, Eˇliˇshehˇ yaˇ miˇ ma oˇ ve hkʼaˇ suh gʼa‸ kʼai ve yoˬ.

31Geˍhaˍziˆ gʼuiˇ kʼai leh, Eˇliˇshehˇ ve juˇ fuiˍ taˬ hta‸ yaˇ ehˉ oˇ ve awˬ hkʼoˆ lo che peu ve yoˬ. Ya‸ hkʼaˇ, yaˇ ehˉ oˇ ve maˇ kʼaw‸ te‸ la. Hkʼe te leh, yawˇ Eˇliˇshehˇ geh laˬ leh, Yaˇ ehˉ maˇ kʼaw‸ te‸ tu la mawˬ, teh‸ yawˇ hta‸ kʼoˆ piˇ ve yoˬ.

32Eˇliˇshehˇ yehˬ lo gaˬ la ve teˇ yanˇ, yawˇ teˇ gʼaˇ ceh tiˉ bawehˇ hkʼaw lo‸-e leh, yaˇ ehˉ oˇ ve zuh‸ hpui hkʼoˆ lo zuh‸ taˍ laˇ ve hta‸ yawˇ gʼa mawˬ ve yoˬ.

33Hkʼe te leh, yawˇ yehˬ miˉ hoˆ peuˬ hkʼaw‸ nawˉ, Gʼuiˬsha geh bon lawˬ ve yoˬ.

34Oˇ hkʼe te peuˬ hkʼaw‸ nawˉ, yawˇ ku-iˍ hkʼoˆ taˆ-e leh, yawˇ ve maw‸ kʼaw, mehˆ shiˍ, leh la‸ sheh teˇ hpaˍ, yaˇ ehˉ ve maw‸ kʼaw‸, mehˆ shiˍ leh la‸ sheh hkʼoˆ taˍ ve yoˬ. Oˇ htaˇ, yaˇ ehˉ kʼaw‸ lehˬ la ve yoˬ.

35Hkʼe te leh, yawˇ tu la leh bawehˇ hkʼaw htawˇ kʼaw‸ nawˬ kʼaw‸ te toˇ chehˇ ve yoˬ. Peuˬ hkʼaw‸ nawˉ, ku-iˍ hkʼoˆ lo teˇ pawˆ kʼaw‸ taˆ-e leh, awˉ lawˉ teˇ pawˆ te ve hkʼe kʼaw‸ te ve yoˬ. Oˇ htaˇ yaˇ ehˉ oˇ ve suhˍ pawˆ hkʼa gaˬ tcuhˍ peuˬ hkʼaw‸ nawˉ mehˆ hpaw la ve yoˬ.

36Hkʼe te leh, Eˇliˇshehˇ Geˍhaˍziˆ hta‸ kuˬ leh, yawˇ ve awˬ e hta‸ ca kuˬ tcuh ve yoˬ. Yawˇ gaˬ la ve teˇ yanˇ, Nawˬ ve yaˇ hta‸ nyi-o, teh‸ Eˇliˇshehˇ yawˇ hta‸ kʼoˆ piˇ ve yoˬ.

37Yaˇ miˇ oˇ ve lehˬ, Eˇliˇshehˇ ve hkui paˇ lo boˆ taˍ ve yoˬ. Oˇ ve hkʼaw‸ nawˉ, yawˇ ve yaˇ hta‸ shiˍ leh tawˆ kʼai ve yoˬ.

38Teˇ pawˆ htaˇ, mvuhˇmiˬ hkʼaw lo meu‸ lonˉ kaˆ lonˉ gaˬ la ve yoˬ. Oˇ htaˇ Eˇliˇshehˇ Giˇlaˍgaˍ venˇ lo gaˬ la ve yoˬ. Teˇ nyi htaˇ, yawˇ lehˬ tcuh kaˍ paˍ teˇ hpaˍ hta‸ maˍ piˇ chehˇ ve teˇ yanˇ, yawˇ hui hkʼa peu-eˬ awˬ pon awˍ chiˇ teˇ mu‸ hkʼu lonˉ te tuˬ yawˇ ve awˬ ceˬ paˍ hta‸ tawˇ piˇ ve yoˬ.

39Awˬ ceˬ paˍ oˇ ve lehˬ, heh puiˉ hkʼaw lo kʼai leh gʼawˇ hpa‸ mvuhˬ naweh leh, aˉ mo‸ kʼoˍ shiˍ teˇ hpaˍ hta‸ pfuhˇ gʼaˇ ve hkʼe shaˉ pfuhˇ veu laˇ leh teˇ geh hkaw‸ caˉ ve yoˬ.

40Awˍ caˇ yanˇ gaˬ leh, awˍ keu caˇ ve teˇ yanˇ, Awˍ chiˇ mu‸ hkʼu hkʼaw awˬ taw‸ ma cawˬ ve yoˬ, teh‸ yawˇ hui Eˇliˇshehˇ hta‸ kʼoˆ piˇ leh, yawˇ hui teˇ gʼaˇ ka‸ maˇ kʼaw‸ caˇ ve yoˬ.

41Oˇ htaˇ Eˇliˇshehˇ lehˬ, Caˬ hkʼa meu-e a ciˉ yuˬ veuˬ laˇ-oˆ, teh‸ yawˇ hui hta‸ kʼoˆ piˇ leh, yawˇ hui yuˬ veu laˇ htaˇ, awˬ chiˇ mu‸ hkʼu hkʼaw baˬ keu leh, Chi teˇ pawˆ caˇ nyi loˬ. Te‸ chiˉ maˇ hpeh‸-o, teh‸ yawˇ hui hta‸ kʼoˆ piˇ ve yoˬ. Hkʼe te leh awˍ chiˇ oˇ ve te‸ chiˉ maˇ kʼaw‸ hpeh‸ ve yoˬ.

42Awˬ hkʼaw‸ nawˉ teˇ pawˆ, Baˍlaˍsaˍliˇshaˆ venˇ yaˇ teˇ gʼaˇ Eˇliˇshehˇ geh lo caˬ suhˉ hkʼa yuˬ te taˍ ve hkaoˍmonˇ 20 shiˍ leh iˉ shiˍ teˇ hpaˍ yuˬ veu laˇ ve yoˬ. Hkʼe te leh, Eˇliˇshehˇ lehˬ caˇ tuˬ chi teˇ hpaˍ tcuh kaˍ paˍ hui hta‸ pehˬ caˍ piˇ tuˬ yawˇ ve awˬ ceˬ paˍ hta‸ kʼoˆ piˇ ve yoˬ.

43Oˇ htaˇ yawˇ ve awˬ ceˬ paˍ lehˬ, Caˇ tuˬ chi ve chaw 100 gʼaˇ caˇ law‸-aw laˇ, teh‸ Eˇliˇshehˇ hta‸ na nyi ve yoˬ. Yawˇ hui hta‸ pehˬ caˍ piˇ-oˆ. Awˬ lawn kʼo Gʼuiˬsha kʼoˆ ve, Yawˇ hui caˇ bvuhˆ ve awˬ hkʼoˆ awˬ leuˉ ka‸ cawˬ tuˬ sheˍ ve yoˬ, teh‸ Eˇliˇshehˇ yawˇ ve awˬ ceˬ paˍ hta‸ kʼoˆ piˇ ve yoˬ.

44Hkʼe te leh, awˬ ceˬ paˍ oˇ ve yawˇ hui hta‸ pehˬ caˍ piˇ ve yoˬ. Gʼuiˬsha kʼoˆ taˍ ve hkʼe, yawˇ hui caˇ bvuhˆ ve awˬ hkʼoˆ, awˬ leuˉ ka‸ cawˬ sheˍ ve yoˬ.

← Chapter 3 Jump to: Chapter 5 →