2 Kings 5

Lahu Bible Edited © Thailand Bible Society and Bible Society of Myanmar, 2010, 2020.

← Chapter 4 Jump to: Chapter 6 →

1Suˇriˆ ma‸ poˍ lonˉ Neˍmanˍ lehˬ, Suˇriˆ jawˇmawˇ taˍ uiˍ taˍ mvuh ve hta‸ gʼa hkanˍ ve ma‸ poˍ lonˉ hpeh‸ ve yoˬ. Awˬ lawn kʼo, Gʼuiˬsha lehˬ ma‸ poˍ lonˉ Neˍmanˍ hta‸ cuˇ leh Suˇriˆ chaw hui hta‸ ma‸ bawˆ gʼaˇ piˇ lawˬ ve pa taw yoˬ. Yawˇ lehˬ cheuˬ jaˇ ve ma‸ poˍ lonˉ hpeh‸ ve htawˇ, hkiˬ tu‸ keuˆ taˍ ve yoˬ.

2Teˇ pawˆ htaˇ, yawˇ hui Iˉsaˍreˍlaˆ chaw hui hta‸ ma‸ ca bawˆ da‸ ve yoˬ. Yawˇ hui Iˉsaˍ reˍlaˆ chaw yaˇ miˇ ehˉ teˇ gʼaˇ hpeh gʼa leh, Neˍmanˍ ve awˬ ceˬ ma te tcuh ve yoˬ.

3Teˇ nyi htaˇ, yaˇ miˇ ehˉ chi yawˇ ve yehˬ shehˍ ma geh laˬ leh, Ngaˬ ve awˬ shehˍ hpaˇ hta‸ Saˍmaˍriˆ venˇ hkʼaw chehˇ ve tcuh kaˍ paˍ geh kʼai piˇ lawˬ gaˇ ve yoˬ. Yawˇ lehˬ hkiˬ tu‸ a naˍ hta‸ gu na-e laˇ hpeh‸ ve yoˬ, teh‸ kʼoˆ piˇ ve yoˬ.

4Tawˇ oˇ ve hta‸ Neˍmanˍ gʼa kaˇ htaˇ, yaˇ miˇ ehˉ kʼoˆ ve tawˇ oˇ ve teˇ hpaˍ yawˇ jawˇmawˇ hta‸ ca kʼoˆ piˇ ve yoˬ.

5Oˇ htaˇ jawˇmawˇ lehˬ, Li‸ chi ve hta‸ yuˬ veu leh Iˉsaˍreˍlaˆ jawˇmawˇ geh kʼai-o, teh‸ Neˍmanˍ hta‸ kʼoˆ piˇ ve yoˬ. Hkʼe te leh, Neˍmanˍ lehˬ hpu 30,000, shi 6,000 leh da‸ jaˇ ve veu‸ kʼaˇ 10 cuˍ yuˬ leh tawˆ kʼai ve yoˬ.

6Jawˇmawˇ ve li‸ hkʼaw lo chi hkʼe bvuh‸ taˍ ve yoˬ. Chaw chi ve lehˬ, ngaˬ ve ma‸ poˍ lonˉ hpeh‸ ve yoˬ. Yawˇ ve hkiˬ tu‸ a naˍ hta‸ a ciˉ gu na-e piˇ-oˆ, teh‸ bvuh‸ taˍ ve yoˬ.

7Li‸ oˇ ve hta‸ Iˉsaˍreˍlaˆ jawˇmawˇ gʼaw nyi peuˬ htaˇ, yawˇ ve veu‸ kʼaˇ hta‸ tzuh‸ suhˍ leh, Suˇriˆ jawˇmawˇ ngaˬ hta‸ hkʼaˬ hkʼe dawˇ leh chaw chi hpaˇ hta‸ gu na-e tcuh laˇ ve le. Ngaˬ lehˬ a sha‸ te‸ piˇ tuˬ maˇ kʼoˆ, suh piˇ tuˬ maˇ kʼoˆ, kanˇ paˆ cawˬ ve Gʼuiˬsha hpeh‸ ve, teh‸ yawˇ dawˇ ve laˇ. Yawˇ ngaˬ hta‸ ya‸ meuˇ ca chehˇ ve yoˬ, teh‸ kʼoˆ ve yoˬ.

8Chi hkʼe hpeh‸ chehˇ ve awˬ hkawˇ hta‸ Eˇliˇshehˇ gʼa kaˇ ve teˇ yanˇ, Aˬ hto‸ ma te nawˬ dawˇ haˍ chehˇ ve le. Chaw oˇ ve hta‸ ngaˬ geh peu laˇ-oˆ. Iˉsaˍreˍlaˆ mvuhˇmiˬ hkʼaw Gʼuiˬsha ve tcuh kaˍ paˍ teˇ gʼaˇ chehˇ taˍ ve ngaˬ yawˇ hta‸ maˍ piˇ tuˬ yoˬ, teh‸ jawˇmawˇ hta‸ ca kʼoˆ piˇ tcuh ve yoˬ.

9Hkʼe te leh, Neˍmanˍ iˉ mvuhˇ lawˬ ciˇ leh Eˇliˇshehˇ yehˬ gʼuˇ suhˍ lo gaˬ la ve yoˬ.

10Oˇ htaˇ Eˇliˇshehˇ lehˬ, yawˇ ve awˬ ceˬ paˍ hta‸ kuˬ yuˬ leh, Yawˇ hta‸ Yawˇdanˍ iˉ kaˆ lawˬ hkʼaw suhˍ pawˆ hkʼa gaˬ ca tuˍ keu tuˬ kʼoˆ piˇ-oˆ. Oˇ hkʼe te ve kʼo, yawˇ ve a naˍ na-e la tuˬ yoˬ, teh‸ ca kʼoˆ piˇ tcuh ve yoˬ.

11Oˇ htaˇ, Neˍmanˍ nyi ma zuhˆ jaˇ leh tawˆ kʼai ve yoˬ. Yawˇ kʼoˆ ve, Ngaˬ dawˇ taˍ ve lehˬ, yawˇ awˬ to tawˆ la leh ngaˬ awˬ pon yawˇ ve Gʼuiˬsha geh bon lawˬ laˇ peuˬ hkʼaw‸ nawˉ, yawˇ ngaˬ ve a naˍ hta‸ htawˇ leh ngaˬ hta‸ gu na-e laˇ tuˬ yoˬ teh‸ dawˇ ve yoˬ.

12Ngaˬ hui ve Daˍmaˍsehˆ mvuhˇmiˬ hkʼaw cawˬ ve Aˍbaˍnaˍ iˉ kaˆ lawˬ leh Hpaˍhpaˍ iˉ kaˆ lawˬ teˇ hpaˍ lehˬ, Iˉsaˍreˍlaˆ mvuhˇmiˬ hkʼaw cawˬ ve iˉ kaˆ lawˬ teˇ hpaˍ a‸ kehˉ da‸ ve maˇ heˆ laˇ. Ngaˬ ve a naˍ na-e la tuˬ, iˉ kaˆ ceh tiˉ gʼa hehˉ tuˬ ve hkʼe kʼo, ngaˬ ve mvuhˇmiˬ hkʼaw ca kʼaw‸ hehˉ-e yoˬ, teh‸ kʼoˆ ve yoˬ.

13Ya‸ hkʼaˇ, yawˇ ve awˬ ceˬ paˍ teˇ hpaˍ yawˇ geh laˬ leh, Jawˇmawˇ-oˬ, tcuh kaˍ paˍ lehˬ nawˬ hta‸ chi a‸ kehˉ haˍ jaˇ ve kanˉ te tcuh laˇ ve kʼo ka‸, nawˬ te cawˇ ve yoˬ. Chi beu‸ yawˇ kʼoˆ ve hkʼe, iˉ kaˆ ceh ca hehˉ leh nawˬ ve a naˍ na-e la tuˬ ve kʼo, nawˬ te nyi cawˇ ve maˇ heˆ laˇ, teh‸ yawˇ hta‸ kʼoˆ piˇ ve yoˬ.

14Hkʼe te leh, Neˍmanˍ Yawˇdanˍ iˉ kaˆ lawˬ lo kʼai leh, Eˇliˇshehˇ kʼoˆ ve hkʼe iˉ kaˆ hkʼaw 7 pawˆ tuˍ keu ve yoˬ. Hkʼe te leh, yawˇ kʼaw‸ da‸ la ve yoˬ. Yawˇ ve awˬ shaˍ da‸ la kehˬ la leh, yaˇ ehˉ ve awˬ suhˍ awˬ shaˍ hkʼe kʼaw‸ hpeh‸ la ve yoˬ.

15Oˇ htaˇ, Neˍmanˍ lehˬ yawˇ ve chaw hkʼa peu-eˬ hta‸ Eˇliˇshehˇ geh kʼaw‸ shiˍ kʼai leh, Iˉsaˍreˍlaˆ ve Gʼuiˬsha maˇ heˆ kʼo, awˬ kaˍ awˬ nu gʼuiˬsha teˇ gʼaˇ ka‸ maˇ cawˬ ve hta‸ chi beu‸ ngaˬ gʼa shiˍ peuˬ. Chi hta‸ pa taw, ngaˬ ve la‸ shawnˍ teˇ hpaˍ hta‸ a ciˉ ha‸ yuˬ laˇ-oˆ, teh‸ Eˇliˇshehˇ hta‸ kʼoˆ piˇ ve yoˬ.

16Oˇ htaˇ Eˇliˇshehˇ lehˬ, La‸ shawnˍ hkʼaˬ ve teˇ ceuˬ hta‸ maˇ kʼoˆ ngaˬ ha‸ yuˬ maˇ hpeh‸, teh‸ te‸ chehˇ ve ngaˬ ve Gʼuiˬsha awˬ meh hta‸ cuˇ leh ngaˬ hkanˍ ve yoˬ, teh‸ Neˍmanˍ hta‸ kʼoˆ piˇ ve yoˬ. La‸ shawnˍ oˇ ve teˇ hpaˍ hta‸ ha‸ yuˬ laˇ tuˬ, Neˍmanˍ gʼaˇ hte‸ lawˬ hkawˉ ve yoˬ. Ya‸ hkʼaˇ, Eˇliˇshehˇ maˇ ha‸ yuˬ.

17Oˇ htaˇ Neˍmanˍ lehˬ, Nawˬ ngaˬ ve la‸ shawnˍ hta‸ maˇ ha‸ yuˬ ve kʼo, piˉ laˬ nyiˇ hkeh taˆ law‸ ve je‸ teˇ hpaˍ hta‸ ngaˬ ve mvuhˇmiˬ lo yuˬ kʼo‸-e tuˬ a hkaw-anˬ pe‸ laˇ-oˆ. Aw lawn kʼo, ya‸ nyi hkʼaw‸ nawˉ Gʼuiˬsha chi teˇ gʼaˇ hta‸ maˇ heˆ kʼo, awˬ kaˍ awˬ nu gʼuiˬsha teˇ gʼaˇ hta‸ ka‸ ngaˬ maˇ kʼaw‸ tuˉ tanˇ piˇ-o.

18Ya‸ hkʼaˇ, ngaˬ ve jawˇmawˇ geh teˇ pawˆ pawˆ Suˇriˆ mvuhˇmiˬ ve Riˇmonˍ gʼuiˬsha hta‸ oˉ kʼoˍ gʼa ca pui tuˬ yoˬ. Oˇ htaˇ, Gʼuiˬsha ngaˬ ve venˇbaˆ hta‸ hpehˇ laˇ tuˬ ngaˬ dawˇ law ve yoˬ. Gʼuiˬsha lehˬ, awˬ tehˬ awˬ na ngaˬ ve venˇbaˆ hta‸ hpehˇ laˇ tuˬ yoˬ, teh‸ Eˇliˇshehˇ hta‸ kʼoˆ piˇ ve yoˬ.

19Gawˬ lehˍ ve hkʼaw kʼo‸-e loˬ, teh‸ Eˇliˇshehˇ Neˍmanˍ hta‸ kʼoˆ piˇ ve yoˬ. Hkʼe te leh Neˍmanˍ tawˆ kʼai ve yoˬ. Yawˇ tawˆ kʼai ve teˇ hkui hkʼe gaˬ leh, Eˇliˇshehˇ ve awˬ ceˬ paˍ Geˍhaˍziˆ chi hkʼe dawˇ tawˆ la ve yoˬ.

20Ngaˬ ve awˬ shehˍ hpaˇ lehˬ, Neˍmanˍ geh te‸ chiˉ maˇ yuˬ taˉ leh, yawˇ hta‸ hkʼe leˇ kʼo‸-e tcuh ve yoˬ. Suˇriˆ ma‸ poˍ lonˉ oˇ ve tanˇ laˇ ve la‸ shawnˍ teˇ hpaˍ hta‸ yawˇ ha‸ yuˬ cawˇ ve yoˬ. Chi beu‸ ngaˬ yawˇ hkʼaˇ suh gʼa‸ yuˬ leh, yawˇ geh teˇ ceuˬ ceuˬ ca lawˬ yuˬ taˉ shaˍ, teh‸ dawˇ ve yoˬ.

21Hkʼe te leh, yawˇ Neˍmanˍ hkʼaˇ suh gʼa‸ yuˬ kʼai ve yoˬ. Chaw teˇ gʼaˇ yawˇ hkʼaˇ suh gʼa‸ yuˬ laˬ chehˇ ve hta‸ Neˍmanˍ gʼa mawˬ ve teˇ yanˇ yawˇ iˉ mvuhˇ lawˬ hkʼaw tawˆ-e leh, Teˇ ceuˬ ceuˬ hpeh‸ ve laˇ, teh‸ yawˇ hta‸ na nyi ve yoˬ.

22Geˍhaˍziˆ kʼaw‸ yaw hkʼaw‸ leh kʼoˆ ve, Te‸ chiˉ maˇ heˆ. Ya‸ hkʼaˇ, ya‸ sheh htaˇ ceh Eˇhpaˍrenˍ mvuhˇmiˬ hkʼaw chehˇ ve tcuh kaˍ paˍ teˇ moˍ gaˬ la ve pa taw, yawˇ hui hta‸ ga piˇ tuˬ ngaˬ ve awˬ shehˍ hpaˇ lehˬ, nawˬ geh lo hpu shehˆ hinˉ leh da‸ ja ve veu‸ kʼaˇ nyiˇ cuˍ ca lawˬ peu laˇ ve yoˬ, teh‸ Neˍmanˍ hta‸ kʼoˆ piˇ ve yoˬ.

23Oˇ htaˇ, Neˍmanˍ lehˬ, Awˬ bon te leh hpu hkaw‸ hinˉ yuˬ kʼai piˇ-oˆ, teh‸ Gaˍhaˍziˆ hta‸ kʼoˆ piˇ ve yoˬ. Hkʼe te leh, Neˍmanˍ lehˬ hpu oˇ ve hkaw‸ hinˉ hta‸ taˉ poˆ nyiˇ maˬ hkʼaw keu leh yawˇ ve awˬ ceˬ paˍ nyiˇ gʼaˇ hta‸ gʼa ga taˆ kʼoˬ tcuh ve yoˬ. Da‸ jaˇ ve veu‸ kʼaˇ nyiˇ cuˍ htawˇ piˇ kʼai ve yoˬ.

24Eˇliˇshehˇ chehˇ taˍ ve hkʼaw hkʼoˆ lo gaˬ htaˇ, Geˍhaˍziˆ lehˬ taˉ poˆ oˇ ve nyiˇ maˬ hta‸ yuˬ leh yehˬ hkʼaw lo‸-e ve yoˬ. Neˍmanˍ ve awˬ ceˬ paˍ nyiˇ gʼaˇ hta‸ htawˇ kʼaw‸ kʼo‸-e peu ve yoˬ.

25Yawˇ yehˬ hkʼaw lo‸-e ve teˇ yanˇ, Nawˬ hkʼaˬ lo kʼai ve le, teh‸ Eˇliˇshehˇ yawˇ hta‸ na nyi ve yoˬ. Ngaˬ teˇ kaˬ ka‸ maˇ kʼai, teh‸ Geˍhaˍziˆ yawˇ hta‸ kʼaw‸ yaw hkʼaw‸ piˇ ve yoˬ.

26Ya‸ hkʼaˇ Eˇliˇshehˇ kʼoˆ ve, Chaw oˇ ve nawˬ hta‸ hpuˇ da‸ tuˬ iˉ mvuhˇ lawˬ hkʼoˆ ya‸-e chehˇ ve teˇ yanˇ, awˬ ha awˬ hkʼaw lo ngaˬ oˇ kaˬ chehˇ taˍ ve maˇ heˆ laˇ. Chi beu‸ ve awˬ yanˇ lehˬ, hpu, veu‸ kʼaˇ, shaˍlonˍ hko, a pehˉ meuˇ hko, ceˇ caˬ leh awˬ ceˬ teˇ hpaˍ hta‸ ha‸ yuˬ ve awˬ yanˇ maˇ heˆ.

27Chi beu‸ Neˍmanˍ ve a naˍ nawˬ hkʼaw lo‸ la tuˬ yoˬ. Nawˬ leh nawˬ ve awˬ ceuˬ awˬ hkʼaˇ teˇ hpaˍ teˇ co peuˬ teˇ co a naˍ chi ve hta‸ gʼa hkanˍ tuˬ yoˬ, teh‸ Geˍhaˍziˆ hta‸ kʼoˆ piˇ ve yoˬ. Geˍhaˍziˆ tawˆ kʼai chehˇ ve teˇ yanˇ, a naˍ oˇ ve yawˇ hkʼaw lo‸ la leh, yawˇ ve awˬ shaˍ vaˇ meu-e hkʼa shuˍ hpeh‸ la ve yoˬ.

← Chapter 4 Jump to: Chapter 6 →