2 Kings 25

Lahu Bible Edited © Thailand Bible Society and Bible Society of Myanmar, 2010, 2020.

← Chapter 24 Jump to:

1Zeˍdaˍkiˆ lehˬ, Baˍbuˍlonˍ jawˇmawˇ Neˍbuˍhkaˍneˍzaˍ hta‸ kʼaw‸ hpfuhˆ ve pa taw, Yuˇda‸ mvuhˇmiˬ hta‸ Zeˍdaˍkiˆ uˉ peunˍ ve 9 hkʼaw‸ teˇ hkʼaw, ha pa 10 maˬ, 10 nyi htaˇ, jawˇmawˇ Neˍbuˍhkaˍneˍzaˍ lehˬ, yawˇ ve ma‸ yaˇ teˇ hpaˍ hta‸ shiˍ laˬ leh, Yeˍruˆsaˍlehnˍ venˇ hta‸ ca bawˆ la ve yoˬ. Yawˇ hui venˇ baˬ lo ta‸ kʼoˍ duˇ taˍ leh,

2Zeˍdaˍkiˆ uˉ peunˍ ve 11 hkʼaw‸ gaˬ htaˇ hkʼa gaˬ venˇ oˇ ve hta‸ caw hoˆ taˍ ve yoˬ.

3Oˇ ve teˇ hkʼaw‸ ha pa 4 maˬ teˇ maˬ 9 nyi gaˬ ve teˇ yanˇ caˇ tuˬ dawˬ tuˬ peuˬ kʼai leh, meu‸ lonˉ kaˆ lonˉ gaˬ la ve yoˬ.

4Oˇ htaˇ, lanˇ venˇ teˇ hpaˍ paˆ kʼai ve yoˬ. Baˍbuˍlonˍ ma‸ yaˇ venˇ hta‸ caw hoˆ taˍ ve htawˇ, mvuhˇ hpeu‸ htaˇ ma‸ yaˇ teˇ hpaˍ hpaw tawˆ-e peuˬ sheˬ ve yoˬ. Yawˇ hui hko hkʼaw lo kʼai leh, lanˇ venˇ nyiˇ maˬ kaˍ lo cawˬ ve taˍ meu‸ hpe‸ hta‸ hpanˍ kʼai peuˬ hkʼaw‸ nawˉ, Yawˇdanˍ miˬ tawˬ kuiˬ hpawˇ lo hpaw tawˆ-e ve yoˬ.

5Ya‸ hkʼaˇ, Baˍbuˍlonˍ ma‸ yaˇ teˇ hpaˍ yawˇ hui hta‸ gʼa‸ yuˬ leh, Yeˍriˆhkoˇ venˇ paˇ lo yawˇ hui Zeˍdaˍkiˆ hta‸ hpeh gʼa ve yoˬ. Yawˇ ve ma‸ yaˇ teˇ hpaˍ yawˇ hta‸ baˬ taˉ leh hpaw-e ve yoˬ.

6Hkʼe te leh, yawˇ hui yawˇ hta‸ Haˍmaˆ mvuhˇmiˬ, Riˇbaˍlaˆ venˇ hkʼaw chehˇ taˍ ve jawˇmawˇ Neˍbuˍhkaˍneˍzaˍ geh shiˍ laˬ ve yoˬ.

7Oˇ kaˬ lo jawˇmawˇ Neˍbuˍhkaˍneˍzaˍ lehˬ, Zeˍdaˍkiˆ ve yaˇ teˇ hpaˍ hta‸ yawˇ mehˆ gʼuˇ suhˍ lo tiˇ pehˍ piˇ ve yoˬ. Oˇ hkʼe te peuˬ hkʼaw‸ nawˉ, Zeˍdaˍkiˆ ve mehˆ shiˍ teˇ hpaˍ hta‸ juˆ pe‸ leh, sho caˆ yuˬ hpeh peuˬ hkʼaw‸ nawˉ Baˍbuˍlonˍ mvuhˇmiˬ lo shiˍ kʼai ve yoˬ.

8Baˍbuˍlonˍ mvuhˇmiˬ hta‸ jawˇmawˇ Neˍbuˍhkaˍneˍzaˍ uˉ peunˍ ve 19 hkʼaw‸ ha pa ngaˇ maˬ teˇ maˬ, 10 nyi htaˇ yawˇ ve ma‸ poˍ lonˉ Neˍbuˍzaˍraˍdanˍ Yeˍruˆsaˍlehnˍ venˇ lo gaˬ la ve yoˬ.

9Yawˇ lehˬ bon yehˬ, hawˉ yehˬ, leh Yeˍruˆsaˍlehnˍ venˇ hkʼaw chehˇ ve chaw uiˍ teˇ hpaˍ ve yehˬ hkʼa peu-eˬ hta‸ aˬ miˍ tuˉ baˬ ve yoˬ.

10Yawˇ ve ma‸ yaˇ teˇ hpaˍ htawˇ, lanˇ venˇ teˇ hpaˍ hta‸ dawˆ paˆ piˇ ve yoˬ.

11Oˇ hkʼe te peuˬ hkʼaw‸ nawˉ, Neˍbuˍzaˍraˍdanˍ lehˬ, venˇ hkʼaw chehˇ taˍ sheˍ ve kanˉ te puiˉ ve chaw leh, la‸ caˉ ya‸ la ve chaw hui hta‸ Baˍbuˍlonˍ mvuhˇmiˬ lo shiˍ kʼai ve yoˬ.

12Yawˇ lehˬ, haˍ gʼawˇ jaˇ ve chaw teˇ hpaˍ hta‸ ceh tiˉ, Yuˇda‸ mvuhˇmiˬ hkʼaw teh taˉ piˇ leh, yawˇ hui hta‸ ti mi leh a pehˉ meuˇ hko teˇ hpaˍ pehˬ piˇ taˉ ve yoˬ.

13Baˍbuˍlonˍ chaw teˇ hpaˍ lehˬ, bon yehˬ hkʼaw cawˬ ve kuiˇ yehˬ hkuiˉ daw teˇ hpaˍ leh punˇ kʼoˍ lonˉ hta‸ dawˆ paˆ leh kuiˇ hkʼa peu-eˬ hta‸ Baˍbuˍlonˍ mvuhˇmiˬ lo yuˬ kʼo‸-e ve yoˬ.

14Yawˇ hui lehˬ, mu‸ hkʼu, sho nuˆ, aˬ miˍ tuˉ htaˇ yehˇ ve awˬ hkʼeun teˇ hpaˍ, sha hawnˉ tuˉ tanˇ htaˇ yehˇ ve hkehˇ teˇ hpaˍ leh bon yehˬ hkʼaw lo awˬ nu awˬ na hkʼa yehˇ ve kuiˇ hkʼa peu-eˬ hta‸ htawˇ yuˬ kʼo‸-e ve yoˬ.

15Hpu leh shi yuˬ te taˍ ve mawˇ hkʼa peu-eˬ hta‸ htawˇ yuˬ kʼo‸-e ve yoˬ.

16Sawˉla‸monˍ te taˉ ve kuiˇ yehˬ hkuiˉ daw lonˉ nyiˇ maˬ, punˇ kʼoˍ lonˉ leh lawˬ ehˉ teˇ hpaˍ lehˬ hawˇ jaˇ ve pa taw tsuh nyi maˇ gʼa ve yoˬ.

17Kuiˇ yehˬ hkuiˉ daw lonˉ oˇ ve nyiˇ maˬ lehˬ, hkʼa shuˍ-ehˬ hpeh‸ leh, mvuh hpawˇ 18 shaw‸ cawˬ ve yoˬ. Yehˬ hkuiˉ daw oˇ ve awˬ hkʼoˆ lo, mvuh hpawˇ 3 shaw‸ cawˬ leh, aˉ ci ku shiˍ awˬ han hkʼa biˇ te nehˉ taˍ ve awˬ hoˆ teˇ maˬ te hoˆ taˍ ve yoˬ.

18Chi hkʼoˆ ka‸, ma‸ poˍ lonˉ Neˍbuˍzaˍraˍdanˍ lehˬ, paw hkuˇ lonˉ Seˍraˍyaˆ leh yawˇ awˬ hawˉ ve paw hkuˇ lonˉ Zeˍhpaˍniˆ leh awˬ nu ve paw hkuˇ shehˆ gʼaˇ hta‸ htawˇ Baˍbuˍlonˍ mvuhˇmiˬ lo shiˍ kʼai ve yoˬ.

19Venˇ hkʼaw chehˇ taˉ ve Yuˇda‸ ma‸ poˍ lonˉ, jawˇmawˇ hta‸ dawˇ hkʼaˇ piˇ paˍ ngaˇ gʼaˇ, ma‸ hpawˇ ceˇ leˇ te chehˇ ve ma‸ poˍ teˇ hpaˍ, leh awˬ nu ve chaw uiˍ hkaw‸ chi gʼaˇ hta‸ htawˇ shiˍ kʼai ve yoˬ.

20Neˍbuˍzaˍraˍdanˍ lehˬ chaw chi teˇ hpaˍ hta‸ Haˍmaˆ mvuhˇmiˬ Riˆbaˍlaˆ venˇ hkʼaw chehˇ taˍ ve Baˍbuˍlonˍ jawˇmawˇ geh shiˍ kʼai ve yoˬ.

21Oˇ ka‸ lo jawˇmawˇ yawˇ hui hta‸ fawˉ mehˍ leh tiˇ pehˍ piˇ ve yoˬ. Hkʼe te leh, Yuˇda‸ chaw teˇ hpaˍ lehˬ, shu mvuhˇmiˬ lo hpeh kʼai ve hta‸ gʼa hkanˍ ve yoˬ.

22Baˍbuˍlonˍ jawˇmawˇ Neˍbuˍhkaˍneˍzaˍ lehˬ, Shaˍhpanˍ ve awˬ hawehˍ, Aˍhiˆkanˍ ve yaˇ Geˍdaˍliˆ hta‸ Yuˇda‸ mvuhˇmiˬ hta‸ uˉ peunˍ tcuh taˉ ve yoˬ.

23Oˇ htaˇ, Baˍbuˍlonˍ jawˇmawˇ hta‸ la‸ caˉ maˇ ya‸ piˇ ve Yuˇda‸ chaw Naˍtaˍniˆ ve yaˇ Iˉsaˍmeˍlaˆ, Kaˍraˆ ve yaˇ Yawˇhaˍnanˍ, Neˍtawˇhpaˆ venˇ hkʼaw chehˇ ve Taˍhuˇmehˆ ve yaˇ Seˍsaˍraˆ leh Maˍkaˍ venˇ yaˇ Yeˍzaˍniˆ hui Miˆsaˍpaˍ venˇ lo Geˍdaˍliˆ geh laˬ ve yoˬ.

24Hkʼe te leh, Geˍdaˍliˆ yawˇ hui hta‸ chi hkʼe kʼoˆ piˇ ve yoˬ. Baˍbuˍlonˍ chaw hui hta‸ nawˬ hui kawˆ jehˇ chehˇ tuˬ maˇ loˍ. Mvuhˇmiˬ chi ve hkʼaw chehˇ taˍ leh, Baˍbuˍlonˍ chaw hui ve awˬ ceˬ te-o. Oˇ hkʼe te ve kʼo, nawˬ hui te‸ chiˉ dawˇ hkiˉ tuˬ maˇ cawˬ, teh‸ yawˇ hui hta‸ kʼoˆ piˇ ve yoˬ.

25Ya‸ hkʼaˇ, oˇ ve teˇ hkʼaw‸ ha pa 7 maˬ teˇ maˬ gaˬ ve teˇ yanˇ, Eˇliˆshaˍmaˍ ve awˬ hawehˍ, Naˍtaˍniˆ ve yaˇ Iˉshaˍmeˍlaˆ lehˬ yawˇ ve chaw 10 gʼaˇ hta‸ shiˍ veu leh, Miˆsaˍpaˍ venˇ hkʼaw chehˇ taˍ ve Geˍdaˍliˆ hta‸ ca tiˇ pehˍ piˇ ve yoˬ. Yawˇ lehˬ, oˇ kaˬ lo Geˍdaˍliˆ geh chehˇ taˍ ve Iˉsaˍreˍlaˆ chaw leh Baˍbuˍlonˍ chaw hui hta‸ htawˇ tiˇ pehˍ piˇ ve yoˬ.

26Oˇ hkʼe te peuˬ hkʼaw‸ nawˉ, Iˉsaˍreˍlaˆ chaw hkʼa peu-eˬ Baˍbuˍlonˍ chaw hui hta‸ kawˆ ve pa taw, Eˇjiˇtu‸ mvuhˇmiˬ lo ca hpaw chehˇ kʼai ve yoˬ.

27Baˍbuˍlonˍ mvuhˇmiˬ hta‸ Eˇviˇlaˆmeˍrawˇdaˆ kʼaw‸ uˉ peunˍ ve teˇ yanˇ, yawˇ lehˬ Yuˇda‸ jawˇmawˇ Yeˍhkawˇniˆ hta‸ ha kʼaˉ leh htawnˍ hkʼaw yuˬ tawˆ piˇ ve yoˬ. Chi hkʼe te piˇ ve lehˬ, Yeˍhkawˇniˆ hta‸ Baˍbuˍlonˍ mvuhˇmiˬ hkʼaw shiˍ kʼai ve 37 hkʼaw‸, ha pa 12 maˬ, 25 nyi htaˇ hpeh‸ ve yoˬ.

28Eˇliˇlaˆmeˍrawˇdaˆ lehˬ, Yeˍhkawˇniˆ hta‸ ha kʼaˉ piˇ leh, Baˍbuˍlonˍ mvuhˇmiˬ lo shu shiˍ laˬ ve hta‸ gʼa hkanˍ ve awˬ nu ve jawˇmawˇ teˇ hpaˍ a‸ kehˉ uiˍ ve aˉ yaˇ hta‸ gʼa ve yoˬ.

29Hkʼe te leh Yeˍhkawˇniˆ lehˬ, htawnˍ hkʼaw‸ veu‸ deh ve veu‸ kʼaˇ hta‸ kʼehˆ baˬ taˉ leh, yawˇ ve a sha‸ leh htaˇ hkʼa gaˬ, jawˇmawˇ ve hpui lawˇ paˇ lo gʼa mui caˇ ve yoˬ.

30Yawˇ a sha‸ te‸ chehˇ sheˍ ve teˇ co-e loˍ ve caˇ tuˬ dawˬ tuˬ teˇ hpaˍ hta‸ Baˍbuˍlonˍ jawˇmawˇ piˇ chehˇ taˍ ve yoˬ.

← Chapter 24 Jump to: