2 Kings 19

Lahu Bible Edited © Thailand Bible Society and Bible Society of Myanmar, 2010, 2020.

← Chapter 18 Jump to: Chapter 20 →

1Tawˇ oˇ ve teˇ hpaˍ hta‸ Heˍsaˍkiˆ gʼa kaˇ ve teˇ yanˇ, yawˇ ve veu‸ kʼaˇ hta‸ tzuh‸ suhˍ ve yoˬ. Yawˇ lehˬ, meh htuˉ pui hpa hta‸ veu‸ deh leh, Gʼuiˬsha ve bon yehˬ lo kʼai ve yoˬ.

2Yawˇ lehˬ Eˇlaˍkenˍ, Shaˍbaˍnaˍ leh paw hku lonˉ teˇ hpaˍ hta‸ Aˍmoˆ ve yaˇ Iˉsaˍyaˆ geh kʼai tcuh ve yoˬ. Yawˇ hui hkʼa peu-eˬ htawˇ meh htuˉ pui hpa veu‸ deh taˍ ve yoˬ.

3Yawˇ hui jawˇmawˇ Heˍsaˍkiˆ ve tawˇ chi teˇ hpaˍ Iˉsaˍyaˆ hta‸ hto piˇ leh kʼoˆ ve, Ya‸ nyi lehˬ tu‸ hkanˍ jaˇ ve awˬ nyi hpeh‸ ve yo‸. Ngaˬ hui lehˬ awˬ me‸ awˬ hponˇ luˬ kʼai peuˬ leh, ciˍ yanˍ ve hta‸ gʼa hkanˍ chehˇ ve yoˬ. Ngaˬ hui lehˬ awˬ gʼaˇ nuˇ jaˇ ve pa taw, yaˇ paw maˇ gʼa ve yaˇ miˇ hkʼe hpeh‸ chehˇ ve yoˬ.

4Aˍsuˇriˆ jawˇmawˇ lehˬ, te‸ chehˇ ve Gʼuiˬsha hta‸ maˇ shawˍ maˇ caˆ kʼoˆ tuˬ, yawˇ ve ma‸ poˍ lonˉ hta‸ peu laˇ taˍ peuˬ ve yoˬ. Nawˬ ve Gʼuiˬsha lehˬ, maˇ shawˍ maˇ caˆ kʼoˆ chehˇ ve chaw oˇ ve teˇ hpaˍ ve tawˇ hta‸ kaˇ leh, yawˇ hui hta‸ ciˍ yanˍ piˇ-oˆ. A sha‸ te‸ chehˇ taˍ sheˍ ve ngaˬ hui ve chaw teˇ hpaˍ awˬ pon, bon a ciˉ lawˬ laˇ-oˆ, teh‸ yawˇ hta‸ kʼoˆ piˇ ve yoˬ.

5Iˉsaˍyaˆ lehˬ, jawˇmawˇ Heˍsaˍkiˆ ve tawˇ oˇ ve teˇ hpaˍ hta‸ gʼa kaˇ ve teˇ yanˇ,

6yawˇ hta‸ chi hkʼe kʼaw‸ kʼoˆ hkʼaw‸ feu piˇ ve yoˬ. Gʼuiˬsha nawˬ hta‸ ga laˇ maˇ gʼa taˬ, teh‸ Aˍsuˇriˆ chaw kʼoˆ ve tawˇ hta‸ pa taw, nawˬ nyi ma taˇ luˬ.

7Gʼuiˬsha lehˬ, Aˍsuˇriˆ jawˇmawˇ hta‸ yawˇ ve mvuhˇmiˬ lo haˆ haˆ kʼaw‸ hpfuhˆ kʼo‸-e tuˬ te piˇ leh, yawˇ hta‸ oˇ kaˬ lo suh-e piˇ lawˬ tuˬ yoˬ, teh‸ jawˇmawˇ Heˍsaˍkiˆ hta‸ ca kʼaw‸ kʼoˆ piˇ tcuh ve yoˬ.

8Aˍsuˇriˆ ma‸ poˍ lonˉ oˇ ve lehˬ, yawˇ ve jawˇmawˇ lonˉ Laˍhkiˇshaˆ venˇ hkʼaw tawˆ-e leh, Liˆbaˍnaˍ venˇ hta‸ ca kʼaw‸ bawˆ kʼai peuˬ ve awˬ hkawˇ hta‸ gʼa kaˇ ve teˇ yanˇ, yawˇ geh ca jehˬ da‸ tuˬ oˇ kaˬ lo gʼa‸ kʼai ve yoˬ.

9Aˍsuˇriˆ chaw teˇ hpaˍ lehˬ, Eˇjiˇtu‸ jawˇmawˇ Tiˇraˍkaˍ yawˇ hui hta‸ ca bawˆ la tuˬ laˬ chehˇ ve awˬ hkawˇ hta‸ gʼa kaˇ ve yoˬ. Oˇ htaˇ, Aˍsuˇriˆ jawˇmawˇ lonˉ lehˬ, Yuˇda‸ jawˇmawˇ Heˍsaˍkiˆ hta‸ li‸ chi hkʼe bvuh‸ feu piˇ ve yoˬ.

10Nawˬ gʼaˇ va chehˇ ve nawˬ ve Gʼuiˬsha lehˬ, nawˬ hta‸ ngaˬ ve la‸ sheh hkʼaw lo htaiˍ hkʼaw‸ laˇ tuˬ yoˬ, teh‸ nawˬ hta‸ kʼoˆ piˇ taˍ peuˬ ve yoˬ. Ya‸ hkʼaˇ, tawˇ oˇ ve hta‸ pa taw, nawˬ nyi ma taˇ uiˍ chehˇ.

11Aˍsuˇriˆ jawˇmawˇ lonˉ te luˬ piˇ tuˬ dawˇ cheˆ taˍ ve mvuhˇmiˬ teˇ peˆ hkʼaˬ hkʼe hpeh‸ la chehˇ ve awˬ hkawˇ hta‸ nawˬ htawˇ gʼa kaˇ chehˇ taˍ ve yoˬ. Nawˬ gʼa ponˬ tuˬ yoˬ, teh‸ dawˇ chehˇ ve laˇ.

12Nawˬ ve awˬ puˍ lonˉ teˇ hpaˍ lehˬ, Gawˇzanˍ, Haˍranˍ, Reˍyaˆ venˇ chi teˇ hpaˍ hta‸ te luˬ leh, Teˍlaˍsaˍ venˇ hkʼaw chehˇ ve Beˍteˍdenˍ chaw hui hta‸ tiˇ pehˍ piˇ taˍ peuˬ ve yoˬ. Yawˇ hui ve gʼuiˬsha teˇ gʼaˇ ka‸ yawˇ hui hta‸ ponˬ piˇ maˇ gʼa.

13Yaˍmaˆ, Aˍpaˆ, Sheˍhpaˍvenˍ, Heˍnaˆ leh Iˍvaˍ venˇ hta‸ uˉ peunˍ chehˇ ve jawˇmawˇ teˇ hpaˍ, chi beu‸ hkʼaˬ lo kʼai peuˬ le, teh‸ yawˇ hta‸ li‸ bvuh‸ feu piˇ ve yoˬ.

14Jawˇmawˇ Heˍsaˍkiˆ lehˬ, li‸ oˇ ve hta‸ yuˬ leh gʼaw nyi ve yoˬ. Oˇ ve hkʼaw‸ nawˉ, yawˇ bon yehˬ lo kʼai leh, li‸ oˇ ve hta‸ Gʼuiˬsha mehˆ gʼuˇ suhˍ lo teh taˍ ve yoˬ.

15Yawˇ bon lawˬ leh kʼoˆ ve, Iˉsaˍreˍlaˆ ve Jawˇmawˇ Gʼuiˬsha-oˬ, nawˬ teˇ gʼaˇ ceh tiˉ Gʼuiˬsha hpeh‸ leh, miˬguiˬ hkʼa peu-eˬ ve hta‸ uˉ peunˍ chehˇ ve yoˬ. Miˬguiˬ mvuhˇ naw ma hta‸ nawˬ te hpanˍ taˍ ve yoˬ.

16Gʼuiˬsha-oˬ, chi beu‸ ngaˬ hui hta‸ nyi leh, ngaˬ hui lawˬ hkawˉ ve awˬ hkawˇ hta‸ a ciˉ na yuˬ laˇ-oˆ. Te‸ chehˇ ve Gʼuiˬsha nawˬ hta‸ Seˍnaˍhkaˍriˆ maˇ shawˍ maˇ caˆ kʼoˆ chehˇ ve tawˇ hta‸ a ciˉ na sheˍ.

17Gʼuiˬsha-oˬ, Aˍsuˇriˆ jawˇmawˇ lehˬ, mvuhˇmiˬ laiˉ peˆ hta‸ te luˬ te sheˆ piˇ chehˇ ve hta‸ ngaˬ hui shiˍ chehˇ ve yoˬ.

18Gʼuiˬsha maˇ heˆ ve yawˇ hui ve suhˆ, leh haˉ pui yuˬ te taˍ ve shaˉ ho‸ teˇ hpaˍ hta‸ aˬ miˍ tuˉ baˬ piˇ chehˇ ve yoˬ.

19Ngaˬ hui ve Gʼuiˬsha-oˬ, nawˬ teˇ gʼaˇ ceh tiˉ Gʼuiˬsha hpeh‸ ve hta‸ chaw yaˇ hkʼa peu-eˬ gʼa shiˍ tuˬ, ngaˬ hui hta‸ Aˍsuˇriˆ chaw hui ve la‸ sheh hkʼaw lo a ciˉ ponˬ laˇ-oˆ, teh‸ kʼoˆ leh bon lawˬ ve yoˬ.

20Oˇ htaˇ, Iˉsaˍyaˆ lehˬ jawˇmawˇ Heˍsaˍkiˆ ve bon lawˬ hkawˇ hta‸ caˉ da‸ leh, Gʼuiˬsha kʼoˆ ve tawˇ teˇ hpaˍ yawˇ hta‸ kʼaw‸ kʼoˆ piˇ ve yoˬ.

21Gʼuiˬsha kʼoˆ ve, Saˍnaˍhkaˍriˆ-oˬ, Yeˍruˆsaˍlehnˍ venˇ nawˬ hta‸ gʼuiˬ leh maˇ shawˍ maˇ caˆ te laˇ tuˬ yoˬ.

22Nawˬ maˇ shawˍ maˇ caˆ kʼoˆ guiˇ chehˇ ve teˇ gʼaˇ lehˬ, a shu hpeh‸ ve teh‸ nawˬ dawˇ chehˇ ve le. Nawˬ lehˬ, Ngaˬ, Iˉsaˍreˍlaˆ ve da‸ kehˬ ve Gʼuiˬsha hta‸ maˇ yawˆ maˇ yan te chehˇ ve yoˬ.

23Nawˬ ve iˉ mvuhˇ lawˬ teˇ hpaˍ hta‸ cuˇ leh, nawˬ lehˬ Leˍbaˍnonˍ hkʼaw hta‸ tanˬ leh awˬ nu ve hkʼaw teˇ hpaˍ hta‸ bawˆ gʼaˇ taˍ peuˬ, teh‸ nawˬ ve ma‸ poˍ lonˉ hta‸ hpehˇ leh tawˇ uiˍ tawˇ mvuh ca yaw maˍ laˇ tcuh ve yoˬ. Nawˬ lehˬ, naˉ jaˇ ve hteunˍ lonˉ hkʼaw cawˬ ve, uiˍ jaˇ mvuh jaˇ ve htawˇ cehˬ, yawnˉ cehˬ teˇ hpaˍ hta‸ htawˇ htu baˬ piˇ taˍ peuˬ, teh‸ kʼoˆ chehˇ ve yoˬ.

24Nawˬ lehˬ, shu ve mvuhˇmiˬ hkʼaw nanˬ bawˍ duˇ leh iˉ kaˆ gʼa dawˬ peuˬ teh‸ kʼoˆ leh, nawˬ ve ma‸ yaˇ teˇ hpaˍ htawˇ, Niˍlaˆ iˉ kaˆ lawˬ hta‸ naˆ fiˍ piˇ taˍ peuˬ, teh‸ kʼoˆ chehˇ ve yoˬ.

25Chi hkʼe hpeh‸ la tuˬ, ponˬ laˬ htaˇ ka‸ ngaˬ awˬ hkʼaˇ gu taˍ ve hta‸ nawˬ teˇ pawˆ ka‸ maˇ gʼa kaˇ sheˍ laˇ. Chi beu‸ ngaˬ awˬ hkʼaˇ gu taˍ ve hkʼe te chehˇ taˍ peuˬ ve yoˬ. Yeˬ jaˇ ve ta‸ yehˬ teˇ hpaˍ hta‸ te luˬ piˇ tuˬ, ngaˬ nawˬ hta‸ awˬ gʼaˇ awˬ shaˉ piˇ taˍ ve yoˬ.

26Oˇ kaˬ lo chehˇ taˍ ve chaw teˇ hpaˍ lehˬ, awˬ gʼaˇ nuˇ jaˇ ve yoˬ. Yawˇ hui dawˇ maˇ tawˆ leh kawˆ jaˇ chehˇ ve yoˬ. Yawˇ hui lehˬ, mvuhˇ nyi tawˆ hpawˇ lo meuˆ laˬ ve haw jaˇ chiˆ jaˇ ve mvuhˇ haw hta‸ gʼa hkanˍ chehˇ ve zuhˇ leh, yehˬ hkʼoˆ lo yeˬ chehˇ ve mvuh‸ hkʼa shuˍ hpeh‸ chehˇ ve yoˬ.

27Ya‸ hkʼaˇ, nawˬ kʼai kuiˬ laˬ kuiˬ, dawˇ kuiˬ te kuiˬ hkʼa peu-eˬ ve hta‸ ngaˬ shiˍ taˍ ve yoˬ.

28Nawˬ ngaˬ hta‸ nyi ma zuhˆ chehˇ ve awˬ lawn leh, nawˬ nyi ma uiˍ ve chaw hpeh‸ ve awˬ lawn ngaˬ gʼa kaˇ taˍ peuˬ. Chi hta‸ pa taw, ngaˬ nawˬ hta‸ naˍ hkʼawˇ htaw leh, nawˬ ve maw‸ kʼaw hkʼaw sho caˆ keu peuˬ hkʼaw‸ nawˉ, nawˬ laˬ ve ya‸ kaw hkʼaˇ suh, ngaˬ nawˬ hta‸ shiˍ kʼo‸-e laˇ tuˬ yoˬ, teh‸ Gʼuiˬsha kʼoˆ ve yoˬ.

29Oˇ ve hkʼaw‸ nawˉ, Iˉsaˍyaˆ jawˇmawˇ Heˍsaˍkiˆ hta‸ kʼoˆ piˇ ve, Awˬ gʼuˇ suhˍ hpawˇ hkʼaˬ hkʼe hpeh‸ la tuˬ ve awˬ heˆ chi hkʼe cawˬ ve yoˬ. Chi teˇ hkʼaw‸ leh nehˉ hkʼaw‸ nawˬ hui lehˬ suhˆ shiˍ hawˆ shiˍ hta‸ ceh tiˉ gʼa caˇ tuˬ yoˬ. Ya‸ hkʼaˇ awˬ hkʼaw‸ nawˉ teˇ hkʼaw‸ kʼaw‸ gaˬ ve kʼo nawˬ hui caˬ ti leh awˬ shiˍ awˬ nu teˇ hpaˍ gʼa kʼaw‸ gʼeu‸ jaw‸ tuˬ yoˬ. Oˇ ve hkʼa shuˍ, a pehˉ meuˇ shiˍ htawˇ gʼa kʼaw‸ caˇ tuˬ yoˬ.

30Cawˬ taˍ sheˍ ve Yuˇda‸ chaw teˇ hpaˍ lehˬ, awˬ geu tcuhˆ naˉ ve suhˆ cehˬ hkʼa shuˍ, awˬ shiˍ maˇ maˇ kʼaw‸ naw‸ la tuˬ yoˬ.

31Yeˍruˆsaˍlehnˍ venˇ leh Ziˉonˍ hkʼaw hkʼoˆ lo, chaw yaˇ teˇ hpaˍ chehˇ taˍ tuˬ yoˬ. Awˬ lawn kʼo, chi hkʼe hpeh‸ la piˇ tuˬ Gʼuiˬsha dawˇ cheˆ taˍ peuˬ, teh‸ Heˍsaˍkiˆ hta‸ kʼoˆ piˇ ve yoˬ.

32Aˍsuˇriˆ jawˇmawˇ lonˉ hta‸ caˉ da‸ leh, Gʼuiˬsha chi hkʼe kʼaw‸ kʼoˆ ve yoˬ. Yawˇ lehˬ venˇ chi hkʼaw lo‸ la leh, hkaˆ teˇ hkʼe ka‸ gʼa bawˆ tuˬ ve maˇ heˆ. La‸ caˉ pfuhˇ taˍ ve ma‸ yaˇ teˇ gʼaˇ ka‸, venˇ chi awˬ paˇ lo laˬ tuˬ ve maˇ heˆ. Venˇ jaˇ venˇ ji lo htawˇ, ta‸ kʼoˍ gʼa duˇ tuˬ ve maˇ heˆ.

33Yawˇ lehˬ, laˬ ve ya‸ kʼaw hkʼaˇ suh gʼa kʼaw‸ kʼo‸-e leh, venˇ chi hkʼaw gʼa lo‸ la tuˬ ve maˇ heˆ. Ngaˬ Gʼuiˬsha chi hkʼe kʼoˆ taˍ ve yoˬ.

34Ngaˬ ve awˬ ceˬ paˍ Daˍviˆ hta‸ ngaˬ ka ti‸ te taˍ ve hkʼe, ngaˬ ve awˬ me‸ awˬ hponˇ tawˆ la tuˬ, venˇ chi hta‸ ngaˬ ha‸ shaˉ taˍ tuˬ yoˬ, teh‸ kʼoˆ ve yoˬ.

35Gʼuiˬsha ve mvuhˇ naw tcuh yaˇ teˇ gʼaˇ lehˬ, Aˍsuˇriˆ chaw hui deh chehˇ taˍ kuiˬ lo kʼai leh, Aˍsuˇriˆ ma‸ yaˇ 185,000 gʼaˇ hta‸ tiˇ pehˍ piˇ ve yoˬ. Shawˉpawˍ mvuhˇ htiˇ la htaˇ, yawˇ hui hkʼa peu-eˬ suh-e peuˬ ve yoˬ.

36Oˇ htaˇ, Aˍsuˇriˆ jawˇmawˇ Seˍnaˍhkaˍriˆ Niˇnaˍveˍ venˇ lo kʼaw‸ hpfuhˆ kʼo‸-e ve yoˬ.

37Teˇ nyi htaˇ, yawˇ lehˬ yawˇ ve gʼuiˬsha Niˇsaˍroˍ ve bon yehˬ hkʼaw oˉ kʼoˍ pui chehˇ ve teˇ yanˇ, yawˇ yaˇ paˍ Aˍdraˍmeˍlehˆ leh Shaˍreˍzaˍ hui lo‸ la leh, yawˇ hta‸ chaw pehˍ peuˬ hkʼaw‸ nawˇ, Aˍraˍraˆ mvuhˇmiˬ lo hpaw-e ve yoˬ. Yawˇ ve yaˇ paˍ Eˇsaˍraˆhaˍdonˍ jawˇmawˇ kʼaw‸ te ve yoˬ.

← Chapter 18 Jump to: Chapter 20 →