2 Kings 9

Lahu Bible Edited © Thailand Bible Society and Bible Society of Myanmar, 2010, 2020.

← Chapter 8 Jump to: Chapter 10 →

1Awˬ yanˇ oˇ ve hkʼaw tcuh kaˍ paˍ Eˇliˇshehˇ lehˬ, yawˇ ve tcuh kaˍ paˍ ehˉ teˇ gʼaˇ hta‸ kuˬ yuˬ leh, yawˇ hta‸ chi hkʼe kʼoˆ piˇ ve yoˬ. Shaˍlonˍ chu hta‸ yuˬ veu leh Raˍmoˆ venˇ lo kʼai-o.

2Nawˬ oˇ kaˬ lo gaˬ kʼo, Neˍshiˆ ve awˬ hawehˍ, Yawˇshaˍhpaˆ ve yaˇ Yeˍhuˆ hta‸ ca nyi-o. Yawˇ hta‸ mawˬ ve kʼo, shu maˇ gʼa mawˬ tuˬ yawˇ hta‸ bawehˇ hkʼaw shiˍ kʼai leh,

3yawˇ ve oˉ kʼoˍ hta‸ naˍ manˇ pfuhˍ piˇ peuˬ hkʼaw‸ nawˉ, Iˉsaˍreˍlaˆ jawˇmawˇ hpeh‸ la tuˬ, Gʼuiˬsha nawˬ hta‸ naˍ manˇ pfuhˍ laˇ ve yoˬ, teh‸ yawˇ hta‸ kʼoˆ piˇ-oˆ. Oˇ hkʼe te taˉ peuˬ ve kʼo, haˆ kʼaw‸ hpfuhˆ kʼaw‸ la-o, teh‸ Eˇliˇshehˇ yawˇ hta‸ kʼoˆ piˇ ve yoˬ.

4Hkʼe te leh tcuh kaˍ paˍ ehˉ oˇ ve Raˍmoˆ venˇ lo kʼai ve yoˬ.

5Oˇ kaˬ lo ma‸ poˍ lonˉ teˇ hpaˍ hpawnˬ da‸ leh jehˬ da‸ chehˇ ve hta‸ yawˇ gʼa mawˬ ve yoˬ. Hkʼe te leh yawˇ oˇ kaˬ lo kʼai leh, Jawˇmawˇ-oˬ, ngaˬ nawˬ hta‸ kʼoˆ laˇ tuˬ ve tawˇ cawˬ ve yoˬ, teh‸ kʼoˆ piˇ ve yoˬ. Oˇ htaˇ Yeˍhuˆ tu la leh, Nawˬ a shu teˇ gʼaˇ hta‸ kʼoˆ gaˇ ve le, teh‸ yawˇ hta‸ kʼoˆ piˇ ve yoˬ. Nawˬ hta‸ yoˬ, teh‸ tcuh kaˍ paˍ yawˇ hta‸ kʼaw‸ yaw hkʼaw‸ piˇ ve yoˬ.

6Hkʼe te leh, yawˇ huiˉ maˬ bawehˇ teˇ maˬ hkʼaw lo‸-e leh, Yeˍhuˆ ve oˉ kʼoˍ hta‸ naˍ manˇ ngeuˍ pfuhˍ piˇ peuˬ hkʼaw‸ nawˉ, Iˉsaˍreˍlaˆ ve jawˇmawˇ hpeh‸ la tuˬ, Gʼuiˬsha nawˬ hta‸ naˍ manˇ pfuhˍ laˇ ve yoˬ.

7Nawˬ lehˬ chi beu‸ jawˇmawˇ te chehˇ ve Aˍhaˆ ve yaˇ hta‸ gʼa tiˇ pehˍ piˇ tuˬ yoˬ. Awˬ lawn kʼo, Yeˍsaˍbeˍlaˆ lehˬ Gʼuiˬsha ve tcuh kaˍ paˍ leh Gʼuiˬsha ve awˬ ceˬ paˍ teˇ hpaˍ hta‸ tiˇ pehˍ piˇ peuˬ ve pa taw, Gʼuiˬsha yawˇ hta‸ chi hkʼe ciˍ yanˍ piˇ ve yoˬ.

8Aˍhaˆ ve awˬ ceuˬ awˬ hkʼaˇ hawˉ hkʼaˆ paˍ hkʼa peu-eˬ gʼa suh-e tuˬ yoˬ.

9Gʼuiˬsha lehˬ, Iˉsaˍreˍlaˆ jawˇmawˇ Yeˍyawˇbaoˍ leh jawˇmawˇ Baˍshaˍ hui ve yehˬ yaˇ kʼa yaˇ teˇ hpaˍ hta‸ htawˇ oˇ hkʼe te piˇ tuˬ yoˬ.

10Yeˍsaˍbeˍlaˆ hta‸ shu tuˍ piˇ tuˬ ve maˇ heˆ. Yeˍsaˍreˍlaˆ venˇ hkʼaw lo, yawˇ ve awˬ to hta‸ hpuiˇ teˇ hpaˍ che‸ caˇ tuˬ yoˬ, teh‸ Yeˍhuˆ hta‸ kʼoˆ piˇ ve yoˬ. Oˇ hkʼe kʼoˆ piˇ taˉ leh tcuh kaˍ paˍ ehˉ oˇ ve teˇ cawˬ haˉ kʼaw‸ kʼo‸-e ve yoˬ.

11Yeˍhuˆ htawˇ hpawnˬ da‸ kuiˬ lo kʼaw‸ kʼo‸-e ve yoˬ. Chaw gʼuˇ paˍ oˇ ve nawˬ hta‸ aˬ hto‸ ma ca kʼoˆ la ve le, teh‸ yawˇ hui yawˇ hta‸ ga hpoˆ na nyi ve yoˬ. Yawˇ aˬ hto‸ ma loˍ ve nawˬ hui shiˍ chehˇ ve yoˬ, teh‸ Yeˍhuˆ yawˇ hui hta‸ kʼaw‸ yaw hkʼaw‸ piˇ ve yoˬ.

12Ngaˬ hui maˇ shiˍ. Yawˇ nawˬ hta‸ aˬ hto‸ ma kʼoˆ laˇ ve le, teh‸ yawˇ hui yawˇ hta‸ kʼaw‸ na nyi ve yoˬ. Iˉsaˍreˍlaˆ jawˇmawˇ te tuˬ, ngaˬ nawˬ hta‸ naˍ manˇ pfuhˍ laˇ ve yoˬ, teh‸ yawˇ ngaˬ hta‸ kʼoˆ laˇ ve yoˬ, teh‸ Yeˍhuˆ yawˇ hui hta‸ kʼoˆ piˇ ve yoˬ.

13Oˇ htaˇ ma‸ poˍ lonˉ teˇ hpaˍ, a shu yawˇ ve veu‸ kʼaˇ kʼehˆ leh go hkʼeh‸ hkʼoˆ lo hkʼawˇ peuˬ hkʼaw‸ nawˉ, Yeˍhuˆ hta‸ oˇ kaˬ lo huˉ tcuh leh, Yeˍhuˆ jawˇmawˇ hpeh‸ la peuˬ, teh‸ kʼoˆ leh behˬ heh ma meuˆ ve yoˬ.

14Oˇ ve hkʼaw‸ nawˉ, Yeˍhuˆ lehˬ jawˇmawˇ Yawˇranˍ hta‸ kʼaw‸ hpfuhˆ ve yoˬ. Yawˇranˍ lehˬ, Raˍmoˆ venˇ lo Suˇriˆ jawˇmawˇ Haˍzeˍlaˆ hta‸ bawˆ da‸ chehˇ htaˇ hkaˆ ce heuˆ ve pa taw, Yeˍsaˍreˍlaˆ venˇ hkʼaw naˆ tsuhˇ gu chehˇ ve yoˬ.

15Oˇ htaˇ Yeˍhuˆ lehˬ, Nawˬ hui ngaˬ hpawˇ lo chehˇ tuˬ ve kʼo, chaw teˇ gʼaˇ ka‸ Raˍmoˆ venˇ hkʼaw tawˆ-e leh Yeˍsaˍreˍlaˆ venˇ yaˇ teˇ hpaˍ geh maˇ gʼa kʼai tuˬ, hkʼa deh‸ shaˍ ti‸ te leh nyi taˍ-oˬ, teh‸ yawˇ ve ma‸ poˍ lonˉ teˇ hpaˍ hta‸ kʼoˆ piˇ ve yoˬ.

16Oˇ hkʼe kʼoˆ piˇ peuˬ hkʼaw‸ nawˉ, yawˇ iˉ mvuhˇ lawˬ ciˇ leh Yeˍsaˍreˍlaˆ venˇ lo kʼai ve yoˬ. Yawˇranˍ lehˬ naˬ ve maˇ na-e la sheˍ. Yuˇda‸ jawˇmawˇ Aˍhaˍziˆ lehˬ, oˇ kaˬ lo yawˇ geh guiˇ chehˇ taˍ ve yoˬ.

17Yeˍsaˍreˍlaˆ venˇ hta‸ shaw chehˇ ve ma‸ yaˇ teˇ hpaˍ lehˬ, Yeˍhuˆ leh yawˇ ve awˬ chawˇ teˇ hpaˍ laˬ chehˇ ve hta‸ gʼa mawˬ ve yoˬ. Hkʼe te leh yawˇ hui lehˬ, Chaw teˇ hpaˍ hpaˍ iˉ mvuhˇ ciˇ laˬ chehˇ ve hta‸ ngaˬ hui gʼa mawˬ ve yoˬ, teh‸ kʼoˆ ve yoˬ. Oˇ htaˇ Yawˇranˍ lehˬ, Laˬ chehˇ ve chaw oˇ ve teˇ hpaˍ, ngaˬ hui ve awˬ chawˇ naˍ, maˇ heˆ kʼo canˇ paˍ leh naˍ, gʼa shiˍ tuˬ chaw teˇ gʼaˇ hta‸ hpehˇ leh ca nyi tcuh-o, teh‸ kʼoˆ ve yoˬ.

18Hkʼe te leh, ma‸ yaˇ teˇ gʼaˇ Yeˍhuˆ geh kʼai leh, Nawˬ lehˬ awˬ chawˇ laˇ. Maˇ heˆ kʼo canˇ paˍ hpeh‸ ve laˇ. Jawˇmawˇ shiˍ gaˇ ve ceˇ, teh‸ yawˇ hta‸ kʼoˆ piˇ ve yoˬ. Oˇ htaˇ Yeˍhuˆ lehˬ, Kanˉ chi nawˬ hta‸ aˬ hto‸ ma caˉ da‸ le. Ngaˬ hkʼaˇ suh gʼa‸ laˬ-o‸, teh‸ yawˇ hta‸ kʼoˆ piˇ ve yoˬ. Venˇ hta‸ shaw shehˍ hpaˇ lehˬ, ma‸ yaˇ oˇ ve yawˇ hui geh gaˬ peuˬ ve htawˇ maˇ kʼaw‸ la mawˬ ve awˬ lawn jawˇmawˇ hta‸ kʼoˆ piˇ ve yoˬ.

19Hkʼe te leh, yawˇ hui awˬ nu ve ma‸ yaˇ teˇ gʼaˇ hta‸ kʼaw‸ hpehˇ peu leh, ca kʼaw‸ nyi tcuh ve yoˬ. Oˇ htaˇ Yeˍhuˆ lehˬ, Kanˉ chi nawˬ hta‸ aˬ hto‸ ma caˉ da‸ le. Ngaˬ hkʼaˇ suh gʼa‸ laˬ-oˬ, teh‸ yawˇ hta‸ kʼoˆ piˇ ve yoˬ.

20Venˇ hta‸ shawˍ shehˍ hpaˇ lehˬ, ma‸ yaˇ oˇ ve ka‸ yawˇ hui geh gaˬ peuˬ ve htawˇ maˇ kʼaw‸ la mawˬ ve awˬ lawn jawˇmawˇ hta‸ teˇ pawˆ ca kʼaw‸ hto piˇ la leh, Chaw oˇ ve teˇ hpaˍ ve awˬ hoˉ teˇ gʼaˇ lehˬ, yawˇ ve iˉ mvuhˇ lawˬ hta‸ gʼaˇ hte‸ gʼa‸ laˬ chehˇ ve yoˬ. Nyi kʼo, Yeˍhuˆ hta‸ shuˍ ve yoˬ, teh‸ jawˇmawˇ hta‸ kʼoˆ piˇ ve yoˬ.

21Oˇ htaˇ jawˇmawˇ Yawˇranˍ lehˬ, Ngaˬ ve iˉ mvuhˇ lawˬ hta‸ gu taˍ-o‸, teh‸ kʼoˆ ve yoˬ. Oˇ hkʼe te peuˬ hkʼaw‸ nawˉ, Yeˍhuˆ hta‸ ca hpuˇ da‸ tuˬ jawˇmawˇ Aˍhaˍziˆ yawˇ huiˉ maˬ iˉ mvuhˇ lawˬ teˇ gʼaˇ teˇ maˬ ciˇ tawˆ-e ve yoˬ. Yawˇ huiˉ maˬ Yeˍhuˆ hta‸ Naˍboˆ ve ti mi paˇ lo hpuˇ da‸ ve yoˬ.

22Oˇ htaˇ jawˇmawˇ Yawˇranˍ lehˬ, Nawˬ dawˇ sha ha lehˬ ve hkʼaw laˬ ve laˇ, teh‸ Yeˍhuˆ hta‸ na nyi ve yoˬ. Yeˍhuˆ kʼaw‸ yaw hkʼaw‸ leh kʼoˆ ve, Nawˬ e Yeˍsaˍbeˍlaˆ te keu taˍ ve shaˉ ho‸ teˇ hpaˍ leh awˬ nu ve cha‸ chiˆ ve awˬ ceuˬ teˇ hpaˍ cawˬ chehˇ sheˍ ve ceh ceh, hkʼaˬ hkʼe te leh ngaˬ hui geh dawˇ sha gaˇ sha ve awˬ ceuˬ cawˬ la gʼa tuˬ ve le, teh‸ Yawˇranˍ hta‸ kʼoˆ piˇ ve yoˬ.

23Oˇ htaˇ jawˇmawˇ Yawˇranˍ lehˬ, Aˍhaˍziˆ-oˬ, chi hpaˇ ngaˬ hui hta‸ kʼaw‸ hpfuhˆ gaˇ ve yoˬ, teh‸ kʼoˆ leh, iˉ mvuhˇ lawˬ gʼa‸ hpaw-e ve yoˬ.

24Yeˍhuˆ lehˬ, Yawˇranˍ hta‸ hkaˆ bawˆ hpehˇ leh, Yawˇranˍ ve nyi ma shiˍ hta‸ heuˆ sheˬ ve yoˬ. Hkʼe te leh Yawˇranˍ iˉ mvuhˇ lawˬ hkʼaw paˍ suh-e ve yoˬ.

25Oˇ htaˇ Yeˍhuˆ lehˬ yawˇ ve ma‸ poˍ lonˉ Biˆdaˍkaˍ hta‸ kuˬ yuˬ leh, Yawˇranˍ ve awˬ to hta‸ Naˍboˆ ve ti mi hkʼaw baˬ keu piˇ-oˆ. Ngaˬ huiˉ maˬ Yawˇranˍ ve awˬ pa jawˇmawˇ Aˍhaˆ hkʼaˇ suh gʼa‸ toˇ chehˇ htaˇ, Gʼuiˬsha Aˍhaˆ awˬ lawn hkʼaˬ hkʼe kʼoˆ taˍ peuˬ ve hta‸ dawˇ nawˇ-oˆ.

26Yawˇ kʼoˆ ve, Aˉ nyi htaˇ Naˍboˆ leh yawˇ ve yaˇ teˇ hpaˍ shu tiˇ pehˍ ve hta‸ ngaˬ gʼa mawˬ peuˬ. Hkʼe te leh, chehˇ kuiˬ oˇ ve hkʼaw ngaˬ nawˬ hta‸ ciˍ yanˬ laˇ tuˬ yoˬ, teh‸ Gʼuiˬsha kʼoˆ taˍ peuˬ ve yoˬ. Chi hta‸ pa taw, Gʼuiˬsha ve tawˇ biˇ la tuˬ Yawˇranˍ ve awˬ to hta‸ haˆ gʼawˬ tawˆ leh Naˍboˆ ve ti mi hkʼaw lo baˬ keu piˇ-oˆ, teh‸ yawˇ ve ma‸ poˍ lonˉ Biˆdaˍkaˍ hta‸ kʼoˆ piˇ ve yoˬ.

27Jawˇmawˇ Aˍhaˍziˆ lehˬ, hpeh‸ la peuˬ ve awˬ ceuˬ oˇ ve hta‸ gʼa mawˬ ve teˇ yanˇ, yawˇ ve iˉ mvuhˇ lawˬ ciˇ leh Beˍtaˍhaˍganˍ venˇ lo hpaw-e ve yoˬ. Yeˍhuˆ htawˇ yawˇ hkʼaˇ suh gʼa‸ yuˬ kʼai leh, Chi hpaˇ hta‸ htawˇ tiˇ pehˍ-o‸, teh‸ yawˇ ve chaw teˇ hpaˍ hta‸ kʼoˆ piˇ ve yoˬ. Iˇbaˍlanˍ venˇ paˇ lo cawˬ ve Guˇraˆ teh‸ kʼoˆ ve chehˇ kuiˬ lo gaˬ htaˇ, Aˍhaˍziˆ hta‸ htawˇ hkaˆ ce bawˆ heuˆ sheˬ ve yoˬ. Ya‸ hkʼaˇ, yawˇ lehˬ Mehˆgiˇdoˍ venˇ lo hkʼa gaˬ hpaw-e leh, oˇ kaˬ gaˬ htaˇ suh-e ve yoˬ.

28Yawˇ ve ma‸ poˍ lonˉ teˇ hpaˍ yawˇ hta‸ Yeˍruˆsaˍlehnˍ venˇ lo kʼaw‸ yuˬ hkʼaw‸ veu laˇ leh Daˍviˆ ve venˇ hkʼaw tuˍ piˇ ve yoˬ.

29Iˉsaˍreˍlaˆ mvuhˇmiˬ hta‸ Aˍhaˆ ve yaˇ Yawˇranˍ uˉ peunˍ chehˇ ve 11 hkʼaw‸ gaˬ htaˇ, Yuˇda‸ mvuhˇmiˬ hta‸ Aˍhaˍziˆ kʼaw‸ uˉ peunˍ ve yoˬ.

30Yeˍhuˆ lehˬ Yeˍsaˍreˍlaˆ venˇ hkʼaw gaˬ la ve yoˬ. Hpeh‸ la peuˬ ve awˬ lawn hkʼa peu-eˬ ve hta‸ Yeˍsaˍ beˍlaˆ gʼa kaˇ ve teˇ yanˇ, yawˇ ve awˬ to hta‸ awˬ hkiˇ gu shawˍ leh, yehˬ miˉ ehˉ hkʼaw jaˆ nyi chehˇ taˍ ve yoˬ.

31Yeˍhuˆ jawˇmawˇ ve hawˉ yehˬ lo laˬ chehˇ ve hta‸ yawˇ gʼa mawˬ ve teˇ yanˇ, Chaw hta‸ tiˇ pehˍ shehˍ hpaˇ Ziˇmaˍriˆ-oˬ, nawˬ choˬ kaˬ lo aˬ hto‸ ma ca la ve le, teh‸ yawˇ hta‸ kʼoˆ piˇ ve yoˬ.

32Yeˍhuˆ chiˇ nyi leh, A shu ngaˬ hpawˇ lo chehˇ tuˬ ve le, teh‸ kuˬ na nyi ve yoˬ. Oˇ htaˇ hawˉ yehˬ hkʼaw ve ma‸ poˍ nyiˇ, shehˆ gʼaˇ yehˬ miˉ ehˉ hkʼaw yawˇ hta‸ ca tawˆ nyi la ve yoˬ.

33Hkʼe te leh Yeˍhuˆ lehˬ, Yaˇ miˇ ma chi ve hta‸ ca‸ ce peu-o, teh‸ ma‸ poˍ oˇ ve teˇ hpaˍ hta‸ kʼoˆ piˇ ve yoˬ. Hkʼe te leh, yawˇ hui yawˇ hta‸ ca‸ ce peu leh, yawˇ ve awˬ suhˍ gʼo‸ pa leh iˉ mvuhˇ teˇ hpaˍ hta‸ ngawˉ sheˬ ve yoˬ. Yeˍhuˆ lehˬ, yawˇ ve iˉ mvuhˇ leh iˉ mvuhˇ lawˬ teˇ hpaˍ yaˇ miˇ ma oˇ ve awˬ hkʼoˆ lo gʼa‸ kʼai ve yoˬ.

34Yawˇ hawˉ yehˬ hkʼaw lo‸-e leh awˍ caˇ ve yoˬ. Oˇ ve hkʼaw‸ nawˉ, Yaˇ miˇ ma chi hta‸ ca yuˬ tuˍ piˇ-oˆ. Awˬ lawn kʼo, yawˇ lehˬ jawˇmawˇ yaˇ miˇ hpeh‸ ve yoˬ, teh‸ kʼoˆ ve yoˬ.

35Yaˇ miˇ oˇ ve hta‸ ca tuˍ piˇ tuˬ tawˆ kʼai ve chaw teˇ hpaˍ lehˬ, yawˇ ve awˬ mu‸ ku teˇ hpaˍ hta‸ ceh tiˉ gʼa mawˬ ve yoˬ.

36Awˬ lawn chi yawˇ hui Yeˍhuˆ hta‸ ca kʼoˆ piˇ ve teˇ yanˇ yawˇ kʼoˆ ve, Gʼuiˬsha lehˬ yawˇ ve awˬ ceˬ paˍ Eˇliˇya‸ hta‸ cuˇ leh kʼoˆ taˍ ve tawˇ biˇ peuˬ. Yeˍsaˍreˍlaˆ venˇ hkʼaw lo, hpuiˇ teˇ hpaˍ Yeˍsaˍbeˍlaˆ ve awˬ shaˍ hta‸ che‸ caˇ tuˬ yoˬ.

37Cawˬ taˍ sheˍ ve awˬ mu‸ ku teˇ hpaˍ lehˬ, nuˇ hkʼehˇ hkʼa shuˍ sheˆ kʼai leh, chaw teˇ gʼaˇ ka‸ ca tawnˇ gʼa tuˬ ve maˇ heˆ teh‸ Gʼuiˬsha kʼoˆ taˍ peuˬ ve yoˬ, teh‸ Yeˍhuˆ kʼoˆ ve yoˬ.

← Chapter 8 Jump to: Chapter 10 →