bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Lahu
/
Lahu Bible Edited © Thailand Bible Society and Bible Society of Myanmar, 2010, 2020.
/
2 Kings 17
2 Kings 17
Lahu Bible Edited © Thailand Bible Society and Bible Society of Myanmar, 2010, 2020.
← Chapter 16
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 18 →
1
Yuˇda‸ mvuhˇmiˬ hta‸ jawˇmawˇ Aˍhkaˆ uˉ peunˍ chehˇ ve 12 hkʼaw‸ teˇ hkʼaw‸ htaˇ, Iˉsaˍreˍlaˆ mvuhˇmiˬ hta‸ Eˇlaˍ ve yaˇ Hawˇsheˍ kʼaw‸ uˉ peunˍ leh, yawˇ lehˬ Saˍmaˍriˆ venˇ hta‸ 9 hkʼaw‸ uˉ peunˍ ve yoˬ.
2
Yawˇ lehˬ Gʼuiˬsha hta‸ te ya‸ ve yoˬ. Ya‸ hkʼaˇ, awˬ nu ve Iˉsaˍreˍlaˆ jawˇmawˇ teˇ hpaˍ hkʼe taw maˇ haiˬ jaˇ.
3
Aˍsuˇriˆ jawˇmawˇ Shaˍlaˍmaˍneˍsaˍ yawˇ hta‸ ca bawˆ la ve yoˬ. Hkʼe te leh, Hawˉsheˍ Aˍsuˇriˆ jawˇmawˇ hta‸ la‸ caˉ ya‸ piˇ leh, teˇ hkʼaw‸ le le awˬ hkawnˍ keu piˇ ve yoˬ.
4
Ya‸ hkʼaˇ, teˇ hkʼaw‸ gaˬ htaˇ Hawˇsheˍ lehˬ Eˇjiˇtu‸ jawˇmawˇ Sawˇ geh lo yawˇ ve chaw hta‸ hpehˇ peu leh, yawˇ hta‸ ca ga la tuˬ ca lawˬ hkawˉ tcuh ve yoˬ. Oˇ ve hkʼaw‸ nawˉ, Hawˇsheˍ lehˬ Aˍsuˇriˆ jawˇmawˇ hta‸ awˬ hkawnˍ maˇ kʼaw‸ keu piˇ-o. Awˬ lawn chi hta‸ Aˍsuˇriˆ jawˇmawˇ gʼa kaˇ htaˇ, yawˇ Hawˇsheˍ hta‸ hpeh yuˬ leh htawnˍ hkʼaw keu taˍ ve yoˬ.
5
Oˇ ve hkʼaw‸ nawˉ, Aˍsuˇriˆ jawˇmawˇ lehˬ Iˉsaˍreˍlaˆ mvuhˇmiˬ hta‸ ca bawˆ la leh, Saˍmaˍriˆ venˇ hta‸ shehˆ hkʼaw‸ hkʼa gaˬ caw hoˆ taˍ ve yoˬ.
6
Hawˇseˍ jawˇmawˇ te ve 9 hkʼaw‸ teˇ hkʼaw‸ gaˬ htaˇ, Aˍsuˇriˆ jawˇmawˇ lehˬ Saˍmaˍriˆ venˇ hta‸ bawˆ gʼaˇ leh, Iˉsaˍreˍlaˆ chaw hui hta‸ Aˍsuˇriˆ mvuhˇmiˬ lo shiˍ kʼai ve yoˬ. Yawˇ hui teˇ hpaˍ hpaˍ hta‸ Haˍlaˍ venˇ hkʼaw maˇ kʼoˆ, teˇ hpaˍ hpaˍ hta‸ Gawˇzanˍ venˇ paˇ lo cawˬ ve Haˍbaˆ iˉ kaˆ lawˬ paˇ lo maˇ kʼoˆ, teˇ hpaˍ hta‸ Meˍdiˆ venˇ hkʼaw maˇ kʼoˆ chehˇ tcuh ve yoˬ.
7
Saˍmaˍriˆ venˇ gʼa luˬ kʼai ve lehˬ, Iˉsaˍreˍlaˆ chaw teˇ hpaˍ yawˇ hui hta‸ Eˇjiˇtu‸ mvuhˇmiˬ hkʼaw shiˍ tawˆ la piˇ ve yawˇ hui ve Gʼuiˬsha hta‸ te ya‸ jaˇ ve pa taw yoˬ. Yawˇ hui lehˬ, awˬ kaˍ awˬ nu ve gʼuiˬsha teˇ hpaˍ hta‸ oˉ kʼoˍ pui ve yoˬ.
8
Yawˇ hui Hkaˍnanˍ mvuhˇmiˬ hkʼaw lo‸ la htaˇ, Gʼuiˬsha gʼa‸ kʼoˬ piˇ taˍ ve chaw oˇ ve teˇ hpaˍ ve oˉ kʼoˍ pui ve awˬ liˇ hta‸ gʼa‸ te ve yoˬ.
9
Yawˇ hui lehˬ, Gʼuiˬsha nyi ma maˇ cawˇ ve kanˉ hta‸ te ve yoˬ. Yawˇ hui ve venˇ teˇ hpaˍ hkʼaw, awˬ nu ve gʼuiˬsha teˇ hpaˍ hta‸ oˉ kʼoˍ pui kuiˬ bon yehˬ teˇ hpaˍ te taˍ ve yoˬ.
10
Hkʼaw hkʼoˆ lo leh, suhˆ cehˬ teˇ hpaˍ hawˉ lo, Aˍsheˍraˆ gʼuiˬsha ma ve shaˉ ho‸ teˇ hpaˍ te teh taˍ ve yoˬ.
11
Gʼuiˬsha gʼa‸ kʼoˬ piˇ taˍ ve chaw oˇ ve teˇ hpaˍ ve awˬ liˇ hta‸ yuˬ leh, yawˇ hui lehˬ awˬ nu ve gʼuiˬsha teˇ hpaˍ hta‸ sha hawnˉ tuˉ tanˇ piˇ chehˇ ve yoˬ.
12
Chi hkʼe te ve hkʼaw, yawˇ hui Gʼuiˬsha hta‸ nyi ma zuhˆ tuˬ te piˇ leh, shaˉ ho‸ hta‸ oˉ kʼoˍ maˇ gʼa pui, teh‸ Gʼuiˬsha kʼoˆ taˍ ve tawˇ hta‸ ponˬ leuˉ ve yoˬ.
13
Gʼuiˬsha lehˬ, Iˉsaˍreˍlaˆ leh Yuˇda‸ chaw hui geh yawˇ ve tcuh kaˍ paˍ teˇ hpaˍ hta‸ kʼai tcuh leh, shaˍ ti‸ piˇ tcuh taˍ peuˬ ve yoˬ. Nawˬ hui te chehˇ ve cha‸ chiˆ ve kanˉ teˇ hpaˍ hta‸ baˬ taˉ leh, ngaˬ ve tawˇ hta‸ na yuˬ-oˬ. Ngaˬ ve tawˇ hkawˇ lehˬ, nawˬ hui ve awˬ puˍ awˬ pi hui hta‸ piˇ taˍ ve awˬliˇtawˇhkawˇ li‸ daw hkʼaw cawˬ taˍ leh, ngaˬ ve tcuh kaˍ paˍ teˇ hpaˍ nawˬ hui hta‸ maˍ laˇ chehˇ ve yoˬ, teh‸ Gʼuiˬsha kʼoˆ ve yoˬ.
14
Ya‸ hkʼaˇ, yawˇ hui maˇ na yuˬ. Yawˇ hui lehˬ, yawˇ hui ve awˬ puˍ awˬ pi teˇ hpaˍ hkʼa shuˍ kʼaˍ jaˇ leh, Gʼuiˬsha hta‸ gʼaˇ maˇ va.
15
Yawˇ hui lehˬ, Gʼuiˬsha maˍ piˇ ve tawˇ hta‸ maˇ na yuˬ. Yawˇ hui ve awˬ puˍ awˬ pi hui hta‸ Gʼuiˬsha te piˇ taˍ ve ka ti‸ hta‸ yawˇ hui maˇ ha‸ shaˉ. Gʼuiˬsha shaˍ ti‸ piˇ ve tawˇ hta‸ yawˇ hui maˇ na yuˬ. Yawˇ hui lehˬ, te‸ chiˉ tcuhˉ kuiˬ maˇ cawˬ ve shaˉ ho‸ teˇ hpaˍ hta‸ oˉ kʼoˍ pui leh, yawˇ hui ka‸ te‸ chiˉ tcuhˉ kuiˬ maˇ cawˬ ve chaw hpeh‸ la ve yoˬ. Yawˇ hui awˬ paˇ awˬ kui lo chehˇ ve chaw hui te ve hkʼe yawˇ hui ka‸ gʼa‸ te chehˇ ve yoˬ.
16
Yawˇ hui lehˬ, Gʼuiˬsha ve awˬliˇtawˇhkawˇ teˇ hpaˍ hta‸ baˬ taˉ leh, shi nuˇ shaˉ ho‸ nyiˇ maˬ te teh taˍ ve yoˬ. Aˍsheˍraˆ gʼuiˬsha ma ve shaˉ ho‸ hta‸ ka‸ yawˇ hui te teh taˍ leh, meu‸ keu shiˍ teˇ hpaˍ hta‸ oˉ kʼoˍ pui leh, Baˍlaˆ gʼuiˬsha hta‸ tuˉ tanˇ piˇ chehˇ ve yoˬ.
17
Yawˇ hui ve yaˇ paˍ yaˇ miˇ teˇ hpaˍ hta‸ yuˬ leh, awˬ nu ve gʼuiˬsha teˇ hpaˍ hta‸ tuˉ tanˇ piˇ chehˇ ve yoˬ. Yawˇ hui lehˬ, mawˉ paˍ sheˍ paˍ hui geh kʼai leh, Gʼuiˬsha mehˆ gʼuˇ suhˍ cha‸ chiˆ ve kanˉ hta‸ te chehˇ ve yoˬ.
18
Chi hta‸ pa taw, Gʼuiˬsha Iˉsaˍreˍlaˆ chaw hui hta‸ nyi ma zuhˆ jaˇ leh, yawˇ hui hta‸ gʼa‸ kʼoˬ piˇ ve yoˬ. Yuˇda‸ chaw hui hta‸ ceh tiˉ teh taˉ piˇ ve yoˬ.
19
Ya‸ hkʼaˇ, Yuˇda‸ chaw hui ka‸ Gʼuiˬsha ve awˬliˇtawˇhkawˇ hta‸ na yuˬ chehˇ ve maˇ heˆ. Iˉsaˍreˍlaˆ chaw hui te ve hkʼe, yawˇ hui ka‸ gʼa‸ te chehˇ ve yoˬ.
20
Gʼuiˬsha lehˬ, Iˉsaˍreˍlaˆ chaw hkʼa peu-eˬ ve hta‸ chiˇ baˬ piˇ leh, haiˬ ve canˇ paˍ teˇ hpaˍ ve la‸ sheh hkʼaw lo chiˇ a‸ piˇ ve yoˬ.
21
Iˉsaˍreˍlaˆ chaw leh Yuˇda‸ chaw hui hta‸ Gʼuiˬsha hpaˆ da‸ kʼai piˇ peuˬ hkʼaw‸ nawˉ, Iˉsaˍreˍlaˆ chaw hui lehˬ Neˍbaˆ ve yaˇ Yeˍyawˇbaoˍ hta‸ yawˇ hui ve jawˇmawˇ te tcuh ve yoˬ. Yeˍyawˇbaoˍ lehˬ, Iˉsaˍreˍlaˆ chaw hui hta‸ ya‸ kʼaw sheh ya‸ piˇ ve yoˬ.
22
Yawˇ hui lehˬ, Yeˍyawˇbaoˍ te ve cha‸ chiˆ ve kanˉ hkʼa peu-eˬ hta‸ gʼa‸ te ve yoˬ.
23
Awˬ leh meuˇ gaˬ htaˇ, Gʼuiˬsha lehˬ yawˇ ve tcuh kaˍ paˍ teˇ hpaˍ hta‸ cuˇ leh, shaˍ ti‸ piˇ taˍ peuˬ ve hkʼe, yawˇ hui hta‸ gʼa‸ kʼoˬ piˇ ve yoˬ. Hkʼe te leh, Iˉsaˍreˍlaˆ chaw hui lehˬ, Aˍsuˇriˆ chaw hui hpeh kʼai ve hta‸ gʼa hkanˍ chehˇ taˍ peuˬ ve yoˬ.
24
Aˍsuˇriˆ jawˇmawˇ lehˬ, Baˍbuˍlonˍ venˇ, Kuˇtaˆ venˇ, Aˍvaˍ venˇ, Haˍmaˆ venˇ, leh Seˍhpaˍraˍvenˍ venˇ chi teˇ hpaˍ hkʼaw chehˇ ve chaw hui hta‸ Saˍmaˍriˆ venˇ hkʼaw shiˍ kʼai leh, Iˉsaˍreˍlaˆ chaw teˇ hpaˍ awˬ tan oˇ kaˬ lo chehˇ tcuh ve yoˬ. Hkʼe te leh, mvuhˇmiˬ oˇ ve yawˇ hui ve chehˇ kuiˬ hpeh‸ la ve yoˬ.
25
Yawˇ hui oˇ kaˬ lo tanˬ chehˇ gehˇ htaˇ, Gʼuiˬsha lehˬ laˇ caˬ shiˉ teˇ hpaˍ hta‸ oˇ kaˬ lo kʼai tcuh leh, yawˇ hui teˇ hpaˍ hpaˍ hta‸ che‸ pehˍ piˇ lawˬ ve yoˬ.
26
Oˇ kaˬ lo ca chehˇ la ve chaw teˇ hpaˍ lehˬ, mvuhˇmiˬ oˇ ve hkʼaw chehˇ ve Gʼuiˬsha hta‸ maˇ shiˍ ve pa taw, Gʼuiˬsha lehˬ laˇ caˬ shiˉ teˇ hpaˍ hta‸ hpehˇ leh, yawˇ hui hta‸ ca che‸ pehˍ la ve awˬ lawn, Aˍsuˇriˆ jawˇmawˇ hta‸ ca kʼoˆ piˇ ve yoˬ.
27
Oˇ htaˇ jawˇmawˇ tawˇ piˇ leh kʼoˆ ve, Ngaˬ hui shiˍ veu laˇ ve paw hkuˇ teˇ gʼaˇ hta‸ oˇ kaˬ lo kʼaw‸ kʼo‸-e peu leh, chaw oˇ ve teˇ hpaˍ hta‸ Gʼuiˬsha oˇ ve teˇ gʼaˇ awˬ lawn ca kʼaw‸ maˍ piˇ tcuh-o, teh‸ kʼoˆ ve yoˬ.
28
Hkʼe te leh, yawˇ hui Iˉsaˍreˍlaˆ chaw paw hkuˇ teˇ gʼaˇ hta‸ Beˍteˍlaˆ venˇ lo kʼaw‸ kʼo‸-e tcuh leh, yawˇ hui hta‸ Iˉsaˍreˍlaˆ Gʼuiˬsha awˬ lawn maˍ piˇ tcuh ve yoˬ.
29
Ya‸ hkʼaˇ, yawˇ hui lehˬ awˬ nu ve shaˉ ho‸ teˇ hpaˍ hta‸ htawˇ te leh, hkʼaw hkʼoˆ lo teh taˍ ve yoˬ. Yawˇ hui ve mvuhˇmiˬ hkʼaw chehˇ htaˇ, oˉ kʼoˍ pui jaw ve shaˉ ho‸ teˇ hpaˍ hta‸ htawˇ te teh taˍ ve yoˬ.
30
Baˍbuˍlonˍ venˇ hkʼaw laˬ taˍ ve chaw hui lehˬ, Suˇkoˆbeˍnoˆ gʼuiˬsha hta‸ maˇ kʼoˆ, Kuˇtaˆ venˇ hkʼaw laˬ taˍ ve chaw hui lehˬ, Neˍraˍgaˍlaˆ gʼuiˬsha hta‸ maˇ kʼoˆ, Haˍmaˆ venˇ hkʼaw laˬ taˍ ve chaw hui lehˬ, Aˍshiˇmaˍ gʼuiˬsha hta‸ maˇ kʼoˆ,
31
Aˍvaˍ venˇ hkʼaw laˬ taˍ ve chaw hui lehˬ, Niˆbaˍhaˍ gʼuiˬsha leh Taˍtehˆ gʼuiˬsha hta‸ maˇ kʼoˆ, Seˍhpaˍraˍvenˍ venˇ hkʼaw laˬ taˍ ve chaw hui lehˬ, Aˍdaˍmeˍlehˆ gʼuiˬsha leh Aˍnaˍmeˍlehˆ gʼuiˬsha hta‸ maˇ kʼoˆ, te leh oˉ kʼoˍ pui chehˇ ve yoˬ.
32
Chaw oˇ ve teˇ hpaˍ lehˬ, Gʼuiˬsha hta‸ htawˇ oˉ kʼoˍ pui ve yoˬ. Yawˇ hui awˬ hkʼaw lo ve chaw teˇ hpaˍ hta‸ paw hkuˇ te tcuh leh, awˬ nu ve gʼuiˬsha teˇ hpaˍ hta‸ tuˉ tanˇ piˇ chehˇ ve yoˬ.
33
Hkʼe te leh, yawˇ hui lehˬ Gʼuiˬsha hta‸ htawˇ oˉ kʼoˍ pui leh, yawˇ hui ve mvuhˇmiˬ hkʼaw chehˇ htaˇ oˉ kʼoˍ pui jaw ve gʼuiˬsha teˇ hpaˍ hta‸ htawˇ oˉ kʼoˍ pui chehˇ ve yoˬ.
34
Ya‸ nyi hkʼa gaˬ yawˇ hui oˇ hkʼe te chehˇ ve yoˬ. Yawˇ hui lehˬ, Gʼuiˬsha hta‸ oˉ kʼoˍ maˇ pui. Awˬ meh awˬ suhˉ Iˉsaˍreˍlaˆ teh‸ meh piˇ taˍ ve Yaˍkoˆ ve awˬ ceuˬ awˬ hkʼaˇ teˇ hpaˍ hta‸ Gʼuiˬsha piˇ taˍ ve awˬliˇtawˇhkawˇ teˇ hpaˍ hta‸ yawˇ hui maˇ na yuˬ.
35
Gʼuiˬsha yawˇ hui hta‸ ka ti‸ shaˉ caˆ chi hkʼe te piˇ taˍ ve yoˬ. Awˬ kaˍ awˬ nu ve gʼuiˬsha teˇ hpaˍ hta‸ oˉ kʼoˍ taˇ pui. Tuˉ tanˇ piˇ ve ka‸ taˇ te.
36
Nawˬ hui hta‸ Eˇjiˇtu‸ mvuhˇmiˬ hkʼaw shiˍ tawˆ laˇ shehˍ hpaˇ awˬ gʼaˇ uiˍ jaˇ ve ngaˬ Gʼuiˬsha hta‸ tiˉ oˉ kʼoˍ gʼa pui leh, ngaˬ hta‸ tiˉ gʼa tuˉ tanˇ laˇ ve yoˬ.
37
Ngaˬ nawˬ hui awˬ pon bvuh‸ piˇ taˍ ve awˬliˇtawˇhkawˇ teˇ hpaˍ hta‸ hkʼaˬ htaˆ ka‸ gʼa na yuˬ ve yoˬ. Awˬ kaˍ awˬ nu gʼuiˬsha teˇ hpaˍ hta‸ nawˬ hui oˉ kʼoˍ maˇ gʼa pui.
38
Ngaˬ nawˬ hui hta‸ te piˇ taˍ ve ka ti‸ shaˉ caˆ hta‸ nawˬ hui maˇ gʼa leunˇ piˇ.
39
Nawˬ hui lehˬ ngaˬ ve tawˇ hta‸ gʼa na yuˬ ve yoˬ. Oˇ hkʼe te ve kʼo, canˇ paˍ teˇ hpaˍ ve la‸ sheh hkʼaw lo ngaˬ nawˬ hui hta‸ ponˬ laˇ tuˬ yoˬ, teh‸ Gʼuiˬsha kʼoˆ piˇ taˍ peuˬ ve yoˬ.
40
Ya‸ hkʼaˇ, chaw oˇ ve teˇ hpaˍ maˇ na yuˬ. A shu yawˇ te jaw ve awˬ liˇ awˬ hkʼaˇ teˇ hpaˍ awˬ hkʼaˇ suh te kʼai ve yoˬ.
41
Hkʼe te leh, chaw oˇ ve teˇ hpaˍ Gʼuiˬsha hta‸ ka‸ oˉ kʼoˍ pui leh, awˬ nu ve gʼuiˬsha teˇ hpaˍ hta‸ htawˇ oˉ kʼoˍ pui chehˇ ve yoˬ. Ya‸ nyi hkʼa gaˬ, yawˇ hui ve awˬ ceuˬ awˬ hkʼaˇ teˇ hpaˍ oˇ hkʼe te chehˇ sheˍ ve yoˬ.
← Chapter 16
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 18 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25