2 Kings 10

Lahu Bible Edited © Thailand Bible Society and Bible Society of Myanmar, 2010, 2020.

1Saˍmaˍriˆ venˇ hkʼaw lo jawˇmawˇ Aˍhaˆ ve awˬ ceuˬ awˬ hkʼaˇ 70 gʼaˇ chehˇ taˍ sheˍ ve yoˬ. Hkʼe te leh, Yeˍhuˆ lehˬ venˇ oˇ ve hta‸ uˉ peunˍ chehˇ ve awˬ hoˉ awˬ naˬ teˇ hpaˍ leh, Aˍhaˆ ve awˬ ceuˬ awˬ hkʼaˇ oˇ ve teˇ hpaˍ hta‸ nyi ha‸ shaˉ piˇ chehˇ ve chaw teˇ hpaˍ geh li‸ chi hkʼe bvuh‸ feu piˇ ve yoˬ.

2Nawˬ hui lehˬ, jawˇmawˇ ve awˬ ceuˬ awˬ hkʼaˇ teˇ hpaˍ hta‸ nyi ha‸ shaˉ piˇ chehˇ ve yoˬ. Nawˬ hui geh lo iˉ mvuhˇ lawˬ, iˉ mvuhˇ teˇ hpaˍ, la‸ caˉ teˇ hpaˍ leh ta‸ yehˬ teˇ hpaˍ cawˬ taˍ ve yoˬ. Chi hta‸ pa taw, nawˬ hui li‸ chi hta‸ gʼa mawˬ ve teˇ yanˇ,

3jawˇmawˇ ve awˬ ceuˬ awˬ hkʼaˇ awˬ hkʼaw lo cheuˬ jaˇ ve chaw teˇ gʼaˇ hta‸ leuˆ yuˬ leh jawˇmawˇ te tcuh-o. Peuˬ hkʼaw‸ nawˉ, ma‸ bawˆ tuˬ hkʼa deh‸ gu taˍ tcuh-o, teh‸ bvuh‸ feu piˇ ve yoˬ.

4Oˇ htaˇ, Saˍmaˍriˆ venˇ hta‸ uˉ peunˍ chehˇ ve awˬ hoˉ awˬ naˬ oˇ ve teˇ hpaˍ kawˆ jaˇ leh, Ngaˬ hui Yeˍhuˆ hta‸ hkʼaˬ hkʼe te tawˍ da‸ hpeh‸ tuˬ le. Jawˇmawˇ Yawˇranˍ leh jawˇmawˇ Aˍhaˍziˆ hui ka‸ yawˇ hta‸ tawˍ da‸ maˇ gʼa, teh‸ kʼoˆ ve yoˬ.

5Hkʼe te leh, Saˍmaˍriˆ venˇ hta‸ uˉ peunˍ chehˇ ve awˬ hoˉ awˬ naˬ teˇ hpaˍ leh Aˍhaˆ ve awˬ ceuˬ awˬ hkʼaˇ teˇ hpaˍ hta‸ nyi ha‸ shaˉ piˇ chehˇ ve chaw teˇ hpaˍ, Yeˍhuˆ hta‸ li‸ chi hkʼe kʼaw‸ bvuh‸ hkʼaw‸ piˇ ve yoˬ. Ngaˬ hui lehˬ nawˬ ve awˬ ceˬ hpeh‸ leh nawˬ kʼoˆ ve hkʼe te tuˬ yoˬ. Ya‸ hkʼaˇ, ngaˬ hui lehˬ, choˬ kaˬ lo chehˇ ve chaw teˇ gʼaˇ hta‸ ka‸ jawˇmawˇ te tcuh tuˬ ve maˇ heˆ. Nawˬ dawˇ cawˇ ve hkʼe te-o, teh‸ li‸ bvuh‸ hkʼaw‸ piˇ ve yoˬ.

6Oˇ htaˇ, Yeˍhuˆ yawˇ hui hta‸ li‸ chi hkʼe kʼaw‸ bvuh‸ feu piˇ ve yoˬ. Nawˬ hui ngaˬ hpawˇ chehˇ leh, ngaˬ ve tawˇ hta‸ na tuˬ ve kʼo, shawˉ pawˍ chi teˇ yanˇ gaˬ htaˇ, Aˍhaˆ ve awˬ ceuˬ awˬ hkʼaˇ 70 gʼaˇ ve oˉ kʼoˍ choˬ kaˬ Yeˍsaˍreˍlaˆ venˇ hkʼaw ngaˬ geh gaˬ la piˆ, teh‸ li‸ kʼaw‸ bvuh‸ feu piˇ ve yoˬ. Aˍhaˆ ve awˬ ceuˬ awˬ hkʼaˇ oˇ ve 70 gʼaˇ lehˬ, a sha‸ i chehˇ sheˍ htaˇ ka‸ Saˍmaˍriˆ venˇ hkʼaw ve awˬ hoˉ awˬ naˬ teˇ hpaˍ gʼawˆ hu piˇ taˍ ve yoˬ.

7Yeˍhuˆ ve li‸ gaˬ la htaˇ, awˬ hoˉ awˬ naˬ teˇ hpaˍ lehˬ, Aˍhaˆ ve awˬ ceuˬ awˬ hkʼaˇ oˇ ve 70 gʼaˇ ve oˉ kʼoˍ hta‸ tawˆ yuˬ leh hkʼawˍ lawˇ hkʼaw keu peuˬ hkʼaw‸ nawˉ, Yeˍsaˍreˍlaˆ venˇ lo Yeˍhuˆ geh feu piˇ ve yoˬ.

8Aˍhaˆ ve awˬ ceuˬ awˬ hkʼaˇ teˇ hpaˍ ve oˉ kʼoˍ gaˬ la peuˬ ve awˬ lawn shu Yeˍhuˆ hta‸ ca hto piˇ htaˇ, Yeˍhuˆ lehˬ oˉ kʼoˍ oˇ ve teˇ hpaˍ hta‸ shawˉ pawˍ mvuhˇ htiˇ la htaˇ hkʼa gaˬ venˇ taˍ meu‸ hpe‸ lo nyiˇ hpoˆ te teh taˍ tuˬ tawˇ piˇ ve yoˬ.

9Shawˉ pawˍ mvuhˇ htiˇ la htaˇ, yawˇ venˇ taˍ meu‸ hpe‸ lo kʼai leh, oˇ kaˬ lo chehˇ taˍ ve chaw moˍ lonˉ hta‸ chi hkʼe kʼoˆ piˇ ve yoˬ. Jawˇmawˇ Yawˇranˍ hta‸ kʼaw‸ hpfuhˆ leh tiˇ pehˍ piˇ shehˍ hpaˇ lehˬ ngaˬ hpeh‸ ve yoˬ. Nawˬ hui lehˬ kanˉ chi hta‸ te‸ chiˉ maˇ caˉ da‸. Ya‸ hkʼaˇ, chaw chi teˇ hpaˍ hta‸ a shu tiˇ pehˍ piˇ taˍ ve le.

10Chi hkʼe hpeh‸ la ve lehˬ, Aˍhaˆ ve awˬ ceuˬ awˬ hkʼaˇ teˇ hpaˍ hta‸ caˉ da‸ leh Gʼuiˬsha kʼoˆ taˍ ve tawˇ biˇ la tuˬ awˬ pon hpeh‸ ve yoˬ. Gʼuiˬsha lehˬ, yawˇ ve tcuh kaˍ paˍ Eˇliˇya‸ hta‸ cuˇ leh kʼoˆ taˍ peuˬ ve tawˇ hta‸ te biˇ la taˍ peuˬ ve yoˬ, teh‸ yawˇ hui hta‸ kʼoˆ piˇ ve yoˬ.

11Oˇ ve hkʼaw‸ nawˉ, Yeˍhuˆ lehˬ Yeˍsaˍreˍlaˆ venˇ hkʼaw chehˇ taˍ sheˍ ve awˬ nu ve Aˍhaˆ ve awˬ ceuˬ awˬ hkʼaˇ hkʼa peu-eˬ ve hta‸ tiˇ pehˍ piˇ ve yoˬ. Yawˇ ve ma‸ poˍ lonˉ, da‸ jaˇ ve awˬ chawˇ leh paw hkuˇ teˇ hpaˍ hta‸ ka‸ maˇ teh taˉ piˇ.

12Oˇ ve hkʼaw‸ nawˉ, Yeˍhuˆ Yeˍsaˍreˍlaˆ venˇ hkʼaw tawˆ-e leh, Saˍmaˍriˆ venˇ lo kʼai ve yoˬ. Ya‸ kʼaw kʼaˉ lo, Yawˬ hawˉ paˍ hui ve fa la teh‸ kʼoˆ ve chehˇ kuiˬ lo gaˬ htaˇ,

13Yuˇda‸ jawˇmawˇ Aˍhaˍziˆ ve awˬ ceuˬ awˬ hkʼaˇ teˇ hpaˍ hta‸ gʼa mawˬ leh, Nawˬ hui a shu le, teh‸ yawˇ hui hta‸ na nyi ve yoˬ. Ngaˬ hui lehˬ Aˍhaˍziˆ ve awˬ ceuˬ awˬ hkʼaˇ teˇ hpaˍ hpeh‸ ve yoˬ. Ngaˬ hui Yeˍsaˍreˍlaˆ venˇ lo jawˇmawˇ ma Yeˍsaˍbeˍlaˆ ve awˬ ceuˬ awˬ hkʼaˇ teˇ hpaˍ geh ca guiˇ tuˬ kʼai toˇ ve yoˬ, teh‸ yawˇ hui Yeˍhuˆ hta‸ kʼaw‸ yaw hkʼaw‸ piˇ ve yoˬ.

14Oˇ htaˇ Yeˍhuˆ lehˬ, Chaw chi teˇ hpaˍ hta‸ hpeh yuˬ-o‸, teh‸ yawˇ ve ma‸ yaˇ teˇ hpaˍ hta‸ tawˇ piˇ ve yoˬ. Hkʼe te leh, yawˇ hui chaw oˇ ve teˇ hpaˍ hta‸ hpeh yuˬ leh, oˇ kaˬ lo cawˬ ve miˬ kʼoˍ teˇ maˬ awˬ paˇ lo yawˇ hui hta‸ tiˇ pehˍ piˇ ve yoˬ. Yawˇ hui tiˇ pehˍ piˇ ve chaw oˇ ve hkʼa peu-eˬ 42 gʼaˇ cawˬ ve yoˬ.

15Oˇ ve hkʼaw‸ nawˉ, Yeˬhuˆ awˬ gʼuˇ suhˍ kʼaw‸ kʼai leh, Reˍhkaˆ ve yaˇ Yawˇnaˍdaˆ hta‸ gʼa mawˬ ve yoˬ. Yeˍhuˆ yawˇ hta‸ la‸ sheh caˉ piˇ leh, Ngaˬ huiˉ maˬ dawˇ hkʼaˇ hawˍ da‸ ve yoˬ. Nawˬ ngaˬ hpawˇ chehˇ tuˬ laˇ, teh‸ yawˇ hta‸ kʼoˆ piˇ ve yoˬ. Yoˬ, ngaˬ chehˇ tuˬ yoˬ, teh‸ Yawˇnaˍdaˆ yawˇ hta‸ kʼaw‸ yaw hkʼaw‸ piˇ ve yoˬ. Hkʼe te leh, Yeˍhuˆ yawˇ hta‸ yawˇ ve iˉ mvuhˇ lawˬ hkʼoˆ gʼawˬ taˆ piˇ leh,

16Ngaˬ Gʼuiˬsha ve kanˉ hta‸ hkʼaˬ ma coˇ caˇ leh te chehˇ ve nawˬ ca gʼa‸ nyi la-o, teh‸ Yawˇnaˍdaˆ hta‸ kʼoˆ piˇ ve yoˬ. Oˇ ve hkʼaw‸ nawˉ, yawˇ hui Saˍmaˍriˆ venˇ lo kʼai ve yoˬ.

17Yawˇ hui oˇ kaˬ lo gaˬ htaˇ, Yeˍhuˆ lehˬ Aˍhaˆ ve awˬ ceuˬ awˬ hkʼaˇ hkʼa peu-eˬ ve hta‸ tiˇ pehˍ piˇ ve yoˬ. Chi hkʼe hpeh‸ la tuˬ, Gʼuiˬsha Eˇliˇya‸ hta‸ kʼoˆ piˇ taˍ peuˬ ve yoˬ.

18Yeˍhuˆ lehˬ, Saˍmaˍriˆ venˇ yaˇ hkʼa peu-eˬ ve hta‸ kuˬ hpawnˬ leh, yawˇ hui hta‸ chi hkʼe kʼoˆ piˇ ve yoˬ. Jawˇmawˇ Aˍhaˆ lehˬ, Baˍlaˆ gʼuiˬsha hta‸ a ciˉ ceh tiˉ tuˉ tanˇ piˇ ve yoˬ. Ya‸ hkʼaˇ, ngaˬ yawˇ hta‸ maˇ maˇ tuˉ tanˇ piˇ gaˇ ve yoˬ.

19Chi hta‸ pa taw, Baˍlaˆ gʼuiˬsha ve tcuh kaˍ paˍ teˇ hpaˍ, paw hkuˇ teˇ hpaˍ leh, gʼuiˬsha chi hta‸ oˉ kʼoˍ hkʼa pui ve chaw hkʼa peu-eˬ ve hta‸ teˇ geh kuˬ hpawnˬ-o‸. Teˇ gʼaˇ hta‸ ka‸ taˇ chehˇ tcuh taˉ. Baˍlaˆ gʼuiˬsha hta‸ ngaˬ tuˉ tanˇ tuˬ hkʼa biˇ tuˉ tanˇ piˇ gaˇ ve yoˬ. Tuˉ tanˇ kuiˬ lo maˇ laˬ ve chaw teˇ hpaˍ hta‸ ngaˬ tiˇ pehˍ tuˬ yoˬ, teh‸ yawˇ hui hta‸ kʼoˆ piˇ ve yoˬ. (Yeˍhuˆ chi hkʼe te ve lehˬ, Baˍlaˆ gʼuiˬsha hta‸ oˉ kʼoˍ hkʼa pui ve chaw hkʼa peu-eˬ hta‸ tiˇ pehˍ gaˇ ve pa taw, yawˇ cuˇ yiˍ te chehˇ ve teˇ ceuˬ yoˬ.)

20Oˇ ve hkʼaw‸ nawˉ Yeˍhuˆ lehˬ, Baˍlaˆ gʼuiˬsha hta‸ taˍ uiˍ taˍ mvuh leh oˉ kʼoˍ pui tuˬ ve awˬ nyi teˇ nyi tinˍ-o‸, teh‸ kʼoˆ ve yoˬ.

21Hkʼe te leh, yawˇ hui awˬ nyi teˇ nyi tinˍ leh, Iˉsaˍreˍlaˆ mvuhˇmiˬ hkʼaˬ ti chi ti lo awˬ lawn kaˇ feu piˇ ve yoˬ. Baˍlaˆ gʼuiˬsha hta‸ oˉ kʼoˍ hkʼa pui chehˇ ve chaw hkʼa peu-eˬ gaˬ la leh, Baˍlaˆ gʼuiˬsha ve bon yehˬ hkʼaw hkʼa biˇ hpoˆ chehˇ taˍ ve yoˬ.

22Oˇ htaˇ Yeˍhuˆ lehˬ, oˇ kaˬ lo oˉ kʼoˍ ca pui la ve chaw hkʼa peu-eˬ hta‸ da‸ kehˬ ve veu‸ kʼaˇ yuˬ tawˆ leh veu‸ deh tcuh piˇ tuˬ, veu‸ kʼaˇ ha‸ shaˉ shehˍ hpaˇ paw hkuˇ teˇ gʼaˇ hta‸ tawˇ piˇ ve yoˬ.

23Oˇ hkʼe te peuˬ hkʼaw‸ nawˉ, Yeˍhuˆ lehˬ Reˍhkaˆ ve yaˇ Yawˇnaˍdaˆ hta‸ shiˍ veu leh bon yehˬ hkʼaw lo‸-e ve yoˬ. Baˍlaˆ gʼuiˬsha hta‸ oˉ kʼoˍ pui ve chaw ceh tiˉ choˬ kaˬ lo laˬ tcuh piˇ-oˆ. Gʼuiˬsha hta‸ oˉ kʼoˍ pui ve chaw teˇ gʼaˇ ka‸ choˬ kaˬ lo maˇ gʼa laˬ tuˬ shaˍ ti‸ hkʼa deh‸ taˍ leh nyi taˍ-o‸, teh‸ oˇ kaˬ lo hpawnˬ chehˇ ve chaw hui hta‸ kʼoˆ piˇ ve yoˬ.

24Oˇ hkʼe kʼoˆ peuˬ hkʼaw‸ nawˉ, Yeˍhuˆ leh Yawˇnaˍdaˆ yawˇ huiˉ maˬ bon yehˬ hkʼaw Baˍlaˆ gʼuiˬsha hta‸ tuˉ tanˇ piˇ ve yoˬ. Yeˍhuˆ lehˬ yawˇ ve ma‸ yaˇ 80 gʼaˇ hta‸ bon yehˬ paˇ lo hkʼa deh‸ shaw tcuh taˍ leh, yawˇ hui hta‸ chi hkʼe kʼoˆ piˇ taˍ ve yoˬ. Nawˬ hui lehˬ, chaw chi hkʼa peu-eˬ ve hta‸ gʼa tiˇ pehˍ ve yoˬ. Teˇ gʼaˇ gʼaˇ ponˬ tawˆ-e kʼo, pon tawˆ-e piˇ shehˍ hpaˇ lehˬ chaw oˇ ve awˬ tan gʼa suh tuˬ yoˬ, teh‸ hkʼa deh‸ shanˍ piˇ taˍ ve yoˬ.

25Yeˍhuˆ lehˬ, Baˍlaˆ gʼuiˬsha hta‸ tuˉ tanˇ piˇ peuˬ hkʼaw‸ nawˉ, Nawˬ hui lo‸-e leh yawˇ hui hkʼa peu-eˬ ve hta‸ tiˇ pehˍ piˇ-oˆ. Teˇ gʼaˇ hta‸ ka‸ taˇ ponˬ piˇ, teh‸ yawˇ ve ma‸ yaˇ teˇ hpaˍ hta‸ kʼoˆ piˇ ve yoˬ. Yawˇ hui lo‸-e leh chaw oˇ ve hkʼa peu-eˬ hta‸ tiˇ pehˍ piˇ peuˬ hkʼaw‸ nawˉ, bon yehˬ awˬ baˬ hpawˇ lo gʼawˬ baˬ ve yoˬ.

26Oˇ hkʼe te peuˬ hkʼaw‸ nawˉ, yawˇ hui bon yehˬ awˬ hkʼaw hpawˇ ve teˇ bawehˇ hkʼaw lo‸-e leh, Baˍlaˆ shaˉ ho‸ hta‸ yuˬ tawˆ-e leh aˬ miˍ tuˉ baˬ ve yoˬ.

27Yawˇ hui lehˬ, shaˉ ho‸ hta‸ ka‸ bon yehˬ hta‸ ka‸ aˬ miˍ tuˉ baˬ leh, oˇ kaˬ lo aˉ kʼa‸ yiˬ kuiˬ kʼaw‸ hpeh‸ la piˇ ve yoˬ. Ya‸ nyi hkʼa gaˬ chi hkʼe hpeh‸ chehˇ taˍ ve yoˬ.

28Chi ve lehˬ, Iˉsaˍreˍlaˆ mvuhˇmiˬ hkʼaw Baˍlaˆ gʼuiˬsha hta‸ oˉ kʼoˍ pui ve awˬ liˇ hta‸ Yeˍhuˆ hkʼaˬ hkʼe te mehˉ kʼai piˇ ve awˬ lawn hpeh‸ ve yoˬ.

29Ya‸ hkʼaˇ, yawˇ lehˬ Beˍteˍlaˆ venˇ leh Danˍ venˇ hkʼaw lo Yeˍyawˇbaoˍ te teh taˍ ve Iˉsaˍreˍlaˆ chaw hui hta‸ ya‸ kʼaw sheh ya‸ piˇ chehˇ ve shi nuˇ shaˉ ho‸ oˇ ve teˇ hpaˍ hta‸ maˇ te luˬ piˇ.

30Gʼuiˬsha Yeˍhuˆ hta‸ chi hkʼe kʼoˆ piˇ ve yoˬ. Nawˬ lehˬ, Aˍhaˆ ve awˬ ceuˬ awˬ hkʼaˇ teˇ hpaˍ hta‸ ngaˬ te tcuh piˇ gaˇ ve hkʼe hkʼa deh‸ te piˇ taˍ peuˬ. Chi hta‸ pa taw, nawˬ ve awˬ ceuˬ awˬ hkʼaˇ 4 co-e hkʼa gaˬ, Iˉsaˍreˍlaˆ ve jawˇmawˇ gʼa te tuˬ yoˬ, teh‸ yawˇ hta‸ kʼoˆ piˇ ve yoˬ.

31Ya‸ hkʼaˇ, Yeˍhuˆ lehˬ Iˉsaˍreˍlaˆ Gʼuiˬsha ve tawˇ hta‸ nyi ma awˬ tawˬ hkʼa gaˬ maˇ na yuˬ. Yawˇ lehˬ Yeˍyawˇbaoˍ hkʼa shuˍ Iˉsaˍreˍlaˆ chaw hui hta‸ ya‸ kʼaw sheh ya‸ piˇ ve yoˬ.

32Oˇ htaˇ, Gʼuiˬsha lehˬ Iˉsaˍreˍlaˆ mvuhˇmiˬ hta‸ shaˬ te shaˬ i la piˇ ve yoˬ. Suˇriˆ jawˇmawˇ Haˍzeˍlaˆ lehˬ, Yawˇdanˍ iˉ kaˆ lawˬ mvuhˇ nyi tawˆ hpawˇ te leh awˬ hawˉ hpawˇ Aˍnonˍ iˉ kaˆ lawˬ paˇ lo cawˬ ve Aˍyawˍ venˇ lo hkʼa gaˬ,

33awˬ kaˍ lo cawˬ ve Giˇlaˆ mvuhˇmiˬ leh Baˍshanˍ mvuhˇmiˬ hkʼa peu-eˬ ve hta‸ bawˆ yuˬ kʼai ve yoˬ. Mvuhˇmiˬ chi teˇ hpaˍ lehˬ Gaˆ, Ruˇbenˍ leh Maˍnaˍseˍ chaw hui ve mvuhˇmiˬ hpehˬ ve yoˬ.

34Yeˍhuˆ hkʼa te ve kanˉ hkʼa peu-eˬ ve hta‸ Iˉsaˍreˍlaˆ jawˇmawˇ hui ve li‸ daw hkʼaw bvuh‸ keu taˍ ve yoˬ.

35Yawˇ suh-e leh, shu yawˇ hta‸ Saˍmaˍriˆ venˇ hkʼaw tuˍ piˇ ve yoˬ. Hkʼe te leh, yawˇ ve yaˇ Yawˇhkaˆ yawˇ awˬ tan jawˇmawˇ kʼaw‸ te ve yoˬ.

36Yeˍhuˆ lehˬ, Iˉsaˍreˍlaˆ jawˇmawˇ hpeh‸ leh, Saˍmaˍriˆ venˇ hta‸ 28 hkʼaw‸ uˉ peunˍ taˉ ve yoˬ.

← Chapter 9 Jump to: Chapter 11 →