2 Kings 18

Lahu Bible Edited © Thailand Bible Society and Bible Society of Myanmar, 2010, 2020.

← Chapter 17 Jump to: Chapter 19 →

1Iˉsaˍreˍlaˆ mvuhˇmiˬ hta‸ Eˇlaˍ ve yaˇ Hawˇseˍ uˉ peunˍ chehˇ ve 3 hkʼaw‸ teˇ hkʼaw‸ htaˇ, Yuˇda‸ mvuhˇmiˬ hta‸ Aˍhkaˆ ve yaˇ Heˍsaˍkiˆ kʼaw‸ uˉ peunˍ ve yoˬ.

2Yawˇ jawˇmawˇ hpeh‸ la htaˇ, yawˇ ve a sha‸ 25 hkʼaw‸ gaˬ peuˬ leh, Yeˍruˆsaˍlehnˍ venˇ hta‸ 29 hkʼaw‸ uˉ peunˍ ve yoˬ. Yawˇ ve awˬ e lehˬ, Zaˍhkaˍriˆ ve yaˇ miˇ Aˍbiˇyaˆ hpeh‸ ve yoˬ.

3Yawˇ ve awˬ puˍ lonˉ Daˍviˆ hkʼa shuˍ, yawˇ lehˬ Gʼuiˬsha nyi ma cawˇ ve kanˉ hta‸ tiˉ te ve yoˬ.

4Awˬ kaˍ awˬ nu ve gʼuiˬsha teˇ hpaˍ hta‸ oˉ kʼoˍ pui kuiˬ bon yehˬ teˇ hpaˍ hta‸ te luˬ piˇ leh, Aˍsheˍraˆ gʼuiˬsha ma ve shaˉ ho‸ teˇ hpaˍ hta‸ htawˇ dawˆ paˆ piˇ ve yoˬ. Chi hkʼoˆ ka‸, yawˇ lehˬ Neˍhuˆtanˍ teh‸ kʼoˆ ve aˬ sho-eˬ htaˇ Moˉseˍ te teh taˉ ve kuiˇ vuiˬ hta‸ htawˇ te luˬ piˇ ve yoˬ. Awˬ yanˇ oˇ ve teˇ yanˇ hkʼa gaˬ, Iˉsaˍreˍlaˆ chaw hui lehˬ kuiˇ vuiˬ oˇ ve hta‸ taˍ uiˍ leh sha hawnˉ tuˉ tanˇ piˇ chehˇ sheˍ ve yoˬ.

5Heˍsaˍkiˆ lehˬ, Iˉsaˍreˍlaˆ ve Gʼuiˬsha hta‸ ceh tiˉ gʼaˇ va chehˇ ve yoˬ. Yuˇda‸ mvuhˇmiˬ hkʼaw, yawˇ hkʼe ve jawˇmawˇ teˇ gʼaˇ ka‸ maˇ cawˬ.

6Yawˇ lehˬ, Gʼuiˬsha hta‸ ka ti‸ yeˬ jaˇ leh, teˇ pawˆ ka‸ yawˇ ve tawˇ hta‸ maˇ ponˬ leuˉ jaw. Gʼuiˬsha Moˉseˍ hta‸ piˇ taˍ ve awˬliˇtawˇhkawˇ hkʼa peu-eˬ ve hta‸ yawˇ na yuˬ ve yoˬ.

7Hkʼe te leh, Gʼuiˬsha yawˇ geh chehˇ leh, yawˇ hkʼa te ve kanˉ hkʼa peu-eˬ uiˍ la da‸ la chehˇ ve yoˬ. Yawˇ Aˍsuˇriˆ jawˇmawˇ hta‸ kʼaw‸ hpfuhˆ leh, yawˇ hta‸ awˬ hkawnˍ maˇ keu piˇ.

8Yawˇ Hpiˇliˇtiˆ chaw hta‸ ma‸ bawˆ gʼaˇ leh, Gaˍsaˍ venˇ hta‸ te leh awˬ nu ve venˇ teˇ hpaˍ hta‸ yawˇ gʼa ve yoˬ.

9Yawˇ jawˇmawˇ te ve 4 hkʼaw‸ teˇ hkʼaw‸ (Iˉsaˍreˍlaˆ mvuhˇmiˬ hta‸ Hawˇseˍ uˉ peunˍ ve 7 hkʼaw‸ teˇ hkʼaw‸ htaˇ) Aˍsuˇriˆ jawˇmawˇ Shaˍlaˍmaˍneˍsaˍ Iˉsaˍreˍlaˆ mvuhˇmiˬ hta‸ ca bawˆ la leh, Saˍmaˍriˆ venˇ hta‸ caw hoˆ taˍ ve yoˬ.

10Shehˆ hkʼaw‸ teˇ hkʼaw‸ gaˬ htaˇ, Saˍmaˍriˆ venˇ luˬ kʼai ve yoˬ. Chi hkʼe hpeh‸ la ve lehˬ, Heˍsaˍkiˆ uˉ peunˍ chehˇ ve 6 hkʼaw‸ teˇ hkʼaw‸ leh, Hawˇseˍ uˉ peunˍ chehˇ ve 9 hkʼaw‸ teˇ hkʼaw‸ htaˇ hpeh‸ ve yoˬ.

11Aˍsuˇriˆ jawˇmawˇ lehˬ, Iˉsaˍreˍlaˆ chaw teˇ hpaˍ hta‸ Aˍsuˇriˆ mvuhˇmiˬ lo shiˍ kʼai leh, teˇ hpaˍ hpaˍ hta‸ Haˍlaˍ venˇ lo maˇ kʼoˆ, teˇ hpaˍ hpaˍ hta‸ Gawˇzanˍ venˇ paˇ lo cawˬ ve Haˍbaˆ iˉ kaˆ lawˬ paˇ lo maˇ kʼoˆ, chehˇ tcuh taˍ ve yoˬ.

12Saˍmaˍriˆ venˇ gʼa luˬ kʼai ve lehˬ, Iˉsaˍreˍlaˆ chaw teˇ hpaˍ Gʼuiˬsha ve tawˇ hta‸ ponˬ leuˉ leh, Gʼuiˬsha ve awˬ ceˬ Moˉseˍ yawˇ hui hta‸ piˇ taˍ ve awˬliˇtawˇhkawˇ teˇ hpaˍ hta‸ maˇ na yuˬ ve pa taw yoˬ.

13Yuˇda‸ mvuhˇmiˬ hta‸ Heˍsaˍkiˆ uˉ peunˍ chehˇ ve 14 hkʼaw‸ teˇ hkʼaw‸ htaˇ, Aˍsuˇriˆ jawˇmawˇ Seˍnaˍ hkaˍriˆ lehˬ, Yuˇda‸ mvuhˇmiˬ ve ta‸ yehˬ teˇ hpaˍ hta‸ bawˆ yuˬ ve yoˬ.

14Oˇ htaˇ, Heˍsaˍkiˆ lehˬ Laˍhkiˇshaˆ venˇ hkʼaw chehˇ taˍ ve Seˍnaˍhkaˍriˆ hta‸ li‸ chi hkʼe bvuh‸ piˇ ve yoˬ. Ngaˬ lehˬ te ya‸ jaˇ peuˬ. Ngaˬ hui hta‸ taˇ ca bawˆ la-o. Nawˬ hpu hkʼaˬ ma lawˬ kʼo chi ma keu laˇ tuˬ yoˬ, teh‸ kʼoˆ piˇ ve yoˬ. Hkʼe te leh, Aˍsuˇriˆ jawˇmawˇ lehˬ, Heˍsaˍkiˆ hta‸ hpu shehˆ shehnˉ, leh shi shehˆ hinˉ keu tcuh ve yoˬ.

15Heˍsaˍkiˆ lehˬ bon yehˬ leh hawˉ yehˬ hkʼaw cawˬ ve hpu hkʼa peu-eˬ yuˬ keu piˇ ve yoˬ.

16Chi hkʼoˆ ka‸, yawˇ lehˬ bon yehˬ yehˬ miˉ hta‸ oˍ taˍ ve shi leh, yawˇ awˬ to yehˬ hkuiˉ daw hta‸ oˍ taˍ ve shi teˇ hpaˍ hta‸ kʼehˆ yuˬ leh, Seˍnaˍhkaˍriˆ hta‸ feu piˇ ve yoˬ.

17Aˍsuˇriˆ jawˇmawˇ lehˬ, Yeˍruˆsaˍlehnˍ venˇ hta‸ ca bawˆ yuˬ tcuh tuˬ, yawˇ ve ma‸ moˍ lonˉ teˇ moˍ hta‸ Laˍhkiˇshaˆ venˇ lo tu leh, Yeˍruˆsaˍlehnˍ venˇ lo kʼai tcuh ve yoˬ. Ma‸ moˍ lonˉ chi ve hta‸ yawˇ ve ma‸ poˍ lonˉ shehˆ gʼaˇ awˬ hoˉ te leh shiˍ kʼai tcuh ve yoˬ. Yawˇ hui Yeˍruˆsaˍlehnˍ venˇ lo gaˬ la htaˇ, hpa te chiˇ shehˍ hpaˇ hui kanˉ te chehˇ taˍ kuiˬ, iˉ kaˆ gʼuiˬ tuˇ paˇ lo hpoˆ chehˇ taˍ ve yoˬ.

18Oˇ ve hkʼaw‸ nawˉ, yawˇ hui Heˍsaˍkiˆ hta‸ kuˬ yuˬ ve yoˬ. Hkʼe te leh, Heˍsaˍkiˆ ve a ma‸ lonˉ, hawˉ yehˬ hkʼaw kanˉ hkʼa peu-eˬ nyi shehˍ hpaˇ Eˇlaˍkenˍ, hawˉ yehˬ hkʼaw ceˇ leˇ lonˉ Sheˍbaˍnaˍ leh Aˍsaˆ ve yaˇ, mawˇ ha‸ shaˉ shehˍ hpaˇ Yawˇaˍ, yawˇ hui shehˆ gʼaˇ tawˆ la leh, yawˇ hui hta‸ ca hpuˇ da‸ la ve yoˬ.

19Oˇ htaˇ, Aˍsuˇriˆ ma‸ poˍ lonˉ teˇ gʼaˇ yawˇ hui hta‸ chi hkʼe kʼoˆ piˇ ve yoˬ. Aˍsuˇriˆ jawˇmawˇ lonˉ lehˬ, aˬ hto‸ ma pa taw jawˇmawˇ Heˍsaˍkiˆ chi taw taw nyi ma uiˍ chehˇ ve hta‸ shiˍ gaˇ ve yoˬ.

20Chaw yaˇ yaw ve tawˇ lehˬ, ma‸ bawˆ kuiˬ lo aˬ hto‸ ma awˬ bon te laˇ gʼa tuˬ le. Nawˬ hui Aˍsuˇriˆ chaw hta‸ kʼaw‸ hpfuhˆ tuˬ a shu nawˬ hui hta‸ ga laˇ gʼa tuˬ ve le.

21Eˇjiˇtu‸ chaw hui nawˬ hui hta‸ ca ga la tuˬ ve hta‸ nawˬ hui dawˇ law chehˇ ve yoˬ. Ya‸ hkʼaˇ, yawˇ hui lehˬ lo ceh yuˬ te taˍ ve juˇ fuiˍ taˬ hkʼe ceh hpeh‸ leh, teˇ hkui tiˉ hkoˇ kʼai leh, nawˬ hui ve la‸ sheh hta‸ tcuhˍ laˇ tuˬ yoˬ. Eˇjiˇtu‸ jawˇmawˇ lehˬ, oˇ ve hta‸ shuˍ ve yoˬ.

22Maˇ heˆ kʼo, nawˬ hui lehˬ nawˬ hui ve Gʼuiˬsha hta‸ gʼaˇ va chehˇ ve yoˬ, teh‸ kʼoˆ tuˬ ve laˇ. Jawˇmawˇ Heˍsaˍkiˆ lehˬ, Gʼuiˬsha oˇ ve teˇ gʼaˇ ve tuˉ tanˇ kuiˬ leh shaˉ ho‸ teˇ hpaˍ hta‸ te luˬ te sheˆ piˇ chehˇ leh, Yuˇda‸ chaw hkʼa peu-eˬ hta‸ Yeˍruˆsaˍlehnˍ venˇ hkʼaw ceh tiˉ oˉ kʼoˍ gʼa ca pui la ve yoˬ, teh‸ kʼoˆ piˇ chehˇ ve maˇ heˆ laˇ.

23Nawˬ hui awˬ hkʼaw lo iˉ mvuhˇ ciˇ paˍ nyiˇ hinˉ gʼaˇ ca gʼa ve kʼo, ngaˬ nawˬ hui hta‸ iˉ mvuhˇ 2,000 hkeh pe‸ laˇ tuˬ, Aˍsuˇriˆ jawˇmawˇ lonˉ ve awˬ meh hkʼaw nawˬ hui hta‸ ka ti‸ te laˇ ve yoˬ.

24Nawˬ hui lehˬ, Aˍsuˇriˆ ma‸ poˍ ehˉ teˇ gʼaˇ hkʼe ceh ka‸ maˇ cheuˬ taˬ sheˍ. Hkʼe ka‸, Eˇjiˇtu‸ chaw nawˬ hui hta‸ iˉ mvuhˇ lawˬ teˇ hpaˍ piˇ laˇ tuˬ dawˇ law chehˇ ve yoˬ.

25Ngaˬ hkʼaˇ ngaˬ dawˇ tawˆ leh, nawˬ hui ve mvuhˇmiˬ hta‸ ca bawˆ la ve yoˬ, teh‸ nawˬ hui dawˇ ve laˇ. Nawˬ hui ve mvuhˇmiˬ hta‸ ca te luˬ piˇ tuˬ, Gʼuiˬsha yawˇ awˬ to ngaˬ hta‸ kʼoˆ laˇ taˍ ve yoˬ, teh‸ yawˇ hui hta‸ kʼoˆ piˇ ve yoˬ.

26Oˇ htaˇ Eˇlaˍkenˍ, Sheˍbaˍnaˍ leh Yawˇaˍ lehˬ, Ngaˬ hui hta‸ Aˍraˍmiˆ hkawˇ yaw laˇ-oˆ. Ngaˬ hui na gʼa chehˇ ve yoˬ. Ngaˬ hui hta‸ Heˍbrehˇ hkawˇ taˇ yaw laˇ. Awˬ lawn kʼo, lanˇ venˇ hkʼoˆ lo chehˇ taˍ ve chaw hui htawˇ na chehˇ ve yoˬ, teh‸ yawˇ hui hta‸ kʼoˆ piˇ ve yoˬ.

27Oˇ htaˇ, Aˍsuˇriˆ ma‸ poˍ lonˉ kʼaw‸ yaw hkʼaw‸ leh kʼoˆ ve, Aˍsuˇriˆ jawˇmawˇ lonˉ lehˬ, nawˬ hui teˇ hpaˍ leh nawˬ hui ve jawˇmawˇ hta‸ ceh tiˉ tawˇ ca yaw piˇ tuˬ, ngaˬ hta‸ peu laˇ ve yoˬ, teh‸ nawˬ hui dawˇ ve laˇ. Ngaˬ lehˬ, lanˇ venˇ hkʼoˆ lo mui chehˇ ve chaw hui hta‸ htawˇ tawˇ yaw piˇ chehˇ ve yoˬ. Awˬ lawn kʼo, yawˇ hui htawˇ nawˬ hui hkʼa shuˍ, a shu yawˇ ve hkʼehˇ hta‸ gʼa caˇ leh, a shu yawˇ ve tzuhˇ hta‸ gʼa dawˬ tuˬ yoˬ, teh‸ yawˇ hui hta‸ kʼoˆ piˇ ve yoˬ.

28Oˇ ve hkʼaw‸ nawˉ, Aˍsuˇriˆ ma‸ poˍ lonˉ tu la leh, Heˍbrehˇ hkawˇ yaw leh kʼoˆ ve, Aˍsuˇriˆ jawˇmawˇ lonˉ kʼoˆ laˇ chehˇ ve tawˇ hta‸ na sheˍ.

29Nawˬ hui jawˇmawˇ Heˍsaˍkiˆ heˍ yuˬ beˬ yuˬ ve hkawˇ maˇ gʼa na tuˬ, yawˇ nawˬ hui hta‸ shaˍ ti‸ pe‸ laˇ chehˇ ve yoˬ. Awˬ lawn kʼo, yawˇ nawˬ hui hta‸ ponˬ laˇ gʼa tuˬ ve maˇ heˆ.

30Gʼuiˬsha nawˬ hui hta‸ ponˬ laˇ leh, Aˍsuˇriˆ chaw nawˬ hui hta‸ maˇ gʼa te luˬ te sheˆ tuˬ, Gʼuiˬsha hta‸ gʼaˇ va-o, teh‸ yawˇ kʼoˆ maˍ laˇ chehˇ ve tawˇ hta‸ taˇ na.

31Nawˬ hui la‸ caˉ ya‸ leh venˇ hkʼaw tawˆ la tuˬ, Aˍsuˇriˆ jawˇmawˇ lonˉ nawˬ hui hta‸ tawˇ pe‸ laˇ chehˇ ve yoˬ. Oˇ hkʼe te ve kʼo, yawˇ nawˬ hui hta‸ mvuhˇmiˬ awˬ suhˉ teˇ peˆ hkʼaw lo kʼaw‸ chehˇ tcuh laˇ tuˬ yoˬ.

32Yawˇ oˇ hkʼe maˇ te laˇ sheˍ ve ceh ceh, nawˬ hui lehˬ a shu yawˇ ve a pehˉ meuˇ shiˍ, maˉ nawˆ shiˍ leh a shu yawˇ nanˬ bawˍ hkʼaw tawˆ ve iˉ kaˆ hta‸ gʼa dawˬ chehˇ tuˬ yoˬ. Nawˬ hui yawˇ kʼoˆ laˇ chehˇ ve hkʼe te ve kʼo, gʼa suh tuˬ ve maˇ heˆ. Gʼuiˬsha nawˬ hui hta‸ ponˬ laˇ tuˬ yoˬ, teh‸ Heˍsaˍkiˆ kʼoˆ maˍ laˇ chehˇ ve tawˇ hta‸ taˇ na.

33Awˬ nu ve chaw ceuˬ teˇ hpaˍ ve gʼuiˬsha lehˬ chaw ceuˬ oˇ ve teˇ hpaˍ hta‸ Aˍsuˇriˆ chaw hui ve la‸ sheh hkʼaw lo ponˬ piˇ gʼa ve cawˬ jaw laˇ.

34Haˍmaˆ venˇ leh Aˍpaˆ venˇ teˇ hpaˍ ve gʼuiˬsha chi beu‸ hkʼaˬ lo gaˬ peuˬ le. Sheˍhpaˍvenˍ, Heˍnaˆ leh Iˍvaˍ venˇ chi teˇ hpaˍ ve gʼuiˬsha chi beu‸ hkʼaˬ lo le. Saˍmaˍriˆ venˇ hta‸ chaw teˇ gʼaˇ gʼaˇ ponˬ piˇ tuˬ te gʼa-aw laˇ.

35Mvuhˇmiˬ chi teˇ hpaˍ ve gʼuiˬsha lehˬ, mvuhˇ yaˇ miˬ yaˇ teˇ hpaˍ hta‸ Aˍsuˇriˆ chaw hui ve la‸ sheh hkʼaw hkʼaˬ htaˆ ponˬ piˇ gʼa jaw le. Aˬ hto‸ ma pa taw, nawˬ hui ka‸ Gʼuiˬsha lehˬ Yeˍruˆsaˍlehnˍ venˇ hta‸ ponˬ laˇ gʼa tuˬ yoˬ teh‸ ca dawˇ guiˇ chehˇ ve le, teh‸ yawˇ hui hta‸ kʼoˆ piˇ ve yoˬ.

36Yuˇda‸ chaw teˇ hpaˍ lehˬ, jawˇmawˇ Heˍsaˍkiˆ kʼoˆ piˇ taˍ ve hkʼe ta‸ iˉ gawˬ lehˍ chehˇ taˍ ve yoˬ. Yawˇ hui te‸ chiˉ maˇ kʼaw‸ yaw hkʼaw‸ piˇ.

37Oˇ htaˇ Eˇlaˍkenˍ, Sheˍbaˍnaˍ leh Yawˇaˍ hui a shu yawˇ ve veu‸ kʼaˇ hta‸ tzuh‸ suhˍ leh, Aˍsuˇriˆ ma‸ poˍ lonˉ kʼoˆ laˇ ve tawˇ oˇ ve teˇ hpaˍ, jawˇmawˇ Heˍsaˍkiˆ hta‸ ca kʼaw‸ hto maˍ piˇ ve yoˬ.

← Chapter 17 Jump to: Chapter 19 →